Má-in醫生傳(1)
Má-in I-seng-toān(1)
文獻資訊
| 項目 | 資料 |
|---|---|
| 作者 | 周淑慧 Chiu Siok-huī |
| 卷期 | 台灣教會公報 |
| 卷期 | 第919期 |
| 日期 | 1963/10 |
| 頁數 | 6 |
白話字（原文數位化）
MÁ-IN I-SENG-TOAN (Duncan Main of China)
P. J. Doherty chok
Chiu Siok-huī e̍k
1963.10.01 P.6-7
Chá-chêng soan-kàu-su thoân hok-im lâi kàu Tiong-kok ê chêng-hêng sī siáⁿ khoán. Tī chia ū chit uī sī Tiong-kok thoân-kàu ê sian-hong, tit-tio̍h Chiu Siok-huī lú-sū hoan-e̍k tī chia, ǹg-bāng oē to-to lī-e̍k tāi-ke.
“Toē-chiūⁿ ê thian-tông” (Heaven Below) chiah nih kú iáu-bē kàu “Tī chit tiâu bô chin cheng-khì, àm-sàm ê koe-lō͘.” MÁ-IN Tán-kan (Duncan Main) Sian-siⁿ khoàⁿ i sì-uî ê koe-lō͘ ēng tām-po̍h So͘-kek-lân chho͘-chho͘ ê siaⁿ-tiāu án-ni kóng. Che sī chi̍t tiâu noā-thô͘ kham-khia̍t bô pîⁿ ê chio̍h-thâu-lō͘. Lō͘-piⁿ ê siang-pêng-chhiûⁿ sī ēng liâm-thô͘ kô͘ ê, ū am-cham thǹg-theh ê gín-ná tī lō͘-nih cháu-lâi cháu-khì, teh siám tī lō͘-piⁿ khioh chiah ê koe-á, káu-á. Ū taⁿ tāng-tàⁿ ê ku-lí toā sian teh hoah. “ Hé-ò͘! Hé-ò͘!” ū khit-chiah tī lō͘-piⁿ ai-kiû. “MÁ-IN” hit ê chhoā-lō͘ ê Eng-kok lâng ǹg hit ê sin lâi ê lâng-kheh kóng, “Chia chiū sī Tiong-kok ê sio̍k-gú só͘ kóng, “Thiⁿ-téng ū Thian-tông, toē-chiūⁿ ū So͘-chiu, Hâng-chiu” (siōng ū Thian-tông, hā ū So͘ Hâng) ê só͘-chāi lah.”
MÁ-IN ba̍k-chiu lô-lô, chù-ì khoàⁿ piⁿ-á o͘-hiā ê kē chhù-á, tuì he soè-soè ê mn̂g, ū lâng, koe, hô͘-sîn teh chhut-ji̍p, gín-ná poa̍h-tó teh toā siaⁿ háu. “Goá tī ài-teng-pó ê pîn-bîn khut bat khoàⁿ-tio̍h chiah bái ê chêng-hêng, chóng-sī Hâng-chiu chit ê toē miâ hō͘ goá kî-thāi sī chi̍t uī khah hó ê só͘-chāi.”
Hit-sî chi̍t ê moá-sin siⁿ lia̍p-á ê khit-chia̍h, pê oá chi̍t tàⁿ tiám-sim-tàⁿ. MÁ-IN chi̍t-ē kiâⁿ-oá khì ê sî, khit-chia̍h soà phâng oáⁿ ǹg i kiû-khit. I àⁿ-lo̍h khoàⁿ, chin tio̍h kiaⁿ. “Thái-ko!” Hit ê khit-chia̍h ê kha í-keng noā beh liáu lah! “Kiaⁿ sí lâng! cháiⁿ-iūⁿ bô siat-hoat pàng in án-ni?” I chhun-chhiú the̍h chîⁿ chhut-lâi, “Muî Sian-siⁿ, chhiáⁿ lí boé chi̍t oáⁿ chia̍h-mi̍h hō͘ i. Goá ê oē-gú iáu boē thong.” MÁ-IN án-ni pài-thok chhoā-lō͘ ê sian-siⁿ.
Tī i sì-uî ê seng-lí lâng chhut kî-īⁿ ê siaⁿ, ū Tiong-kok lâm-hong chhiùⁿ koa-á-tiāu ê siaⁿ, koh ū chi̍t ê hoah kóng, “Âng-mn̂g hoan, Iûⁿ kuí-á.”
MÁ-IN Sian-siⁿ mn̄g kóng, “He sī sím-mi̍h ì-sù?”
Muî Sian-siⁿ kā i soat-bêng, “Kóng lí sī Se-iûⁿ kuí, âng-mn̂g-hoan lah!”
MÁ-IN Sian-siⁿ chhun-chhiú ǹg hit ê chih-chuh ê siàu-liân gín-ná pí chi̍t-ē, gín-ná tio̍h kiaⁿ, peh khí-kha cháu. Jiân-āu oa̍t-thâu khoàⁿ-tio̍h chi̍t ê goā-kok lâng ê ba̍k-chiu tńg chi̍t-ē, i soà chhiò chhut-lâi, chio-chi̍p i ê tâng-phoāⁿ oá-lâi.
Siū chiah ê i-ho̍k lām-luì ê gín-ná tuī pau-uî, chiah ê soan-kàu-su koh chìn-chêng kiâⁿ kè chi̍t tiâu ūn-hô ê kiô.
“Tī chia ū kui chheng tiâu chit khoán ê kiô.” Muî Sian-siⁿ soat-bêng kóng, “In-uī ū chin-choē tiâu ūn-hô, só͘-í kè-khì 8-900 nî kú chin chhut-miâ.” Lí khoàn …… nn̄g lâng chiū thêng kha tī hia, tú-tú khoàn-kìⁿ ū lâng tò chi̍t tháng lah-sap tī chuí-lāi.
MÁ-IN chiū kóng, “Che hō͘ goá siūⁿ-tio̍h Tap2-put-leng(Dublin Jarvey: ài-ní-lân kok ê siú-to͘ ê sái bé-chhia) ê kò͘-sū. Ū lâng mn̄g i kóng, siáⁿ-sū i-seng chiong pīn-lâng sàng kàu Lí-hui ê thê-hoāⁿ khiā-khí, hoê-tap sī án-ni kóng, “Ah! sī in-uī in ê bī thài bái, kàu-gia̍h thang sat sí só͘ ū ê to̍k-khún.”
In tāi-ke ná chhiò ná kiâⁿ kàu chi̍t tiâu khah khoah pîⁿ-tháⁿ ê koe-lō͘. Siang-pêng ū chin kian-kò͘ ê chhù, Ta̍k keng chhù ū tiàu iû-chhat ê tiàm-hō-pâi, á-sī tiû-pò͘ siù ê pò͘-liâu.
Tiàm-kháu ū pâi kok sek, kok chióng ê hoè.
Chia sī lēng-goā chi̍t bīn ê Hâng-chiu-thang kóng sī hó ê chi̍t bīn. Lán teh-beh kiâⁿ kàu uī lah.” Muî Sian-siⁿ chhiú kí thâu-chêng suí ê lō͘-piⁿ chin-chiàⁿ án-ni kóng. Si̍t-chāi in hiān-chāi só͘ teh kiâⁿ ê sī te̍k-pia̍t ê koe-lō͘, chheng-khì, chéng-choê, koh lō͘-piⁿ ū chhiū-á, khong-khì ná-chún chuí-téng sin-sian ê bî-hong. Ta̍uh-ta̍uh oē thang khoàⁿ-tio̍h sió soaⁿ lun-á. Tiàm-nih só͘ pâi ê sī ko-kuì ê tiû, toān. Koe-lō͘ ê lâng só͘ chhēng ê iā lóng sī ēng chit keng tiàm, in kám-kak chin chhù-bī, thêng-kha lâi khoàⁿ lâng ēng tek-á kap choá teh choè choá hō͘-soàⁿ, iā ū piáⁿ-tiàm teh choè ko-kuì hó-chia̍h ê piáⁿ.
Muî Sian-siⁿ kóng, “Chia chiū-sī Thiⁿ-siâⁿ, sī tuì i ê hong-hù, iu-siù tit-tio̍h chit ê miâ.”
“Sī sím-mi̍h lâng hō ê?”
“Chiū-sī choè chhut-miâ ê Má-khó, Pó-lô tī sò͘ sè-kí í-chêng, Goân-tiâu tóng-tī ê sî-tāi, lâi hóng-būn chit só͘-chāi ê sî. Hiān-chāi sī 1881 nî, án-ni sī iok-lio̍k 600 nî chêng lah!”
Lō͘-nih in tú-tio̍h chit ê Tiong-kok lâng ê sin-sū, in iā siang-chhiú ha̍p-oá kiân chin-choē ê kiok-kiong-lé kap i chhéng-an.
“I chhiáⁿ lán khì i ê m̄-chiâⁿ só͘-chāi.” Muî Sian-siⁿ soat-bêng kóng, “I sī soan-kàu-su ê hó-pêng-iú. I thiaⁿ-tio̍h lí thâu chi̍t pái lâi Hâng-chiu, i kóng tek-khak tio̍h khì khoàⁿ Se-ô͘. Tong-jiân lí tio̍h khì. Taⁿ tuì chia lâi.”
In oat chi̍t ê kak, ū chi̍t ê hui-siông bí-lē ê ô͘ chhut-hiān tī in ba̍k-chêng. Sī chi̍t ê Chuí-chiⁿ-ô͘, ná-chún hoán-chiò toā ê bōng-oán-kiàⁿ ê kiàⁿ-bīn chi̍t iūⁿ, koh iā hoán-chiò chháu-le̍k-sek ê soaⁿ lun-á kap hé-hu-sek ê thah.
Hit ê thah tuì in ê kha ǹg soaⁿ hit pêng tián-khui iok ū 3 lí ê hn̄g. Bí-lē chhàn-lān ê ô͘-bīn, tī ciàⁿ-pêng ê hoān-piⁿ ū kuí tè ko͘-li̍p ê sió-tó.
“Khoàⁿ tio̍h chit ê kéng-siōng lí beh cháiⁿ-iūⁿ kóng?” Muî Sian-siⁿ chin tek-ì ê khoán mn̄g i.
“Oh! boē bái! chóng-sī goá siūⁿ kiám oē pí Lô-bûn-ô͘ (Lomond: So͘-kek lân chhut-miâ ê ô͘) khah suí?”
Ū chi̍t tiâu hoāⁿ thàu ô͘-pin kàu ô͘-tiong ê tó, nn̄g lâng sàn-pō͘ tī hoāⁿ-téng ê sî, iā ū kiâⁿ-kè lī chuí kuí-nā chhioh koâiⁿ ê hoāⁿ, iā ū kiâⁿ-kè oan-kong-kiô, i ê chiu-uî sī khí tī chuí-tiong. Nn̄g lâng tī hia him-sióng sì-uî ê kéng-tì, ū chhái-sek chin suí ê chûn thêng tī sió-tó ê hoāⁿ-pin, tī hia ū tek-á kap liú-chhiū suî lo̍h-lâi, ū chiⁿ tek-si, chiáu tī téng-bīn pe kè.
“Bo̍k-koài Má-khó Pó-lô siá kóng sī Thiⁿ-siâⁿ. Tī sè-kan khó-lêng bô chi̍t uī pí chit ê ô͘ khah bí-lē khó-ài.”
“Thiⁿ-kha-ē” oē éng-oán khek-tiâu tī lí ê sim-lāi, chhin-chhiūn tī goá ê chi̍t iūⁿ.
Chóng-sī chit ê siàu-liân ê i-seng bô teh chù-ì khoàⁿ hit ê kéng-sek. I teh khoàn hoāⁿ-piⁿ thóng chhut-lâi ê chiam-chiam ê soan lun-á. Tī hia chí-ū chi̍t chō 7 chàn ê thah, koâiⁿ-koâiⁿ kiàn-li̍p tī khong-tiong, ū bî-bî ê hong tī hia teh chhe.
“Goá ài tī hia khí goá ê pīⁿīⁿ,” i chhun-chhiú kí chiam-thah soaⁿ án-ni kóng, chóng-sī hiah ê chai-iáⁿ Tiong-kok lâng ê thoân-thóng siūn hoat ê soan-kàu-su, chek-sî thê-chhut īⁿ-gī. “Lâng oē hoán-tuì, in oē kóng án-ni oē phò-hoāi in ê hong-suí, hong-suí oē éng-hióng in, koh chit ê chiam-thah sī oē toà hó-ūn hō͘ in……”
MÁ-IN i-seng tiām-tiām bô khui-chhuì, iáu-kú ū i ê koat-sim piáu-hiān tī i ha̍p-oá ê chhuì-tûn.
“Lí m̄-chai tī chia ê thoân-thóng ê le̍k-liōng ū joā-toā.” Lēng-goā chi̍t lâng chiap-soà kóng, “Lí tio̍h oē-kì-tit he sī í-keng ū kuí chheng nî ê le̍k-sú lah! Sī chin khùn-lân phah-phoà-pí A-phiàn-hun ê si̍p-koàn koh-khah khùn-lân.”
MÁ-IN i-seng kóng, “ Lí kóng án-ni, hō͘ goá siūⁿ tio̍h, lí ū kóng beh chhoā goá khì khoàⁿ A-phiàn-hun-liâu. Goá ài tuì hia khai-sí kang-chok. Lán chit sî chek-sî lâi khì khoàⁿ.”
O͘h! Lí si̍t-chāi sī chi̍t ê ióng-béng ê chheng-liân!” hit ê khah lāu ê soan-kàu-su án-ni kóng, chóng-sī i iā hoaⁿ-hí chìn-chêng chhoā-lō͘.
漢羅（Ùi原文改寫）
MÁ-IN醫生傳(Duncan Main of China)
P.J.Doherty 作
周淑慧譯
1963.10.01 P.6-7
早前宣教師傳福音來到中國的情形是啥款。佇遮有這位是中國傳教的先鋒，得著周淑惠女士翻譯佇遮，向望會多多利益大家。
「地上的天堂」(Heaven Below)才呢久猶未到「佇這條無真蒸汽，暗-sàm的街路。」Má-in Tán-kan (Duncan Main)先生看伊四圍的街路用淡薄蘇格籣粗粗的聲調按呢講。這是一條爛土坎坷無平的石頭路。路邊的雙爿牆是用黏土糊的，有am-cham thǹg-theh的囡仔佇路裡走來走去，咧閃佇路邊拾食的雞仔、狗仔。有擔重擔的ku-lí大聲咧喊。「火喔！火喔！」有乞丐佇路邊哀求。「Má-in」彼个chhoā路的英國人向彼个新來的人客講，「遮就是中國的俗語所講，「天頂有天堂，地上有蘇州，杭州」(上有天堂，下有蘇杭)的所在啦」
Má-in目睭濁濁，注意看邊仔烏瓦的低厝仔，對遐細細的門，有人、雞、胡蠅咧出入，囡仔跋倒咧大聲哮。「我佇愛丁堡的貧民窟捌看著才捌的情形，總是杭州這个地名予我期待是一位較好的所在。」
彼時一个滿身生粒仔的乞食，爬倚一擔點心擔。Má-in一下行倚去的時，乞食紲捧碗向伊求乞。伊向落看，真著驚。「癩ko！」彼个乞食的跤已經爛欲了啦！「驚死人！怎樣無設法放in按呢？」伊伸手提錢出來，「梅先生，請你買一碗食物予伊。我的話語猶未通。」Má-in按呢拜託chhoā路的先生。
佇伊四圍的生理人出奇異的聲，有中國南方唱歌仔調的聲，閣有一个喝講，「紅毛番，洋鬼仔。」
Má-in先生問講，「he是甚物意思？」
Muî先生共伊說明，「講你是西洋鬼，紅毛番啦！」
Má-in先生伸手向彼个chih-chuh的少年囡仔比一下，囡仔著驚，peh起跤走。然後越頭看著這个外國人的目睭轉一下，伊紲笑出來，招集伊的同伴倚來。
受遮的衣服襤褸的囡仔隊包圍，這的宣教師閣進前行過一條運河的橋。
「佇遮有規千條這款的橋。」梅先生說明講，「因為有真濟條運河，所以過去8、900年久真出名。」你看…兩人就停跤佇遐，拄拄看見有人倒一桶垃圾佇水內。
Má-in就講，「這予我想著Tap2-put-leng(Dublin Jarvey：愛爾蘭國的首都的駛馬車)的故事。有人問伊講，啥事醫生將病人送到Lí-hui的堤岸徛起，回答是按呢講，「啊！是因為in的米太bái，夠額通殺死所有的毒菌。」
In大家那笑那行到一條較闊平坦的街路。雙爿有真堅固的厝，逐間厝有召油漆的店號牌，抑是綢布繡的布料。
店口有排各色，各種的貨。
遮是另外一面的杭州-通講是好的一面。咱咧欲行到位啦。」梅先生手指頭前的路邊真正按呢講。實在in現在所咧行的是特別的街路，清氣，整齊，閣路邊有樹仔，空氣若圳水等新鮮的微風。沓沓會通看著小山崙仔。店裡所排的是高貴的綢、緞。街路的人所穿的也攏是用這間店，in感覺真趣味，停跤來看人用竹仔佮紙咧做紙雨傘，也有餅店咧做高貴好食的餅。
梅先生講，「遮就是天城，是對伊的豐富，優秀得著這个名。」
「是甚物人號的？」
「就是最出名的馬可，保羅佇數世紀以前，元朝統治的時代，來訪問這所在的時。現在是1881年，按呢是約略600年前lah！」
路裡in拄著這个中國人的紳士，in也雙手合倚行真濟的鞠躬禮佮伊請安。
「伊請咱去伊的毋成所在。」梅先生說明講，「伊是宣教師的好朋友。伊聽著你頭一擺來杭州，伊講的確著去看西湖。當然你著去。今對遮來。」
In斡一个角，有一个非常美麗的湖出現佇in目前。是一个水晶湖，若準反照大的望遠鏡的鏡面一樣，閣也反照草綠色的山崙仔崙仔佮火灰式的塔。
彼个塔對in 的跤向山彼爿展開約有3里的遠。美麗燦爛的湖面，佇正爿的岸邊有幾塊孤立的小島。
「看著這个景象你欲怎樣講？」梅先生真得意的款問伊。
「喔！未bái！總是我想敢會比Lô-bûn-ô͘ (Lomond：蘇格蘭出名的湖)較媠？」
有一條岸透湖邊到湖中的島，兩人散步佇岸頂的時，也有行過離水幾仔尺懸的岸，也有行過彎拱橋，伊的周圍是起佇水中。兩人佇遐欣賞四圍的景緻，有彩色真水的船停佇小島的岸邊，佇遐有竹仔佮柳樹垂落來，有青竹絲，鳥佇頂面飛過。
「莫怪馬可保羅寫講是天城。佇世間可能無一位比這个湖較美麗可愛。」
「天跤下」會永遠刻牢佇你的心內，親像佇我的一樣。
總是這个少年的醫生無咧注意看彼个景色。伊咧看岸邊捅出來的尖尖的山崙仔。佇遐只有一座7層的塔，高高建立佇空中，有微微的風佇遐咧吹。
「我愛佇遐起我的病院，」伊伸手指尖塔山按呢講，總是遐的知影中國人的傳統想法的宣教師，即時提出異議。「人會反對，in會講按呢會破壞in的風水，風水會影響in，閣這个尖塔是會帶好運予in……」
Má-in醫生恬恬無開喙，猶閣有伊的決心表現佇伊合倚的嘴唇。
「你毋知佇遮的傳統的力量有偌大。」另外一人接紲講，「你著會記得彼是已經有幾千年的歷史啦！是真困難拍破-比鴉片薰的習慣閣較困難。」
Má-in醫生講，「你講按呢，予我想著，你有講欲chhoā我去看鴉片薰寮。我愛對遐開始工作。咱這時即時來去看。」
喔！你實在是一个勇猛的青年！」彼个較老的宣教師按呢講，總是伊也歡喜進前chhoā路。