數念葉金木牧師娘
Siàu-liām Ia̍p Kim-bo̍k Bo̍k-su-niû
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第907期 |
| 日期 | 1963/4 |
| 頁數 | 11 |
白話字（原文數位化）
Siàu-liām Ia̍p Kim-bo̍k Bo̍k-su-niû
1963.04.01 P.11
Ia̍p Kim-bo̍k Bo̍k-su-niû, miâ Tân Mī lú-sū, kin-nî 3 ge̍h 20 hō téng-po͘ 11 tiám 5 hun tī Má-kai pīⁿ-īⁿ siū kéng-tiàu, lâi kiat-sok i tī sè-kan tio̍h-boâ ê seng-gâi, hióng-siū 79 hè. Ia̍p Kim-bo̍k Bo̍k-su tī lán ê kàu-hoē choè Chú ê kang kàu taⁿ ū 63 nî, hiān-chāi iáu ióng-kiāⁿ, sī Tâi-pak Tang-mn̂g kàu-hoē hiān-jīm ê bo̍k-su, sī lán kàu-kài ê goân-ló, iā-sī lán kàu-hoē ê pó-poè. Tang-mn̂g kàu-hoē uī-tio̍h siàu-liām bo̍k-su-niû tuì kong-ho̍k í-lâi kap Ia̍p Bo̍k-su saⁿ-kap khó͘-sim kiàn-siat in ê kàu-hoē, i ê kòng-hiàn chin-chiàⁿ choē, só͘-í koat-tēng ēng kàu-hoē chóng lâi kā Ia̍p Bo̍k-su-niû kú-hêng kò-pia̍t lé-pài. chit ê sek tī 3 ge̍h 23 ji̍t pài 6 ē-po͘ 1 tiám poàⁿ chún-sî khai-sí, Tang-mn̂g kàu-hoē Tân Tiâu-kéng tiúⁿ-ló choè chú-lé-jîn, Chhiⁿ Tiong Gī-tiúⁿ Tīⁿ Kun-hong bo̍k-su káng-tō. Chhî Chhun-seng Bo̍k-su kóng kò͘-jîn ê lí-le̍k, hoē-chòng-chiá iok 400 lâng, put-chí sēng-hóng. Kò pia̍t-sek tiong ū Chóng-hoē tāi-piáu Tân Huī-lâm Bo̍k-su, Thoân Chóng tāi-piáu Keh Hô-lia̍t Bo̍k-su, Pak Tāi tāi-piáu Tīⁿ Liân-tek Bo̍k-su, Pak Tiong tāi-piáu Tīⁿ Gím-êng Bo̍k-su, Chhiⁿ Tiong tāi-piáu Chng Teng-chhiong Bo̍k-su, í-goā kuí-nā uī kóng tiàu-sû, tiàu-tiān iā put-chí choē, kiōng 100 goā thong, tuì choân-séng ta̍k só͘-chāi lâi, thâu kàu bé ēng chin giâm-siok ê sim-chêng choè sek lâi siàu-liām Ia̍p Bo̍k-su-niû. Chin-choē lâng lâu m̄-kam ê ba̍k-sái lâi kap i saⁿ lī-pia̍t. Ia̍p Bo̍k-su iā toê chi̍t siú si koà tī sek-tiûⁿ ê tiong-ng kóng:
六十年患難與共我安不哭
巳五代兒孫滿堂卿應無憾
Saⁿ tiám poàⁿ kiat-sok chit ê chòng-sek, uî-thé an-chòng tī Se̍k-chí kong-bōng, hit ji̍t khì-siōng-kio̍k hoat-piáu oē lo̍h-hō͘, nā-sī tuì Siōng-tè te̍k-pia̍t ê an-pâi, m̄-nā bô lo̍h-hō͘, koh iā chin hó thiⁿ, kám-siā Chú. Hoē tiong Ia̍p Bo̍k-su tâm-oē kóng: “Hoān-sū ū Siōng-tè ê hó chí-ì, Siōng Chú tāi-seng kéng-tiàu i ê loē-chō͘ kui thian, soah i tī sè-kan ta̍k khoán ê tio̍h-boâ, i í-keng kàu tī Chú ê heng-chêng, só͘-í sui-jiân tī ai-siong ê tiong-kan, iā ū siū toā ê an-uì.
Ia̍p Bo̍k-su-niû ê miâ Ia̍p Tân Mī, sī Chuí-tńg-kha kàu-hoē Tân Hîm Tiúⁿ-ló ê toā chhian-kim, Chú-āu 1885 nî 5 ge̍h 25 ji̍t chhut-sì, 19 hè ê sî kap Ia̍p Kim-bo̍k Bo̍k-su kiat-hun, tui-suî Ia̍p Bo̍k-su khì bo̍k-hoē, toà tī Loán-loán, Biâu-lek, Koe-lâng, se̍k-chí, Tāi-kah, Koe-lâng kap Tâi-pak Tang-mn̂g chiah ê kàu-hoē. In kiat-hun 60 nî kú, Siōng-tè siúⁿ-sù in saⁿ lâm, saⁿ lú. Toā-kiáⁿ Ia̍p Tāi-pi̍t Tiúⁿ-ló tī Chiong-hoà choè ūn-sàng tiàm ê keng-lí, tè jī kiáⁿ Ia̍p Cheng-joē Sian-siⁿ tī Hoa-liân choè seng-lí, tē saⁿ kiáⁿ Ia̍p Jîn-ióng Sian-siⁿ iā tī Hoa-liân choè seng-lí. Tióng-lú Kéng-séng lú-sū phoè Hoa-liân Niû A-piau Tiúⁿ-ló, (i bat choè Hoa-liân-koān Koān-gī-hoē hù gī-tiúⁿ, hiān-sî choè Hoa-liân khu-ha̍p-hoē chóng keng-lí), chhù-lú An-sim lú-sū phoè Sai-lê Liân Pún-thong i-ha̍k Phok-sū, (hiān-sî tī Sai-lê khai-gia̍p), sam lú Bí-lē lú-sū phoè Sin-tek Lí Chhun-seng Sian-siⁿ (bat choè Tang A tiān-khì chhiúⁿ chhiúⁿ-tiúⁿ), í-goā lāi-goā sun 32 ê, cheng-sun 7 ê, kiōng uî-cho̍k 52 ê.
Bo̍k-su-niû it-seng kèng-khiân koh jia̍t-sim ho̍k-sāi Chú, khûn-khûn tha̍k Sèng-keng, sui-jiân tī pīⁿ-tiong i iā sī chin tì-ì ài tha̍k, iā siông-siông kî-tó, uī-tio̍h Ia̍p Bo̍k-su, kàu-hoē kap hoē-iú lâi kî-tó, koan-sim kàu-hoē ê tāi-chì, hó koán-thāi hoē-iú, sī chi̍t ê put-chí bô͘-hoān ê bo̍k-su-niû, gâu pang-chān Ia̍p Bo̍k-su, hō͘ Ia̍p bo̍k-su 63 nî kú ê thoân-kàu seng-gâi ū chin hó ê sêng-chiū. I teh tī-ke kà-kiáⁿ iú-hong, 1954 nî bú-chhin-choeh ê sî siū Tâi-pak-chhī Chèng-hú piáu-chiong choè bô͘-hoān bú-chhin, i choè lâng chin khûn-khiām, phok-sò͘, kàu-gia̍h hō͘ lán thang siàu-liām, iā kàu-gia̍h thang choè lán ê bô͘-iūⁿ.
Chit kuí nî lâi, bo̍k-su-niû ū hoān-tio̍h ko-hiat-ap ê pīⁿ, poàⁿ-nî chêng koh khí, tī chhù chhiáⁿ kuí-nā uī i-seng lâi i-tī, bô sím-mi̍h khah hó, nn̄g lé-pài chêng khì Má-kai pīⁿ-īⁿ ji̍p-īⁿ, kàu 3 ge̍h 20 hō téng-po͘ 11 tiám siū Chú kéng-tiàu lī-khui sè-kan, tò-tńg khì chó͘-ke, hióng-siū 79 hè.
漢羅（Ùi原文改寫）
數念葉金木牧師娘
葉金木牧師娘，名陳麵女士，今年3月20號頂晡11點5分佇馬偕病院受揀召，來結束伊佇世間著磨的生涯，享壽79歲。 葉金木牧師佇咱的教會做主的工到taⁿ有63年，現在猶勇健，是台北東門教會現任的牧師，是咱教界的元老，也是咱教會的寶貝。東門教會為著數念牧師娘對光復以來佮葉牧師相佮苦心建設in的教會，伊的貢獻真正濟，所以決定用教會總來共葉牧師娘舉行告別禮拜。這个式佇3月23日拜6下晡1點半準時開始，東門教會陳Tiâu-kéng長老做主理人，星中議長鄭君芳牧師講道。徐春生牧師講故人的歷略，會眾者約400人，不止盛況。告別式中有總會代表陳惠南牧師，傳總代表郭和烈牧師，北大代表鄭連德牧師，北中代表鄭錦榮牧師，星中代表莊丁昌牧師，以外幾若位講悼辭，悼奠也不止濟，共100外通，對全省逐所在來，頭到尾用真嚴肅的心情做式來數念葉牧師娘。真濟人流毋甘的目屎來佮伊相離別。葉牧師也題一首詩掛佇式場的中央講：
六十年患難與共我安不哭
巳五代兒孫滿堂卿應無憾
三點半結束這个葬式，遺體安葬佇汐止公墓，彼日氣象局發表會落雨，若是對上帝特別的安排，毋nā無落雨，閣也真好天，感謝主。會中葉牧師談話講：「凡事有上帝的好旨意，上主事先揀召伊的內助歸天，煞伊佇世間逐款的著磨，伊已經到佇主的胸前，所以雖然佇哀傷的中間，也有受大的安慰。
葉牧師娘的名葉陳麵，是水返腳（水轉跤）教會陳熊長老的大千金，主後1885年5月25日出世，19歲的時佮葉金木牧師結婚，追隨葉牧師去牧會，蹛佇暖暖，苗栗，基隆，汐止，大甲，基隆佮台北東門遮的教會。In結婚60年久，上帝賞賜in三男，三女。大囝葉大衛長老佇彰化做運送店的經理，第二囝葉Cheng-joē先生佇花蓮做生理，第三囝葉Jîn-ióng先生也佇花蓮做生理。長女Kéng-séng女士配花蓮梁A-piau長老，(伊捌做花蓮縣縣議會副議長。現時做花蓮區合總經理)，次女An-sim女士配西螺連Pún-thong醫學博士，(現時佇西螺開業)，三女美麗女士配新竹李Chhun-seng先生(捌做東亞電器廠廠長)，以外內外孫32个，曾孫7个，共遺族52个。
牧師娘一生敬虔閣熱心服事主，勤勤讀聖經，雖然佇病中伊也是真致意愛讀，也常常祈禱，為著葉牧師，教會佮會友來祈禱，關心教會的代誌，好款待會友，是一个不止模範的牧師娘，gâu幫贊葉牧師，予葉牧師63年久的傳教生涯有真好的成就。 伊teh治家教囝有方，1954年母親節的時受台北市政府表彰做模範母親，伊做人真勤儉，樸素，夠額予咱通數念，也夠額通做咱的模樣。
這幾年來，牧師娘有患著高血壓的病，半年前閣去，佇厝請幾若位醫生來醫治，無甚麼較好，兩禮拜前去馬偕病院入院， 到3月20號頂晡11點受主揀召離開世間，倒轉去祖家，享受79歲。