數念聖徒
Siàu-liām Sèng-tô͘
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第907期 |
| 日期 | 1963/4 |
| 頁數 | 10 |
白話字（原文數位化）
Siàu-liām Sèng-tô͘
1963.04.01 P.10
Kò͘ Lîm So͘ Phek-song chí-bē, chiū-sī Tâi-lâm Séng-li̍p pīⁿ-īⁿ Hīⁿ phīⁿ âu kho chú-jīm Lîm Bo̍k Sian-siⁿ-niû, tī 3 ge̍h 6 ji̍t hā-ngó͘ 3 tiám 5-hun siū Chú kéng-tiàu kui thian, hióng-siū 47 hè.
Kò͘-jîn tī bîn-kok 6 nî 5 ge̍h 25 ji̍t chhut-sì, tiong-sêng tī sè-sio̍k-ke. I sī Pe̍h-hô bêng-i So͘ Hông-péng Sian-siⁿ ê tē jī cha-bó͘-kiáⁿ. Kok-bîn ha̍k-hāu pit-gia̍p liáu chiū lâi khó ji̍p Tióng-êng Lú-o̍h. Bô kú chiū choán khì Ji̍t-pún Tang-kiaⁿ Kím-chhiu Ko-lú. ko-lú pit-gia̍p liáu, chiū khó ji̍p Tang-kiaⁿ io̍h-choan Lú-chú-pō͘. Bîn-kok 28 nî, uī-tio̍h Lîm Bo̍k Sian-siⁿ ka-sū siōng ê to͘-ha̍p, chāi-ha̍k tiong chiū kap Lîm Bo̍k Sian-siⁿ kiat-hun. Bîn-kok 29 nî pit-gia̍p io̍h-choan, liáu-āu tī Tang-kiaⁿ siū chi̍t keng io̍h-chhiúⁿ phèng-chhiáⁿ, chāi chhiúⁿ ho̍k-bū nn̄g nî kú.
Kàu Bîn-kok 32 nî, chiū kap Lîm Sian-siⁿ tńg-lâi Tâi-oân, chiū tī pún-toē Pe̍h-hô ka-kī khai-gia̍p Chín-chhiong Chín-só͘（振昌）. Chi̍t-bīn pang-chān Lîm Sian-siⁿ ê io̍h-kio̍k, chi̍t-bīn siū Kiâm-chuí Im-iông-tông io̍h-chhiúⁿ phèng-chhiáⁿ choè koán-lí, tuì hit-tia̍p kàu hiān-chāi lóng án-ni kè-sio̍k.
Tī Pe̍h-hô, chiū siông-siông kap kàu-hoē ê hiaⁿ-chí kau-poê chhut-ji̍p, nā hioh-joa̍h tiong, kàu-hoē ū chhiáⁿ Sîn-ha̍k-seng khah choē lóng chhiáⁿ in lâi toà i ê só͘-chāi, chin gâu khoán-thāi in, nā bat khì toà Pe̍h-hô kàu-hoē ê ha̍k-seng lóng chin teh siàu-liām in.
Kàu 10 nî chêng i chí-ū chi̍t ê hāu-siⁿ, kî-û saⁿ ê lóng sī cha-bó͘-kiáⁿ, khó-sioh, toā hāu-siⁿ tú-tio̍h kha ū phoà-pīⁿ, hō͘ kuí-nā ê chhut-miâ ê i-seng khoàⁿ, kóng tio̍h kù khí--lâi; sian-siⁿ-niû ê sim joā kan-khó͘, sī khoài-khoài thang sióng-siōng. Nā-sī i bô sit-chì, chi̍t-bīn kiû Chú koh siúⁿ-sù i ta-po͘-kiáⁿ, chi̍t-bīn kiû Chú i-tī i ê toā kiáⁿ, chhin-sin chhoā kàu Ka-gī hù Au Su-pún ê pò͘-tō-hoē. Kó-jiân Chú thiaⁿ in ê kî-tó, toā-kiáⁿ ê kha m̄-bián kù khí--lâi, lóng hó, hiān sî teh chún-pī khó Tāi-ha̍k, jî-chhiáⁿ pún-sin koh tit-tio̍h tē jī hāu-siⁿ, taⁿ iā í-keng 10 hè lah, miâ kiò-choè Chì-sìn. Tuì án-ni sìn-sim ná khak-chhiat.
Liáu-āu uī-tio̍h chú-lú ê kàu-io̍k kap chióng-chióng ê to͘-ha̍p, tī bîn-kok 44 nî, chiū tuì Pe̍h-hô poaⁿ-soá lâi Tâi-lâm, Lîm Sian-siⁿ tī Séng-li̍p pīⁿ-īⁿ hok-bū, i tī ka-têng liāu-lí ka-bū kap chú-lú ê kàu-io̍k.
Bô phah-sǹg, tī kū-nî 4 ge̍h hoat-pīⁿ, keng-kè choē-choē i-seng ê kiám-cha, chiah chai sī khùn-lân ê chèng-thâu, chiū kàu Tâi-pak kuí-nā ge̍h-ji̍t ji̍p-īⁿ i-tī, lóng bô hāu; hoán-tńg ná giâm-tiōng. Kàu chiaⁿ-ge̍h chhoe chiū tńg-lâi Tai-lâm; iû-goân ji̍p tī Séng-li̍p pīⁿ-īⁿ i-liâu.
Tī chāi īⁿ tiong, choē-choē chhin-iú í-ki̍p hiaⁿ-chí khì hóng-būn, thoè i kî-tó, tha̍k Sèng-keng, gîm-si lâi an-uì i. Tī chhn̂g-tiong i siông-siông ka-kī gîm-si, i choè ài gîm ê Si, sī Sèng-si 178 siú; nā ū kám-kak kan-khó͘, á-sī ut-būn ê sî, i chiū gîm chit siú si lâi chān i ê sìn-sim kap choè i ê an-uì kap bián-lē. I chai i tī sè-kan lóng bô choè sím-mi̍h kang lâi pò-tap Siōng-tè ê un, in-uī tī kè-khì i ū tit-tio̍h Siōng-tè te̍k-pia̍t ê un-tián tī in, i siūⁿ, siat-sú nā oē hó khí-lâi, ài beh chīn i tit-tio̍h Siōng-tè ê un lâi pò-tap. M̄-kú i iā chai bô hoat-tō͘, só͘-í chiū hoan-hù Lîm Sian-siⁿ, i nā kè-sin, song-sū tio̍h chin kán-tan m̄-thang lōng-huì thang choè Tâi-lâm Te̍k-chióng phê-hu pīⁿ-īⁿ ê lō͘-ēng lâi choè i pò-tap Siōng-tè chi̍t tiám-á ê ì-sù, chhiáⁿ Lîm Sian-siⁿ tì-ì tio̍h oē kì-tit chit hāng; che sī i choè-āu ê uî-giân. iā bián-lē i ê kiáⁿ-jî tio̍h jia̍t-sim siú lé-pài ho̍k-sāi Chú, in-ui Chú Siōng-tè ū te̍k-pia̍t si-un tī in ê ke. Taⁿ i ū lâu nn̄g ê hāu-siⁿ, saⁿ ê cha-bó͘-kiáⁿ kap Lîm Bo̍k Sian-siⁿ. Kiû Siōng-tè an-uì in, chhit-khì in it-chhè pi-siong ê ba̍k-sái.
漢羅（Ùi原文改寫）
數念聖徒
故林蘇Phek-song姊妹，就是台南省立病院耳鼻喉主任林Bo̍k先生娘，佇3月6日下午3點5分受主揀召歸天，享受47歲。
故人佇民國6年5月25日出世，忠誠佇世俗家。 伊是白河名醫蘇Hông-péng先生的第二查某囝。國民學校畢業了就來考入長榮女學。無久就轉去日本東京Kím-chhiu高女。 高女畢業了，就考入東京藥專女子部。 民國28年，為著林Bo̍k先生家事上的都合，在學中就佮林Bo̍k先生結婚。民國29年畢業藥專，了後佇東京受一間藥廠聘請，在廠服務兩年久。
到民國32年，就佮林先生轉來台灣，就佇本地白河家己開業振昌診所。一面幫贊林先生的藥局，一面受鹹水陰陽堂藥廠聘請做管理，對彼霎到現在攏按呢繼續。
佇白河，就常常佮教會的兄姐交陪出入，若歇熱中，教會有請神學生較濟攏請in來蹛伊的所在，真gâu款待in，若捌去蹛白河教會的學生攏真teh數念in。
到10年前伊只有一个後生，其餘三个攏是查某囝，可惜，大後生拄著跤有破病，予幾若的出名的醫生看，講著鋸起--來；先生娘的心偌艱苦，是快快通想像。若是伊無失志，一面求主閣賞賜伊查埔囝，一面求主醫治伊的大囝，親身chhoā到嘉義赴Au Su-pún的佈道會。果然主聽in的祈禱，大囝的跤毋免鋸起--來，攏好，現時teh準備考大學，而且本身閣得著第二後生，taⁿ也已經10歲lah，名叫做至信。對按呢信心那確切。
了後為著子女的教育佮種種的都合，佇民國44年，就對白河搬徙來台南，林先生佇省立病院服務，伊佇家庭料理家務佮子女的教育。
無拍算，佇舊年4月發病，經過濟濟醫生的檢查，才知是困難的症頭，就到台北幾若月日入院醫治，攏無效；反轉那嚴重。到正月初就轉來台南；猶原入佇省立病院醫療。
佇在院中，濟濟親友以及兄姐去訪問，替伊祈禱，讀聖經，吟詩來安慰伊。 佇床中伊常常家己吟詩，伊最愛吟的詩，是聖詩178首；若有感覺艱苦，á是鬱悶的時，伊就吟這首詩來贊伊的信心佮做伊的安慰佮勉勵。 伊知伊佇世間攏無做甚麼工來報答上帝的恩，因為佇過去伊有得著上帝特別的恩典佇in，伊想，設使若會好起來，愛欲盡伊得著上帝的恩來報答。毋過伊也知無法度，所以就吩咐林先生，伊若過身，喪事著真簡單毋通浪費通做台南特種皮膚病院的路用來做伊報答上帝一點仔的意思，請林先生致意著會記得這項；這是伊最後的遺願。也勉勵伊的囝兒著熱心守禮拜服事主，因為主上帝有特別施恩佇in的家。Taⁿ伊有留兩个後生，三个查某囝佮林Bo̍k先生。求上帝安慰in，拭去in一切悲傷的目屎。