宋尚節博士 (5-2)

Sòng Siōng-chiat Phok-sū (5-2)

文獻資訊

項目	資料
作者	蔡愛義 Chhoà ài-gī
卷期	台灣教會公報
卷期	第925號
日期	1964/1
頁數	14

白話字（原文數位化）

OĀ-KE̍K

Sòng Siōng-chiat Phok-sū(V)

Chhoà ài-gī chok

1964.01.01 925 kî P14

In-uī tiòng liáu Mô͘-kuí ê khuí-kè, hoan-e̍k Hu̍t-keng, Tō-tek-keng, jî-chhiáⁿ khì chē-siân, siōng-keng, siūⁿ beh kiû kái-thoat.  Tān-sī kiat-kio̍k sī ke-thiⁿ goá ê thòng-khó͘ kap ba̍k-sái jî-í, Chú Iâ-so͘ kiû Lí khó-lîn Lí ê kiáⁿ-jî.  Goá sī hòng-tōng chú.  Goá í-keng koat-ì hoán-hoé jīn-choē lah.  Kiû Lí iōng Lí ê pó-huih soé-tû goá ê choē, hō͘ goá chiâⁿ-choè têng-thâu-siⁿ ê lâng.  Kiû Lí ê Sèng Sîn éng-oán tiàm tī goá sim-lāi, choè goá ê Chú.

Goá nā bô tit-tio̍h Chú ê Sîn tiàm tī goá sim-lāi, goá beh cháiⁿ-iūⁿ ū lêng-le̍k thang choè thoân-tō ê lâng.  Chú ah, kiû Lí hián-chhut Lí ê toā chû-pi, toā lîn-bín, khoàⁿ-kò͘ thòng-khó͘ lâu ba̍k-sái kàu beh sí ê kiáⁿ-jî, hō͘ goá ū têng-thâu-siⁿ ê un-tián, chiong-sin(sic.) lâi hōng-hiàn hō͘ Lí, choè Lí chīn-tiong ê lô͘-po̍k (Hut-jiân sek-lāi ū toā-kng).

Hòng-sàng ê siaⁿ:  Soè-kiáⁿ, lí ê choē sià lah, chū kin-á-ji̍t khí, Goá kā lí kái miâ choè Iok-hān, in-uī kiâⁿ soé-lé ê Iok-hān it-seng uī goá choè kan-chèng, lí it-seng iā beh uī goá choè kiàn-chèng thoân hok-im.

Sòng Phok-sū:  Goá ê Chú, goá kám-siā Lí, o-ló Lí.  Lí ê un-tián sù goá pêng-an.  À-bēng.

Phian-chiá chù:  Sòng Phok-sū tī Hia̍p-hô Sîn-ha̍k-īⁿ tha̍k liáu boē thang moá-ì, sim-lāi ū hoân-būn, che sī ū-iáⁿ; in-uī bô lūn sím-mi̍h só͘-chāi, kì-jiân sī lâng só͘ pān ê, to ū thang hoān-hiâm ê só͘-chāi; chóng-sī Hia̍p-hô Sîn-ha̍k-īⁿ iā ū i ê kòng-hiàn kap ek-chhù.  Só͘-í nî-nî tuì lán ê kàu-hoē iā ū chin toā ê pang-chān.  Chū tī chá-chêng Lâu Chín-hong Bo̍k-su khì liû-ha̍k, chiū-sī chit-keng Sîn-ha̍k-īⁿ ê chiân-sin.  Kàu tī chiàn-āu, N̂g Chú-gī, Khó͘ Heng-jîn, N̂g Chiong-hui, Lâu Hoâ-gī, Sòng Choân-sēng, Tiuⁿ Tek-hiong, Ko Chiau-liông, Tân Sek-chong chiah ê bo̍k-su á-sī sian-siⁿ, kap Pún-pò chú-pit lóng sī tī chia tit-tio̍h chióng-ha̍k-kim siū chō-chiū ê.  Chiah ê lâng só͘ choè sui-jiân m̄-sī chiâu-pī oē hō͘ lâng moá-ì, iáu-kú tuì lán kàu-hoē iā sī ū ēng sim ēng kang beh chiong tī Hia̍p-hô Sîn-ha̍k-īⁿ só͘ chiap-siū tio̍h ê hó-chhù thang lâi lī-ek lán ê kàu-hoē.  Só͘-í chhin-chhiūⁿ Sòng Phok-sū ê uí-tāi kap kòng-hiàn lán tio̍h to-to ha̍k-si̍p, siāng sî tuì Hia̍p-hô Sîn-ha̍k-īⁿ oē thang kòng-hiàn ê ek-chhù, iā ǹg-bāng tho̍k-chiá iā ha̍k-si̍p oē tio̍h, sī só͘ ǹg-bāng.

TĒ 6 BŌ͘:  Hia̍p-hô Sîn-ha̍k-īⁿ ê hāu-mn̂g.

Pò͘-tì:  Pò͘-kéng, Tāi-ha̍k ê oán-kéng.

Bō͘-āu hòng-sàng:  Sòng Phok-sū thiaⁿ-tio̍h Chú ê siaⁿ kóng, “Soè-kiáⁿ, lí ê choē sià lah, lí ê miâ kái choè Iok-hān.  Í-āu sim-tiong ê khoài-lo̍k boē tàng hêng-iông.  chóng-sī tī Hia̍p-hô Sîn-ha̍k-īⁿ ê hoân-būn iáu-kú boē siau-soàⁿ.

Hia̍p-hô Sîn-ha̍k-īⁿ-tiúⁿ:  Sòng Phok-sū, goá khoàⁿ lí kūn-lâi sin-thé chin soe-jio̍k.  Lí ji̍p-o̍h í-lâi poàⁿ-nî kú, lí chi̍t lâng si̍t-chāi choè liáu 3 ê lâng ê kang, tha̍k liáu 3 lâng hūn ê chheh.  uī-tio̍h thé-liām lí cheng-sîn jio̍k-thé ê phî-lô, goá ū thè lí pān-lí siâⁿ-goā chi̍t keng pīⁿ-īⁿ hō͘ lí khì hiu-sek chēng-ióng.

Sòng Phok-sū:  Kiám ū che sū mah?

ĪN-tiúⁿ:  Si̍t-si̍t chāi-chāi lah, lí khì hiu-sek chi̍t lé-pài, tán-hāu cheng-sîn pá-chiok í-āu chiah koh tńg lâi tha̍k-chheh.

Sòng Phok-sū:  To-siā īⁿ-tiúⁿ ê pang-bâng, goá ji̍p-lâi khì the̍h goá ê ji̍t-iōng-phín.

ĪN-tiúⁿ:  Pīⁿ-īⁿ it-chhè oē chioh lí, bô su-iàu, bô su-iàu, chit uī pêng-iú oē kap lí khì.

TĒ 7 BŌ͘:  Cheng-sîn pīⁿ-īⁿ.

Pò͘-tì:  Pīⁿ-sek-lāi bîn-chhn̂g chi̍t tiuⁿ, í-á 3 liâu, toh chi̍t tè, toh-téng ū io̍h-chuí kan-á, tê-koàn, tê-au.

(I-seng kap hō͘-sū kiâⁿ ji̍p pâng-keng).

I-seng:  Sòng Phok-sū, cha-mî hó khùn bô?  Lí ū chhut toā-siaⁿ gîm-si bô?

Sòng Phok-sū:  Chin hó khùn, goá bô toā siaⁿ gîm-si.

(Thāi-sio̍k)

漢羅（Ùi原文改寫）

話劇

宋尚節博士(V)

蔡愛義 作

1964.01.01 925 期 P14

因為中了魔鬼ê詭計，翻譯佛經，道德經，而且去坐禪，誦經，想beh求解脫。但是結局是加添我ê痛苦kap目屎而已，主耶穌求你可憐你ê囝兒。我是放蕩子。我已經決意反悔認罪lah。求你用你ê寶血洗除我ê罪，予我成做重頭生ê人。求你ê聖神永遠踮佇我心內，做我ê主。

我若無得著主ê神踮佇我心內，我beh怎樣有能力通做傳道ê人。主ah，求你顯出你ê大慈悲，大憐憫，看顧痛苦流目屎到beh死ê囝兒，予我有重頭生ê恩典，從新來奉獻予你，做你盡忠ê奴僕(忽然室內有大光)。

放送ê聲:細囝，你ê罪赦lah， 自今仔日起，我kā你改名做約翰，因為行洗禮ê約翰一生為我做干證，你一生也beh為我做見證傳福音。

宋博士:我ê主，我感謝你，呵咾你。你ê恩典賜我平安。À-bēng。

編者註:  宋博士佇協和神學院讀了袂通滿意，心內有煩悶，這是有影;因為無論啥物所在，既然是人所辦ê， to有通犯嫌ê所在;總是協和神學院也有伊ê貢獻佮益處。所以年年對咱ê教會也有真大ê幫贊。自佇早前劉振風牧師去留學，就是這間神學院ê前身。到佇戰後，黃主義，許興仁，黃彰輝，劉華義，宋泉盛，張德香，高昭良，陳室宗chiah-ê牧師á是先生，kap本報主筆攏是佇遮得著獎學金受造就ê。 Chiah-ê人所做雖然毋是齊備oē予人滿意，猶過對咱教會也是有用心用工beh將佇協和神學院所接受著ê好處通來利益咱ê教會。所以親像宋博士ê偉大佮貢獻咱著多多學習，siāng時對協和神學院oē通貢獻ê益處，也向望讀者也學習oē著，是所向望。

第6幕:協和神學院ê校門。

佈置: 佈景，大學ê遠景。

幕後放送:  宋博士聽著主ê聲講：「細囝，你ê罪赦lah，你ê名改做約翰。以後心中ê快樂袂當形容。總是佇協和神學院ê煩悶猶過袂消散。

協和神學院長:宋博士，我看你近來身體真衰弱。你入學以來半年久，你一人實在做了三个人ê工，讀了3人份ê冊。為著體念你精神肉體ê疲勞，我有替你辨理城外一間病院予你去休息靜養。

宋博士:  kiám有這事mah?

院長:實實在在lah，你去休息一禮拜，等候精神飽足以後chiah閣轉來讀冊。

宋博士:多謝院長ê幫忙，我入來去提我ê日用品。

院長:病院一切oē借你，無需要，無需要，這位朋友oē佮你去。

第7幕:精神病院。

佈置:病室內眠床一張，椅仔3liâu，桌一塊，桌頂有藥水矸仔，茶罐，茶甌。

(醫生kap護士行入房間)。

醫生: 宋博士，昨暝好睏無？你有出大聲吟詩無？

宋博士:真好睏，我無大聲吟詩。

(待續)