宋尚節博士 (6)

Sòng Siōng-chiat Phok-sū (6)

文獻資訊

項目	資料
作者	蔡愛義 Chhoà ài-gī
卷期	台灣教會公報
卷期	第926號
日期	1964/1
頁數	5-7

白話字（原文數位化）

OĀ-KE̍K

Sòng Siōng-chiat Phok-sū(VI)

Chhoà ài-gī chok

1964.01.15  926 kî  P.5~7

I-seng:  Sòng Phok-sū, lí ê pē-bú, hiaⁿ-tī chí-bē ū bat lâng hoān tio̍h cheng-sîn-pīⁿ bô?

Sòng Phok-sū:  I-seng, lí sī khoàⁿ goá choè siáu-lâng sī m̄?  Chhiáⁿ lí chhek-giām goá ê thâu-náu, chiū oē bêng-pe̍k.  Lí thang tiāu-cha goá só͘ tha̍k kè-khì ê tāi-ha̍k kàu-siū, iā thang khoàⁿ goá ê phok-sū lūn-bûn kap goá hoan-e̍k ê Hu̍t-keng, Tō-tek-keng kap goá só͘ tù Eng-kok Ko͘-jî-īⁿ ê le̍k-sú, kap Kū-iok Iâ-lī-bí ê chù-kái.

I-seng:  Sòng Phok-sū, lí si̍t-chāi chin chhong-bêng, tān-sī su-iàu hiu-sek chēng-ióng.

Sòng Phok-sū:  I-seng, sím-mi̍h sî-chūn chiah oē tàng chhut-īⁿ.

I-seng:  Tāi-khài 40 ji̍t chiū kàu-gia̍h, chhiáⁿ m̄-thang tio̍h-kip.  (Nn̄g lâng chhut-khì, Sòng Phok-sū toā siaⁿ tha̍k Sèng-keng, tha̍k 2, 3 pái.  I-seng kap hō͘-sū koh lâi).

I-seng:  Sòng Phok-sū, kin-á-ji̍t cheng-sîn ū sóng-khoài bô?  Cha-àm hó-khùn bô?

Sòng Phok-sū:  I-seng, lí cheng-sîn sóng-khoài bô? Lí cha-mî hó-khùn bô?  I-seng lí si̍t-chāi chin bô lé, lí iáu-kú khoàⁿ goá choè siáu-lâng, moá chhuì pe̍h-chha̍t, goá lâi pīⁿ-īⁿ hit ji̍t, lí kóng 40 ji̍t chiū oē hō͘ goá chhut-īⁿ, hiān-chāi í-keng 150 ji̍t, iáu-kú m̄-chún goá chhut-īⁿ, tàu-tí sím-mi̍h sî chiah beh hō͘ goá chhut-īⁿ?

I-seng:  Sòng Phok-sū:, chêng-ji̍t lí nā bô thau cháu chhut-khì, hō͘ lâng lia̍h tńg-lâi, tāi-khài í-keng hō͘ lí chhut-īⁿ lah.

Sòng Phok-sū:  I-seng, goá toà chit keng pīⁿ-pâng, kun-pún bô hoat-tō͘ thang oa̍h lah.  Kuí ji̍t chêng tú-hó goá ji̍p-īⁿ 126 ji̍t, goá siūⁿ beh chū-sat, tháu liáu khò͘-toà, siūⁿ beh tiàu tāu ê sî, hut-jiân Siōng-tè ê siaⁿ lîm-kàu goá kóng, “Soè-kiáⁿ, lí sī goá ēng pó-huih sio̍k-hoê ê, cháiⁿ-iūⁿ beh kiâⁿ té-lō͘ chū-sat neh?”  Tuì hit ji̍t khí, goá chiū ka-pē kèng-uì Siōng-tè, khûn tha̍k Sèng-keng.  Hiān-chāi Sin Kū-iok í-keng tha̍k 30 piàn lah, Siōng-tè an-uì goá kóng tio̍h jím-nāi, kàu 193 ji̍t goá só͘ pē ê si̍p-jī-kè chiū oē kái-tû, só͘-í goá ê sim í-keng pêng-an lah.

I-seng:  Sòng Phok-sū, chin kiong-hí, ǹg-bāng lí ê Siōng-tè pì-iū lí, tī hit ji̍t thang kiong-hí chhut-īⁿ.

TĒ 8 BŌ͘:  Cheng-sîn pīⁿ-īⁿ ê Hoē-kheh-sek.

Pò͘-tì:  Í, toh lóng chiâu-pī, Sòng chhēng chéng-choê ê i-ho̍k kiâⁿ ji̍p sek-lāi, Hoâ Phok-sū, i-seng, hō͘-sū khiā--khí-lâi.

Hoâ Phok-sū:  (Kap Sòng ak-chhiú).

Sòng Phok-sū pêng-an!  Bô phah-sǹg goá kap lí lī-pia̍t liáu-āu khì Au-chiu, kàu cha-ji̍t chiah tńg-lâi, tú-tú sī chi̍t nî, chit tiong-kan, sui-jiân siá chin-choē tiuⁿ phoe hō͘ lí, tān-sī lóng bô chiap-tio̍h lí hoê phoe.  Cha-ji̍t khì Hia̍p-hô Sîn-ha̍k-īⁿ chhē īⁿ-tiúⁿ, chiah chai-iáⁿ lí tī chia, thiaⁿ kóng í-keng 193 ji̍t lah.  Siōng-tè pì-iū lí pêng-an, chin kiong-hí.

Sòng Phok-sū:  Hoâ Kàu-siū, chin to-siā, goá hō͘ siáu īⁿ-tiúⁿ kap siáu i-seng koaiⁿ toà siáu-lâng pīⁿ-īⁿ, chiok-chiok 193 ji̍t. Tān--sī(sic.) goá tī pīⁿ-īⁿ tha̍k Sin Kū-iok ū 40 piàn, hō͘ goá tit-tio̍h Siōng-tè ê un-tián kap Sèng-keng tiong ê khé-sī chin toā, kám-kak chin khoài-lo̍k kap kám-siā.  Siáu i-seng chin to-siā. (Khiā khí-lâi kap i-seng ak-chhiú).

I-seng:  Hoâ Phok-sū, m̄-chai lí khéng choè pó-chèng-jîn chhoā Sòng Phok-sū chhut-īⁿ bô?  Tān--sī ū chi̍t ê tiâu-kiāⁿ, chiū-sī chhut-īⁿ āu má-siōng sàng Sòng Phok-sū chē chûn tńg-khì Tiong-kok.

Hoâ Kàu-siū:  ĪN-tiúⁿ, goá khéng choè pó-chèng-jîn, chhiáⁿ lí suî-sî pān-lí chún Sòng Phok-sū chhut-īⁿ.

I-seng:  (Hō͘-sū the̍h khah-phìⁿ hō͘ i-seng, i-seng chhiam-jī.).

Sòng Phok-sū, goá chún lí chhut-īⁿ, kiong-hí.

Hoâ Hu-jîn:  Sòng Phok-sū kiong-hí, chhiáⁿ lâi-khì goán tau kiâⁿ-kiâⁿ. (Tāi-ke ak-chhiú lī-khui).

TĒ 9 BŌ͘:  Sòng Bo̍k-su kheh-thiaⁿ.

Pò͘-tì:  Kap chhut kok chêng siāng khoán.

Bō͘-āu ê hòng-sàng:  Sòng Phok-sū lī-khui hiuⁿ-lí, pún-kok kap pē-bú í-keng 7 nî poàⁿ.  1927 nî 11 ge̍h 8 ji̍t, sin-khu chhēng chi̍t niá chho͘-pò͘ tn̂g saⁿ, chhiú koāⁿ hêng-lí tńg-lâi kò͘-hiong ta̍h ji̍p kheh-thiaⁿ.

Sòng Bo̍k-su:  Lí sī siáⁿ lâng?

Sòng Phok-sū:  A-pa, goá sī Iok-hān.

Sòng Bo̍k-su:  Hò͘!  Lí chiàⁿ-chiàⁿ sī Chú-un, kó-jiân sī khí khong, sím-mi̍h lí sī Iok-hān.

Sòng Phok-sū:  A-pa, í-chêng ê Chú-un í-keng sí-lah, hiān-chāi sī ū oa̍h-miā ê Iok-hān tńg-lâi ê.

Lāu-bú:  Chú-un, Chú-un, goá só͘ thiàⁿ ê kiáⁿ Chú-un, lí tńg-lâi lah, Kám-siā Chú!  O-ló Chú!  Goá koáⁿ-kín lâi thâi lí só͘ ài chia̍h ê koe, iā sūn-soà thong-ti Lîm Chhin-ke, chhiⁿ-ḿ kap Kim-hoâ lâi (lāu-bú thè chhut).

Sòng Bo̍k-su: Chú-un, lí chit kiāⁿ hêng-lí, í-goā iáu ū sím-mi̍h mih7-kiāⁿ bô?

Sòng Phok-sū:  A-pa, goá só͘ ū ê mi̍h-kiāⁿ chiū-sī chit ê hêng-lí, lāi-bīn sī phoà koh kū ê saⁿ khò͘ nā-tiāⁿ, in-uī goá só͘ tha̍k kè-khì ê chheh it-chhè to sio-liáu lah.

Lîm Chhiⁿ-ke:  Chú-un kiong-hí, lí pêng-an tńg-lâi. (Nn̄g lâng ak-chhiú).

Sòng Phok-sū:  A-pa, pêng-an! Kiong-hí!

Lîm Chhiⁿ-ḿ :  Chú-un, kiong-hí!

Sòng Phok-sū:  A-bú, pêng-an! (tāi-ke ak-chhiú).

Sòng Phok-sū:  Kím-hoâ pêng-an, chin to-siā, goá chhut kok tiong pē-bú tit-tio̍h lí ê pang-bâng, chin to-siā. (Nn̄g lâng ak-chhiú, Kím-hoâ lâu ba̍k-sái, Gô͘ Hāu-tiúⁿ kiâⁿ ji̍p-lâi).

Gô͘ Hāu-tiúⁿ:  Sòng Phok-sū kiong-hí!

Sòng Phok-sū:  Gô͘ Hāu-tiúⁿ pêng-an, (ak-chhiú, siāng-sî lāu-bú phâng pn̄g chhài ji̍p-lâi, Kím-hoâ má-siōng kā pang-bâng, tāi-ke chē choè-hoé, Sòng Bo̍k-su khí-lâi kám-siā).

Sòng Bo̍k-su:  To-siā Thiⁿ-pē Siōng-tè, goán ê chhuì tio̍h chheng-chàn Lí ê koân-lêng, Lí ê thiàⁿ-thàng, Lí ê lîn-bín hō͘ goán boē chhek-to̍k tit, Lí siúⁿ-sù goá ê kiáⁿ-jî Chú-un, 7 nî poàⁿ kú chhut kok, kin-á-ji̍t pêng-an tńg-lâi, choân-ke hoaⁿ-hí saⁿ-kìⁿ, goán chhim-chhim kám-siā put chīn, kim-āu it-chhè ê sū kiû Lí kā goán an-pâi.  Hiān-chāi goán beh hióng-siū ê tāi-seng khò Iâ-so͘ ê miâ kám-siā.  À-bēng.  (Tāi-ke chīn-la̍t chia̍h, chia̍h liáu-āu phok-sū khiā khí-lâi).

Sòng Phok-sū:  Kèng-ài ê hāu-tiúⁿ, a-pa, a-bú kap chu-uī.  Goá kap lín lī-pia̍t 7 nî poàⁿ, kim-ji̍t pêng-an tńg-lâi, khoàⁿ-kìⁿ tāi-ke pêng-an, chin khoài-lo̍k, kám-siā Siōng-tè ê hông-un.  Goá sui-jiân tī Bí-kok tit-tio̍h Hoà-ha̍k Phok-sū, iā tit-tio̍h Kim-sî chióng-chiong.  Tān--sī phok-sū ê bûn-pîn kap chióng-chiong í-keng kā tìm lo̍h-khì Thài-pêng-iûⁿ lah, goá só͘ tha̍k-kè ê chheh choân-pō͘ kā sio liáu lah, chí-ū toà chi̍t pún, sī goá tha̍k 40 piàn ê Sèng-keng tńg-lâi jî-í.  Í-chêng ê Chú-un í-keng sí lah, hiān-chāi sī Kiù-chú Iâ-so͘ kā goá kái miâ ê Iok-hān teh oa̍h.  Kim-āu it-chhè lóng sī thàn Chú ê bēng-lēng, chí-sī lâi oa̍h jî-í.

Sòng Bo̍k-su:  Chú-un, lí í-keng the̍h phok-sū tńg-lâi, iā tio̍h thoè goá thàn chi̍t-tiám-á chîⁿ lâi pang-chān ke-lāi ê seng-oa̍h-huì, in-uī hiān-chāi goá ê ge̍h-kip chiah ū 35 kho͘ nā-tiāⁿ.

Sòng Phok-sū:  A-pa, goá tit-tio̍h Hoà-ha̍k Phok-sū ê sî, Pak-kiaⁿ Tāi-ha̍k ê I-ha̍k īⁿ-tiúⁿ ū phah tiān-pò lâi beh chhiáⁿ goá khì kà chheh, nî-hōng beh chi̍t bān kho͘, goá ū kā i kū-choa̍t lah.  Goá pit-gia̍p ê Tāi-ha̍k kiò goá khì Pak-kiaⁿ Tāi-ha̍k, choan-kong hoà-ha̍k, goá ū kā i kū-choa̍t.  Sè-kan it-chhè ê miâ, lī goá bô iân, chí-ū uī Chú thoân hok-im sī goá it-seng ê sù-bēng.

Gô͘ Hāu-tiúⁿ:  Sòng Phok-sū, lí ê miâ-siaⁿ thoân piàn Bí-kok, goá lóng chai-iáⁿ, put-kò hiān-chāi lí iáu-bē koat-tēng hong-chiam, chiām-sî lâi bú-hāu kà Hoà-ha̍k hó bô?  Chū-jiân goá boē chó͘-chí lí hiòng ha̍k-seng thoân-tō ê sū.

Sòng Phok-sū:  Kì-jiân hāu-tiúⁿ ê hó-ì, goá hoaⁿ-hí chiap-siū, chū-jiân goá iā ū ì-sù hiòng ha̍k-seng thoân-tō.

Lāu-bú:  Chú-un, lí kin-á-ji̍t tńg-lâi, tāi-ke to sī chin hoaⁿ-hí, lí í-keng 25 hè, Kím-hoâ iā sī 25 hè, goá siūⁿ kūn ji̍t tiong lâi kú-hêng kiat-hun tián-lé sī choè hó, choè iàu-kín ê sū.

Sòng Phok-sū:  A-bú thiàⁿ -thàng un chhim bû ke̍k, koe chú liáu chin hó-chia̍h.  Kiat-hun ê sū chhiáⁿ a-pa, a-bú siat-hoat chiū-sī, goá bô ì-kiàn.

Lāu-bú:  M̄-chai chhin-ke, chhiⁿ-ḿ cháiⁿ-iūⁿ, sím-mi̍h ì-kiàn?

Lîm Chhiⁿ-ḿ :  Tong-jiân goán bô īⁿ-gī, chàn-sêng, iā oē chīn-liōng koáⁿ-kín pang-chān Kím-hoâ pī-pān kè-chng.

Lîm Chhin-ke:  Chhin-ke, chhiⁿ-ḿ chin to-siā, hō͘ lín chhiáⁿ chin pá, chhiáⁿ Chú-un lí chiah siông lâi goán tau thit-thô, goán seng sit-lé.  Kím-hoâ lí chiah chia pang-bâng chhiⁿ-ḿ , khang-khè choè liáu chiah tńg-lâi.  Lí chhiáⁿ.

(Thāi-sio̍k)

漢羅（Ùi原文改寫）

話劇

宋尚節博士(VI)

蔡愛義作

1964.01.15  926 期  P.5~7

醫生：  宋博士，你ê父母，兄弟姊妹有捌人犯著精神病無？

宋博士：醫生，你是看我做痟人是毋？請你測驗我ê頭腦，就會明白。你通調查我所讀過去ê大學教授，也通看我ê博士論文kap我翻譯ê佛經，道德經kap我所著英國孤兒院ê歷史，佮舊約耶利米ê註解。

醫生：宋博士，你實在真聰明，但是需要休息靜養。

宋博士：醫生，啥物時陣chiah會當出院。

醫生：大概40日就夠額，請毋通著急。(兩人出去，宋博士大聲讀聖經，讀2， 3擺。醫生佮護士閣來)。

醫生：  宋博士，今仔日精神有爽快無？昨暗好睏無？

宋博士：醫生，你精神爽快無？你昨暝好睏無？醫生你實在真無禮，你猶過看我做痟人，滿喙白賊，我來病院hit日，你講40日就會予我出院，現在已經150日，猶過毋准我出院，到底啥物時chiah beh予我出院？

醫生：  宋博士：，前日你若無偷走出去，予人掠轉來，大概已經予你出院lah。

宋博士：醫生，我蹛這間病房，根本無法度通活lah。幾日前拄好我入院126日，我想beh自殺， tháu了褲帶，想beh吊脰ê時，忽然上帝ê聲臨到我講：「細囝，你是我用寶血贖回ê，怎樣beh行短路自殺neh?」對hit日起，我就加倍敬畏上帝，勤讀聖經。現在新舊約已經讀30遍lah，上帝安慰我講著忍耐，到193日我所背ê十字架就會解除，所以我ê心已經平安lah。

醫生： 宋博士，真恭喜，向望你ê上帝庇佑你，佇hit日通恭喜出院。

第8幕：精神病院ê會客室。

佈置： 椅，桌攏齊備，宋穿整齊ê衣服行入室內，華博士，醫生，護士徛--起來。

華博士：  (佮宋握手)。

宋博士平安！無拍算我佮你離別了後去歐洲，到昨日chiah轉來，拄拄是一年，這中間，雖然寫真濟張批予你，但是攏無接著你回批。昨日去協和神學院揣院長，chiah知影你佇遮，聽講已經193日lah。上帝庇佑你平安，真恭喜。

宋博士：  華教授，真多謝，我予痟院長佮痟醫生關蹛痟人病院，足足193日。但是我佇病院讀新舊約有40遍，予我得著上帝ê恩典kap聖經中ê啟示真大，感覺真快樂kap感謝。痟醫生真多謝。(徛起來佮醫生握手)。

醫生： 華博士，毋知你肯做保證人chhoā宋博士出院無？但--是有一個條件，就是出院後馬上送宋博士坐船轉去中國。

華教授：院長，我肯做保證人，請你隨時辨理准宋博士出院。

醫生：  (護士提卡片予醫生，醫生簽字。)。

宋博士，我准你出院，恭喜。

華夫人：  宋博士恭喜，請來去阮兜行行。(大家握手離開)。

第9幕：宋牧師客廳。

佈置：佮出國前siāng款。

幕後ê放送：宋博士離開鄉里、本國佮父母已經7年半。1927年11月8日，身軀穿一領粗布長衫，手捾行李轉來故鄉踏入客廳。

宋牧師：你是啥人？

宋博士：  A-pa，我是約翰。

宋牧師：  Hò͘!你正正是Chú-un，果然是起khong，啥物你是約翰。

宋博士：  A-pa，以前ê Chú-un已經死-lah，現在是有活命ê約翰轉來ê。

老母：Chú-un，Chú-un，我所疼ê囝Chú-un，你轉來lah，感謝主！呵咾主！我趕緊來刣你所愛食ê雞，也順紲通知Lîm親家， 親姆佮Kim-hoâ來(老母退出)。

宋牧師： Chú-un，你這件行李，以外猶有啥物物件無?

宋博士：  A-pa，我所有ê物件就是這个行李，內面是破閣舊ê衫褲nā-tiāⁿ，因為我所讀過去ê冊一切都燒了lah。

林親家：Chú-un恭喜，你平安轉來。(兩人握手)。

宋博士：  A-pa，平安！恭喜！

林親姆：Chú-un，恭喜！

宋博士：  A母，平安！(大家握手)。

宋博士：  Kím-hoâ平安，真多謝，我出國中父母得著你ê幫忙，真多謝。(兩人握手，Kím-hoâ流目屎，吳校長行入來)。

吳校長：  宋博士恭喜！

宋博士：  吳校長平安，(握手，siāng時老母捧飯菜入來，Kím-hoâ馬上kā幫忙，大家坐做夥，宋牧師起來感謝)。

宋牧師：多謝天父上帝，阮ê喙著稱讚你ê權能，你ê thiàⁿ-thàng，你ê憐憫予阮袂測度得，你賞賜我ê囝兒Chú-un， 7年半久出國，今仔日平安轉來，全家歡喜相見，阮深深感謝不盡，今後一切ê事求你kā阮安排。現在阮beh享受ê代先靠耶穌ê名感謝。À-bēng。  (大家盡力食，食了後博士徛起來)。

宋博士：敬愛ê校長，a-pa， a母佮諸位。我佮恁離別7年半，今日平安轉來，看見大家平安，真快樂，感謝上帝ê鴻恩。我雖然佇美國得著化學博士，也得著金匙獎章。但--是博士ê博士ê文憑佮獎章已經kā tìm落去太平洋lah，我所讀過ê冊全部kā燒了lah，只有帶一本，是我讀40遍ê聖經轉來而已。以前ê Chú-un已經死lah，現在是救主耶穌kā我改名ê約翰teh活。今後一切攏是趁主ê命令，指示來活而已。

宋牧師：Chú-un，你已經提博士轉來，也著替我趁一點仔錢來幫贊家內ê生活費，因為現在我ê月給 chiah有35箍nā-tiāⁿ。

宋博士：  A-pa，我得著化學博士ê時，北京大學ê醫學院長有拍電報來beh請我去教冊，年俸beh一萬箍，我有kā伊拒絕lah。我畢業ê大學叫我去北京大學，專攻化學，我有kā伊拒絕。世間一切ê名，lī我無緣，只有為主傳福音是我一生ê使命。

吳校長：  宋博士，你ê名聲傳遍美國，我攏知-影，不過現在你猶未決定方針，暫時來母校教化學好無？自然我袂阻止你向學生傳道ê事。

宋博士：既然校長ê好意，我歡喜接受，自然我也有意思向學生傳道。

老母：Chú-un，你今仔日轉來，大家都是真歡喜，你已經25歲， Kím-hoâ也是25歲，我想近日中來舉行結婚典禮是最好，最要緊ê事。

宋博士：  A母thiàⁿ-thàng 恩深無極，雞煮了真好食。結婚ê事請a-pa， a母設法就是，我無意見。

老母：毋知親家，親姆怎樣，啥物意見？

林親姆：當然阮無異議，贊成，也會盡量趕緊幫贊Kím-hoâ備辦嫁妝。

林親家：  親家， 親姆真多謝，予恁請真飽，請Chú-un你chiah常來阮兜thit-thô，阮先失禮。Kím-hoâ你chiah遮幫忙親姆， khang-khè做了chiah轉來。你請。

(待續)