我所尊敬數念的師友
Goá só͘ chun-kèng siàu-liām ê su-iú
文獻資訊
| 項目 | 資料 |
|---|---|
| 作者 | 王占魁 Ông Chiàm-khoe |
| 卷期 | 台灣教會公報 |
| 卷期 | 第933號 |
| 日期 | 1964/5 |
| 頁數 | 10-11 |
白話字（原文數位化）
GOÁ SÓ͘ CHUN-KÈNG SIÀU-LIĀM Ê SU-IÚ
LŪN N̂G SŪ-BĒNG BO̍K-SU
Ông Chiàm-khoe
1964.05.01 933 kî P.10-11
iáu khah uí-tāi ê, sī Tân Kam-bo̍k Sian-siⁿ ê lāu-bú, bô hoan-gêng tō-lí; ū chi̍t ê bo̍k-su tuì Chheng-chuí lâi Lêng-chíⁿ chhē Tân Sian-siⁿ, in-uī ta̍uh-ta̍uh khì, in lāu-bú chiū chhut-thâu koáⁿ hit ê bo̍k-su. N̂g Bo̍k-su khì, tāi-seng iā bô hoan-gêng, nā-sī N̂g Bo̍k-su ēng thiàⁿ-sim, ēng un-jiû ê kám-hoà, Sèng-lêng ê kang-chok, kàu āu-lâi kèng-jiân lāu-lâng iā ji̍p sìm niá soé-lé; koh hoaⁿ-hí hiàn i só͘ thiàⁿ ê chhian-kim kè hō͘ N̂g Tong-bat choè bo̍k-su-niû.
6. iáu chi̍t hāng m̄-thang bô kóng ê, chiū-sī i ê káng-tō.
I m̄-sī siūⁿ tio̍h chiū kóng, i sī ū hē-thóng, ū chó͘-chit, ū tia̍t-sū, ū bo̍k-tek, ū hun toāⁿ, ū hun hāng, chit lé-pài soà thong-ti āu lé-pài ê Sèng-keng kap khài-iàu, uī-tio̍h án-ni, ū sím-mi̍h bo̍k-su hut-jiân lâi, i bô suî-piān chhiáⁿ i káng-tō, m̄-sī kiaⁿ lâng ê ám-bō-ké piàⁿ tó chhân-chháu tàⁿ; sī in-uī hit ê sui-jiân sī bo̍k-su, i kap lán ê hoē-iú bô kám-chêng, koh i bô pī-pān sim. N̂g Bo̍k-su ū kî-tó, ū pī-pān sim-sîn, ū jia̍t-jia̍t ê sim-chêng beh hoat chhut, m̄ ài phah-tn̄g kó͘-pìⁿ (m̄-sī kóng kó͘ ê kó͘-pìⁿ, sī jia̍t-chêng m̄ ài chi̍h-chām). Só͘-í i ê káng-tō kù-kù ū la̍t. Chiàu lâng kan-chèng, i ê soat-kàu hō͘ lâng chhiò ê chin chió, hō͘ lâng iu-būn choē-koà lâi lâu ba̍k-sái sī siông-siông ū.
Lūn N̂g Bo̍k-su i ê uí-tāi; chóng kóng i ū chin suí ê sìn-gióng hiat-thóng; koh ū sù-bēng kám. Bô sù-bēng kám oē pìⁿ-choè chit-gia̍p, choè pn̄g-oáⁿ. Ū sù-bēng kám khoàⁿ thoân-tō sī hêng-chè; bô thoân ū chai-ē.
Choè-āu kiat-bé lâi kóng, i sī tiong-sêng ê Sîn-po̍k:
A. Tuì Siōng-tè sī chīn-sim, chīn sèng, chīn la̍t, chīn ì thiàⁿ Siōng-tè. In-uī i ū hiàn it-seng, choân châi-sán kap sìⁿ-miā, kap chú-lú, 37 nî kú sí chiong.
B. Tuì lâng: Ū thiàⁿ lâng chhin-chhiūⁿ ka-kī. Tuì Ông Kim-lêng, Chiā Liân-tuì lâi khoàⁿ chhut. Hoē-iú jia̍t-sim sī choè i ê hoaⁿ-hí kap khoài-lo̍k; hoē-iú léng-sim hoān-choē sī i ê siong-sim iu-būn.
C. Tuì kang-chok: Kî-tó kap gián-kiù Sèng-keng sī i kang-chok ê le̍k-liōng, i ê pī-pān tō-lí, m̄-sī chhin-chhiūⁿ kā lâng choè kè-chng, sī chhin-chhiūⁿ Sîn-lông i pún-sin chhì io̍h, chiong i ê thé-giām lâi kà lâng àn-choáⁿ si̍t-giām, á-sī kóng, “Khí thiàⁿ chiah chai khí thiàⁿ lâng.” M̄-sī khioh lâng ê oē, á-sī keng-giām, sī i pún-sin ê thé-giām. Chhin-chhiūⁿ Pó-lô kóng, “Goá bat tuì Chú siū, lâi thoân-siū hō͘ lín ê.”
D. I sī giâm-keh ê sîn po̍k: Tī Tiong-o̍h choè sià-kam ê sî, ha̍k-seng chhiok-hō i choè àu-bīn ê, ū iáⁿ i hán-tit chhiò, m̄-sī chhin-chhiūⁿ hit hō chhiò-bīn hó͘ ê, i ê giâm-keh, m̄-sī kek phài--ê; sī tuì i ê lêng-thêng giâm-ui só͘ hoat-chhut ê, chhin-chhiūⁿ Mô͘-se tuì Se-nái soaⁿ lêng-siu lo̍h soaⁿ ê khoán (Chhut 34: 29－35). M̄-chai ê lâng kiò sī i ê bīn joā-nih ok-hêng leh. Sī pháiⁿ gín-ná khoàⁿ tio̍h oē lún--i, nā-sī chèng-gī ê lâng oē chun-kèng i.
I sī chi̍t ê thih-bīn bû su chèng-gī ê sîn po̍k, chhin-chhiūⁿ kiâⁿ soé-lé Iok-hān, sui-jiân sī Hi-lu̍t ông choè m̄-tio̍h i iā hó-táⁿ chek-pī i (Thài 14: 4). Koh chhin-chhiūⁿ Pó-lô, sui-jiân sī toā sù-tô͘ Pí-tek ū m̄-tio̍h, i tng-bīn chek-pī i (Ka 2: 11). uī-tio̍h án-ni, i ū choē-choē pêng-iú, iā ū choē-choē tuì-te̍k, tì-kàu ū siong i ê náu-kun. I sui-jiân sí, iáu teh kóng-oē.
E. I sī lêng khut lêng sin ê sîn-po̍k: I oē choè Tiong-hoē ê gī-tiúⁿ, iā oē choè Tāi-hoē ê gī-tiúⁿ; i oē choè toā siâⁿ-chhī ê bo̍k-su, iā oē tī sió kàu-hoē choè thoân-tō; i oē thang tī tāi-chiòng toā soat-kàu, iā oē tuì chi̍t ê lāu-lâng bián-lē i lâi sìn Chú. Tuì chin-lí, tuì si̍p-jī-kè ê hok-im sī put khut put láu ê cheng-sîn, tuì ok sè-le̍k sī lêng khut lêng sin. M̄-sī jīn su, sī chiām thè, kiàn ki jî chok.
F. ēng ké-chí lâi chèng-bêng chhiū: Chú Iâ-so͘ kóng, Hó chhiū boē kiat pháiⁿ ké-chí, pháiⁿ chhiū iā boē-oē kiat hó ké-chí. Taⁿ N̂g Bo̍k-su ê ké-chí, tuì i tī Tiong-o̍h, Tang-mn̂g, Toā-tō͘, Chiong-hoà I-koán kap Oân-lîm lóng thang khoàⁿ-kìⁿ. Koh-khah hián-bêng ê, chiū-sī tuì i ê hiat-me̍h, tuì i ê sìn-gióng ka-têng só͘ kiat ê ké-chí siāng chún. I ū hiàn i ê toā kiáⁿ, chiū-sī thâu chuí ê ké-chí N̂g Chiong-hui Phok-sū, tī Ji̍t-pún Tè Tāi pit-gia̍p, khì Eng-kok 11 nî kú chhim-chō, tò-lâi choè Sîn-ha̍k-īⁿ ĪN-tiúⁿ, keng-kè 16 nî kú, ha̍k-seng ke cha̍p-sì pē choē, sian-siⁿ ê tīn-iông, su-chu toā thê-ko. Tuì kiàn-siat: Pún-īⁿ ū kái-tiok, cheng-tiok tô͘-su-sek tī lâu-téng, lâu-ē choè pān-kong-thiaⁿ; iā khí īⁿ-lāi ê lé-pài-tn̂g, saⁿ lâu ê ha̍k-seng siok-sià, kàu-siū ê siok-sià 7 chō, gián-kiù-īⁿ; tông-hông tāi-hā, chhióng-li̍p tī Sin-lâu lāi. Chài khai-pān ê sî sī 17 ê ha̍k-seng, hiān-sî ū 239 miâ. iā goā kàu-phài ū 29 ê ha̍k-seng lâi kià tha̍k, iā ū tuì Tiâu-sián, Lâm-iûⁿ Hoâ-kiâu ê ha̍k-seng lâi teh tha̍k, chiâⁿ-choè Tang Lâm A khu toā ê Sîn-ha̍k-īⁿ, che chū-jiân sī Thiⁿ-pē ê un-sù, tit-tio̍h goā oān, iā sī N̂g ĪN-tiúⁿ ê ló͘-le̍k. Koh i ê sam lâm Bêng-hui Sian-siⁿ bat tī Chiong-hoà Ki-tok-kàu pīⁿ-īⁿ choè lāi-kho chú-jīm, iā ū khì Eng-kok chhim-chō. I ê toā cha-bó͘-kiáⁿ choè soan-kàu-su Chiong Khé-an Bo̍k-su-niû, tī hái-goā teh ho̍k-bū. I ê sì lâm An-hui kap sam lú Siok-huī iā ū tī Sîn-ha̍k-īⁿ pit-gia̍p, tī kàu-hoē teh choè kang. An-hui kap Têng-hui tī Sîn-ha̍k-īⁿ ê tô͘-su-sek teh ho̍k-bū. Tē jī chhian-kim Siok-chin sī kàu-oân; Keng-hui sī tiong-ha̍k ê kàu-oân, Sèng-hui tha̍k Gê-kho, Siok-sūn tī Sîn-ha̍k-īⁿ teh tha̍k. án-ni, 6 lâm 4 lú, chèng-bêng N̂g Bo̍k-su tuì sìn-sim kap ko chhim ê lêng-thêng só͘ sán-seng ê.
G. Chin hó ê goān-bōng: I ū saⁿ ê goān-bōng: Tē it, sī Phîⁿ-ô͘ thoân-tō. Tē jī, sī Koân-soaⁿ ê thoân-tō; chit nn̄g hāng téng-bīn í-keng kóng liáu; iáu ū chi̍t hāng, chiū sī pêng-sìn-tô͘ tio̍h siū Sîn-ha̍k kàu-ióng, JĪ-cha̍p goā nî chêng tī Oân-lîm ê sî, tiāⁿ-tiāⁿ liām: i ê kiáⁿ Chiong-hui nā tò-lâi tek-khek beh kā i kóng, tio̍h kàu-io̍k pêng-sìn-tô͘ hō͘ in ū Sîn-ha̍k tì-sek thang pang-chān kàu-hoē. Kin-á-ji̍t kó-jiân ū si̍t-hiān lah. Hiān-sî ū Sîn-ha̍k pún-kho, iā ū gián-kiù kho, ū Ki-tok-kàu kàu-io̍k kho, ū im-ga̍k kho, iā ū pó-io̍k kho; tī kok kàu-hoē teh kà iù-tī-oân, Chú-ji̍t-o̍h, sèng-koa-tuī, khîm-chhiú, T. K. C., Y. M. C. A., pò͘-tō-tuī, Lú Soan-tō-hoē, kok pō͘ oa̍h-tāng, hun kang ha̍p-chok, bo̍k-su choè chí-hui.
Í-āu Sîn-ha̍k-īⁿ pit-gia̍p bô pó-chiòng ê kàu-hoē thang bo̍k-hoē, só͘-í in thang tī kàu-hoē tng tiúⁿ-ló, chip-sū lâi pang-chān kàu-hoē ê bo̍k-su, iā tī muí chit-he̍k lâi thoân-tō, chiū-sī sìn-tô͘ lóng sī thoân-tō. I m̄-sī chhin-chhiūⁿ Thian-chú-kàu, gû bîn chèng-chhek, kan-ta thoân-kàu ê bat chiū hó, kî-û ê sìn-tô͘ lóng m̄-bián bat, chí-ū thiaⁿ in ê sîn-hū ê chí-tō chiū kàu-gia̍h. I ài chèng sìn-tô͘ lóng ū sîn-ha̍k ê tì-sek, iā suî-lâng lóng tit-tio̍h Sîn ê khé-sī, che taⁿ tuì i ê kiáⁿ ê Sîn-ha̍k kàu-io̍k ū chi̍t-pō͘ chi̍t-pō͘ teh si̍t-hiān, khó-kiàn i ê sian kiàn chi bêng, ū joā-ni̍h chún-khak.
(Oân).
漢羅（Ùi原文改寫）
我所尊敬數念Ê師友
論黃俟命牧師
王占魁
1964.05.01 933 期 P.10-11
猶較偉大ê，是Tân Kam-bo̍k先生ê老母，無歡迎道理；有一個牧師對清水來龍井揣Tân先生，因為ta̍uh-ta̍uh去，in老母就出頭趕彼个牧師。N̂g牧師去，代先也無歡迎，若是N̂g牧師用疼心，用溫柔ê感化，聖靈ê工作，到後來竟然老人也入信領洗禮；閣歡喜獻伊所疼ê千金嫁予N̂g Tong-bat做牧師娘。
6.猶一項毋通無講ê，就是伊ê講道。
伊毋是想著就講：伊是有系統，有組織，有秩序，有目的，有分段，有分項，這禮拜紲通知後禮拜ê聖經佮概要，為著按呢，有甚物牧師忽然來，伊無隨便請伊講道，毋是驚人ê ám-bō粿拚倒仙草擔；是因為彼个雖然是牧師，伊佮咱ê會友無感情，閣伊無備辦心。N̂g牧師有祈禱，有備辦心神，有熱熱ê心情beh發出，毋愛拍斷鼓柄(毋是講鼓ê鼓柄，是熱情毋愛折chām)。所以伊ê講道句句有力。照人干證，伊ê說教予人笑ê真少，予人憂悶罪過來流目屎是常常有。
論N̂g牧師伊ê偉大；總講伊有真媠ê信仰血統；閣有使命感。無使命感oē變做職業，做飯碗。有使命感看傳道是還債；無傳有災禍。
最後結尾來講：伊是忠誠ê神僕:
A.對上帝是盡心，盡性，盡力，盡意疼上帝。因為伊有獻一生，全財產佮性命，佮子女，37年久始終。
B.對人：有疼人親像家己。對Ông Kim-lêng， Chiā Liân-tuì來看出。會友熱心是做伊ê歡喜佮快樂；會友冷心犯罪是伊ê傷心憂悶。
C.對工作：祈禱佮研究聖經是伊工作ê力量，伊ê備辦道理，毋是親像kā人做嫁妝，是親像神農伊本身試藥，將伊ê體驗來教人按怎實驗，á是講：「齒疼chiah知齒疼人。」毋是抾人ê話，á是經驗，是伊本身ê體驗。親像保羅講：「我捌對主受，來傳授予恁ê。」
D.伊是嚴格ê神僕:佇中學做舍監ê時，學生綽號伊做漚面ê，有影伊罕得笑，毋是親像hit號笑面虎ê，伊ê嚴格，毋是激派--ê；是對伊ê靈程嚴威所發出ê，親像摩西對西奈山靈修落山ê款(出34: 29－35)。毋知ê人叫是伊ê面偌呢惡形leh。是歹囡仔看著oē忍--伊，若是正義ê人會尊敬伊。
伊是一个鐵面無私正義ê神僕，親像行洗禮約翰，雖然是希律王做毋著伊也好膽責備伊(太 14: 4)。閣親像保羅，雖然是大使徒彼得有毋著，伊當面責備伊(加 2: 11)。為著按呢，伊有濟濟朋友，也有濟濟對敵，致到有傷伊ê腦筋。伊雖然死，猶teh講話。
E.伊是能屈能伸ê神僕：伊會做中會ê議長，也會做大會ê議長；伊會做大城市ê牧師，也會佇小教會做傳道；伊會通佇大眾大說教，也會對一个老人勉勵伊來信主。對真理，對十字架ê福音是不屈不撓ê精神，對惡勢力是能屈能伸。毋是認輸，是暫退，見機而作。
F.用果子來證明樹：主耶穌講：好樹袂結歹果子，歹樹也袂oē結好果子。Taⁿ N̂g牧師ê果子，對伊佇中學，東門，大肚，彰化醫館佮員林攏通看見。閣較顯明ê，就是對伊ê血脈，對伊ê信仰家庭所結ê果子上準。伊有獻伊ê大囝，就是頭水ê果子N̂g Chiong-hui博士，佇日本帝大畢業，去英國11年久深造， 倒來做神學院院長，經過16年久，學生加十四倍濟，先生ê陣容， 師資大提高。對建設：本院有改築， 增築圖書室佇樓頂，樓下做辦公廳；也起院內ê禮拜堂，三樓ê學生宿舍，教授ê宿舍7座，研究院；堂皇大廈，敞立佇新樓內。再開辦ê時是17个學生，現時有239名。也外教派有29个學生來寄讀，也有對朝鮮， 南洋華僑ê學生來teh讀，成做東南亞區大ê神學院，這自然是天父ê恩賜，得著外援，也是N̂g院長ê努力。閣伊ê三男Bêng-hui先生捌佇彰化基督教病院做內科主任，也有去英國深造。伊ê大查某囝做宣教師Chiong Khé-an牧師娘，佇海外teh服務。伊ê四男An-hui佮三女Siok-huī也有佇神學院畢業，佇教會teh做工。An-hui佮Têng-hui佇神學院ê圖書室teh服務。第二千金Siok-chin是教員； Keng-hui是中學ê教員，Sèng-hui讀牙科，Siok-sūn佇神學院teh讀。按呢，6男4女，證明N̂g牧師對信心佮高深ê靈程所產生ê。
G.真好ê願望：伊有三個願望：第一，是澎湖傳道。第二，是高山ê傳道；這兩項頂面已經講了；猶有一項，就是平信徒著受神學教養，二十外年前佇員林ê時，定定念：伊ê囝Chiong-hui若倒來tek-khek beh kā伊講，著教育平信徒予in有神學智識通幫贊教會。今仔日果然有實現lah。現時有神學本科，也有研究科，有基督教教育科，有音樂科，也有保育科；佇各教會teh教幼稚園，主日學，聖歌隊，琴手，T.K.C.，Y.M.C.A.，佈道隊， 女宣道會，各部活動，分工合作，牧師做指揮。
以後神學院畢業無保障ê教會通牧會，所以in通佇教會當長老，執事來幫贊教會ê牧師，也佇每職域來傳道，就是信徒攏是傳道。伊毋是親像天主教，愚民政策，干但傳教ê捌就好，其餘ê信徒攏毋免捌，只有聽in ê神父ê指導就夠額。伊愛眾信徒攏有神學ê智識，也隨人攏得著神ê啟示，這taⁿ對伊ê囝ê神學教育有一步一步teh實現，可見伊ê先見之明之明，有偌呢準確。
（完）