Má-in醫生傳(7)
Má-in I-seng-toān(7)
文獻資訊
| 項目 | 資料 |
|---|---|
| 作者 | 周淑慧 Chiu Siok-huī |
| 卷期 | 台灣教會公報 |
| 卷期 | 第926期 |
| 日期 | 1964/1 |
| 頁數 | 9 |
白話字（原文數位化）
MÁ-IN I-SENG-TOĀN（7） (Duncan Main of China)
P. J. Doherty chok
Chiu Siok-huī e̍k
1964.01.15 926 kî P.9-10
Tī hia iā bô khoàⁿ-kìⁿ i-kho ê ha̍k-seng, kàu beh tńg-lâi ê sî, i chiah tú-tio̍h Lâu Te̍k-jîn. Ko̍k-ke chit-sî ê bīn-māu chin an-chēng, bô chhin-chhiūⁿ i ê miâ hiah m̄-ài oa̍h-tāng. I suî-thâu sòng-chì ê khoán. Thang khoàⁿ-chhut i ū khì sì-bīn phun-cháu, i ê saⁿ am-cham koh thiah-phoà, chhin-chhiūⁿ i ū choè pō-tōng ê léng-tō-chiá.
I-seng ê gán-kong hián-chhut chin giâm-keh ê khoán, bēng-lēng i kóng, “Chek-sî tńg-lâi pīⁿ-īⁿ, goá beh tī hia thèng-hāu lí, goá beh kā lí sǹg-siàu.”
Lâu Te̍k-jîn sêng-jīn i hit chá-khí ū kap kî-û ê ha̍k-seng lī-khui pīⁿ-īⁿ. Má-in I-seng pìⁿ-bīn kóng: “Che chiū-sī lí ê ài-kok-sim mah? Pàng-sak lí ê kang-chok, koh tàu-tīn khì jiáu-tōng bû ko͘ ê peh-sìⁿ?” Boán-cho̍k chiong-kun kap i ê hū-jîn-lâng sī goá ê pêng-iú, lí iā ū hūn khì chhiúⁿ-kiap in ê chhù mah?”
“Bô! Che goá bô choè. Goá m̄-sī khì choè chit hō sū.” Te̍k-jîn chin chū-sìn ê khoán, kia̍h i ê thâu khí-lâi kóng.
“Chóng-sī lí kiám m̄-sī beh chham-ka tī koe-lō͘ ê hán-hoah nāu-tōng? Lí kiám m̄-sī sái-lōng lí ê tông-ha̍k hō͘ in bô tia̍t-sū?” I khoàⁿ-kìⁿ hit ê siàu-liân gín-ná ê ba̍k-chiu suî lo̍h-khì.
” Lín chiah ê siàu-liân lâng, ún-tàng sī siūⁿ kóng hó-sè ê sî, chiū beh koh tńg-lâi pīⁿ-īⁿ kî-thāi goá kè-sio̍k hùn-liān lín choè i-seng ho͘N3?” Che iā bo̍k-koài, in-uī nā ū lâng beh chiong chi̍t ê kok-ka lâi hō͘ i ka-kī phah-sǹg, lâng khoàⁿ-kìⁿ tek-khak oē put-ho̍k.
“Beh uī kok-ka ho̍k-bū kiám m̄-sī i-tī pīⁿ-lâng, pang-chān lâi khí liâu-ióng-īⁿ mah? Á-sī huí-hoāi kiàn-tiok-bu̍t, chham-ka nāu-tōng lâi siong-hāi peh-sìⁿ sī khah hó ê ho̍k-bū?”
Te̍k-jîn chit sî ēng thòng-khó͘ hoán-pok ê siaⁿ-tiāu kóng: I-seng, m̄-sī lah! Goá iā sī án-ni kā hiah ê koh-khah iá-bân, bô chû-sim ê lâng kóng. Goá m̄-ài huí-hoāi, lí ū kà-sī goán tio̍h ài pang-chān lâng ióng-chòng kap kái-siān. Khoàⁿ! Goá oē thang chèng-bêng, chiū-sī in-uī goá kiû pīⁿ-īⁿ ê an-choân, goá chiah ū chông kàu chit ê iūⁿ-siùⁿ!”
Hit-sî io̍h-kio̍k-tiúⁿ phah-mn̂g ji̍p-lâi. Lí Te̍k-jîn ê bīn chhiò chi̍t-ē.
“Sian-siⁿ, lí kiám ū thiaⁿ-kìⁿ Lí Te̍k-jîn cháiⁿ-iūⁿ kiù chit keng pīⁿ-īⁿ?
“Kiù chit keng pīⁿ-īⁿ?”
“Sī lah! Sī lah! Nā bô, chit keng chhù hiān-chāi khó-lêng í-keng……án-ni lah. (I chhun chhiú pí po̍k-chà ê khoán-sit).” “I kap pa̍t ê ha̍k-seng chhut-khì ê sî, i thiaⁿ-kìⁿ in ê kè-bô͘…ū saⁿ lia̍p chà-tân khǹg tī lán ê pīⁿ-īⁿ ê chhù-āu.”
I-seng chin tio̍h-kiaⁿ, oa̍t ǹg i ê ha̍k-seng kóng: “Kiám ū iáⁿ án-ni? āu-lâi cháiⁿ-iūⁿ?”
“Goá chiū chīn goá só͘ oē, kín cháu tńg-lâi kiò lâng khì kā Lí Sian-siⁿ kóng, Goá koh cháu khì in khǹg chà-tân ê sió-chhù. Goá m̄ chai tī-sî oē po̍k-hoat.”
Hit ê tiau-che-su koh soà lo̍h-khì kóng: “In keng-kè chi̍t toāⁿ ê sî-kan chiah chhē-tio̍h goá, goá tú-hó ū kín-kip ê sū boē thang suî-sî khì. Tng goá kàu hit ê sió-chhù ê sî,-Lí chai, sian-siⁿ,chiū-sī āu-bīn hit keng-Te̍k-jîn siang-kha kap chhiú kuī-teh, chai tī chit tui ê han-chû tui nih.”
Lí Te̍k-jîn chin pi-siong ê khoán, àⁿ-lo̍h khoàⁿ i thiah-phoà ê saⁿ.
“Bô iàu-kín, Ko̍k-ke! Chiah koh pó͘ lí chi̍t niá sin ê. Kín-kín kā goá kóng i kuī tī hia choè sím-mi̍h? M̄-sī chia̍h han-chû ho͘N3?”
Lí Sian-siⁿ ê bīn-iông kèng-ka chhiò-iông kóng, “ I só͘ the̍h-tio̍h ê, m̄-sī tiⁿ ê mi̍h, sī chà-tân, kap koe-á pîⁿ toā. Goá ó͘ chhut-lâi hiat tī ūn-hô.”
Má-in hoah chhut-lâi. “Kám-siā Siōng-tè.” I chhit thâu-hia̍h ê chhìn-koāⁿ. Che sī koan-hē pīⁿ-īⁿ hoān-chiá kap i ka-kī ê chhù ê būn-toê. I khan Ko̍k-ke ê chhiú kap i ak-chhiú kóng, “Goá pún-lâi siūⁿ kóng su-iàu te̍k-pia̍t lâi kà-koai, taⁿ sī su-iàu te̍k-pia̍t lâi pò-siúⁿ lah!” I oa̍t-tńg-sin ǹg io̍h-kio̍k-tiúⁿ kóng, “Lán beh cháiⁿ-iūⁿ pò-siúⁿ i?”
Lâu Te̍k-jîn ìn kóng, “Siat-sú sian-siⁿ nā hoaⁿ-hí ún-chún goá tò-tńg lâi i-īⁿ kè-sio̍k hùn-liān -che sī goá só͘ ài ê.”
Má-in I-seng kóng, “Chin hó, goá ǹg-bāng tī pit-gia̍p ê sî koh kè-sio̍k tī chia hùn-liān pa̍t-lâng.”
Tē 7 chiuⁿ
Só͘-í tng 1914 nî-1918 nî Sè-kài tāi-chiàn ê tiong-kan, Má-in I-seng só͘ ū choè chīn-tiong ê chō͘-chhiú chiū-sī Lâu Te̍k-jîn. Hit-sî sī chin khùn-lân ê sî-kî. Chin-choē kî-û ê chō͘-chhiú khì Au-chiu ê Tiong-kok Lô-tōng-thoân (Chinsee Labo͘r Corps) choè koaⁿ-oân, ū-ê soan-kàu-su iā sī án-ni. Chin-choē soan-tō kang-chok kap i-liâu kang-chok iû Tiong-kok lâng lâi hū-chek. In chin ū pá-ak lâi choè chiah ê kang, m̄-nā i-tī in ê tông-pau, iā i-tī goā-kok lâng.
Lâu Thian-tek Bo̍k-su-chi̍t uī pún-toē kàu-hoē ê léng-tō-chiá kap bo̍k-su-tī 1916 nî Má-in I-seng 60 hè siⁿ-ji̍t khèng-chiok-hoē ê sî chò chú-káng-chiá. Hâng-chiu uī chit ê sū kú-hêng te̍k-pia̍t ê hêng-sū, m̄-nā in-uī Tiong-kok lâng chin chun-tiōng tiông-siū ū keng-giām ê lāu-lâng, iā sī in-uī Má-in I-seng kap i ê tâng-phoāⁿ, uī-tio̍h in ê kok-ka kap toē-hng só͘ choè ê kòng-hiàn.
漢羅（Ùi原文改寫）
MÁ-IN醫生傳 (7) (Duncan Main of China)
P.J. Doherty作
周淑慧 譯
1964.01.15 526期 p.9-10
佇遐也無看見醫科的學生，到欲轉來的時，伊才拄著劉Te̍k-jîn。Ko̍k-ke這時的面貌真安靜，無親像伊的名遐毋愛活動。伊垂頭喪志的款。通看出伊有去四面奔走，伊的衫am-cham閣拆破，親像伊有做暴動的領導者。
醫生的眼光顯出真嚴格的款，命令伊講：「即時轉來病院，我欲佇遐聽候你，我欲共你算數。」
劉Te̍k-jîn承認伊彼早起有佮其餘的學生離開病院。Má-in醫生變面講：「這就是你的愛國心mah？放拺你的工作，閣鬥陣去擾動無辜的百姓？」滿族將軍佮伊的婦人人是我的朋友，你也有份去搶劫in的厝mah？」
「無！這我無做。我毋是去做這號事。」Te̍k-jîn真自信的款，舉伊的頭起來講。
「總是你敢毋是欲參加佇街路的喊喝鬧動？你敢毋是使弄你的同學予in無秩序？」伊看見彼个少年囡仔的目睭垂落去。
「恁遮的少年人，穩當是想講好勢的時，就欲閣轉來病院期待我繼續訓練恁做醫生ho͘N3？」這也莫怪，因為若有人欲將一个國家來予伊家己拍算，人看見的確會不服。
「欲為國家服務敢毋是醫治病人，幫贊來起療養院mah？Á是毀壞建築物，參加鬧動來傷害百姓是較好的服務？」
Te̍k-jîn這時用痛苦反駁的聲調講：醫生，毋是lah！我也是按呢共遐的閣較野蠻，無慈心的人講。我毋愛毀壞，你有教示阮著愛幫贊人勇壯佮改善。看！我會通證明，就是因為我求病院的安全，我才有傱到這个樣相！」
彼時藥局長拍門入來。李Te̍k-jîn的面笑一下。
「先生，你敢有聽見李Te̍k-jîn怎樣救這間病院？
「救這間病院？」
「是lah！是lah！ 若無，這間厝現在可能已經……按呢lah。 (伊伸手比爆炸的款式)。」「伊佮別个學生出去的時，伊聽見in的計謀…有三粒炸彈囥佇咱的病院的厝後。」
醫生真著驚，越向伊的學生講：「敢有影按呢？後來怎樣？」
「我就盡我所會，緊走轉來叫人去共李先生講：我閣走去in囥炸彈的小-厝。我毋知佇時會爆發。」
彼个調劑師閣紲落去講：「In經過一段的時間才揣著我，我拄好有緊急的事袂通隨時去。當我到彼个小厝的時，-你知，先生，就是後面彼間-Te̍k-jîn雙跤佮手跪teh，栽佇這堆的番藷堆裡。」
李Te̍k-jîn真悲傷的款，向落看伊拆破的衫。
「無要緊，Ko̍k-ke！才閣補你一領新的。緊緊共我講伊跪佇遐做甚物？毋是食番藷ho͘N3？」
李先生的面容更加笑容講：「伊所提著的，毋是甜的物，是炸彈，佮雞仔平大。我挖出來hiat佇運河。」
Má-in喝出來。「感謝上帝。」伊拭頭額的凊汗。這是關係病院患者佮伊家己的厝的問題。伊牽Ko̍k-ke的手佮伊握手講：「我本來想講需要特別來教乖，taⁿ是需要特別來報賞lah！」伊越轉身向藥局長講：「咱欲怎樣報賞伊？」
劉Te̍k-jîn應講，「設使先生若歡喜允准我倒轉來醫院繼續訓練-這是我所愛的。」
Má-in醫生講：「真好，我向望佇畢業的時閣繼續佇遮訓練別人。」
第7章
所以當1914年-1918年世界大戰的中間，Má-in醫生所有做盡忠的助手就是劉Te̍k-jîn。彼時是真困難的時期。真濟其餘的助手去歐洲的中國勞動團(Chinsee Labo͘r Corps)做官員，有的宣教師也是按呢。真濟宣道工作佮醫療工作由中國人來負責。In真有把握來做遮的工，毋若醫治in的同胞，也醫治外國人。
劉Thian-tek牧師-一位本地教會的領導者佮牧師-佇1916年Má-in醫生60歲生日慶祝會的時做主講者。杭州為這个事舉行特別的行事，毋若因為中國人真尊重長壽有經驗的老人，也是因為Má-in醫生佮伊的同伴，為著in的國家佮地方所做的貢獻。