Má-in醫生傳(9)

Má-in I-seng-toān(9)

文獻資訊

項目	資料
作者	周淑慧 Chiu Siok-huī
卷期	台灣教會公報
卷期	第928號
日期	1964/2
頁數	8-9

白話字（原文數位化）

MÁ-IN I-SENG-TOĀN（9） (Duncan Main of China)

P. J. Doherty chok

Chiu Siok-huī e̍k

1964.02.15  928 kî  P.8-9

Sī-ui ê hêng-lia̍t, sian-siⁿ, ha̍k-hāu só͘ ū ê lâng, lóng kia̍h kî hoah kóng:  “Táⁿ-tó tè-kok chú-gī,” “Koáⁿ-tio̍k goā-kok lâng.  Lí bo̍h-tit chhut-khì koe-lō͘, kiaⁿ-liáu in sit-lo̍h lí-sèng.”

Chóng-sī tng Má I-seng thiaⁿ-kì”(sic) Kóng-ha̍k-īⁿ ê Eng-kok kok-kî hō͘ lâng luī lo̍h-lâi, oāⁿ Tiong-kok ê kok-kî, i chiū ti̍t-chiap kiâⁿ chhut-khì mn̄g ha̍k-seng.

I khoàⁿ-kìⁿ Te̍k-jîn tī hia teh an-tēng chi̍t kûn lâng.  chóng-sī tng in khoàⁿ-kìⁿ i-seng lâi, it-hoat háng-hoah tiô-thiàu, chhiú ia̍t kok-kî kap kun-kî kóng, “ Kiù Tiong-kok!  Goán boē thang lâu tī chia hō͘ lâng kiò tè-kok chú-gī ê cháu-kàu (sic).  Goán iau-kiû chū-iû.”

Má-in I-seng kia̍h chhiú, sui-jiân i oé-soè, iáu-kú ū bēng-lēng ê koân-ui.  Tiap-á-kú hiah ê heng-hùn ê ha̍k-seng na-chēng(sic) lo̍h-lâi.  I kā in kóng, “Lín sī teh hoat khin tō͘ ê jia̍t-kông.  Lán lâi tiám tām-po̍h kng.  Tàu-tí lín sī ài sím-mi̍h?”

In ná háng-hoah koh ia̍t kî, “In ài chham-ka iû-hêng.  In tek-khak ài lī-khui ha̍k-īⁿ.  Pa̍t lâng èng-ún beh hō͘ in khah koân ê sin-suí.  Tiong-kok kàu-io̍k uí-oân iok-sok beh i-kho ê chèng-kiāⁿ hō͘ in.  In tek-khak tio̍h pang-chān Tiong-kok.

Lâu Te̍k-jîn soè-siaⁿ tuì Má-in I-seng kóng, “In lóng chhiong-moá ài-kok-sim.  Sui-jiân goá bô kap in tông-ì, iáu-kú goá oē thang liáu-kái in.”

Má-in I-seng ê ba̍k-chiu tńg chi̍t-ē.  Tuì thâu chi̍t hoê ê kek-bēng kàu taⁿ, í-keng keng-kè 14 nî, taⁿ Ko̍k-ke sī chi̍t ê kàu-siū lah.  I khó-lêng ū liáu-kái, nā-sī Má-in I-seng pún-sin chit sî pí i khah liáu-kái.  I kap i ê ha̍k-seng piān-lūn, i ài in oē kì-tit “Siōng-tè kok pí Tiong-kok khah chá chûn-chāi.”  Choè-āu i kóng, “Goá boē thang tī chit ê thoân-thê iông-ún pâi Ki-tok-kàu kap pâi-goā ūn-tōng.  siat-sú lín tek-khak beh khì, chiū khì, chóng-sī……goá sī ǹg-bāng lín bô lī-khui.”

Sui-jiân sī án-ni, iā iáu-kú kiâⁿ chhut-khì.  Chhun chi̍t nn̄g ê i-seng, chin iu-siong ê khoán, saⁿ tuì khoàⁿ, che sī chin sit-bāng ê an-chēng.

Lâu Te̍k-jîn kóng, “Goá siūⁿ in oē koh ài tńg-lâi.”

Má-in I-seng ìn kóng, “Goá iā án-ni siong-sìn, koh siong-sìn thâu-chêng ū koh-khah hó ê sū.

Chiah ê kian-kò͘ ê pêng-iú, hō͘-siong bî-chhiò chi̍t-ē!

Tē 8 chiuⁿ

Má-in I-seng, i-seng-niû:  Kiám ū iáⁿ lín teh-beh lī-khui?”  Chi̍t uī chá-chêng tī pīⁿ-īⁿ ê hū-jîn hoān-chiá, i ê kha pa̍k kah soè-soè, khiā tī kheh-thiaⁿ án-ni teh mn̄g.

I ìn kóng, “Sī lah!”  45 nî kú tī Hâng-chiu, in taⁿ chún-pī beh tńg-khì So͘-kek-lân.  chin-choē Tiong-kok pêng-iú tī chit kuí ji̍t lio̍k-sio̍k lâi thàm-hóng, in chha-put-to boē thang siong-sìn, chha-put-to m̄-káⁿ sêng-jīn chit ê sū-si̍t.

“Lín beh chē toā chûn tńg-khì hit ê goā uī ê ông-kok mah?”

“Pí toā ūn-hô só͘ ū ê chûn khah toā chiah ê.”

Lāu hū-jîn-lâng kóng, “Nā-sī án-ni lín su-iàu toà chin-choē ê chia̍h-mi̍h,” i koāⁿ chi̍t nâ koe-nn̄g kóng, “Chiah ê, iā chng lo̍h-khì, bián-tit lín tī lō͘-tiong iau-gō.”

I bô kū-choa̍t, chhiò-chhiò, ba̍k-chiu kâm ba̍k-sái kā i siu khí-lâi.  I ê lé-bu̍t lóng sī 1925 nî 12 ge̍h só͘ sàng lâi ê lé-bu̍t ê tāi-piáu-tek ê chi̍t hāng.  Má-in hu-hū kám-kak lī-pia̍t ê kan-khó͘.  I choè-āu khì hóng-būn ta̍k keng pīⁿ-īⁿ, lâm--ê, lú--ê, jî-tông téng pīⁿ-īⁿ.  I-seng choè-āu lâu hō͘ in ê oē iā sī kóng, “Kè-sio̍k pó-chhî chhiò-iông.”

Jiân-āu in kiâⁿ kàu Se-ô͘ piⁿ ê sió-soaⁿ, chiū-sī keh-lī ê pīⁿ-īⁿ, sin-sian khong-khì ê liâu-ióng-īⁿ kap chēng-ióng-īⁿ.

Tuì hia khoàⁿ lo̍h Se-ô͘, tī n̂g-kim sek ê ji̍t-kng hoán-chiò ê ē-bīn, hián-tit te̍k-pia̍t bí-lē.  Má-in I-seng niû siū kám-tōng kóng, “Goá oē éng-oán kì-tit chit ê kong-kéng koh ài i.”

I ê tiōng-hu ê ba̍k-chiu koh chi̍t pái thêng tī hiah ê pīⁿ-īⁿ jiân-āu i-i put-sià（依依不捨）lâi lī-khui hit ê só͘-chāi.

Tī in lī-khui Hâng-chiu beh khì Siōng-hái hit ji̍t, só͘ ū ê chit-oân chhut-lâi hoan-sàng kóng, pêng-an.  Ū pīⁿ-pâng ê i-seng Lí Sian-siⁿ choè thâu chhoā io̍h-kio̍k ê lâng, koh ū hō͘-sū, kang-ia̍h.  I-ha̍k-īⁿ ê chit-oân kap ha̍k-seng iā lóng chū-chi̍p chē chhia kàu chhia-chām.  Ū chin-choē kî, iā ū ga̍k-tuī toâⁿ Tiong-kok tiāu ê lī-pia̍t-koa kap lāng-sai, chit ê khái-soân ê hêng-lia̍t keng-kè pí Má-in I-seng lâi ê sî khah khoah ê Hâng-chiu-koe.  Chin-choē tiàm-bīn taⁿ ū an-siat po-lê-thang, lō͘-piⁿ iû-goân ū khit-chia̍h teh âu-kiò.

In kuí-nā pái âu-kiò kóng, “Má I-seng” liân i iā bat i ê miâ.

Ki-tok ê kok-bîn í-keng cheng-ka kàu án-ni.  Tng in keng-kè chá-chêng chí-ū sī kán-tan ê chhù ê soan-kàu-su toē-khu ê sî, Má-in I-seng án-ni kóng: “Taⁿ hiān-chāi iā pau-koat boē sǹg-tit ê Tiong-kok lâng ka-têng lah.”

In kàu chhia-chām lah!  Ū chin-choē ha̍k-seng, soan-kàu-su, pêng-iú, koaⁿ-oân tī chhia-chām beh hoan-sàng in.

Lô tân lah, hé-chhia teh-beh chhut-hoat.  Hiah ê khah sio-bat ê tông-liâu Lâu Te̍k-jîn kap kî-û ê lâng, oá-kūn tī Má-in I-seng thàm-thâu chhut-lâi ê thang-á-piⁿ.  Chit ê nî khin ê i-liâu soan-kàu-su Sú Tek-tun I-seng (Dr. Starton) kap i ak-chhiú kóng, “Goán sit-lo̍h lí chin m̄-kam.”

Má-in I-seng chhiú kí hiah ê Tiong-kok ê i-kho ha̍k-seng, koh hoāⁿ chhiú tī Ko̍k-ke ê keng-thâu kóng, “ Lán teh hō͘ Tiong-kok ê, sī pí lán pún-sin khah ū kè-ta̍t ê mi̍h.”

Chiah ê nî khin ê i-seng, io̍h-che-su, hō͘-sū oē tī “Hâng-chiu pó-chhî chit ê thoân-thóng, lí kap in lóng thang khoàⁿ-tio̍h sū-sū kè-sio̍k chìn-hêng.”

(Thāi-sio̍k)

漢羅（Ùi原文改寫）

MÁ-IN醫生傳 (9) (Duncan Main of China)

P.J. Doherty作

Chiu Siok-huī譯

1964.02.15  928期  P.8-9

示威ê行列，先生，學校所有ê人，攏舉旗喝講：「打倒帝國主義，」「趕逐外國人。你莫得出去街路，驚了in失落理性。」

總是當Má醫生聽見講學院ê英國國旗予人縋落來，換中國ê國旗，伊就直接行出去問學生。

伊看見Te̍k-jîn佇遐teh安定一群人。總是當in看見醫生來，益發喊喝tiô跳，手ia̍t國旗佮軍旗講：「救中國！阮袂通留佇遮予人叫帝國主義ê走狗。阮要求自由。」

Má-in醫生舉手，雖然伊矮細，猶過有命令ê權威。Tiap仔久hiah-ê興奮ê學生安靜落來。伊kā in講：「恁是teh發輕度ê熱狂。咱來點淡薄光。到底恁是愛甚乜？」

In ná喊喝閣ia̍t 旗， 「In愛參加遊行。 In的確愛離開學院。別人應允beh予in較懸ê薪水。中國教育委員約束beh醫科ê證件予in。  In的確著幫贊中國。

Lâu Te̍k-jîn細聲對Má-in醫生講：「In攏充滿愛國心。雖然我無佮in同意，猶過我會通了解in。」

Má-in醫生ê目睭轉一下。對頭一回ê革命到taⁿ，已經經過14年，taⁿ Ko̍k-ke是一个教授lah。伊可能有了解，若是Má-in醫生本身這時比伊較了解。伊佮伊ê學生辯論，伊愛in會記得「上帝國比中國較早存在。」最後伊講：「我袂通佇這个團體容允排基督教佮排外運動。設使恁的確beh去，就去，總是……我是向望恁無離開。」

雖然是按呢，也猶過行出去。賰一兩个醫生，真憂傷ê款，相對看，這是真失望ê安靜。

Lâu Te̍k-jîn講：「我想in oē閣愛轉來。」

Má-in醫生應講，「我也按呢相信，閣相信頭前有閣較好ê su。

Chiah-ê堅固ê朋友，互相微笑一下！

第8章

Má-in醫生，醫生娘：Kiám有影恁teh-beh離開？」一位早前佇病院ê婦人患者，伊ê跤縛kah細細，徛佇客廳按呢teh問。

伊應講，「是lah!」45年久佇杭州，in taⁿ準備beh轉去蘇格籣。真濟中國朋友佇這幾日陸續來探訪，in差不多袂通相信，差不多毋敢承認這个事實。

「恁beh坐大船轉去彼个外位ê王國mah？」

「比大運河所有ê船較大隻ê。」

老婦jîn人講：「若是按呢恁需要帶真濟ê食物，」伊捾一籃雞蛋講：「Chiah-ê，也chng落去，免得恁佇路中枵餓。」

伊無拒絕，笑笑，目睭k含目屎kā伊收起來。伊ê禮物攏是1925年12月所送來ê禮物ê代表的ê一項。Má-in夫婦感覺離別ê艱苦。伊最後去訪問逐間病院，男--ê， 女--ê，兒童等病院。醫生最後留予in ê話也是講：「繼續保持笑容。」

然後in行到西湖邊ê小山，就是隔離ê病院，新鮮空氣ê療養院佮靜養院。

對遐看落西湖，佇黃金色ê日光反照ê下面，顯得特別美麗。Má-in醫生娘受感動講：「我會永遠記得這个光景閣愛伊。」

伊ê丈夫ê目睭閣一擺停佇hiah-ê病院然後依依不捨來離開彼个所在。

佇in離開杭州beh去上海hit日，所有ê職員出來歡送講：平安。有病房ê醫生李先生做頭chhoā藥局ê人，閣有護士，工役。醫學院ê職員佮學生也攏聚集坐車到車站。有真濟旗，也有樂隊彈中國調ê離別歌佮弄獅，這个凱旋ê行列經過比Má-in醫生來ê時較闊ê杭州街。真濟店面taⁿ有安設玻璃窗，路邊猶原有乞食teh喉叫。

In幾若擺喉叫講：「Má醫生」連伊也捌伊ê名。

基督ê國民已經增加到按呢。當in經過早前只有是簡單ê厝ê宣教師地區ê時，Má-in醫生按呢講：”Taⁿ現在也包括袂算得ê中國人家庭lah。」

In到車站lah!有真濟學生，宣教師，朋友，官員佇車站beh歡送in。

鑼tân lah，火車teh-beh出發。hiah-ê較相捌ê同僚Lâu Te̍k-jîn佮其餘ê人，倚近佇Má-in醫生探頭出來ê窗仔邊。這个年輕ê醫療宣教師Sú Tek-tun醫生(Dr。 Starton)佮伊握手講：「阮失落你真毋甘。」

Má-in醫生手指hiah-ê中國ê醫科學生，閣按手佇Ko̍k-ke ê肩頭講：「咱teh予中國ê，是比咱本身較有價值ê物。」

Chiah-ê年輕ê醫生，藥劑師，護士oē佇「杭州保持這个傳統，你佮in攏通看著事事繼續進行。」

(待續)