數念故陳明清長老

Siàu-liām kò͘ Tân Bêng-chheng Tiúⁿ-ló

文獻資訊

項目	資料
作者	無lo̍h名
卷期	台灣教會公報
卷期	第927號
日期	1964/2
頁數	12

白話字（原文數位化）

SIÀU-LIĀM KÒ͘ TÂN BÊNG-CHHENG TIÚN-LÓ

1964.02.01  927 kî  P.12

Kū nî 9 ge̍h Pún-pò tē 918 hō ū chiong Tióng-êng Tiong-ha̍k Táng-sū-tiúⁿ Hâu Choân-sêng Sian-siⁿ ê chiū-jīm, kap kū Táng-sū-tiúⁿ Tân Bêng-chheng Sian-siⁿ ê sî-jīm, pò-kò hō͘ kok-uī tho̍k-chiá chai.

Tuì hit-tia̍p khí Tân Bêng-chheng Sian-siⁿ ê pīⁿ-chōng chiū it-chìn it-thè, liáu-āu tī Tâi-oân Tāi-ha̍k tī-liâu, koh thoè īⁿ tńg-lâi liáu tī Tâi-lâm ka-kī ê chhù-nih tī-liâu, keng-kè ia chám-jiân ū khì-sek ê khoán, khó-sioh kàu chêng lé-pài koh khí hì-hiām(sic), pīⁿ-chōng chiū it-ti̍t ok-hoà, kàu 1 ge̍h 28 hō siōng-ngó͘ 2 tiám 10 hun chiū kè-sì.

Kò͘ Tân Bêng-chheng Tiúⁿ-ló sī chhut-sì tī Koan-á-niá ê bōng-cho̍k.  Tióng-sêng liáu tī Tióng-êng Tiong-ha̍k siū kàu-io̍k, āu-lâi pit-gia̍p Ji̍t-pún Tiong-iong Tāi-ha̍k Hoat-ha̍k-pō͘, koh keng-kè Ji̍t-pún Ko-téng Su-hoat khó-chhì ki̍p-keh, chiū tī su-hoat-kài hoat-hui i ê châi-lêng; tī Jit-pún(sic) sî-tāi bat tī Ji̍t-pún Pak-hái-tō Bêng-kó͘-ok, kap Tè-kok khòng-sò͘-īⁿ í-ki̍p kî-thaⁿ kuí nā uī hoat-īⁿ choè phoàⁿ-koaⁿ, kàu kong-ho̍k āu, ū tng Sin-tek hoat-īⁿ ê īⁿ-tiúⁿ kap Tâi-oân Ko-téng hoat-īⁿ ê chhui-sū.

Chiah ê chit-bū lóng sī pún-séng chhut-sin-chiá hán-tit tam-tng ê koân ê chit-uī, thang chai i ê chai-chêng(sic) sī chin iu-oa̍t ê.  Tân Tiúⁿ-ló m̄ nā tī Su-hoat-kài ū chit khoán iu-oa̍t ê piáu-hiān, chiū-sī chū soè-hàn tuì sìn-gióng ū chin koân ê chō-chiū, it-seng bô piàn-oāⁿ.  I chū chá-chá chiū tng kò͘-hiong Koan-á-niá kàu-hoē ê tiúⁿ-ló it-ti̍t kàu sí.  Kàu tī 10 goā nî chêng lī-khui koaⁿ-kài, lâi Tâi-lâm chi̍p-hêng lu̍t-su ê gia̍p-bū, í-āu tû-khí(sic) choè lu̍t-su thoè choē-choē lâng sin-oan í-goā, in-uī i ū hó ê sìn-gióng, koân ê kiàn-sek, só͘-í tī kàu-kài kap kàu-io̍k-kài put-chí siū tiōng-iōng, liâm-piⁿ siū phèng-chhiáⁿ choè lán kàu-hoē Châi-thoân Hoat-jîn ê lí-sū-tiúⁿ, í-goā iā tam-tng Tióng-êng Tiong-ha̍k ê Táng-sū-tiúⁿ, Tióng-êng Lú Tiong ê táng-sū, Tong-hái Tāi-ha̍k ê táng-sū, Tâi-lâm Sîn-ha̍k-īⁿ ê táng-sū, í-goā iā koh ū tng Kong-hoâ Lú-chú Tiong-ha̍k, Tâi-lâm Y. M. C. A ê táng-sū, Sèng-keng Kong-hoē ê Chu-sûn uí-oân, í-ki̍p Tâi-lâm chhī Lu̍t-su kong-hoē ê siông-bū lí-sū, chhin-chhiūⁿ án-ni, sī lán kàu-kài choè tiōng-iàu ê jîn-bu̍t ê chi̍t ê.

Khó-sioh kuí nî lâi, ū hoān-tio̍h thn̂g-jiō-pīⁿ kap ko hiat-ap, kàu kū-nî chhiu-kuì pīⁿ-chōng ok-hoà, chū án-ni bô thang koh ho̍k-goân.

Hiān-sî toā hāu-siⁿ tī sin-piⁿ chiàu-liāu; tē jī hāu-siⁿ tī Ji̍t-pún kiû-ha̍k tiong, pún-nî 4 ge̍h oē pit-gia̍p Kok-chè Ki-tok-kàu Tāi-ha̍k; tē jī cha-bó͘-kiáⁿ Bí-boán Lú-sū tī Bí-kok choan-kong kǹg-khîm, sêng-chiū hui-siông iu-siù, bat tī chêng Bí-kok Chóng-thóng hu-jîn lîm-se̍k ê hoē-tiong ián-chàu; toā kiáⁿ-sài Ko Chiau-jîn Sian-siⁿ, choè kūn oân-sêng se̍k-sū ha̍k-uī tuì Bí-kok kui-tô͘ tiong, tē jī kiáⁿ-sài sī Sòng Choân-sēng Bo̍k-su iáu tī Bí-kok chhim-chō tiong, tē 3 kiáⁿ kap cha-bó͘-kiáⁿ Ko Tiong chāi ha̍k tiong.  Hu-jîn Kím-hoa Lú-sū sī lán Tiong-kok choè chhut-miâ ê kǹg-khîm-ka ê chi̍t ê.

Choè-kūn Tân Sian-siⁿ koh koat-tēng chiong Koán-á-niá(sic) ka-kī ê su-iú thó͘-toē 3000 phîⁿ koan-hiàn beh choè lán Chóng-hoē kok chióng Lêng-siu-hoē hoē-tiûⁿ ê iōng-toē.  Che sī chi̍t phit khó-koan ê toē-sán.  I ū kam-sim hōng-hiàn, thang chai i tuì lán Chóng-hoē ê jia̍t-sêng.  Chóng-hoē khoàⁿ i tī lán chóng-hoē ê toē-uī kòng-hiàn lóng chin hián-tù, ū chún-pī beh ēng Chóng-hoē bêng-gī tī 2 ge̍h 7 hō chham-ka á-sī chú-pān chòng-sek.

漢羅（Ùi原文改寫）

數念顧陳明清長老

1964.02.01  927 期  P.12

舊年9月本報第918號有將長榮中學董事長侯全成先生ê就任，kap舊董事長陳明清先生ê辭任，報告予各位讀者知。

對hit-tia̍p起陳明清先生ê病狀就一進一退，了後佇台灣大學治療，閣退院轉來了佇台南家己ê厝裡治療，經過ia嶄然有氣色ê款，可惜到前禮拜閣起肺炎，病狀就一直惡化，到1月28號上午2點10分就過世。

故陳明清長老是出世佇關仔嶺ê望族。長成了佇長榮中學受教育，後來畢業日本中央大學法學部，閣經過日本高等司法考試及格，就佇司法界發揮伊ê才能;佇日本時代捌佇日本北海道名古屋，佮帝國控訴院以及其他幾若位法院做判官，到光復後，有當新竹法院ê院長佮台灣高等法院ê推事。

Chiah-ê職務攏是本省出身者罕得擔當ê懸ê職位，通知伊ê才情是真優越ê。  陳長老毋若佇司法界有這款優越ê表現，就是自細漢對信仰有真懸ê造就，一生無變換。伊自早早就當故鄉關仔嶺教會ê長老一直到死。到佇10外年前離開官界，來台南執行律師ê業務，以後除去做律師替濟濟人伸冤以外，因為伊有好ê信仰，懸ê見識，所以佇教界佮教育界不止受重用，連鞭受聘請做咱教會財團法人ê理事長，以外也擔當長榮中學ê董事長，長榮女中ê董事，東海大學ê董事，台南神學院ê董事，以外也閣有當光華女子中學，台南Y. M. C. A ê董事，聖經公會ê諮詢委員，以及台南市律師公會ê常務理事，親像按呢，是咱教界最重要ê人物ê一个。

可惜幾年來，有患著糖尿病佮高血壓，到舊年秋季病狀惡化，自按呢無通閣復原。

現時大後生佇身邊照料;第二後生佇日本求學中，本年4月oē畢業國際基督教大學;第二查某囝美滿女士佇美國專攻鋼琴，成就非常優秀，捌佇前美國總統夫人臨席ê會中演奏;大囝婿高昭仁先生，最近完成碩士學位對美國歸途中，第二囝婿是宋泉盛牧師猶佇美國深造中，第三囝佮查某囝高中在學中。夫人Kím-hoa女士是咱中國做出名ê鋼琴家ê一个。

最近陳先生閣決定將關仔嶺家己ê私有土地3000坪捐獻beh做咱總會各種靈修會會場ê用地。這是一筆可觀ê地產。伊有甘心奉獻，通知伊對咱總會ê熱誠。總會看伊佇咱總會ê地位貢獻攏真顯著，有準備beh用總會名義佇2月7號參加á是主辦葬式。