對Mô͘-lí-se-a 的請安
Tuì Mô͘-lí-se-a ê Chhéng-an
文獻資訊
| 項目 | 資料 |
|---|---|
| 作者 | Chhî Io̍k-lîn Chhî Io̍k-lîn |
| 卷期 | 台灣教會公報 |
| 卷期 | 第904期 |
| 日期 | 1963/2 |
| 頁數 | 9 |
白話字（原文數位化）
Tuì Mô͘-lí-se-a ê Chhéng-an
Chhî Io̍k-lîn
1963.02.15 P.9
Tâi-oân bú-hoē kok-uī hiaⁿ-chí pêng-an:
Tit-tio̍h tāi-ke ê koan-sim kap tāi-tó, goán chi̍t ke pêng-an lâi kàu chit ê soè-soè ê tó-sū, keng-kè ge̍h goā ji̍t kú lóng tit-tio̍h Thiⁿ-pē ê un-tián, ta̍k-hāng lóng sūn-sū. Tī chia kóng kuí kù oē, ài kā tāi-ke seh-siā kap pò-kò tām-po̍h siau-sit, soà pài-thok kè-sio̍k thoè goán kî-tó. Mô͘-lí-se-a tó, chha-put-to lín tī tē-tô͘ chin oh-tit thang chhē-tio̍h, sī tī ìn-tō͘ iûⁿ oá Lâm Hui-chiu chi̍t ê toā tó kiò-choè Ma-la-ka-si ê tang-pêng 500 hái-lí ê só͘-chāi, chiah ū lán Tâi-oân ê 19 hūn chi̍t ê toā nā-tiān. Khì-hāu kap lán hia chha-put-to, chit sî tú-tn̄g joa̍h-thiⁿ(chia kap Tâi-oân ê sù-kuì tò-péng) nā-sī kám-kak pí lán hia ū khah liâng, khiok ū sî iā pí Pîn-tong khah joa̍h. Toē-bīn hō͘ chhiⁿ-chhuì ê chhiū-ba̍k, hoe-chháu lâi khàm-ba̍t, tó-bīn ū 4, 5 cha̍p tiâu ê phek-iû lō͘, ū nn̄g bān goā tâi toā sió hêng ê khì-chhia lâi-óng. Jîn-kháu ū 67 bān lâng, tiong-kan lán Tiong-kok lâng oá cha̍p-hūn-chi̍t, toā-pō͘-hūn sī Kńg-tang lâi ê Kheh-lâng, in khah choē lóng choè seng-lí, ū ê tuì 50 goā nî chêng chiū lâi tī chia, í-keng ū 3, 4 tāi ê kiáⁿ-sun, khó-sioh choē-choē chheng-liân kap gín-ná boē hiáu kóng Tiong-kok oē, in khah thong-iōng pún-toē oē.
In-uī nn̄g pah nî chêng sī Hoat léng, (hiān-sî Eng léng) ū lâu chin-choē Hoat-kok ê bûn-hoà, hong-sio̍k. Choē-choē Hoat-kok sek ê chū-the̍h chin tông-hông, chhiū-ba̍k, hoe-hn̂g chhiⁿ-chhuì, khoân-kéng iu-ngá. Hoat-kok oē pí Eng-kok oē khah thong-iōng, ha̍k-hāu tuì sió-o̍h chiū teh kà Hoat, Eng nn̄g kok ê oē, sīm-chì ū ê Tiong-ha̍k iā teh kà Lia̍p-teng gú. Toà chia ê lâng bô-lūn lâm, lú, ló, iù, tī saⁿ kìⁿ-bīn, saⁿ sî ê sî, lóng tio̍h ài khan-chhiú chhéng-an. Thian-chú kàu ū chin toā ê sè-le̍k, tò chhù, toā-lō͘ piⁿ lóng ū in ê kàu-tn̂g chin tông-hông. Tiong-kok lâng ê sìn-tô͘ iā boē chió, ū choē-choē chheng-liân uī-tio̍h kiat-hun lâi ji̍p-kàu. Ki-tok-kàu tī chia ū Sèng-kong-hoē, Tiúⁿ-ló-hoē kap An-hioh-ji̍t-hoē téng, Sèng-kong-hoē ū Chú-kàu tī chia, sìn-tô͘ iā boē chió, Tiúⁿ-ló-hoē ū Eng, Hoat gú kap lán ê kiōng 5 keng, sio̍k So͘-kek-lân Tiúⁿ-ló-hoē, sìn-tô͘ bô chin-choē. Chêng-ji̍t goá ê chiū-jīm-sek, ū pún-toē ê Chóng-tok hu-hū kap Sèng-kong-hoē Chú-kàu hu-hū lâi chham-ka.
Lán ê kàu-hoē chiah chiâⁿ cha̍p hō͘ nā-tiāⁿ, sì-soàⁿ tī chin hn̄g ê só͘-chāi, tī bo̍k-hoē siōng ū kám-kak tām-po̍h khùn-lân. Chêng chí-ū chi̍t uī Tek-kok ê ko͘-niû teh choè kang, kám-siā Chú, kūn-lâi ū khah choē lâng lâi lé-pài, chóng-sī choè khùn-lân ê kang-chok, chiū-sī tuì chheng-liân kap jî-tông ê chong-kàu kàu-io̍k, in-uī in khah thong-iōng pún-toē oē, iā khah koàiⁿ-sì lâi choè lé-pài. Lán ê kàu-hoē ū chi̍t uī lāu tiúⁿ-ló sìⁿ Toh, kin-nî 82 hè, sī chhut-miâ ê kiàn-tio̍k-su, iáu chin ióng-kiāⁿ teh siat-kè kam-tok, nā-sī i choè lán kàu-hoē ê tòng-liông, muí ū chū-hoē chiū ēng i ka-kī ê chhia khì chài hoē-iú lâi chham-ka, iā chin thiàⁿ bo̍k-chiá, siā-hoē ê lâng put-chí khim-poē i.
Sèng-kong-hoē kap Tiúⁿ-ló-hoē chin hó kau-poê, muí ge̍h ū chi̍t pái Thoân-kàu-su liân-gî-hoē, chêng ge̍h ū chi̍t uī khì hù Phó͘-sè Ki-tok-kàu Kàu-io̍k tāi-hoē ê Bo̍k-su pò-kò lán ê N̂g Chiong-hui īⁿ-tiúⁿ só͘ káng-ián ê loē-iông, iā tī 2 ge̍h in ū beh chhiáⁿ goá hoat-piáu lán Tâi-oân kàu-hoē ê siau-sit. Kám-siā Chú, sui-jiân goá toà tī chit ê ko͘-tó, iáu-kú m̄-bián choè ko͘-jî. Chhiáⁿ kok-uī hiaⁿ-chí, sî-siông uī goán kî-tó, chiū-sī goá ê sim-só͘ goān.
2 ge̍h 1 ji̍t.
漢羅（Ùi原文改寫）
對Mô͘-lí-se-a的請安
台灣母會各位兄姊平安：
得著大家的關心佮代禱，阮一家平安來到這个細細的島嶼，經過月外日久攏得著天爸的恩典，逐項攏順序。佇遮講幾句話，愛共大家說謝佮報告淡薄消息，紲拜託繼續替阮祈禱。Mô͘-lí-se-a島，差不多恁佇地圖真oh得通揣著，是佇印度洋倚南非洲一个大島叫做Ma-la-ka-si的東爿500海哩的所在，才有咱台灣的19份一个大nā-tiān。氣候佮咱遐差不多，這時拄搪熱天(遮佮台灣的四季倒反)若是感覺比咱遐有較涼，卻有時也比屏東較熱。地面予青翠的樹木，花草來蓋密，島面有4，5十條的柏油路，有兩萬多台大小型的汽車來往。人口有67萬人，中間咱中國人倚十份一，大部分是廣東來的客人，in較濟攏做生理，有的對50外年前就來佇遮，已經有3，4代的囝孫，可惜濟濟青年佮囡仔袂曉講中國話，in較通用本地話。
因為兩百年前是法領，(現時英領)有留真濟法國的文化，風俗。濟濟法國式的住宅真堂皇，樹木，花園青翠，環境幽雅。 法國話比英國話較通用，學校對小學就teh教法英兩國的話，甚至有的中學也teh教拉丁語。 蹛遮的人無論男女老幼，佇相見面，相時的時，攏著愛牽手請安。天主教有真大的勢力，到處，大路邊攏有in的教堂真堂皇。中國人的信徒也袂少，有濟濟青年為著結婚來入教。基督教佇遮有聖公會，長老會佮安歇日會等，聖公會有主教佇遮，信徒也袂少，長老會有英，法語佮咱的共5間，屬蘇格籣長老會，信徒無真濟。前日我的就任式，有本地的總督夫婦佮聖公會主教夫婦來參加。
咱的教會才成十戶nā-tiāⁿ，四散佇真遠的所在，佇募會上有感覺淡薄困難。前只有一位德國的姑娘teh做工，感謝主，近來有較濟人來禮拜，總是做困難的工作，就是對青年佮兒童的宗教教育，因為in較通用本地話，也較慣勢來做禮拜。咱的教會有一位老長老姓卓，今年82歲，是出名的建築師，猶真勇健teh設計監督，若是伊做咱教會的棟樑，每有聚會就用伊家己的車去載會友來參加，也真疼牧者，社會的人不止欽佩伊。
聖公會佮長老會真好交陪，每月有一擺傳教師聯誼會，前月有一位去赴 普世基督教教育大會的牧師報告咱的黃章輝 院長所講演的內容，也佇2月in有欲請我發表咱台灣教會的消息。感謝主，雖然我蹛佇這个孤島，猶過毋免做孤兒。請各位兄姐，時常為阮祈禱，就是我的心所願。
2月1日。