Siàu-liām Nn̄g uī lú sèng-tô͘Permalink

文獻資訊Permalink

白話字（原文數位化）Permalink

Siàu-liām Nn̄g uī lú sèng-tô͘

1963.03.01  P.13

Kò͘-jîn chiū sī Chiong-hoà chin chhut-miâ ê Pháiⁿ-chîⁿ só.  Tī 1 ge̍h 20 hō pia̍t-sè.

I chhut-sì tī sè-sio̍k ke, 13 hè ê sî siū Lân I-seng khoàⁿ chèng-thâu, táⁿ-tia̍p phoà-pīⁿ, soà tit-tio̍h Ki-tok ê hok-im.

Kàu 20 hè ê sî, kap N̂g Pháiⁿ-chîⁿ hiaⁿ kiat-hun, ū siⁿ 6 ê ta-po͘, 5 ê cha-bó͘ kiáⁿ; ta-po͘-kiáⁿ nn̄g ê sī si̍t-gia̍p-ka nn̄g ê choè tiong-ha̍k ê kàu-su, tē 3 kiáⁿ N̂g Bûn-khim sī lán kàu-kài choè chá khì Bí-kok liû-ha̍k ê, hiān-sî teh tha̍k phok-sū khò-thêng.  Kà kiáⁿ, tī ke sī chi̍t ê khûn-khó͘ lô-boâ ê lâng, chóng-sī chi̍t chhiú-kiáⁿ tit-tio̍h chai-poê, lóng sī sìn-gióng chin chhim ê lâng.

Khoàⁿ i ê it-seng suî-liân sin-khó͘ thoa-boâ, ēng sìn-gióng poê-iúⁿ kiáⁿ-jî, hō͘ in hó miâ-siaⁿ, iā m̄-bat thiaⁿ-tio̍h i khoa-kháu i ê kiáⁿ-jî ê châi-chêng.  I ū tng chip-sū chin choē jīm, āu-lâi in-uī ba̍k-chiu khah bái, sî-thè bô choè, iā sī siông-siông thàm hoē-iú, bô ià-siān, tuì kò-jîn pò͘-tō, tuì bō͘-tō-iú ê ín-chhoā lóng bô sit-lo̍h pún-hūn.  I pún-lâng siông tha̍k Sèng-keng, uī ka-cho̍k sìn-gióng ê tióng-chìn lâi kî-tó, koh uī kàu-hoē, hoē-iú kî-tó; koh in-uī kì-ek-le̍k chin hó, ū choē-choē siú ê Sèng-si kap Sèng-keng chat oē-hiáu àm-liām.

Taⁿ i pún-sin m̄-nā sī ka-têng lāi ê sìn-gióng ê lāu-bú, thang kóng sī kàu-hoē lāi-goā siū i ín-chhoā poê-iúⁿ ê lâng ê sìn-gióng ê lāu-bú.

I tī 1961 nî chhiu-thiⁿ phoà-pīⁿ, liáu-āu ū khah hó, kàu kin-nî 1 ge̍h 18 hō phoà-pīⁿ chài-hoat, tī 1 ge̍h 20 hō kè-sì, 22 hō kò-pia̍t-sek ê sî, m̄-kam siàu-liām ê lâng hui-siông choē, hō͘ ta̍k lâng chin kám-sim.

Tī Tâi-lâm Tang-mn̂g kàu-hoē, á-sī Thài-pêngkéng kàu-hoē, ta̍k ê ún-tàng lóng bat chi̍t uī chin âu kî-tó ê ài koaⁿ, chiàu lâng teh khoàⁿ, i tī Tahì-pêng-kéng ū chi̍t kûn chin khó-chhú ê hū-jîn-lâng, sī in ê kàu-hoe ê thàm-hóng kang-chok, lêng-siu kang-chok, chio-ho͘ lâng ê kang-chok, choè gâu kó͘-bú ê, ài koaⁿ chiū-sī cit kûn hū-jîn-lâng ê chi̍t ê.

I sī 72 nî chêng chhu-sì tī sè-sio̍k ê ke, chha-put-to 40 nî chêng ba̍k-chiu chò thiàⁿ, lâi Sin-lâu pīⁿ-īⁿ hō͘ Má I-seng táⁿ-tia̍p, tuì hia tit-tio̍h tō-lí.  āu-lâi iā ín-chhoā tiōng-hu Chhoà Hê-siūⁿ iā lâi sìn Chú.  I ū nn̄g ê hāu-siⁿ, 5 ê cha-bó͘-kiáⁿ, hāu-siⁿ chi̍t ê tī Ji̍t-pún choan-siu Tāi-ha̍k pit-gia̍p, hiān-sî choè Tâi-lâm chhī chhut-miâ ê koè-kè su.

Koh chi̍t ê hāu-siⁿ tī ko-hiông chhī ho̍k-bū Kéng-chhat-kio̍k, kiáⁿ-sài ū chi̍t ê i-seng, nn̄g ê thoân-kàu-chiá, chiū-sī Sam-kiap kàu-hoē ê Chiā Chìn-siông kap o͘-kha-pīⁿ ê toē-hng Pak-mn̂g-sū ê So͘ Chhàn-tông Sian-siⁿ.

I kàu 5, 6 nî chêng ba̍k-chiu sit-bêng liáu, tian-tò chhin-chhiūⁿ sim-ba̍k jú kng-bêng, muí Chú-ji̍t á-si pài jī hū-jîn kî-tó-hoē, pài saⁿ àm-kî-tó-hoē, koh-khah tì-ì, it-tēng chhut-se̍k.

Pêng-siông siông-siông thiaⁿ-kìⁿ ke-lāi ê lâng kóng, khùn chi̍t-chhíⁿ iáu-kú thiaⁿ i teh kî-tó.  Kàu kū-nî toé sin-khu ū pīⁿ chiām loán-jio̍k, iáu-kú jia̍t-sim tì-ì chū-hoē, kàu Sèng-tàn-choe̍h, soah bé pài chham-ka chū-hoē liáu, chū án-ni bô hoat-tit koh chhut-se̍k, kàu 1 goe̍h 16 hō chiah tī kî-tó tiong an-jiân kè-sì.  Thang kóng sī chi̍t ê keng-kè kî-tó seng-gâi ê lâng.

漢羅（Ùi原文改寫）Permalink

數念兩位女聖徒

1963.03.01  P.13

故人就是彰化真出名的Pháiⁿ-chîⁿ嫂。佇1月20號別世。

伊出世佇世俗家，13歲的時受藍醫生看症頭，打揲破病，紲得著基督的福音。

到20歲的時，佮黃Pháiⁿ-chîⁿ兄結婚，有生6个查哺，5个查某囝；查哺囝兩个是實業家兩个做中學的教師，第3囝黃文欽是咱教界最早去美國留學的，現時咧讀博士課程。教囝，佇家是一个困苦勞磨的，總是一手囝得著栽培，攏是信仰真深的人。

看伊的一生雖然辛苦拖磨，用信仰培養囝兒，予in好名聲，也毋捌聽著伊誇口伊的囝兒的才情。伊有當執事真濟任。

後來因為目睭較bái，辭退無做，也是常常探會友，無厭倦，對個人佈道，對募道友的引chhoā攏無失落本份。伊本人常讀聖經，為家族信仰的長進來祈禱，閣為教會，會友祈禱；閣因為記憶力真好，有濟濟首的聖詩佮聖經節會曉暗念。

今伊本身毋若家庭內的信仰的老母，通講是教會內外受伊引chhoā培養的人的信仰的老母。

伊佇1961年秋天破病，了後有較好，到今年1月18號破病再發，佇1月20號過世，22號告別式的時，毋甘數念的人非常濟，予人真感心。

佇台南東門教會，抑是太平境教會，逐个穩當攏捌一位真gâu祈禱的ài koaⁿ，照人咧看，伊佇太平境有一群真可取的婦人人，是in的教會的探訪工作，靈修工作，招呼人的工作，做gâu鼓舞的，ài koaⁿ就是一群婦人人的一个。

伊是72年前出世佇世俗的家，差不多40年前目睭做疼，來新樓病院予馬醫生打揲，對遐得著道理。後來也引chhoā丈夫蔡Hê-siūⁿ也來信主。伊有兩个後生，5个查某囝，後生一个佇日本專修大學畢業，現時做台南市出名的會計師。

閣一个後生佇高雄市服務警察局，囝婿有一个醫生，兩个傳教者，就是三峽教會的謝進祥佮烏跤病的地方北門寺的蘇Chhàn-tông先生。

伊到5，6年前目睭失明了，顛倒親像心目愈光明，每主日抑是拜二婦人祈禱會，拜三暗祈禱會，閣較致意，一定出席。

平常常常聽見家內的人講，睏一醒猶閣聽伊咧祈禱。到舊年底身軀有病漸軟弱，猶閣熱心致意聚會，到聖誕節，煞尾拜參加聚會了，自按呢無法得閣出席，到1月16號才佇祈禱中安然過世。通講是一个經過祈禱生涯的人。