盧賞牧師略傳
Lô͘ Sióng Bo̍k-su lio̍k-toān
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第923期 |
| 日期 | 1963/12 |
| 頁數 | 16 |
白話字（原文數位化）
Lô͘ Sióng Bo̍k-su lio̍k-toān
1963.12.01 P.16
Lô͘ Sióng Bo̍k-su chhut-sì tī Lí-káng（里港）, i ê lāu-pē miâ kiò choè Lô͘ Ek（盧益）, i ê lāu-bú miâ kiò-choè Khu Muī（邱妹）. Ka-têng keng-lông, i tī 1914 nî tuì Liâm Tek-lia̍t Bo̍k-su niá soé-lé.
I ê lāu-bú kè-sin liáu-āu, i ê lāu-pē ū koh chhoā āu-bú, miâ kiò-choè Khó͘ Choan, chit ê āu-bú chin thiàⁿ i , tī i 22 hè ê sî, i ê āu-bú ū kó͘-lē i ji̍p Sîn-ha̍k-īⁿ, tān-sī keng-chè boē tú-hó, só͘-í i ê āu-bú ū boē i ê kè-chng, só͘ toà lâi ê kim-khì hō͘ i choè ha̍k-huì lâi ji̍p Sîn-ha̍k-hāu.
1922 nî 3 ge̍h 23 ji̍t, pit-gia̍p liáu-āu, suî-sî siū Chhán-tiong kàu-hoē ê phèng-chhiáⁿ choè thoân-tō sian-siⁿ. 1923 nî kap Chiā Khó͘ Tiâu（謝許朝）Tiúⁿ-ló ê tióng-lú Chiā Khó͘ Khîⁿ kiat-hun. In hu-hū chin siong-hó, ū tit-tio̍h saⁿ lam jī lú, tióng-lâm hiān-chāi tī Tâi-lâm Sîn-ha̍k-īⁿ, tē jī ê hāu-siⁿ Un-sēng hiān-chāi tī Bí-kok Liú-iok séng choè bo̍k-su, tē saⁿ ê hāu-siⁿ tī Tiong-ha̍k kà-chheh.
Lô͘ Bo̍k-su uī Chú choè kang 39 nî kú, bat tiàm tī Chhân-tiong, Má-keng, Têng-san, Siān-hoà, Khoàⁿ-sai-koe, Kui-jîn téng, kàu-hoē bo̍k-hoē.
1955 nî tiàm Khoàⁿ-sai-koe jīm-lāi kiàn-tiok sin ê lé-pài-tn̂g, hui-siông chhut-la̍t, koh tī P. K. U. châi-bū kàn-sū jīm-lāi pang-chān Tāi-tông, Pak-mn̂g, Au-âng, Sam-it, Sin-hong téng, kàu-hoē ê kiàn-tn̂g, chhut chin toā ê le̍k-liōng. uī-tio̍h toê-iân mî ji̍t phun-cháu kòng-hiàn hui-siông, kàu hoē-iú ê só͘-chāi bō͘-koan, siông-siông hō͘ lâng bô hoan-gêng, tān-sī i iû-goân bô loé-chì, kè-sio̍k uī Chú chīn-tiong. Bat ū chi̍t pái, tī chi̍t só͘-chāi, ū chi̍t ê siàu-liân lâng tng-bīn chhut-chhuì pō-jio̍k i, piⁿ-á ê lâng thiaⁿ liáu toā boē choè tit, chha-put-to ài chhē ki-hoē hō͘ i kā Lô͘ Bo̍k-su chèng-sek hoē sit-lé. Tān-sī Lô͘ Bo̍k-su iû-goân thài-jiân chū-jio̍k, bô chi̍t-sut-á ê siū-khì.
Thang kóng i sī jīm lô jīm oàn ê bô͘-hoān-chiá.
Lô͘ Bo̍k-su tī 1963 nî 10 ge̍h 31 ji̍t, téng-po͘ 10 tiám 10 hun bōng Chú kéng-tiàu, tī 11 ge̍h chhoe 7 ji̍t hā-ngó͘ tī Khoàⁿ-sai-koe kàu-hoē kú-hêng kàu-hoē-chòng. Chham chòng ê lâng chē moá lé-pài-tn̂g, bô m̄ lóng toā siàu-liām i ê choè lâng.
漢羅（Ùi原文改寫）
盧賞牧師略傳
1963.12.01 P.16
盧賞牧師出世佇里港，伊的老爸名叫做盧益，伊的老母名叫做邱妹。家庭king-lông，伊佇1914年對廉德烈牧師領洗禮。
伊的老母過身了後，伊的老爸有閣娶後母，名叫做許Choan，這个後母真疼伊，佇伊22歲的時，伊的後母有鼓勵伊入神學院，但是經濟袂拄好，所以伊的後母有賣伊的嫁妝，所帶來的金器予伊做學費來入神學校。
1922年3月23日，畢業了後，隨時受田中教會的聘請做傳道先生。1923年佮謝許朝長老的長女謝Khó͘ khîⁿ結婚。In夫婦真相好，有得著三男二女，長男現在佇台南神學院，第二个後生恩盛現在佇美國紐約省做牧師，第三个後生佇中學教冊。
盧牧師為主做工39年久，捌踮佇田中，馬公，澄山，善化，看西街，歸仁等，教會牧會。
1955年踮看西街 任內建築新的禮拜堂，非常出力，閣佇P.K.U.財務幹事任內幫贊大同，北門，漚汪，三一，新豐等，教會的建堂，出真大的力量。為著題捐 暝日奔走貢獻非常，到會友的所在募捐，常常予人無歡迎，但是伊猶原無餒志，繼續為主盡忠。捌有一擺，佇一所在，有一個少年人當面出喙暴辱伊，邊仔的人聽了大未做得，差不多愛揣機會予伊共盧牧師正式會失禮。但是盧牧師猶原泰然自若，無一屑仔的受氣。
通講伊是任勞任怨模範者。
盧牧師佇1963年10月31日，頂晡10點10分墓主揀召，佇11月初7日下午佇看西街教會舉行教會葬。參葬的人坐滿禮拜堂，無毋攏大數念伊的做人。