1月18日ê大地動
1 ge̍h 18 ji̍t ê toā toē-tāng
文獻資訊
| 項目 | 資料 |
|---|---|
| 作者 | 謝陽一 Chiā Iông-it |
| 卷期 | 台灣教會公報 |
| 卷期 | 第927號 |
| 日期 | 1964/2 |
| 頁數 | 9 |
白話字（原文數位化）
1 ge̍h 18 ji̍t ê toā toē-tāng
Chiā Iông-it
1964.02.01 927 kî P.9
Tuì tī chū-jiân kho-ha̍k ê chìn-pō͘, jîn-luī chiū kiau-ngō͘, sî-siông khoa-kháu jîn-le̍k sèng-thian, chóng-sī tuì tī 1 ge̍h 18 ji̍t ê toā toē-tāng, hō͘ lâng kám-kak chō-bu̍t Chú ê uí-tāi. Sui-jiân kho-ha̍k chin hoat-tián, iáu-kú ú-tiū ê chú-koân kap jîn-luī ê sìⁿ-miā, lóng chāi tī Siōng-tè ê chhiú-tiong.
San-siōng kàu-hoē siau-sit.
Chit chhù ê toē-tāng hō͘ San-siōng ê kàu-hoē siū tio̍h chin toā ê sún-sit, kàu-hoē ê chng-á-piah tó-hoāi, hiān-chāi boē thang chū-hoē. Hoē-iú ū nn̄g uī siū tāng-siong, chhù choân tó ū 4 hō͘, sún-hāi ū 10 goā hō͘, tuì chiah ê sū-si̍t hō͘ lán thang chai sún-sit ê chhám-tiōng. Lâm Tiong I-liâu-thoân suî-sî chhut-tōng kàu chai-khu bián-huì i-liâu. Sîn-ha̍k-īⁿ iā chó͘-chit ho̍k-bū-tuī kàu chai-khu ho̍k-bū, ū chi̍t uī ha̍k-seng pang-chān lâng tàu thiah chhù, tuì chhù-téng poa̍h lo̍h-lâi, kha-kut tn̄g--khì, chit chióng thiàⁿ lâng ê jia̍t-chêng, hō͘ lán thang siū kám-tōng.
Toā-lāi kàu-hoē ê siau-sit.
Toā-lāi kàu-hoē sī chi̍t keng sin kiàn-tiok(sic.) ê. Chóng-sī tuì chit chhù ê toē-tāng, toē-ki kap piah lóng pit-sûn, nā bô thiah tiāu sī chin guî-hiám. Hoē-iú ê chhù toā-pō͘-hūn iā lóng tó-hoāi, ū chi̍t ê Iûⁿ Chip-sū sún-sit nn̄g ê kiáⁿ, lóng sī chin iu-siù Chú-ji̍t-o̍h ê ha̍k-seng, iā ū nn̄g uī hoē-goā ê Chú-ji̍t-o̍h ê ha̍k-seng sún-sit sìⁿ-miā, in ê pē-bú sī bī sìn-chiá, hoaⁿ-hí ēng Ki-tok-kàu ê gî-sek kā sàng-chòng, só͘-í hit ji̍t ū sì uī ê Chú-ji̍t-o̍h ê ha̍k-seng choè kò-pia̍t-sek, si̍t-chāi hō͘ khoàⁿ ê lâng toā siong-sim, ǹg-bāng Chú ê oē an-uì in ê pē-bú. Sîn-ha̍k-īⁿ ê ho̍k-bū-tuī tī Toā-lāi ê sî, iā ū chheng tio̍h chi̍t tuì kim-khoân, hō͘ sún-sit ê lâng siū chin toā ê kám-kek. Chit chhù ê thian-chai hō͘ tāi-ke kám-kak m̄-thang chí-ū ēng chhuì ê tông-chêng, khah iàu-kín tio̍h ēng Chú ê thiàⁿ si̍t-chāi kàu si̍t toē lâi pang-chān in, hō͘ siū chai-hāi ê lâng tit-tio̍h toā ê an-uì.
漢羅（Ùi原文改寫）
1月18日ê大地動
謝陽一
1964.02.01 927期 P.9
對佇自然科學ê進步，l人類就驕傲，時常誇口人力勝天，總是對佇1月18日ê大地動，予人感覺造物主ê偉大。雖然科學真發展，猶過宇宙ê主權kap人類ê性命，攏在佇上帝ê手中。
山上教會消息。
這厝ê地動予山上ê教會受著真大ê損失，教會ê磚仔壁倒壞，現在袂通聚會。會友有兩位受重傷，厝全倒有4戶，損害有10外戶，對chiah-ê事實予咱通知損失ê慘重.南中醫療團隨時出動到災區免費醫療。神學院也組織服務隊到知區服務，有一位學生幫贊人鬥拆厝，對厝頂跋落來，腳骨斷--去，這種疼人ê熱情，予咱通受感動。
大內教會ê消息。
大內教會是一間新建築ê.總是對這次ê地動，地基佮壁攏pit-sûn，若無拆掉是真危險。會友ê厝大部份也攏倒壞，有一個Iûⁿ執事損失兩个囝，攏是真優秀主日學ê學生，也有兩位會外ê主日學ê學生損失性命，in ê父母是未信者，歡喜用基督教ê儀式kā送葬，所以hit日有四位ê主日學ê學生做告別式，實在予看ê人大傷心，向望主ê話安慰in ê父母。神學院ê服務隊佇大內ê時，也有清著一對金環，予損失ê人受真大ê感激。這厝ê天災予大家感覺毋通只有用喙ê同情，較要緊著用主ê疼實在到實地來幫贊in，予受災害ê人得著大ê安慰。