宋尚節博士 (2)

Sòng Siōng-chiat Phok-sū (2)

文獻資訊

項目	資料
作者	蔡愛義 Chhoà ài-gī
卷期	台灣教會公報
卷期	第920期
日期	1963/10
頁數	12

白話字（原文數位化）

Sòng Siōng-chiat Phok-sū(II)

Chhoà ài-gī

1963.10.15  P12-13

1.  Chhiⁿ-ḿ :  (Khiā--khí-lâi).

Sòng Bo̍k-su, Bo̍k-su-niû kap chu-uī, lūn khí chit chân chhin-sū, chú-tōng sī goá.  Goân-lâi goán oē sìn Chú ji̍p-kàu sī Bo̍k-su ê khoàn-bián lâi tit-tio̍h ê, goá khoàⁿ Bo̍k-su goân-lâi sī chi̍t uī siù-châi, ka-têng iā chin hù-jū.  Tān-sī choè Bo̍k-su í-āu, chiām-chiām pîn-hân, thoân-tō iā chin chia̍h khó͘.  Put-kò goá sìn.  Siōng-tè tek-khak oē pó-pì i ê ka-têng.  Chú-un nn̄g hè ê sî goá khoàⁿ i toā thâu, toā khok-khok, hī-á toā bok-bok, bīn sī chin o͘-hng, chi̍t mî khàu kàu kng.  Sòng Bo̍k-su chhiò Bo̍k-su-niû, kóng thái oē siⁿ chit ê gín-ná bái koh khiap-sì, chóng-sī goá khoàⁿ liáu chin kah-ì, só͘-í goá kap goá ê tiōng-hu siong-liông, chiong Kím-hoâ lâi phoè hō͘ Chú-un khoàⁿ cháiⁿ-iūⁿ.  Goá ê tiōng-hu chàn-sêng, í-āu goá chiah tuì Bo̍k-su-niû kóng khí chit chân sū.  Bo̍k-su-niû kap Bo̍k-su siong-liông liáu-āu, iā chàn-sêng, chit ê sū keng-kè 15 nî, kin-á-ji̍t Bo̍k-su chiū-sī chhin-ke, si̍t-chāi sī chin ha̍p-sî koh ū ì-gī.  Tuì kin-á-ji̍t Chú-un sī goán ê kiáⁿ-sài, Chú-un, lí chhut-goā tio̍h gâu pó-tiōng sin-thé choè-iàu-kín.

(Kóng liáu chē lo̍h-lâi chia̍h tê).

Bo̍k-su-niû:  (Khiā--khí-lâi).

Î chhin-ke, chhiⁿ-ḿ , chin to-siā, chiong lí ê chhian-kim lâi sàng goá ê kiáⁿ Chú-un.  Tuì kim-ji̍t khí goá oē chin thiàⁿ Kím-hoâ, chhin-chhiūⁿ thiàⁿ ka-kī ê cha-bó͘-kiáⁿ.

Î chhin-ke:

Chú-un kiáⁿ-sài, Lí kiû ha̍k kiû kong-bêng siōng-chìn, si̍t-chāi chin kiong-hí.  Kim-hoâ goá iā tek-khak koán-kàu chek-tok, kiò i kim-āu tio̍h o̍h khîm, o̍h chhâi-hông kap liāu-lí, téng-téng.  ǹg-bāng chiong-lâi oē chiâⁿ-choè chi̍t ê hiân-chhe liông-bú, che chi̍t tiám-á kā lí sūn-hong( sàng âng-pau), goān Siōng Chú chiàu-kò͘ lí pêng-an kàu Bí-kok.

(Kóng liáu chē--lo̍h-lâi chia̍h piáⁿ).

Chú-un:

A-pa, a-bú, tiūⁿ-lâng, tiūⁿ-ḿ , Gô͘ Hāu-tiúⁿ kap chu-uī tông-ha̍k, tāi-ke chin to-siā.  Goá chū soè-hàn tit-tio̍h lín ióng-io̍k, thiàⁿ-sioh ê chêng chhin-chhiūⁿ soaⁿ hiah koân, hái hiah chhim, ēng oē kóng boē liáu, kim-āu chhut-goā, eng-kai ka-kī chim-chiok sin-thé, ló͘-le̍k tha̍k-chheh, hi-bōng bô koh ko͘-hū lín ê un-chêng, iā tông-sî chhiáⁿ lín pó-tiōng sin-thé, chiong-lâi pêng-an saⁿ-kìⁿ (kóng liáu koh chē--lo̍h-lâi).

Nn̄g uī tông-ha̍k:  Khiā--khí-lâi.

Sòng Bo̍k-su, Î Sian-siⁿ lín lióng-ka kiong-hí, goán kap Chú-un hiaⁿ tông-chhong 5 nî kú, lóng iáu bē bat thiaⁿ tio̍h chit chân hí-sū.  Kim-ji̍t thiaⁿ tio̍h si̍t-chāi chin hoaⁿ-hí, lîm-sî bô pī-pān lé-mi̍h, chí-ū goán nn̄g lâng lâi chhiùⁿ chi̍t chat si chiok-hok lín nn̄g uī bī hun ê hu-hū chiân-tô͘ hēng-hok khoài-lo̍k! (Gîm Sèng-si 216 siú tē 4 chat, gîm kàu bé-chām pò͘ bō͘ chiām pàng--lo̍h-lâi.  Lán koat-ì saⁿ-thiàⁿ ê koa iáu ū thiaⁿ-kìⁿ).

TE 2 BŌ͘:  Sòng Chú-un ê pâng-keng

Pò͘-tì:  Chi̍t tâi bîn-chhn̂g, 3 liâu í, chi̍t tè toh, toh-téng ū chheh, tiān-teng tâi, chi̍t tè chia̍h-toh, toh-téng ū poe-poâⁿ, ké-chí.  Chú-un tī sek-lāi kiâⁿ-lâi kiâⁿ-khì, chhiùⁿ “So͘ Bú bo̍k-iông” ê koa.

Bō͘-āu hòng-sàng:  Chú-un tī Bí-kok oē-su-lí Tāi-ha̍k tha̍k-chheh, tit-tio̍h Hoa Kàu-siū, chiū-sī Dr. Walker chin gâu ài-kò͘, chin gâu pang-chō͘.

Hoa Kàu-siū:  (Phah-mn̂g).

Chú-un, gâu chá.

Chú-un:  Hoa Kàu-siū gâu chá, chhiáⁿ lâi saⁿ-kap chia̍h chá-tǹg, chhiáⁿ chē!  (Hoa Kàu-siū chē--lo̍h-lâi, chú-un phâng poe, oáⁿ hō͘ Hoa Kàu-siū).

Hoa Kàu-siū:  Goá í-keng chia̍h pá, to-siā.  Chú-un, goá kin-á-ji̍t lâi pò lí chi̍t ê hó siau-sit, cha-hng ū kàu-siū hoē-gī, chèng kàu-siū to chheng-chàn lí ê sêng-chek iu-siù.  Pún-lâi ta̍k lâng to tio̍h tha̍k 4 nî chiah oē tit-tio̍h ha̍k-sū pit-gia̍p, chóng-sī lí tha̍k 3 nî chiū oē tit-tio̍h pit-gia̍p lah, chin kiong-hí.  Goá thoè lí siūⁿ, lí pit-gia̍p liáu-āu iáu sī tī lán ê Chiu-li̍p Tāi-ha̍k kè-sio̍k tha̍k se̍k-sū khah hó, goá iā í-keng thoè lí sin-chhéng chióng-ha̍k-kim lah, jî-chhiáⁿ lán chit ê só͘-chāi tuì lí ê kiān-khong sī chin hó, beh chhē kang-chok ê ki-hoē iā chin-choē.  Chi̍t-bīn goá kap goá ê hū-jîn-lâng iā oē sî-siông kap lí kìⁿ-bīn, goá iā oē thang kap lí sî-siông kè-sio̍k choè thoân tō-lí ê kang, in-uī lí ê káng-tō chin ū le̍k-liōng, chin siū Bí-kok lâng ê hoan-gêng.

Chú-un:  Hoa Kàu-siū, chin to-siā!  Chū goá lâi oē-su-lí Tāi-ha̍k, tit-tio̍h lí kap su-bú ê ài-kò͘ kap khoán-thāi, bû-bî put-chì, cheng-sîn-chiūⁿ, bu̍t-chit-chiūn ê an-uì chin toā, thang kóng lí sī goá tī Bí-kok tiong ê pē-bú.  Goá oē chun-chiàu lí thoè goá só͘ an-pâi, chi̍t-bīn kong-tho̍k se̍k-sū ha̍k-uī, chi̍t-bīn iā oē tuì kàu-siū tit-tio̍h Sèng-keng tiong ê kà-sī chin-lí, tông-sî iā oē kap Su-mi-su téng-téng ê pêng-iú chó͘-chit pò͘-tō-tuī khì lông-chhoan thoân-tō.  In-uī goán ê pò͘-tō-tuī hui-siông siū hoan-gêng.  Ah!  Hoa Phok-sū, goá cha-hng ū chiap-tio̍h goá ê bī-hun chhe tuì Tiong-kok kià lâi ê phoe, goá tha̍k hō͘ lí thiaⁿ:

Chhin-ài ê Chú-un!  Goá ta̍k pái chiap tio̍h lí ê phoe, chhim chai lí ê thiàⁿ goá, chin to-siā kám-kek lí ê phoe, tāi-ke to sī hui-siông hoaⁿ-hí heng-hùn khoài-lo̍k, te̍k-pia̍t toā-ko hoaⁿ-hí kàu peh khí-lâi thiàu.  Lí tī Bí-kok chit-bīn iōng-kong tha̍k-chheh, sêng-chek iu-siù; chi̍t-bīn chia̍h khó͘ choè kang, tit-tio̍h Bí-kok choē-choē hó-sim lâng ê pang-chō͘, kan-ta chi̍t ê hioh-joa̍h chiū oē thang thàn 600 kho͘ thang choè chi̍t nî ê seng-oa̍h huì, jî-hhiáⁿ iā ū 300 kho͘ thang kià tńg-lâi hō͘ toā-ko khì Bí-kok liû-ha̍k, choân-ke si̍t-chāi hui-siông hoaⁿ-hí kám-siā Siōng-tè.  Toā-ko kūn ji̍t tiong oē chhut-hoat, chit tiuⁿ phoe lí chiap-tio̍h ê sî, tāi-khài toā-ko iā í-keng kàu Bí-kok lah.  Hiān-chāi pa-pa in-uī sió bo̍k-su bô tī-teh, só͘-í kàu-hoē ê kang hui-siông bâng, goá ta̍k ji̍t liān khîm, pang-chān lé-pài ê toâⁿ khîm, ǹg-bāng lí chiong-lâi tńg-lâi ê sî, lí chhiùⁿ, goá toâⁿ, oē thang khîm-sek hô-bêng, hu chhiòng hū suî, ka-têng hô-pêng khoài-lo̍k.  Hiān-chāi pa-pa, ma-ma kap ke-lâi toā-soè to lóng pêng-an, chhiáⁿ lí hòng-sim, te̍k-pia̍t thoè pa-pa, ma-ma chhéng-an Hoa Phok-sū kap hu-jîn, iā thoân-ta̍t choân-ke ê kám-siā.

Chiok lí kiān-khong kap khoài-lo̍k.

The̍h iû-piān ê:  (Hut-jiân phah-mn̂g).

oé!  oé!  Sòng Sian-siⁿ tī chhù-nih bô?  Tiān-pò!  tiān-pò!  (Chú-un chiap tiān-pò tha̍k).

Chú-un:  Téng-po͘ 10 tiám, chhiáⁿ lâi chhia-thâu chiap goá, Sòng Sūn-lí.  Hoa Kàu-siū, goán toā Hiaⁿ 10 tiám chiū oē kàu chhia-thâu, goá beh lâi-khì chiap i.

Hoa Phok-sū:  Chin kiong-hí! chin kiong-hí!  Sî-kan kè tit chin kín, lí iā beh chhut-hoat lah, goá seng sit-lé, lēng-ji̍t chiah kap lín lēng-heng lâi goán tau chē.  Lí chhiáⁿ-(pì-bō͘)-

(Thāi-sio̍k).

漢羅（Ùi原文改寫）

宋尚節博士(II)

蔡愛義

1963.10.15     P12-13

1。親姆：(徛--起來)。

宋牧師，牧師娘佮諸位，論起這層親事，主動是我。原來阮會信主入教是牧師的 勸勉來得著的，我看牧師原來是一位秀才，家庭也真富裕。但是做牧師以後，漸漸貧寒，傳道也真食苦。不過我信。上帝的確會保庇伊的家庭。主恩二歲的時我看伊大頭，大khok-khok，耳仔大bok-bok，面是真烏昏，一暝哭到光。宋牧師笑牧師娘，講thái會生這个囡仔bái閣khiap勢，總是我看了真合意，所以我佮我的丈夫商量，將Kím-hoâ來配予主恩看怎樣。我的丈夫贊成，以後我才對牧師娘講起這層事。牧師娘佮牧師商量了後，也贊成，這个事經過15年，今仔日牧師就是親家，實在是真合時閣有意義。對今仔日主恩是阮的囝婿，主恩，你出外著gâu保重身體最要緊。

(講了坐落來食茶)。

牧師娘：(徛--起來)。

余親家，親姆，真多謝，將你的千金來送我的囝主恩。對今日起我會真疼Kím-hoâ，親像疼家己的查某囝。

余親家：

主恩囝婿，你求學求光明上進，實在真恭喜。今hoâ我也的確管教責督，叫伊今後著學琴，學裁縫佮料理，等等。向望將來會成做一个賢妻良母，這一點仔共你順風(送紅包)，願上主照顧你平安到美國。

(講了坐--落來食餅)。

主恩：

阿爸，阿母，丈人，丈母，吳校長佮諸位同學，大家真多謝。我自細漢得著恁養育，疼惜的情親像山遐懸，海遐深，用會講袂了，今後出外，應該家己斟酌身體，努力讀冊，希望無閣辜負恁的恩情，也同時請恁保重身體，將來平安相見(講了閣坐--落來)。

兩位同學：徛--起來。

宋牧師，余先生恁兩家恭喜，阮佮主恩兄同窗5年久，攏猶未捌聽著這層喜事。今日聽著實在真歡喜，臨時無備辦禮物，只有阮兩人來唱一節詩祝福恁兩位未婚的夫婦前途幸福快樂！(吟聖詩216首第4節，吟到尾站布幕暫放--落來。咱決意相疼的歌猶有聽見)。

第2幕：宋主恩的房間

佈置：一台眠床，3條椅，一塊桌，桌頂有冊，電燈台，一塊食桌，桌頂有杯盤，果子。主恩佇室內行來行去，唱「蘇武牧羊」的歌。

幕後放送：主恩佇美國衛斯你大學讀冊，得著Hoa教授，就是Dr. Walker真gâu愛顧，真gâu幫助。

Hoa教授：(拍門)。

主恩， gâu早。

主恩：Hoa教授gâu早，請來相佮食早頓，請坐！(Hoa教授坐--落來，主恩捧杯，碗予Hoa教授)。

Hoa教授：我已經食飽，多謝。主恩，我今仔日來報你一个好消息，昨昏有教授會議，眾教授都稱讚你的成績優秀。本來逐人都著讀4年才會得著學士畢業，總是你讀3年就會得著畢業lah，真恭喜。我替你想，你畢業了後猶是佇咱的州立大學繼續讀碩士較好，我也已經替你申請獎學金lah，而且咱這个所在對你的健康是真好，欲揣工作的機會也真濟。一面我佮我的婦人人也會時常佮你見面，我也會通佮你時常繼續做傳道理的工，因為你的講道真有力量，真受美國人的歡迎。

主恩：Hoa教授，真多謝！自我來衛斯理大學，得著你佮師母的愛顧佮款待，無微不至，精神上，物質上的安慰真大，通講你是我佇美國中的父母。我會尊照你替我所安排，一面攻讀碩士學位，一面也會對教授得著聖經中的教示真理，同時也會佮Su-mi-su等等的朋友組織佈道隊去農村傳道。因為阮的佈道隊非常受歡迎。Ah！Hoa博士，我昨昏有接著我的未婚妻對中國寄來的批，我讀予你聽：

親愛的主恩！我逐擺接著你的批，深知你的疼我，真多謝感激你的批，大家都是非常歡喜興奮快樂，特別大哥歡喜到peh起來跳。你佇美國一面讀冊，成績優秀；一面食苦做工，得著美國濟濟好心人的幫助，干焦一个歇熱就會通趁600箍通做一年的生活費，而且也有300箍通寄轉來予大哥去美國留學，全家實在非常歡喜感謝上帝。大哥近日中會出發，這張批你接著的時，大概大哥也已經到美國lah。現在pa-pa因為小牧師無佇teh，所以教會的工非常忙，我逐日練琴，幫贊禮拜的彈琴，向望你將來轉來的時，你唱，我彈，會通琴瑟合鳴，夫唱婦隨，家庭和平快樂。現在pa-pa，ma-ma佮家內大細都攏平安，請你放心，特別替pa-pa， ma-ma請安Hoa博士佮夫人，也傳達全家的感謝。

祝你健康佮快樂。

提郵便的：(忽然拍門)。

oé！oé！宋先生佇厝裡無？電報！電報！(主恩接電報讀)。

主恩：頂晡10點，請車頭接我，宋順理。Hoa教授，阮大兄10點就會到車頭，我欲來去接伊。

Hoa博士：真恭喜！真恭喜！時間過得真緊，你也欲出發lah，我先失禮，另日才佮恁令兄來阮兜坐。你請-(閉幕)-

(待續)。