地動ê消息

Toē-tāng ê siau-sit

文獻資訊

項目	資料
作者	姚啟耀 iâu Khé-iāu
卷期	台灣教會公報
卷期	第929號
日期	1964/3
頁數	14-15

白話字（原文數位化）

TOĒ-TĀNG Ê SIAU-SIT

iâu Khé-iāu

1964.03.01 929 kî  P.14-15

Chú lāi kèng-ài ê bo̍k-tióng, hiaⁿ-chí pêng-an.  Kám-siā Chú ê thiàⁿ-thàng, tī chín-chai tiong pó-hō͘ lín tāi-ke pêng-an.

Taⁿ lán chai chit pang chit ê chhim-tiōng ê chín-chai piàn-choè Ka Lâm it-tài chi̍t ia̍h chhiⁿ-chhám ê le̍k-sú.  Tī chín-chai āu, sún-hāi khah khin ê só͘-chāi, tit-tio̍h chèng-hú kap kok hong-bīn ê pang-chān, chiām-chiām hoê-ho̍k chèng-siông ê seng-oa̍h, hō͘ lán chi̍t-ē khoàⁿ, kám-kak chhin-chhiūⁿ khó phàⁿ ê chai-lān kap khó͘-thàng í-keng lī-khui lán chin hn̄g ê khoán lah.  Chóng-sī sū-si̍t kiám sī án-ni?  Sèng-keng kā lán kóng, Lín beh thiaⁿ-kìⁿ kau-chiàn kap kau-chiàn ê hong-siaⁿ, chóng-sī m̄-bián kiaⁿ, chiah ê sū tek-khak ū , chóng-sī boa̍t-kî iáu-bē kàu,……peh-sìⁿ beh kong-kek peh-sìⁿ, kok beh kong-kek kok; choē-choē só͘-chāi beh ū ki-hng, toē-tāng,……che put-kò sī khó͘-thàng ê khí-thâu (Thài 24: 6-8).

Chhin-ài ê hiaⁿ-chí, tī hiān-kim ê sè-tāi bô lâng káⁿ kóng, khó͘-thàng ê ji̍t-chí í-keng kè-khì liáu lah! lán tha̍k tio̍h Chú Iâ-so͘ só͘ kóng chiah ê oē chiū chai.  Chai-lān khó͘-thàng ê ji̍t-chí taⁿ chiām-chiām teh pek-kūn lah.  Tuì tī Sèng-keng ê oē kap chiaⁿ-ge̍h cha̍p-poeh Ka Lâm toē-hng só͘ hoat-seng ê toā chín-chai, hō͘ lán liân-sióng kàu boa̍t-ji̍t ê pek-kūn kap hit ê khó-phàⁿ.

Chit ê toā chín-chai tu̍t-jiân ê hoat-seng, hō͘ lán put-tek-put tio̍h siông-siông kéng-séng, sî-sî chún-pī ka-kī siū-tiàu kìⁿ Chú ê ji̍t.

Hoê-sióng chiaⁿ-ge̍h cha̍p-poeh ji̍t ê iā-mńg, tāi-ke ê-hng-tǹg tú-hó chia̍h-pá, choē-choē ka-têng ê chú-hū, siu-si̍p toh-téng ê oáⁿ-tī, tī chàu-kha teh choè in chi̍t ji̍t choè-āu ê kang-chok, ū ê kong-bū-oân teh siūⁿ beh lī-iōng khin-sang ê chiu-boa̍t lâi choè ka-kī ê sū, kiám-chhái ū ê tâng-kang, chi̍p-tiong in ê choân cheng-sîn teh chún-pī lé-pài-ji̍t ê káng-tō; goán tú beh chún-pī Sèng-koa-tuī ê liān-si̍p, tú-tú tī chit ê sî, hut-jiân-kan chi̍t tīn toā ê toē-tāng, tiān-hé choân-sit, ji̍t-kong-teng lo̍h-toē hún-chhuì, tī o͘-àm tiong, chi̍t sî pe-soa cháu chio̍h, phoà hiā moá toē, khó-phàⁿ hiong-pō ê kū-chín iáu put-toān lâi si̍p, sì-uî chhiⁿ-chhám ai-khàu ê siaⁿ tâng-sî hoat-khí.  Ka Lâm toē-hng ê kū-chín chai-hāi tuì án-ni chiū hoat-seng lah.  Chit pang Ka Lâm toē-khu hoat-seng liáu khong-chêng jîn-miā, châi-sán chhám-tiōng ê sún-sit.

Goán ê kàu-hoē pún-lâi chiū-sī soaⁿ-kan, phian-phiah jio̍k-sió ê kàu-hoē, chit pang tī kū-chai tiong, siū-tio̍h chhám-tiōng ê sún-hāi, goán ê kàu-hoē sī tiàm tī siū chai giâm-tiōng ê Gio̍k-chíⁿ hiong, (chá-sî ê Ta-pa-nî).  Kun-kù Séng chèng-hú Siā-hoē chhù tiāu-cha ê pò-kò tiong kóng, Gio̍k-chíⁿ hiong ê siū chai chêng-hêng, bô khah su Pe̍h-hô, Tong-san ê só͘-chāi.  Kun-kù Tiong-hoâ ji̍t-pò, chiaⁿ-ge̍h 25 ji̍t ê tē jī piàn khak-si̍t ê chai-chêng thóng-kè kóng, Gio̍k-chíⁿ choân hiong hō͘-kháu chóng-sò͘ ū 2899 hō͘ tiong, lô-chai-hō͘(sic)（罹災戶）ū 2225 hō͘, chiàm choân hiong hō͘-sò͘ ê 76%.  Choân hiong sún-sit iok 5000 bān í-siōng, hiong lāi tò-chhù phoà-hoāi put kham, pi-chhám ê kéng-siōng, chhám put-jím tó͘, hiong tiong put-tàn kó͘-lāu kán-lō͘（古老簡陋）ê pâng-ok tó-hoāi, chiū liân chng-chō ê sin-ok, sīm-chì ū ê thih-kun chuí-nî ê kiàn-tiok-bu̍t iā lân-bián tú-tio̍h tó-hoāi ê ūn-miā, chāi hiong-tiong sò͘-lâi siū chheng-choè guî-ngô͘ kian-kò͘ ê tāi-hā, ê koān Gī-tiúⁿ Liāu Khiân-tēng Sian-siⁿ ê kong-koán, Hiong-kong-só͘, Lông-gia̍p ha̍k-hāu, Chho͘-kip tiong-ha̍k, Kok-bîn ha̍k-hāu, í-ki̍p kî-thaⁿ choē-choē ko-lâu tāi-hā lóng pī chín-huí piàn-choè ko͘-khong guî-lâu, chin sī hō͘ lâng khoàⁿ liáu tio̍h kiaⁿ.  Choân-hiong tó-hoāi ê ka-ok, chhiûⁿ-piah tò-chhù to ū.

Chú Iâ-so͘ kóng, tī boa̍t-ji̍t ê sî, sè-kài ū kau-chiàn, sìn-tô͘ siū-hāi, put-hoat ke-thiⁿ, thiàⁿ-sim kiám-chió……(Thài 24:6-12).

Che sī boa̍t-ji̍t lâi-lîm ê tiāu-thâu, koh chiah ê tāi-chì iā sī lán siông-siông khoàⁿ tio̍h ê sū-si̍t.  Chóng-sī kám-siā Chú ê un-tián, tī chit pang ê toā toē-tāng, lán Lâm Tiong I-liâu-thoân Lâu Suī-jîn Bo̍k-su, N̂g Eńg-chhiong Pō͘-tiúⁿ, kap kî-thaⁿ ê i-hō͘ jîn-oân, kap Keh Tong-hui Bo̍k-su, Sîn-ha̍k-īⁿ ê Kàu-siū Lâu Hoâ-gī Bo̍k-su, Sîn-ha̍k-īⁿ ê tông-o̍h, kap Lâm Tiong Lú Soan Pō͘-tiúⁿ Hâu Khu Chhái-hûn Lú-sū, í-ki̍p Lú Soan kok-uī pō͘-oân, li̍p-khek kàu chai-khu, si-hêng gī-chín, hun-hoat si̍t-bu̍t, koan-chō͘ hō͘ chai-khu ê lān-bîn, in chit ê só͘ choè ū hō͘ chiah ê ki-hân kau-pek ê chai-bîn tī chhám-thòng tiong thé-giām tio̍h Siōng-tè ê chû-ài kap tông-tō tiong un-loán ê thiàⁿ-chêng.

Goán tī chín-chai tiong ū siū-tio̍h chin toā ê chai-hāi, chóng-sī goá siong-sìn tī lán Tiong-hoē lāi chai-khu 18 keng siū chai ê kàu-hoē tiong, ún-tàng ū lâng pí goán khah song-tiōng(sic), goán tek-khak tuì hiah ê tú-tio̍h lô-lān(sic) ê tông-tō piáu chhim-khek ê ai-tō, koh-khah ǹg-bāng Chú ê an-uì kap in ê uî-cho̍k saⁿ-kap tī-teh.

Kok toē kàu-hoē ê bo̍k-tióng kap hiaⁿ-chí, nā ū lâng hoaⁿ-hí pang-chān goán, chiū put-lūn hiān-khoán, i-bu̍t, put-lūn to-koáⁿ, chhiáⁿ sù kau Tâi-lâm Tiong-hoē sū-bū-só͘ kàn-sū劉瑞仁牧師 臺南市門路260號，臺南中會事務所.

Tâi-lâm koān Gio̍k-chíⁿ hiong,

Hong-lí kàu-hoē: iâu Khé-iāu.

漢羅（Ùi原文改寫）

地動Ê消息

姚啟耀

1964.03.01 929 期 P.14-15

主內敬愛ê牧長，兄姊平安。感謝主ê疼痛，佇震災中保護恁大家平安。

Taⁿ咱知這pang這个深重e震災變做嘉南一帶一頁悽慘ê歷史。佇震災後，損害較輕ê所在，得著政府佮各方面ê幫贊，漸漸回復正常ê生活，予咱一下看，感覺親像可怕ê災難佮苦痛已經離開咱真遠ê款lah.總是事實kiám是按呢？聖經kā咱講：恁beh聽見交戰佮交戰ê風聲，總是毋免驚，chiah-ê事的確有，總是末期猶未到，……百姓beh攻擊百姓，國beh攻擊國;濟濟所在beh有飢荒，地動，……這不過是苦痛ê起頭(太 24: 6—8)。

親愛ê兄姊，佇現今ê世代無人敢講：苦痛ê日子已經過去了lah!咱讀著主耶穌所講chiah-ê話就知。災難苦痛ê日子taⁿ漸漸teh逼近lah.對佇聖經ê話kap正月十八嘉南地方所發生ê大震災，予咱聯想到末日ê逼近kap彼个可怕。

這个大震災突然ê發生，予咱不得不著常常警醒，時時準備家己受召見主ê日。

回想正月十八日ê夜晚，大家下昏頓拄好食飽，濟濟家庭ê主婦，收拾桌頂ê碗箸，佇灶跤teh做in一日最後ê工作，有ê公務員teh想beh利用輕鬆ê周末來做家己ê事，kiám-chhái有ê同工，集中in ê全精神teh準備禮拜日ê講道;阮拄beh準備聖歌隊ê練習，拄拄佇這个時，忽然間一陣大ê地動，電火全熄，日光燈落地粉碎，佇烏暗中，一時飛沙走石，破瓦滿地，可怕兇暴ê巨震猶不斷來襲，四圍悽慘哀哭ê聲同時發起。嘉南地方ê巨震災害對按呢就發生lah.這pang嘉南地區發生了空前人命，財產慘重ê損失。

阮ê教會本來就是山間，偏僻弱小ê教會，這pang佇巨震中，受著慘重ê損害，阮ê教會是踮佇受知嚴重ê 玉井鄉， (早時ê Ta-pa-nî)。根據省政府社會處調查ê報告中講：玉井鄉ê受災情形，無較輸白河，東山ê所在。根據中華日報，正月25日ê第二遍確實ê災情統計講：玉井鄉全鄉戶口總數有2899戶中，罹災戶有2225戶，佔全鄉戶數ê 76%。

全鄉損失約5000萬以上，鄉內到處破壞不堪，悲慘ê景象，慘不忍睹， 鄉中不但古老簡陋ê房屋倒壞，就連磚造ê新屋，甚至有ê鐵筋水泥ê建築物也難免拄著倒壞ê運命，在鄉中素來受稱做巍峨堅固ê大廈，縣議長廖乾定先生ê公館， 鄉公所，農業學校，初級中學，國民學校，以及其他濟濟高樓大廈攏被震毀變做高空危樓，真是予人看了著驚。全鄉倒壞ê家屋，牆壁到處都有。

主耶穌講：佇末日ê時，世界有交戰，信徒受害，不法加添，疼心減少……(太 24:6-12)。

這是末日來臨ê兆頭，閣chiah-ê代誌也是咱常常看著ê事實。總是感謝主ê恩典，佇這pang ê大地動，咱南中醫療團劉瑞仁牧師，黃永昌部長，佮其他ê醫護人員，佮郭東輝牧師，神學院ê教授劉華義牧師，神學院ê同學，佮南中女宣部長侯邱彩雲女士，以及女宣各位部員，立刻到災區，施行義診，分發食物，捐助予災區ê難民， in這个所做有予chiah-ê飢寒交迫ê災民佇慘痛中體驗著上帝ê慈愛佮同道中溫暖ê疼情。

阮佇震災中有受著真大ê災害，總是我相信佇咱中會內災區18間受災ê教會中，穩當有人比阮較傷重，阮的確對hiah-ê拄著罹難ê同道表深刻ê哀悼，閣較向望主ê安慰佮in ê遺族saⁿ-kap佇teh.

各地教會ê牧長佮兄姊，若有人歡喜幫贊阮，就不論現款，衣物，不論多寡，請賜交台南中會事務所幹事劉瑞仁牧師 臺南市門路260號，臺南中會事務所。

台南縣玉井鄉，

豐里教會：姚啟耀