Má-in醫生傳(4)
Má-in I-seng-toān(4)
文獻資訊
| 項目 | 資料 |
|---|---|
| 作者 | 周淑慧 Chiu Siok-huī |
| 卷期 | 台灣教會公報 |
| 卷期 | 第923期 |
| 日期 | 1963/12 |
| 頁數 | 15 |
白話字（原文數位化）
MÁ-IN I-SENG-TOAN（4） (Duncan Main of China)
P. J. Doherty chok
Chiu Siok-huī e̍k
1963.12.01 P.15
Tē 5 chiuⁿ
Au (Apricat) i-seng lâi lah! khah siám, khah siám leh! Gín-ná thiaⁿ-tio̍h i-seng ê lêng-á siaⁿ ê sî, in chin hoaⁿ-hí tiô-thiàu, toā siaⁿ kiò i-seng ê Tiong-kok miâ. Tiapá-kú in chiū khoàⁿ-kìⁿ Má-in I-seng khiâ i siông-siông the khiâ ê lû-á, ti̍t-ti̍t khiâ lâi.
Gín-ná cháu chìn-chêng tè i kiâⁿ. I chin hoaⁿ-hí ê khoán-sit, koân-koân sut i ê bé-piⁿ, koh oa̍t-thâu ǹg in bî chhiò, m̄-bián chio in chham-ka i ê pì-bi̍t-hoē-bî-chhiò-in iā lóng sī hoē-oân lah!
Hut-jiân-kan i tioh bé-oaⁿ, thêng leh, thiàu lo̍h-lâi. I kéng chi̍t ê choè soè-hàn chhēng choè phoà ê saⁿ ê gín-ná, kiâⁿ oá-khì, ha̍p i ê chhiú, tìm chi̍t-ē thâu, chin giâm-siok mn̄g kóng, “Tāi-jîn chá-khí ū chia̍h-pn̄g bô? Kui-kûn ê gín-ná chhut hoaⁿ-hí ê siaⁿ, ēng chńg-thâu-á lâi pí khoàⁿ in chá-khí chia̍h kuí oáⁿ, chi̍t ki chńg-thâu-á piáu-sī chi̍t oáⁿ.
Ū chi̍t ê lāu hoān-chiá kiâⁿ oán-lâi, i-seng oē jīn-tit i, kā i chhéng-an, chit ê lāu sin-sū kap hiah ê gín-ná pîⁿ hoaⁿ-hí.
Tuì Má-in I-seng kàu Hâng-chiu ê 10 nî āu, i ê miâ-siaⁿ í-keng chin tháu. I kui-kok hioh-nî chài-lâi ê sî, tit-tio̍h sēng-tāi ê hoan-gêng, uī-tio̍h beh khèng-chiok i ê kui-kok, Boán-cho̍k chiong-kun chiau-thāi i-seng, i-seng-niû hù 18 oáⁿ chhài ê toā iân-sia̍h, ū pe̍h-iàn-thng, hún-chiáu-nn̄g, hî-chhì, siông-jiông, soah-bé koh ū pò͘-teng(Pudding).
Kā in seh-siā liáu-āu, Má-in kā in kóng, i kè-e̍k beh khí hū-jîn-lâng ê pīⁿ-īn. Chiong-kun āu-lâi kā i kóng, hit ê pīⁿ-īⁿ nā khí hó, i ài i ê hū-jîn-lâng khì hia ji̍p-īn, i ê ba̍k-chiu ū pe̍h lāi-chiàng.
I-seng mn̄g i kóng, “Cháín-iūⁿ m̄ hiān-chāi lâi chhiú-su̍t? Beh kàu pīⁿ-īn khí hó tio̍h koh saⁿ nî.”
Nā-sī chiong-kun ìn kóng, keng thun-lún chin-choē nî, koh thun-lún tiap-á-kú sī bô iàu-kín. Goá ài i choè lí sin pīⁿ-īⁿ ê thâu chi̍t ê hoān-chiá.
Só͘-í Khu-bu-lái--, Má-in án-ni kiò i-ê hū-jîn-lâng sī sin pīⁿ-īⁿ-Hâng-chiu Hū-jîn i-īⁿ (C. M. S.) thâu chi̍t ê siu-iông-chiá. Chin kai-chài, chhiú-su̍t chin sêng-kong.
“Hit ê lāu hū-jîn-lâng chin kám-kek. Ná-chún it-seng ê goān-bōng sī oē thang koh khoàⁿ-kìⁿ Se-ô͘” Má-in I-seng-niû kā i ê tiōng-hu kóng.
Nā-sī i ê tiōng-hu kóng-chhiò ìn kóng, “Chin bêng thang chai, lán ê Khu-bu-lái sī tāi-seng sàng i lâi choè to̍k-io̍h ê chhì-ēng-phín lah! Taⁿ i ū khoàⁿ-kìⁿ i tī-liâu ê sêng-kong, i chiū lâi kóng, i iā beh ji̍p lán ê pīⁿ-īⁿ, m̄-sī i lāi-chiàng, i ê ba̍k-chiu bô lūn khiâ-bé, phah-la̍h lóng chin hó.”
Taⁿ lí ū lia̍h-tio̍h chi̍t ê Tat-thán-jîn lah!
“Che sī sió-sū. Tio̍h kè-sio̍k piáu-hiān chhiò-iông.”
Sui-jiân Boán-cho̍k ê thâu-lâng choa̍t-tuì m̄-sī chi̍t ê kán-tan ê hoān-chiá, chióng-sī i kap i-seng ê iú-gî ū chìn-pō͘. Tó tī pīⁿ-sek, khoàⁿ i-seng the kang-chok. Ū chi̍t ji̍t, i tuì i-seng kóng, “Goá bē bat khoàⁿ tio̍h lâng lī-khui ka-kī ê kok-ka, uī-tio̍h choè chû-siān ê kang-chok khì kàu goā-kok ê só͘-chāi kang-chok, che sī chin tio̍h kiaⁿ ê sū.”
Má-in kā i soat-bêng hit ê goân-in, chit ê ióng-su kóng, Iâ-so͘ ê tō-lí sī chin ū chhū-bī, sui-jiân goá bē bat ài khì liáu-kái chit hāng tō-lí á-sī pa̍t-hāng. Goán Boán-cho̍k siông-siông sī chiàn-tò͘ ê lâng. Goán ê chó͘-sian siū Khu-bu-lái tāi-tè chhe-phài lâi chit ê lâm Tiong-kok ê siú-to͘, tī chia choè siú-pī-tuī, iā khoàⁿ-kìⁿ peh-sìⁿ ho̍k-chiông i.”
(Thāi-sio̍k).
漢羅（Ùi原文改寫）
MÁ-IN醫生傳（4） (Duncan Main of China)
P.J.Doherty chok
周淑慧譯
1963.12.01 P.15
第5章
Au (Apricat)醫生來啦！較閃，較閃咧！囡仔聽著醫生的鈴仔聲的時，in真歡喜趒跳，大聲叫醫生的中國名。霎仔久in就看見Má-in醫生騎伊常常咧騎的驢仔，直直騎來。
囡仔走進前綴伊行。伊真歡喜的款式，高高捽伊的馬鞭，閣斡頭向in微笑，毋免招in參加伊的祕密會-微笑-in也攏是會員啦！
忽然間伊擢馬鞍，停咧，跳落來。伊揀一个做細漢穿最破的衫的囡仔，行倚去，合伊的手，頕一下頭，真嚴肅問講，「大人早起有食飯無？規群的囡仔出歡喜的聲，用指頭仔來比看in早起食幾碗，一支指頭仔表示一碗。
有一个老患者行倚來，醫生會認得伊，共伊請安，這个老紳事佮遐的囡仔平歡喜。
對Má-in醫生到杭州的10年後，伊的名聲已經真敨。伊歸國歇年再來的時，得著聖代的歡迎，為著欲慶祝伊的歸國，滿族將軍招待醫生，醫生娘赴18碗菜的大筵席，有白燕湯，粉鳥卵，魚翅，松茸，煞尾閣有布丁(Pudding)。
共in說謝了後，Má-in共in講，伊計畫欲起婦人人的病院。將軍後來共伊講，彼个病院若起好，伊愛伊的婦人人去遐入院，伊的目睭有白內障。
醫生問伊講，「怎樣毋現在來手術？欲到病院起好著閣三年。」
若是將軍應講，經吞忍真濟年，閣吞忍霎仔久是無要緊。我愛伊做你新病院的頭一个患者。
所以Khu-bu-lái－，Má-in按呢叫伊-的婦人人是新病院-杭州婦-人醫院(C.M.S.)頭一个收養者。真佳哉，手術真成功。
「彼个老婦人人真感激。那陣一生的願望是會通閣看見西湖」Má-in醫生娘共伊的丈夫講。
若是伊的丈夫講笑應講，「真明通知，咱的Khu-bu-lái是代先送伊來做毒藥的試用品啦！今伊有看見伊治療的成功，伊就來講，伊也欲入咱的病院，毋是醫內障，伊的目睭無論騎馬，拍獵攏真好。」
今你有掠著一个靼靼人啦！
「這是小事。著繼續表現笑容。」
雖然滿族的頭人絕對毋是一个簡單的患者，總是伊佮醫生的友誼有進步。倒佇病室，看醫生咧工作。有一日，伊對醫生講，「我袂捌看著人離開家己的國家，為著做慈善的工作去到外國的所在工作，這是真著驚的事。」
Má-in共伊說明彼个原因，這个勇士講，耶穌的道理是真有趣味，雖然我袂捌愛去了解這項道理抑是別項。阮滿族常常是戰鬥的人。阮的祖先受Khu-bu-lái 大帝差派來這个南中國的首都，佇遮做守備隊，也看見百姓服從伊。」
(待續)。