我所尊敬數念的師友
GOÁ SÓ͘ CHUN-KÈNG SIAU-LIĀM Ê SU-IÚ
文獻資訊
| 項目 | 資料 |
|---|---|
| 作者 | 王占魁 Ông Chiàm-khoe |
| 卷期 | 台灣教會公報 |
| 卷期 | 第920期 |
| 日期 | 1963/10 |
| 頁數 | 7 |
白話字（原文數位化）
GOÁ SÓ͘ CHUN-KÈNG SIÀU-LIAM Ê SU-IÚ
Ông Chiàm-khoe
1963.10.15 P.7
Lîm ián-sîn Bo̍k-su: (Lîm Chong-gī Phok-sū ê a-kong). I sī Tâi-lâm chhī lâng, sī chiân Chheng ê siù-châi; i uī-tio̍h lâi kà Muî Bo̍k-su, Lân I-seng, Liâm Bo̍k-su in ê Tâi-oân oē, soà tit-tio̍h tō-lí, āu-lâi soà lâi kà Tiong-o̍h ê Hàn-bûn. I sī goá Tiong-o̍h kap Sîn-ha̍k ê un-su. I ū kuí hāng khó-chhú.
1. I chin ài thoân tō-lí. I ka-kī tit-tio̍h chhin-lí, ài pò lâng saⁿ-kap ū hūn. La̍k ji̍t kà-chheh, lé-pài-ji̍t sī hioh-khùn-ji̍t, choē-choē lâng sī lī-ēng lé-pài-ji̍t beh thit-thô, á-sī choè su-kí ê tāi-chì. Nā Lîm Sian-siⁿ chiū-sī chio kuí ê ha̍k-seng kàu hiuⁿ-ē pò͘-tō; i m̄-nā ài kóng, sī ài lâng lâi sìn Iâ-so͘, i kiò ha̍k-seng siá phoe á-sī choè bûn, siōng ài ê toê chiū-sī “Khoàn-iú lâi sìn Iâ-so͘,” thang chai i tì-ì ài lâng lâi sìn Chú. Ha̍k-seng nā àm-sî bān siau-teng, nā kā kóng, teh pī-pān tō-lí, i chiū kóng m̄-nā tio̍h khoàⁿ chheh, iā tio̍h kî-tó lâi pī-pān. M̄-nā ài choè kiam ê, i iā ài choè choan-kang, só͘-í ū bián-kióng khó kàu-su, āu-lâi khì Tang-káng choè bo̍k-su. Hàn-bûn sī i pún-pâng, Sèng-keng Sîn-ha̍k sī goā-hâng, oē tit choè bo̍k-su sī siong-tong ê ló͘-le̍k. I iā ài pa̍t-lâng choè bo̍k-su: Ū chi̍t ji̍t kàu Toā-thâm, ū chi̍t ê ha̍k-seng tì chi̍t téng pe̍h bō-á (ヘルメツト), chi̍t ê lú-o̍h ha̍k-seng mn̄g Lîm Sian-siⁿ kóng, “Tì pe̍h bō-á hit ê sī sím-mi̍h bo̍k-su”? Lîm Sian-siⁿ hoaⁿ-hí kah, kín lâi kā chit ê siàu-liân kóng, lí tì chi̍t téng pe̍h bō-á chin ū kè-ta̍t, bó͘ lâng kóng, lí sī sím-mi̍h bo̍k-su, chiū-sī kóng lí pa̍t-ji̍t tio̍h ài choè bo̍k-su, kám-siā Chú, chit ê lâng kó-jiân ū coè bo̍k-su. Chiàu án-ni Lîm Bo̍k-su m̄-sī kan-ta ài kóng tō-lí, bo̍k-tek sī ài lâng tit-kiù, m̄-nā pún-sin ài choè bo̍k-su, iā ài ha̍k-seng choè bo̍k-su.
2. Hoān-sū kám-sia (I Thiap 5:18). Lîm Sian-siⁿ tit-kiù liáu chiū chin hoaⁿ-hí, put-sî gîm-si, chin khoài-lo̍k. Hit-sî Tiong-o̍h chiah 70 goā ê ha̍k-seng, sian-sN 3 ê, i kap Khó͘ Lêng-hûn Sian-siⁿ teh lûnliû tong-ti̍t, nā bô tongti̍t i chiū tò-khì chhù-nih. Tong-sî bô tiān-hé, ia bô chhiú-tiān, lō͘ ā bái, tio̍h kè chi̍t tiâu lō͘ kiò-choè Kim-ku chhiū-kha, ū chi̍t ji̍t lō͘-piⁿ lâng beh the̍h soa khui chi̍t khang chhim-chhim, Lîm Sian-siⁿ ná kiâⁿ ná gîm-si, soà poa̍h-lo̍h khut-té, kha-phīn-liâm hō͘ tîn-á lè chi̍t niá phê, huih chim-chim lâu, chin thiàⁿ, hoan-sin koh iáu oē khiā, oē peh khí-lâi téng-bīn, kiân khoàⁿ-bāi, koh oē kiâⁿ; chiū kám-siā Chú, o-ló Chú, bô hō͘ i kha tn̄g, á-sī koē-tio̍h kun, nā boē kîⁿ, chiū tio̍h toà chit khut-té khùn, chhī báng kàu thiⁿ-kng; in-uī hit tiâu lō͘ chió lâng kiâⁿ, sī sió lō͘. Kàu chhù kiò in tài-thài kóng, chin kám-siā Chú, goá poa̍h-lo̍h khut-té, kai-chài kha bô tn̄g, chhiú iā bô tn̄g, kan-ta kha-phīⁿ-liâm lè-tio̍h nā-tiān, io̍h-á kô͘-kô͘ teh, tāi-ke lâi kám-siā Chú. Phó͘-thong lâng beh chhoh mē, kóng chin-choē put-pêng ê oē, kóng khui khut-á ê lâng put tō-tek, ná kóng ná huì-khài, ná kan-khó͘. Lîm Sian-siⁿ i sī kám-sia Siōng-tè, bô hō͘ i tn̄g kha, iā bô koē tio̍h kun, iáu oē kiâⁿ, m̄-bián khùn thô͘-khut-á, chhī báng, ná siūⁿ ná kám-siā, nā m̄-sī tit-tio̍h kiù ê lâng, chiū bô chit khoán ê hoaⁿ-hí. Bān hāng sū saⁿ-kap lâi, hō͘ thiàⁿ Siōng-tè ê lâng tit-tio̍h lī-ek. Bān hāng sū teh lâi, m̄-sī i ka-kī teh lâi, si Siōng-tè hō͘ i lâi, m̄-sī bô in-toan lâi, sī beh lī-ek thiàⁿ Siōng-tè ê lâng, lán nā ngauh-nga̍uh-liām sī tuì Siōng-tè bô lé, lán hoan-hí sêng-siū ēng kám-siā ê sim; Siōng-tè beh hō͘ lán chai hit ê lī-ek.
漢羅（Ùi原文改寫）
我所尊敬數念的師友
王占魁
1963.10.15 P.7
林燕臣牧師：(林宗義博士的阿公)。伊是台南市人，是前清的秀才；伊為著來教梅牧師、藍醫生、連牧師in的台灣話，紲得著道理，後來紲來教中學的漢文。伊是我中學佮神學的恩師。伊有幾項可取。
1.伊真愛傳道理。伊家己得著真理，愛報人相佮有份。六日教冊，禮拜日是歇睏日，濟濟人是利用禮拜日欲thit迌，抑是做書記的代誌。若林先生就是招幾个學生到鄉下佈道；伊毋那愛講，是愛人來信耶穌，伊叫學生寫批抑是作文，上愛的提就是「勸友來信耶穌」通知伊致意愛人來信主。學生若暗時萬宵燈，若共講，咧備辦道理，伊就講毋那著看冊，也著祈禱來備辦。毋那愛做兼的，伊也愛做專工，所以有勉強考教師，後來去東港做牧師。漢文是伊本房，聖經神學是外行，會得做牧師是相當的努力。伊也愛別人做牧師：有一日到大潭，有一個學生戴一頂白帽仔(ヘルメツト)，一个女學學生問林先生講，「戴白帽仔彼个是甚物牧師」？林先生歡喜kah，緊來共這个少年講，你戴一頂白帽仔真有價值，某人講，你是甚物牧師，就是講你別日著愛做牧師，感謝主，這个人果然有做牧師。照按呢林牧師毋是簡單愛講道理，目的是愛人得救，毋那本身愛做牧師，也愛學生做牧師。
2.凡事感謝 (I帖5：18)。林先生得救了就真歡喜，不時吟詩，真快樂。彼時中學才70外个學生，先生3个，伊佮許靈魂先生咧輪流當值，若無當值伊就轉去厝裡。當時無電火，也無手電，路也bái，著過一條路叫做金龜樹跤，有一日路邊人欲提沙開一空深深，林先生那行那吟詩，紲跋落堀底，跤鼻liâm予藤仔lè一領皮，血涔涔流，真疼，翻身閣猶會徛，會爬起來頂面，行看覓，閣會行；就感謝主，呵咾主，無予伊跤斷，抑是拐著筋，若未行，就著蹛這堀底睏，飼蠓到天光；因為彼條路少人行，是小路。到厝叫in太太講，真感謝主，我跋落堀底，佳哉跤無斷，手也無斷，簡單跤鼻-liâm lè著若定，藥仔糊糊咧，大家來感謝主。普通人欲肏罵，講真濟不平的話，講開堀仔的人不道德，那講那憤慨，那艱苦。林先生伊是感謝上帝，無予伊斷跤，也無拐著筋，猶會行，毋免睏土堀仔，飼蠓，那想那感謝，若毋是得著救的人，就無這款的歡喜。萬項事相佮來，予疼上帝的人得著利益。萬項事咧來，毋是伊家己咧來，是上帝予伊來，毋是無因端來，是欲利益疼上帝的人，咱若ngauh-nga̍uh念是對上帝無禮，咱歡喜承受用感謝的心；上帝欲予咱知彼的利益。