聖經學院的使命
Sèng-keng ha̍k-īⁿ ê sù-bēng
文獻資訊
| 項目 | 資料 |
|---|---|
| 作者 | 徐復增 Chhî Ho̍k-cheng |
| 卷期 | 台灣教會公報 |
| 卷期 | 第872期 |
| 日期 | 1961/8 |
| 頁數 | 3 |
白話字（原文數位化）
社論
Sèng-keng ha̍k-īⁿ ê sù-bēng
Chhî Ho̍k-cheng
1961年8月872期 頁3-4
Peh ge̍h 20 ji̍t sī lán Tâi-oân ê kàu-hoē kì-liām Sèng-keng ha̍k-īⁿ, iā uī-tio̍h i lâi kî-tó ê ji̍t. Tī chit ê sî lâi saⁿ-kap siūⁿ Sèng-keng ha̍k-īⁿ tī kàu-hoē lāi ê uī-tì kap sù-bēng sī chin ū ì-gī ê sū.
Goá siūⁿ Sèng-keng ha̍k-īⁿ ê sù-bēng kap kàu-hoē ê sù-bēng sī siāng-koán[sic.] ê. Koh-oa̍h ê Chú Iâ-so͘ teh-beh chiūⁿ thiⁿ ê sî bēng-lēng ha̍k-seng kóng, “Lín tio̍h khì chio bān peh-sìⁿ lâi choè ha̍k-seng, kā in kiâⁿ soé-lé, hō͘ in kui tī Pē, Kiáⁿ, Sèng Sîn ê miâ; kìⁿ-nā goá só͘ ū bēng-lēng lín ê, tio̍h kà-sī in siú…“(Thài 28: 19,20) Chú só͘ bēng-lēng ê oē ê lāi-bīn,lán thang hoat-kiàn kàu-hoē ê nn̄g ê toā sù-bēng.
(1) “Tio̍h khì chio bān phe-sìⁿ lâi choè ha̍k-seng,” che sī pò͘-tō, soan-kàu ê kang.
(2) “Kìⁿ-nā goá só͘ ū bēng-lēng lín ê, tio̍h kà-sī in siú,” che sī kàu-io̍k ê kang.
Soan-kàu kap kàu-io̍k, che sī kàu-hoē ê nn̄g toā sù-bēng. Kàu-hoē siat Sîn-ha̍k-īⁿ poê-ióng jîn-châi sī uī-tio̍h soan-kàu kap kàu-io̍k. Nā án-ni keng-êng Sèng-keng ha̍k-īⁿ neh? Bô koh-iūⁿ. Put-kò Sîn-ha̍k-īⁿ sī poê-iúⁿ bo̍k-su ê jîn-châi, in ê kang-chok hoān-uî khah khoah, tio̍h koán-ko͘ choân-thé ê kàu-hoē. Sèng-keng ha̍k-īⁿ sī beh poê-iúⁿ pang-chān ê.
Taⁿ hun-khui lâi lūn.
(1) Pang-chān soan-kàu ê kang-chok.
Chú kóng, “Tio̍h chio bān peh-sìⁿ lâi choè ha̍k-seng.” Tâi-oân iáu ū iok 98% ê lâng bô sìn Chú , in chin choē m̄-bat thiaⁿ-kìⁿ hok-im, in toā pō͘-hūn tiàm tī soaⁿ-kan, lông-chhoan, iân-hái, phian-phiah ê só͘-chāi. Kan-ta oá-khò kàu-hoē ê bo̍k-su khì thoân hok-im, in ê kang choè boē kàu, muí chi̍t ê sìn-tô͘ iā tio̍h hū chek-jīm khì thoân, khì choè kan-chèng. Sèng-keng ha̍k-īⁿ te̍k-pia̍t hùn-liān chi̍t koá hōng-hiàn in ê sim, sìn ê sìn-tô͘ choè soan-tō-su, khì lông-chhoan, iân-hái khòng-khu, kang-chhiúⁿ nih, lâi khai-thok thoân-tō sī chin pit-iàu ê sū.
Kūn-lâi lán kàu-hoē ê sîn-ha̍k kàu-io̍k phiau-chún ti̍t-ti̍t teh thê-ko, che sî chin thang hoaⁿ-hí ê hiān-siōng. Ū lâng teh siūⁿ, sîn-ha̍k thê-ko, kàu-chit-chiá ê chit hiòng-siōng lah, só͘-í bô su-iàu Sèng-keng ha̍k-īⁿ poê-iúⁿ ê soan-tō-su lah. Tān-sī lán tio̍h jīn chheng-chhó, thoân-kàu-chiá chit ê thê-ko, m̄-sī liōng ê cheng-ka. Siông-siông hoán-tńg chit ê thê-ko soà éng-hióng liōng ê kiám-chió. Chèng-siông sêng-tióng ê kàu-hoē, sî-siông iau-kiû kèng-to ê thoân-tō-chiá. Goá siong-sìn sîn-ha̍k kàu-io̍k ê thê-ko, boē oē hoè-bô thêng-tō͘ khah kē ê lông-chhoan, iân-hái si̍t-chè khai-thok thoân-tō-chiá ê su-iàu.
(2) Pang-chān Ki-tok-kàu kàu-io̍k ê kang.
Chú kóng, “Kìⁿ-nā goá só͘ bēng-lēng lín ê, tio̍h kà-sī in siú.” Ki-tok-kàu kàu-io̍k ê su-iàu sī kin-á-ji̍t sè-kài kàu-hoē ê siaⁿ. Koh-chài kàu-io̍k ê tuì-siōng iā toā-toā khok-toā lah. Hit ê kháu-hō kóng, “Tuì iô-nâ kàu koaⁿ-chhâ.” oāⁿ oē lâi kóng, muí chi̍t lâng tī in ê choân seng-gâi to su-iàu sìn-gióng seng-oa̍h ê kàu-io̍k. In-uī án-ni, kàu-hoē ha̍k-hāu(Chú-ji̍t-o̍h) tio̍h choân-poaⁿ-tek ê kiám-thó, chài chó͘-chit, chhiong-si̍t lāi-iông chéng-choê kàu-oân ê tīn-iông, kàu-ha̍k tio̍h chiàu khò-thêng ê sūn-sū khak-si̍t chhui-hêng. Si̍t-chāi beh hō͘ kàu-hoē ha̍k-hāu chhiong-si̍t lâi kiat ké-chí, tio̍h ū choan-kang ê lâng choè tiong-sim lâi chhui-hêng khah oē chiâⁿ-mi̍h. Ha̍k-seng, chheng-liân lâi choè kàu-oân sī chin hó, chóng-sī in chin oh-tit choè chhui-hêng ê tiong-sim lâi hū-chek. Koè-khì Chú-ji̍t-o̍h oh-tit sêng-kong ê goân-in , sī in-uī bô choan-kang hū-chek ê lâng. Sèng-keng ha̍k-īⁿ hùn-liān chhut-lâi ê jîn-châi, sī beh hō͘ in tam-tng chit khoán kàu-io̍k ê kang, iā hō͘ in pang-chān chheng-liân-hoē, hū-lú-hoē, sèng-koa-tuī, kap pang-chān bo̍k-su ê bo̍k-hoē ê kang.
(3) Sèng-kang ha̍k-īⁿ iā beh siông-siông khui té-kî ê káng-si̍p-hoē, hùn-liān sìn-tô͘ khah bat Sèng-keng kap tiōng-iàu ê kàu-lí, ha̍k-si̍p kò-jîn thoân-tō, kap choè kiàn-chèng ê siông-sek, hō͘ in khah oē hiáu pang-chān kàu-hoē ê kang-chok, hō͘ kàu-hoē koh khah oē oân-sèng Chú só͘ kau-thok ê sù-bēng.
漢羅（Ùi原文改寫）
社論
聖經學院的使命
徐復增
1961年8月872期 頁3-4
8月20日是咱台灣的教會記念聖經學院，也為著伊來祈禱的日。佇這个時來相佮想聖經學院佇教會內的位置佮使命是真有意義的事。
我想聖經學院的使命佮教會的使命是相關的。閣活的主耶穌teh欲上天的時命令學生講：「恁著去招萬百姓來做學生，共in行洗禮，予in歸佇父、子、聖神的名；見若我所有命令恁的，著教示in守……」主所命令的話的內面，咱通發見教會的兩个大使命。
(1)「著去招萬百姓來做學生」，這是佈道、宣教的工。
(2)「見若我所有命令恁的，著教示in守」，這是教育的工。
宣教佮教育，這是教會的兩大使命。教會設神學院培養人才是為著宣教佮教育。若按呢經營聖經學院neh？無各樣。不過神學院是培養牧師的人才，in的工作範圍較闊，著管顧全體的教會。聖經學院是欲培養幫贊的。
Taⁿ分開來論。
(1)幫贊宣教的工作。
主講：「著招萬百姓來做學生。」台灣猶有約98%的人無信主，in真濟毋捌聽見福音，in大部份踮佇山間、農村、沿海，偏僻的所在。干但倚靠教會的牧師去傳福音，in的工做未到，每一个信徒也著負責任去傳，去做干證。聖經學院特別訓練一寡奉獻in的心，信的信徒做宣道師，去農村、沿海、礦區，工廠nih，來開拓傳道是真必要的事。
近來咱教會的神學教育標準直直teh提高，這時真通歡喜的現象。有人teh想，神學提高，教職者的質向上lah，所以無需要聖經學院培養的宣道師lah。但是咱著認清楚，傳教者質的提高，毋是量的增加。常常反轉質的提高續影響量的減少。正常成長的教會，時常要求更多的傳道者。我相信神學教育的提高，未會廢無程度較低的農村、沿海實際開拓傳道者的需要。
(2)幫贊基督教教育的工。
主講：「見若我所命令恁的，著教示in守。」基督教教育的需要是今仔日世界教會的聲。閣再教育的對象也大大擴大lah。彼个口號講：「對搖籃到棺材。」換話來講：每一人佇in的全生涯都需要信仰生活的教育。因為按呢，教會學校（主日學）著全般tek的檢討，再組織，充實內容整齊教員的陣容，教學著照課程的順序確實推行。實在欲予教會學校充實來結果子，著有專工的人做中心來推行較會成物。學生、青年來做教員是真好，總是in真oh得做推行的中心來負責。過去主日學oh得成功的原因，是因為無專工負責的人。聖經學院訓練出來的人才，是欲予in擔當這款教育的工，也予in幫贊青年會、婦女會、聖歌隊，佮幫贊牧師的牧會的工。
(3)聖經學院也欲常常開短期的講習會，訓練信徒較捌聖經佮重要的教理，學習個人傳道，佮做見證的常識，予in較會曉幫贊教會的工作，予教會閣較會完成主所交託的使命。