Má-in醫生傳(8)
Má-in I-seng-toān(8)
文獻資訊
| 項目 | 資料 |
|---|---|
| 作者 | 周淑慧 Chiu Siok-huī |
| 卷期 | 台灣教會公報 |
| 卷期 | 第927號 |
| 日期 | 1964/2 |
| 頁數 | 7 |
白話字（原文數位化）
MÁ-IN I-SENG-TOĀN（8） (Duncan Main of China)
P. J. Doherty chok
Chiu Siok-huī e̍k
1964.02.01 927 kî P.7
Chin-choē kè-khì ê ha̍k-seng tò-tńg lâi chham-ka chhin-bo̍k-hoē, ū ê tuì chin hn̄g ê só͘-chāi, á-sī tuì Siōng-hái tńg-lâi ê. Só͘ sàng lâi kok-iūⁿ ê lé-mi̍h sī ēng tāi-piáu-tek ê Tiong-kok pó-khì, chhin-chhiūⁿ tê-ô͘, bí-lē ê hoe-kan, poâⁿ-á, hî-kî(sic) ê koàn-bo̍k, tô͘-uī, tiû-toān, iûⁿ-phê, chióng-kî téng. Chi̍t ê í-keng tī chhī-lāi choè i-seng ê tī khèng-chok-hoē(sic) ê sî chò chú-se̍k.
I ê kū ha̍k-seng sio-chiⁿ mn̄g Má-in I-seng ê chi̍t ê būn-toê chiū-sī “I-kho Tāi-ha̍k tī-sî oē khí?” Chit ê phāu-hū sī i kap ha̍k-seng tī chia ê chiām-sî-tek ê hùn-liān-só͘ ê tiong-kan, it-ti̍t khǹg tī sim-lāi ê-Kî-thāi.
In ê hāu-tiúⁿ ài in oē kì-tit tī chiàn-cheng tiong pún-kok ê peh-sìⁿ só͘ siū ê kan-khó͘ kap sún-sit, sīm-chì hiah ê chi-chhî soan-kàu-su ê lâng iā kám-kak beh bō͘-chi̍p 14000 kho͘ sī chin khùn-lân ê sū. Sui-jiân sī án-ni, i tah-èng tī āu-hoê kui-kok ê sî, beh kap Eng-kek-lân kap So͘-kek-lân ê peh-sìⁿ kóng-khí chit ê sū, koh kóng-khí Tiong-kok lâng pún-sin ê só͘ choè kap kòng-hiàn. Siat-sú hiah toā ê kim-gia̍h nā boē thang chū-chi̍p, in chiū tio̍h kak-gō͘ in ê phāu-hū boē thang si̍t-hiān lah!
Kiat-kó ū chi̍t lâng kià-hù 1000 kho͘, beh choè kì-liām ê kià-hù, lâi siàu-liām ê chi̍t Tiong-uì koaⁿ（中尉）tī chiàn-cheng tiong siá chi̍t tiuⁿ phoe hō͘ i ê lāu-pē kóng, “Chhin-chhiūⁿ ū siaⁿ ho͘-tiàu goá, ài goá choè i-liâu soan-kàu-su.” Bô kú i tio̍h siong lâi sí, siū chiap-sàng tńg-khì Hoat-kok. I ê lāu-pē uī beh kì-liām i ê kiáⁿ ê chì-bōng, kià-hù chit tiâu chîⁿ hō͘ pīⁿ-īⁿ kóng, “án-ni thang chiong goá ê choân seng-gâi uī Chú ê iân-kò͘ kap ê I(sic) kok lâi hōng-hiàn.”
Só͘-í oán-tong choè hó ê chit keng i-ha̍k-īⁿ chiū ēng chit tiâu chîⁿ lâi khí. Sī chhái-iōng Tiong-kok kap Se-iûⁿ choè hó ê kiàn-tiok iūⁿ-sek. Goā-têng sī chiàu Tiong-kok kiàn-tiok-bu̍t ê suí ê iūⁿ-sek. Chhù-kak sī ēng oan-khiau hêng, ū khoan-khoah ê oan-kong-mn̂g, kap liâng-têng, lāi-bīn pau-khoat kok-chióng choè hiān-tāi ê khì-kū.
1924 nî 10 ge̍h 8 ji̍t lo̍k-sêng sek ê sî, kè-khì ê ha̍k-seng koh chū-chi̍p, kám-kak hui-siông kong-êng tek-ì, chóng-sī bô lâng pí īⁿ-tiúⁿ Má-in I-seng pún-sin koh-khah hoaⁿ-hí, te̍k-pia̍t tng i àn-nāi lâi pin chham-koan in só͘ ū pīⁿ-chhn̂g ê siat-pī ê sî. Tī hoē-gī-sek i-kho kàu-su-thoân tì bô-á(sic), chhēng lé-ho̍k chē tī hia. Má-in I-seng kóng-khí Hâng-chiu kok-chè i-liâu pīⁿ-īⁿ ê kang-chok. I kóng, ‘Goán ê kang-chok ê sêng-kong sī in-uī goán hoān-sū lia̍h Ki-tok choè tē it”. I ê thiaⁿ-chiòng lóng chai-iáⁿ khak-si̍t kàu-hoē sī hit ê pīⁿ-īⁿ seng-oa̍h ê tiong-sim.
Má-in I-seng só͘ choè ê kang-chok, si̍t-chāi ū chin toā ê kòng-hiàn, koh iā sī ū i ê hū-jîn-lâng kap hō͘-sū ê pang-chān. Liân Bo̍k-su kóng-khí i-seng cháiⁿ-iūⁿ kā i chhiú-su̍t, kiù i ê sìⁿ-miā. I ēng Tiong-kok ê kóng-hoat kóng: “I pang-chān goá nǹg-chhut koaⁿ-chhâ, jiân-āu koh hong ba̍t hit ê khang.”
Í-āu ū sò͘ pah ê ha̍k-seng tuì i-ha̍k īⁿ pit-gia̍p. Má-in I-seng kap Lâu Te̍k-jîn I-su kap kî-thaⁿ ê tông-liâu, chhin-chhiūⁿ Mô͘-kin Sian-siⁿ (Mr. H. B. Morgan) saⁿ-kap ióng-sêng chheng-liân-lâng tī pún-toē lâng ê tiong-kan choè i-liâu soan-kàu-su. Ki-tok ê peng-teng m̄-nā tī “Hā Thian-tông” ū, koh iā phài chhut kàu tī khah hn̄g ê ta̍k só͘-chāi.
In lóng bô khin-sang ê sî-kî. Ha̍k-īⁿ khai-pān liáu bô kú, tī Hoa-lâm toē-tài ū hoat-khí kek-bēng. 1925 nî, iû Tiong-kok ha̍k-seng léng-tō, tiám-to̍h phàu-hé tī Siōng-hái kûn-chiòng tiong. Chek-sî choân-kok piàn-moá pâi-goā ê sī-ui ūn-tōng.
(Thāi-sio̍k)
漢羅（Ùi原文改寫）
MÁ-IN醫生傳（8） (Duncan Main of China)
P. J. Doherty作
周淑慧 譯
1964.02.01 927 期 P.7
真濟過去ê學生倒轉來參加親睦會，有ê對真遠ê所在，á是對上海轉來ê。所送來各樣ê禮物是用代表的ê中國寶器，親像鵜鵠，美麗ê花矸，盤仔，稀奇ê灌木，圖畫，綢緞，羊皮，獎族等。一个已經佇市內做醫生ê佇慶祝會ê時做主席。
伊ê舊學生相爭問Má-in醫生ê一个問題就是「醫科大學佇時oē起？」這个抱負是伊佮學生佇遮ê暫時的ê訓練所ê中間，一直囥佇心內ê-期待。
In ê校長愛in會記得佇戰爭中本國ê百姓所受ê艱苦佮損失，甚至hiah-ê支持宣教師ê人也感覺beh募集14000箍是真困難ê事。雖然是按呢，伊答應佇後回規國ê時，beh佮英格籣佮蘇格籣ê百姓講起這个事，閣講起中國人本身ê所做佮貢獻。設使hiah大ê金額若袂通聚集，in就著覺悟in ê抱負袂通實現lah！
結果有一人寄付1000箍，beh做記念ê寄付，來數念ê一中尉官（中尉）佇戰爭中寫一張批予伊ê老父講：「親像有聲呼召我，愛我做醫療宣教師。」無久伊著傷來死，受接送轉去法國。伊ê老父為beh記念伊ê囝ê志望，寄付這條錢予病院講：「按呢通將我ê全生涯為主ê緣故佮伊ê國來奉獻。」
所以遠東做好ê這間醫學院就用這條錢來起。是採用中國佮西洋做好ê建築樣式。外層是照中國建築物ê媠ê樣式。厝角是用彎曲形，有寬闊ê彎拱門，佮涼亭，內面包括各種做現代ê器具。
1924年10月8日落成式ê時，過去ê學生閣聚集，感覺非常光榮得意，總是無人比院長Má-in醫生本身閣較歡喜，特別tng伊案內來賓參觀in所有病床ê設備ê時。佇會議室醫科教師團戴帽仔，穿禮服坐佇遐。Má-in醫生講起杭州國際醫療病院ê工作。伊講：「阮ê工作ê成功是因為阮凡事掠基督做第一」。伊ê聽眾攏知影確實教會是彼个病院生活ê中心。
Má-in醫生所做ê工作，實在有真大ê貢獻，閣也是有伊ê婦jîn人佮護士ê幫贊。連牧師講起醫生怎樣kā伊手術，救伊ê性命。伊用中國ê講法講：「伊幫贊我nǹg出棺材，然後閣封密彼个空。」
以後有數百个學生對醫學院畢業。Má-in醫生佮Lâu Te̍k-jîn醫師佮其他ê同僚，親像Mô͘-kin先生(Mr. H. B. Morgan)saⁿ-kap養成青年人佇本地人ê中間做醫療宣教師。基督ê兵丁毋若佇「下天堂」有，閣也派出到佇較遠ê逐所在。
In攏無輕鬆ê時期。學院開辦了無久，佇華南地帶有發起革命。1925年，由中國學生領導，點著炮火佇上海群眾中。即時全國遍滿排外ê示威運動。
(待續)