我所尊敬數念的師友
Goá só͘ chun-kèng siàu-liām ê su-iú
文獻資訊
| 項目 | 資料 |
|---|---|
| 作者 | 王占魁 Ông Chiàm-khoe |
| 卷期 | 台灣教會公報 |
| 卷期 | 第932號 |
| 日期 | 1964/4 |
| 頁數 | 9-10 |
白話字（原文數位化）
GOÁ SÓ͘ CHUN-KÈNG SIÀU-LIĀM Ê SU-IÚ
LŪN N̂G SŪ-BĒNG BO̍K-SU (III)
Ông Chiàm-khoe
1964.04.15. 932 kî P.9-10
4. I teh thiàⁿ lâng sī chin chīn-sim.
Tī Kiâm-chuí ê sî; i chut-gia̍p bô kú i kám-kak, lán bô chhāi kong-má pâi, bô sio̍k-hoà ê choè kī, hō͘ bī-sìn-chiá chin hiâm, i chiū siat chi̍t pún Ka-têng cho̍k-phó͘, chún-pī hó-sè, kiò chi̍t ê hoē-iú Ông Kim-lêng siat-hoat khì ìn, chhut-pán lâi boē, lī-ek kim, nn̄g koah choè kàu-hoē ê lī-ek. Khì ìn ê sî, phian-chhip-chiá chiong Ng(sic) Sū-bēng oāⁿ i Ông Kim-lêng, lī-ek i beh to̍k tit, chi̍t-ē kā kóng, i soà siū-khì, N̂g Bo̍k-su m̄ kā chhui-siau, soà boē boē tit khì, tūn-pún, siū khì N̂g Bo̍k-su, beh kò N̂g Sū-bēng Bo̍k-su, bo̍k-su ti̍t-ti̍t niū i, beh kap i hô, i ná hó khoán, choè Mô͘-kuí ti̍t-thang ēng bú-le̍k, si̍t-chāi sī hō͘ tuì thiⁿ-ti̍t(sic) beh phoah lo̍h-lâi, āu-lâi N̂g Bo̍k-su oāⁿ lâi Tâi-lâm, m̄-sī kiaⁿ i lâi cháu. Chóng-sī i uī-tio̍h chit lâng ê lêng-hûn chin koan-sim, koh tuì Tâi-lâm tiâu-kang lâi Kiâm-chuí kàu-hoē chio Tióng-chip-hoē tī pài-tn̂g uī-tio̍h Ông Kim-lêng te̍k-pia̍t khui kî-tó-hoē, kiû Siōng-tè kám-hoà chit lâng, lâi kiù i thoat-lī Sat-tàn ê chhiú, bô iông-ún i choè kàu-hoē ê hāi-thâng. Thêng bô kuí-ji̍t, Ông Kim-lêng ê hū-jîn-lâng kàu Tiong-o̍h, lâi kìⁿ N̂g Bo̍k-su, lâu ba̍k-sái kóng, Ông Kim-lêng chā-ji̍t lâi ji̍p īⁿ, chá-khí sí-khì. N̂g Bo̍k-su bô hoaⁿ-hí tuì-te̍k siū khiàn-chek teh sí, ū khó-lîn chit lâng poē kàu lâi sí, kóng tō-lí an-uì i ê hū-jîn-lâng, kiò i tio̍h jia̍t-sim tè Chú, m̄-thang o̍h tiōng-hu ê pháiⁿ bô͘-iūⁿ, iā kap i khì pīⁿ-īⁿ lâi lâu khó-lîn ê ba̍k-sái. Lí khoàⁿ i ê thiàⁿ hoē-iú kàu án-ni.
Tī Oân-lîm ê sî ū chi̍t ê hoē-iú, Chiā Liân-tuì, khì Pe̍h-hô ê lāi-soaⁿ Sam-chàn-kiā chèng keng-chio, keng-kè 8 ge̍h ji̍t āu, tú-tio̍h toā hong-thai, i suî-sî siá phoe hō͘ Liân-tuì hoē-iú kóng, chit hō hong-thai keng-chio ún-tàng tó-liáu-liáu lah, lí ê bí-niû iā phah-sǹg chia̍h liáu lah, nā án-ni, goá siūⁿ lí m̄-thang hâ pak-tó͘ lâi koh thèng-hāu keng-chio hō͘ lí chia̍h, chhiáⁿ lí koáⁿ-kín choân-ke lâi Oân-lîm, Siōng-tè oē thoè lí khui-lō͘, kóng lí sī chhin-chhiūⁿ taⁿ chuí-kng chiūⁿ soaⁿ í-keng phoà-khì lah, lí m̄-thang khoàⁿ m̄ phoà, tio̍h khoàⁿ-phoà. Liân-tuì hiaⁿ-tī siū bián-lē chiū lo̍h soaⁿ, m̄-nā bô bí, iā bô chîⁿ thang chia̍h io̍h-á, N̂g Bo̍k-su siat-hoat bí hō͘ i chia̍h, chhiáⁿ Pò͘ Tāi-bo̍k I-seng kā i-pīⁿ, toà tī Pò͘ Sian-siⁿ ê chhù.
Oân-lîm ê Toā-chhoan ū hoē-iú Loā Sam-phêng phoà-pīⁿ ài beh niá soé-lé, N̂g Bo̍k-su pún-sin boē tit khì, chiū kín chhiáⁿ Chháu-tun Keh Tiâu-sêng Bo̍k-su lâi uī chit ê hiaⁿ-tī te̍k-pia̍t khì i ê chhù kā i kiâⁿ soé-lé. I nā khoàⁿ tio̍h hiaⁿ-tī jia̍t-sim thiàⁿ Siōng-tè, kiâⁿ jîn-ài, i chiū hoaⁿ-hí khoài-lo̍k; nā khoàⁿ hiaⁿ-tī hoān-choē, i chiū siong-sim iu-būn.
5. Uí-tāi thang chun-kèng ê chong-kàu-ka.
Lūn i thang chun-kèng ê iu-tiám sī chin choē, put-kò i lī-khui Tâi-lâm Tang-mn̂g kàu-hoē, kàu tī bî-jio̍k sió-sió ê Toā-tō͘ kàu-hoē, chit tiám sī chin uí-tāi.
Ū chi̍t ji̍t, chi̍t ê toā bo̍k-su (i ka-kī khoàⁿ choè ê) beh oāⁿ uī, kā goá kóng i bô uī thang khì, in-uī bô pí chia khah toā ê kàu-hoē, khah toā ê to͘-chhī. Lán phó͘-thong teh oāⁿ uī sī kiò-choè êng-chhian, êng-choán, ko-seng, nā m̄-sī lut-chit, á-sī siū khiàn-chek, lóng sī ko-seng. N̂g Bo̍k-su i tuì Tang-mn̂g kàu-hoē hoaⁿ-hí lī-khui; kó͘-chá kóng, it Hú, Jī Lo̍k, saⁿ Báng-kah. Ì-sù sī Tâi-oân tē it lāu-jia̍t ê, chiū-sī Tâi-lâm hú, tē jī sī Lo̍k-káng, tē saⁿ sī Báng-kah, beh lī-khui chiah lāu-jia̍t, chiah toā ê kàu-hoē bô chi̍t-sut-á m̄-kam; i àn-choáⁿ tio̍h lī-khui Tang-mn̂g kàu-hoē: Goân-in sī thiàⁿ kàu-hoē, pó-hō͘ hok-im. Tng-sî N̂g Bo̍k-su choè Tióng-êng Tiong-o̍h chong-kàu chú-jīm kiam sià-kam, Tang-mn̂g kàu-hoē boán-tiûⁿ it-tì ài chhiáⁿ i choè in ê bo̍k-su, Tiong-o̍h iáu-bē ū hō͘-kè-chiá, só͘-í kiam-jīm, in-uī kàu-hoē toā, i kám-kak chek-jīm tāng, só͘-í i thê-gī, tio̍h koh chhiáⁿ chi̍t miâ lâi pang-bâng, lâng iā sī N̂g Bo̍k-su thê-miâ, tāi-ke ha̍p-ì lâi chìn-hêng. Phoaⁿ Bo̍k-su chiū-jīm-sek ê sî, ū lâng chiok-sû kóng, ヒトリハサビシイ、サンニンハヤカマシイ、フタリハチョードイイ。 (Chi̍t lâng bô phoāⁿ, saⁿ lâng siuⁿ kiáu-jiáu, Nn̄g lâng siāng tú-hó). Bô phah-sǹg, bô kú lâng choē, ì-kiàn chiū choē, tì-kàu chhin-chhiūⁿ kó͘-chá Ko-lîm-to kàu-hoē, ū ê kóng sio̍k Pó-lô, ū ê kóng sio̍k A-pho-lô, ū ê kóng sio̍k Ki-hoat. Tang-mn̂g hoē-iú iā án-ni ū ê chhin Phoaⁿ ê, ū ê khah chhin N̂g ê. N̂g Bo̍k-su khoàⁿ tio̍h chit hō chêng-hêng sim chin kan-khó͘; in-uī Phoaⁿ Bo̍k-su sī siáⁿ lâng, N̂g Bo̍k-su sī siáⁿ lâng, kiám m̄-sī lín ê chhe-ēng, Siōng-tè ê kong-po̍k mah, ta̍k lâng chiàu i só͘ choè ê kang siū chhì-giām, nā siū sio khì chiū kui tī khang-khang nā sio boē khì chiū ū pò-siúⁿ. Só͘-í N̂g Sū-bēng kiám thoân i ka-kī mah, kiám m̄-sī ēng si̍p-jī-kè thoân hō͘ lín lâi sìn, lâi kui tī Pē, Kiáⁿ, Sèng Sîn mah. uī-tio̍h m̄-kam hō͘ hoē-iú sim-koaⁿ put an, sió pō͘-hūn sī uī su-chêng teh hun-tóng, it-poaⁿ ê hoē-iú put-ti só͘ chiông. N̂g Bo̍k-su ài pó-hō͘ hok-im, só͘-í i siūⁿ tio̍h lī-khui hn̄g-hn̄g, bô hō͘ in khoàⁿ tio̍h i ê bīn, bô thiaⁿ tio̍h i ê siaⁿ, chiām-chiām oē leng(sic) khì, chiong in kui tī Ki-tok, che sī i ê chûn sim. I khì Toā-tō͘ m̄-sī lâng phài i khì, sī i ka-kī kéng--ê. In-uī Toā-tō͘ kàu-hoē, tuì Phoaⁿ A-hé Thoân-tō-su tī hia tú-tio̍h lô-so ê pīⁿ kè-sin, lâng khah m̄ ài chiap i ê uī, koh Toā-tō͘ iā chin bô la̍t thang hi-bōng thoân-tō, sī ēng in ê tiúⁿ-ló Tân Lâi-choân chiām-tō͘ teh î-chhî. N̂g Bo̍k-su khoàⁿ chit só͘-chāi tú ha̍h i ê sim-koaⁿ. It, bô lâng ài toà ê; Jī, bô khuì-la̍t ê kàu-hoē; Saⁿ, lī Tâi-lâm thài hn̄g, beh lâi sio chhē khah bô hiah khoài; nā m̄-chai ê lâng teh siūⁿ sī khiàn-chek, pián khì hn̄g-hn̄g ê chháu-toē. M̄-nā lī-khui toā siâⁿ-chhī khì chháu-toē. Tē jī tiám, sî bo̍k-su ê chit-uī, kam-sim lo̍k-ì toà hiuⁿ-ē choè thoân-tō, sui-jiân ū pa̍t uī beh chhiáⁿ, i goān léng-chēng chi̍t-ē. Chhin-chhiūⁿ Pó-lô khì A-lat-pek ê khòng-iá.
Koh kóng kàu Toā-tō͘ bô kú tú-tio̍h tiong-pō͘ toā toē-chín, Toā-tō͘ pài-tn̂g chiâⁿ guî-hiám ka-ok, boē tit lé-pài, sió-chhù boē toà tit, tio̍h tī tiâⁿ-ni̍h tah liâu-á lâi toà, hit sî nā tú-tio̍h bô lí-kái ê hū-jîn-lâng ún-tàng oē kā liām kóng, “Mî-chioh-phē m̄ khùn, lâi che ô-khak-kiā chhia-pha-lin.” Kai-chài i ê bo̍k-su-niû bô tē jī kù, sui-jiân ū kiaⁿ-tio̍h, chóng-sī kám-siā Siōng-tè, hō͘ in bô sit-lo̍h sìⁿ-miā, iā bô sit-lo̍h mi̍h-kiāⁿ, iā lia̍h choè ū hūn tio̍h hoē-iú chit hō chín-chai guî-hiám choè keng-giām, ta̍k hō͘ khì thàm-hóng, thoè hoē-iú siat-hoat chhiáⁿ i-seng kap chia̍h, toà ê sū, hoē-iú iā oē mn̄g pài-tn̂g àn-cháiⁿ-iūⁿ? Sió-chhù ū pháiⁿ bô? Tāi-ke sio an-uì, tī tiâⁿ-ni̍h iā toà 2, 3 ge̍h ji̍t. Chhin-chhiūⁿ Mô͘-se lia̍h ū hūn Ki-tok ê lêng-jio̍k, pí Ai-ki̍p ê châi-pó khah kuì-khì.
āu-lâi Lêng-chíⁿ Tân Kam-bo̍k I-seng ū chhng-khò͘ tú bô toé mi̍h, chiū piàⁿ chheng-khì, chi̍t-poàⁿ choè lé-pài-thiaⁿ, chi̍t poàⁿ choè N̂g Bo̍k-su ê khiā ke, chiū soá khì Lêng-chíⁿ, m̄-bián koh toà thiⁿ-lō͘, tī chia khai-sí i uí-tāi ê kang-chok. Tuì Tân Kam-bo̍k Sian-siⁿ in hu-hū, sûn-sûn siān-tō hō͘ in ji̍p sìn, koh tuì chheng-liân ê poê-iúⁿ, choè suí ê ké-chí, chiū-sī Tân Kam-kó Sian-siⁿ, hit sî i chiah 19 hè, i kiàn-chèng kóng, I hit nî só͘ siū ê ìn-siōng, sī choè i 20 goā nî choè toā ê khuì-la̍t, khì kàu Ji̍t-pún tha̍k Gê-kho ê sî, iā khì tha̍k iā-kan Sîn-ha̍k. Tò-lâi khai-gia̍p, kà Chú-ji̍t-o̍h, tng tiúⁿ-ló, choè Chheng-liân-chhù-tiúⁿ, hit ê oa̍h-tāng ê le̍k-liōng chū-jiân sī tiàm tī Ki-tok, nā-sī hit ê chiap-chhiok sī tuì N̂g Bo̍k-su. Só͘-í goá kap goá ê hiaⁿ, hiaⁿ-só, saⁿ lâng tâng sî siū soé-lé.
(Thāi-sio̍k)
漢羅（Ùi原文改寫）
我所尊敬數念Ê師友
論黃俟命牧師(III)
王占魁
1964.04.15. 932 期 P.9-10
4.伊teh疼人是真盡心。
佇鹹水ê時；伊卒業無久伊感覺，咱無chhāi公媽牌，無俗化ê做忌，予未信者真嫌，伊就設一本家庭族譜，準備好勢，叫一个會友王 Kim-lêng設法去印，出版來賣，利益金， 兩割做教會ê利益。去印ê時，編輯者將Ng Sū-bēng換伊王 Kim-lêng，利益伊beh獨得，一下kā講：伊紲受氣，黃牧師毋kā推銷，紲賣袂得去，tūn本，受氣黃牧師，beh告黃俟命牧師，牧師直直讓伊， beh佮伊和，伊ná好款，做魔鬼直通用武力，實在是雨對天直beh潑落來，後來黃牧師換來台南，毋是驚伊來走。總是伊為著這人ê靈魂真關心，閣對台南tiâu-kang來鹹水教會招長執會佇拜堂為著王 Kim-lêng特別開祈禱會，求上帝感化這人，來救伊脫離撒旦ê手，無容允伊做教會ê害蟲。停無幾日，王 Kim-lêng ê婦jîn人到中學，來見黃牧師，流目屎講：王 Kim-lêng昨日來入院，早起死去。黃牧師無歡喜對敵受譴責teh死，有可憐這人背教來死，講道理安慰伊ê婦jîn人，叫伊著熱心綴主，毋通學丈夫ê歹模樣，也kap伊去病院來流可憐ê目屎。你看伊ê疼會友到按呢。
佇員林ê時有一個會友，Chiā Liân-tuì，去白河ê內山Sam-chàn-kiā種芎蕉，經過8月日後，拄著大風颱，伊隨時寫批予Liân-tuì會友講：這號風颱芎蕉穩當倒了了lah，你ê米糧也拍算食了lah，若按呢，我想你毋通縖腹肚來閣聽候芎蕉予你食，請你趕緊全家來員林，上帝oē替你開路，講你是親像擔水缸上山已經破去lah，你毋通看毋破，著看破。lLiân-tuì兄弟受勉勵就落山，毋若無米，也無錢通食藥仔，黃牧師設法米予伊食，請Pò͘ Tāi-bo̍k醫生kā醫病，蹛佇Pò͘先生ê厝。
員林ê大村有會友Loā Sam-phêng破病愛beh領洗禮，黃牧師本身袂得去，就緊請草屯Keh Tiâu-sêng牧師來為這个兄弟特別去伊ê厝kā伊行洗禮。伊若看著兄弟熱心疼上帝，行仁愛，伊就歡喜快樂；若看兄弟犯罪，伊就傷心憂悶。
5.偉大通尊敬ê宗教家。
論伊通尊敬ê優點是真濟，不過伊離開台南東門教會，到佇微弱小小ê大肚教會，這點是真偉大。
有一日，一个大牧師(伊家己看做ê) beh換位， kā我講伊無位通去，因為無比遮較大ê教會，較大ê都市。咱普通teh換位是叫做榮遷， 榮轉，高升，若毋是黜職，á是受譴責，攏是高升。黃牧師伊對東門教會歡喜離開；古早講：一府，二鹿，三艋舺。意思是台灣第一鬧熱ê，就是台南府，第二是鹿港，第三是艋舺， beh離開chiah鬧熱，chiah大ê教會無一屑á毋甘；伊按怎著離開東門教會：原因是疼教會，保護福音。當時黃牧師做長榮中學宗教主任兼舍監，東門教會滿場一致愛請伊做in ê牧師，中學猶未有後繼者，所以兼任，因為教會大，伊感覺責任重，所以伊提議，著閣請一名來幫忙，人也是黃牧師提名，大家合意來進行。 Phoaⁿ牧師就任式ê時，有人祝辭講：ヒトリハサビシイ、サンニンハヤカマシイ、フタリハチョードイイ。(一人無伴，三人siuⁿ攪擾，兩人上拄好)。無拍算，無久人濟，意見就濟，致到親像古早哥林多教會，有ê講屬保羅，有ê講屬亞波羅，有ê講屬磯法。東門會友也按呢有ê親Phoaⁿ ê，有ê較親黃 ê。 黃牧師看著這號情形心真艱苦；因為Phoaⁿ牧師是啥人，黃牧師是啥人，kiám毋是恁ê差用， 上帝 ê公僕mah，逐人照伊所做ê工受試驗，若受燒去就歸佇空空若燒袂去就有報賞。所以黃俟命kiám傳伊家己mah， kiám毋是用十字架傳予恁來信，來歸佇父，囝，聖神mah。為著毋甘予會友心肝不安，小部份是為私情teh分黨，一般ê會友不知所從。黃牧師愛保護福音，所以伊想著離開遠遠，無予in看著伊ê面，無聽著伊ê聲，漸漸oē冷去，將in歸佇基督，這是伊ê存心。伊去大肚毋是人派伊去，是伊家己揀--ê。因為大肚教會，對Phoaⁿ A-hé傳道師佇遐拄著囉嗦ê病過身，人較毋愛接伊ê位，閣大肚也真無力通希望傳道，是用in ê長老Tân Lâi-choân暫度teh維持。黃牧師看這所在拄合伊ê心肝。一，無人愛蹛ê； 二，無氣力ê教會；三，離台南thài遠， beh來相揣較無hiah快；若毋知ê人teh想是譴責，貶去遠遠ê草地。毋若離開大城市去草地。第二點，辭牧師ê職位，甘心樂意蹛鄉下做傳道，雖然有別位beh請，伊願冷靜一下。親像保羅去阿拉伯ê曠野。
閣講到大肚無久拄著中部大地震，大肚拜堂成危險家屋，袂得禮拜，小厝袂蹛得，著佇埕裡搭寮仔來蹛，hit時若拄著無理解ê婦jîn人穩當oē kā念講：「棉chioh被毋睏，來這蚵殼崎車抛lin。」佳哉伊ê牧師娘無第二句，雖然有驚著，總是感謝上帝，予in無失落性命，也無失落物件，也掠做有份著會友這號震災危險做經驗，逐戶去探訪，替會友設法請醫生佮食，蹛ê事，會友也會問拜堂按怎樣？小厝有歹無？大家相安慰，佇埕裡也蹛2， 3月日。親像摩西掠有份基督ê凌辱，比埃及ê財寶較貴氣。
後來龍井Tân Kam-bo̍k醫生有倉庫拄無貯物，就拚清氣，一半做禮拜廳，一半做黃牧師ê徛家，就徙去龍井，毋免閣蹛天露，佇遮開始伊偉大ê工作。對Tân Kam-bo̍k先生in夫婦，循循善導予in入信，閣對青年ê培養，做媠ê果子，就是Tân Kam-kó先生，hit時伊chiah 19歲，伊見證講，伊hit年所受ê 印象，是做伊20外年最大ê氣力，去到日本讀牙科ê時，也去讀夜間神學。倒來開業，教主日學，當長老，做青年處長，彼个活動ê力量自然是踮佇基督，若是彼个接觸是對黃牧師。所以我佮我ê兄，兄嫂，三人同時受洗禮。
(待續)