一个聖人的過世
Chi̍t ê sèng-jîn ê kè-sì
文獻資訊
| 項目 | 資料 |
|---|---|
| 作者 | 謝天祿 Chiā Thian-lo̍k |
| 卷期 | 台灣教會公報 |
| 卷期 | 第904期 |
| 日期 | 1963/2 |
| 頁數 | 13 |
白話字（原文數位化）
Chi̍t ê sèng-jîn ê kè-sì
Chiā Thian-lo̍k
1963.02.15 P.13
Kò͘ Chiā Keng Tiúⁿ-ló, tī Bîn-kok 3 nî chhut-sì tī Lâm-tâu. Lāu-pē Chiā Pin I-su, lāu-bú Gô͘ Siōng-jím Lú-sū, lóng sī Lâm-tâu kàu-hoē ê tiúⁿ-ló, tī chi̍t ê tok-sìn, Chú só͘ hoaⁿ-hí ê ka-têng tióng-toā. Tī 40 goā nî chêng, Gô͘ Thian-sù Bo̍k-su lâi Lâm-tâu choè thoân-tō ê sî, i tú-hó sī 9 hè, teh tha̍k sió-o̍h 1 nî kip, 6 nî kú kàu pit-gia̍p lóng sī iu-téng, phín-hēng hong-chèng, thâu miâ ê sêng-chek iā sī iu-téng, lóng sī teh cheng-chhú 1, 2 miâ; chāi-ha̍k tiong ū chi̍t ê pia̍t-miâ “Sèng-jîn” 聖人, tuì án-ni lán thang chai i ê jîn-keh kap choè lâng ê hong-tō͘, sī lâng chun-kèng. Pit-gia̍p āu kè-sio̍k khó ji̍p Chóng-tok-hú ê I-choan（現台大醫學院）, 4 nî kú ê sêng-chek iā sī iu-téng, phah-sǹg hiān-sî choân séng choē-choē iú-miâ ê i-seng kòng-hiàn tī siā-hoē ê, sī i ê tông-ha̍k. Chhin-chhiūⁿ二林ê Lîm Keⁿ-sin I-su, á-sī 台大醫學院生化系主任 Táng Tāi-sêng Phok-sū, lóng sī i ê tông-ha̍k. Te̍k-pia̍t ài thê-khí ê, chiū-sī Táng Tāi-sêng Phok-sū sī tuì Chiā Keng Tiúⁿ-ló ê jîn-keh kám-hoà lâi sìn Chú, chiâⁿ-choè Ki-tok-tô͘, thang kóng i sī Táng Phok-sū sìn-gióng ê un-jîn. I-choan sî-tāi, tuì ha̍k-hāu kàu Siang-liân kàu-hoē put-chí hn̄g, só͘-í nā tú-tio̍h khó-chhì, chin-choē Ki-tok-tô͘ ha̍k-seng bô ài khì choè lé-pài, hit ê sî-chūn, chiā Keng Tiúⁿ-ló lóng tiām-tiām, Sèng-keng the̍h-leh chiū chhut-hoat khì choè lé-pài, tuì án-ni hō͘ kî-thaⁿ ê ha̍k-seng kiàn-siàu, soà siū kám-tōng, chi̍t-ê chi̍t-ê tè āu-bīn iā khì choè lé-pài. I put-chí ū thian-châi, sī pianist (âu toâⁿ kǹg-khîm), iā sī violinist (gâu toâⁿ chhiú-thê-khîm), tuì im-kai hui-siông chèng-khak. I-choan pit-gia̍p āu, ū tò-lâi Chiong-hoà I-koán koh lîm-chhn̂g gián-kiù nn̄g nî kú, jiân-āu tò-tńg lâi Lâm-tâu pang-chān hia̍p-chō͘ lēng-chun só͘ khai-siat ê Tāi-tông （大同）i-īⁿ, chèng-sek hiân-ô͘ hêng-i. I ê i-su̍t ko-bêng, tuì hoān-chiá chhin-chhiat, tuì pîn-khùn ê hoān-chiá choè bián-huì ê si-liâu.
I tī liân-khin chiū tng pún-hoē ê chip-sū, choè tāi-chì iú-tiâu iú-lí, chin chiu-chì, m̄-bat so͘-hut, gō͘-sū. iā sī Lâm-tâu kàu-hoē chheng-liân-hoē ê hoat-khí-jîn, iā tng thâu chi̍t jīm ê hoē-tiúⁿ, iā tng kè Chú-ji̍t-o̍h hāu-tiúⁿ, saⁿ-kap hia̍p-chō͘ thoân-kàu-chiá khì poê-iúⁿ tē jī tāi ê sìn-tô͘. Bô joā-kú chiū tòng-soán tiúⁿ-ló, liân-jīm kàu tó tī pīⁿ-chhn̂g. I ê choè lâng si̍t-chāi sī choân kàu-hoē ê bô͘-hoān, chin un-jiû, lóng boē tek-sit lâng, ū pau-iông-sèng. I lóng sī teh siūⁿ pa̍t lâng ê sū, iâⁿ-kè ka-kī ê sū, i sui-jiân phoà-pīⁿ, kú-kú tī chhn̂g-nih, koan-sim i só͘ bat ê hoē-iú ê phoà-pīⁿ, boē-thang kè-nî pîn-khùn ê hoē-iú ê seng-oa̍h, sit-lo̍h pêng-an kap tú-tio̍h ge̍k-kéng ê hiaⁿ-chí. I chin gâu thiàⁿ thoân-kàu-chiá, muí nî ê Sèng-tàn-choeh lóng ū sàng lé-mi̍h kap kim-chîⁿ chi̍t hong hō͘ iú-koan ê toân-kàu-chiá. I iā koan-sim thoân-kàu-chiá ê seng-oa̍h, hoaⁿ-hí chiong ka-kī ê hn̂g sàng hō͘ thoè-hiu ê lāu po̍k-jîn choè an-ku ê só͘-chāi, kè boán-liân ê seng-gâi. I só͘ choè ê hó sū, si̍t-chāi kì bē liáu, in-uī i só͘ teh choè ê hó sū, sī ēng chiàⁿ-chhiú só͘ choè bô hō͘ tò-chhiú chai-iáⁿ ê cheng-sîn. I ê seng-gâi sui sī pêng-hoân, iáu-kú sī toā ê uí-jîn（大的偉人）. Bô phah-sǹg hióng siū 50 hè, tī kū-le̍k chiaⁿ ge̍h chhoe 2 chá-khí-sî 3 tiám poàⁿ, an-jiân siū Chú kéng-tiàu kui thian-ka. I ê kò-pia̍t-sek, ū beh kah chiâⁿ chheng lâng chham-ka, ēng giâm-siok pi-ai ê khì-hun, Sèng-koa-tuī chhēng pe̍h-sek ê lé-ho̍k, it lō͘ léng-sian chhiùⁿ “Thiⁿ sī goá tau” ê sèng-koa, hoē-iú iā chhiùⁿ kò͘-jîn siông-siông ài gîm ê Sèng-si, hêng-lia̍t iok ū 3, 4 pah bí ê hn̄g, hō͘ choân Lâm-tâu ê chū-bîn kám-tōng, só͘ kiâⁿ-kè ê koe-bīn, ta̍k lâng lóng ēng chin-kiàm giâm-siok ê thài-tō͘ lâi sàng chit uī “Sèng-jîn”, tī pi-ai giâm-siok ê tiong-kan sàng só͘ kèng-thiàⁿ ê kò͘ Chiā Keng Tiúⁿ-ló kàu éng-oán an-hioh ê só͘-chāi.
南投教會，
教末： 謝天祿。
漢羅（Ùi原文改寫）
一个聖人的過世
故謝Keng長老，佇民國3年出世佇南投。老父謝Pin I-su，老母吳上忍女士，攏是南投教會的長老，佇一个篤信，主所歡喜的家庭長大。佇40外年前，吳天賜牧師來南投做傳道的時，伊拄好是9歲，teh讀小學1年級，6年久到畢業攏是優等，品行方正，頭名的成績也是優等，攏是teh爭取1，2名；在學中有一个別名「聖人」，對按呢咱通知伊的人格佮做人的風度，是人尊敬。畢業後繼紲考入總督府的醫專（現台大醫學院），4年久的成績也是優等，拍算現時全省濟濟有名的醫生貢獻佇社會的，是伊的同學。親像二林的林Keⁿ-sin醫師，á是台大醫學院生化系主任董大成博士，攏是伊的同學。特別愛提起的，就是董大成博士是對謝Keng長老的人格感化來信主，成做基督徒，通講伊是董博士信仰的恩人。 醫專時代，對學校到雙連教會不止遠，所以若拄著考試，真濟基督徒學生無愛去做禮拜，彼个時陣，謝Keng長老攏恬恬，聖經提leh就出發去做禮拜，對按呢予其他的學生見笑，紲受感動，一个一个綴後面也去做禮拜。伊不止有天才，是pianist (gâu彈鋼琴)，也是violinist (gâu彈手提琴)，對音階非常正確。醫專畢業後，有倒來彰化醫館閣臨床研究兩年久，然後倒轉來南投幫贊協助令尊所開設的大同醫院，正式懸壺行醫。伊的醫術高明，對患者親切，對貧困的患者做免費的施療。
伊佇年輕就當本會的執事，做代誌有條有理，真周至，毋捌疏忽，誤事。也是南投教會青年會的發起人，也當頭一任的會長，也當過主日學校長，相佮協助傳教者去培養第二代的信徒。無偌久就當選長老，連任到倒佇病床。伊的做人實在是全教會的模範，真溫柔，攏袂得失人，有包容性。伊攏是teh想別人的事，贏過家己的事，伊雖然破病，久久佇床裡，關心伊所捌的會友的破病，袂通過年貧困的會友的生活，失落平安佮拄著逆境的兄姐。 伊真gâu疼傳教者，每年的聖誕節攏有送禮物佮金錢一封予有關的傳教者。 伊也關心傳教者的生活，歡喜將家己的園送予退休的老僕人做安居的所在，過晚年的生涯。伊所做的好事，實在記袂了，因為伊所teh做的好事，是用正手所做無予倒手知影的精神。伊的生涯雖是平凡，猶過是大的偉人。無拍算享壽50歲，佇舊曆正月初2早起時3點半，安然受主揀召歸天家。伊的告別式，有欲甲成千人參加，用嚴肅悲哀的氣氛，聖歌隊穿白色的禮服，一路領先唱「天是我兜」的聖歌，會友也唱故人常常愛吟的聖詩，行列約有3，4百米的遠，予全南投的住民感動，所行過的街面，逐人攏用真劍嚴肅的態度來送這位「聖人」，佇悲哀嚴肅的中間送所敬疼的故謝Keng長老到永遠安歇的所在。
南投教會，
教末： 謝天祿報。