聖地訪問記(1)
Sèng-tē Hóng-mn̄g-kì (1)
文獻資訊
| 項目 | 資料 |
|---|---|
| 作者 | 劉華義 Lâu Hoâ-gī |
| 卷期 | 台灣教會公報 |
| 卷期 | 第868期 |
| 日期 | 1961/4 |
| 頁數 | 16 |
白話字（原文數位化）
Sèng-tē Hóng-mn̄g-kì (1)
1961.04 868 hō p.16
Lâu Hoâ-gī
Tit-tio̍h Chú-pit ê hó-ì, ài goá chiong sèng-tē ê Lú-hêng-kì lo̍h tī Kong-pò lâi Pun tāi-ke. Che sǹg sī goá ê kong-êng. Bô sioh gia̍h pit ê ham-bān, kan-ta chiong só͘ khoàⁿ, só͘ thiaⁿ, só͘ kám, hun choè kuí-nā pái chò tāi-ke ê chham-khó.
Kiat-sok 2 nî kú tī Eng Bí ê ha̍k-seng seng-oa̍h, beh tńg-lâi Tâi-oân ê lō͘-tiong, ū ki-hoē thang hóng-mn̄g sèng-tē, sī goá it-seng choè toā ê khoài-lo̍k. Tuì tī gín-á sî-tāi chiū teh bîn-bāng, siat-sú nā ē thang chhin-sin lâi ta̍h-tio̍h Chú só͘ ta̍h koè ê tē, m̄-chai joā-nih hó leh! Sèng-tē sī ū toā ê khip-ín-le̍k tī muí chi̍t ê Ki-tok-tô͘ ê sim. Taⁿ chit pang sūn-lō͘ ē thang ta̍t-chiâⁿ chit ê kú-kú ê kî-bōng.
1)Hóng-mn̄g sèng-tē ê chìn-chêng ji̍t.
Káu goe̍h 28 ji̍t (1960) sī goá kap N̂g Chiong-hui Bo̍k-su iok-sok beh saⁿ-gū tī Lī-pa-loán kok ê Beirut jiân-āu beh saⁿ-kap khì sèng-tē ê ji̍t. N̂g Bo̍k-su tuì Hui-chiu hit ē-tàu í-keng kàu Beirut. Goá tuì Tek-kok hit ē-po͘ 4 tiám goā kàu uī. I tī hui-ki-tiûⁿ chiap goá. Goán chiū saⁿ-kap toà tī hui-ki kong-si só͘ chiau-thāi ê lú-koán, kiò-chò “Lord’s Hotel” (Chú ê kheh-koán). Chit ê miâ hō͘ goán ū chhin-bi̍t ê kám-kek, in-uī beh hóng-mn̄g sèng-tē ê chìn-chêng mê ē thang toà tī “Chú ê kheh-koán.” Beirut sī Lī-pa-loán ê siú-to͘ iā sī tiōng-iàu ê káng-kháu. Jîn-kháu 35 bān. Chú-iàu ê sán-bu̍t sī mî, kìn, i-luī kap kuì-kim-sio̍k luī ê chng-thāⁿ-phín. Ū chi̍t keng siat-pī oân-choân, chhut-miâ ê Bí-kok ê kàu-hoē tāi-ha̍k tī chia. Chit ê to͘-chhī tuì kó͘-chá chiū ū miâ-siaⁿ; hiān-sî chhī-sè ji̍t-ji̍t teh hoat-tián. Choè sin-sek ê kiàn-tiok-bu̍t[sic.] tông-hông koh bí-lē, kong lō͘ toā tiâu koh khoan-khoah, si̍t-chāi ū sin-heng ê khì-siōng. (Siōng sī Beirut chhī-ke).
Lī-pa-loán tī lán ê Sèng-keng sī kiò Hui-nî-ki, tuì kó͘-chá chiū uī-tio̍h chhut-sán pek-hiuⁿ-chhâ lâi chhut-miâ. Tī Kū-iok Sèng-keng Só͘-lô-bûn ông ê sî-tāi. Lī-pa-loán kok-ông ū kiong-kip pek-hiuⁿ-chhâ hō͘ Só͘-lô-bûn khí sèng-tiān kap ông-kiong. Hiān-sî pek-hiuⁿ-chhâ iáu sī chò in kok-ka ê kok-teng. Bô lūn tī iû-phiò-siōng á-sī tī soè-koan ê koan-hông téng lóng ē thang khoàⁿ-tio̍h pek-hiuⁿ-chhiū ê kì-hō. Peh-sèⁿ chin chhin-chhiat, koaⁿ-lī tuì goā-kok lú-kheh iā chin kheh-khì, só͘-í hō͘ goán ū lâu hó ê ìn-siōng.
Cha̍p goe̍h eng-kai sī liâng-léng ê chhiu-thiⁿ, nā-sī Beirut iáu-kú chin joa̍h, chhin-chhiūⁿ lán ê 6 goe̍h thiⁿ. Goán tī chia lâi thǹg-khí koâⁿ saⁿ, oāⁿ po̍h ê joa̍h saⁿ. Sek-lāi nā m̄-sī ū léng-khì ê siat-pī, si̍t-chāi bô hoat-tō͘ thang tiàm. Chia̍h àm pá, ū kuí-nā uī kàu-hoē ê léng-siù lâi hóng-mn̄g, kàu in tńg-khì teh siūⁿ beh chhut-khì nāu-jia̍t tē-khu lâi khoàⁿ-khoàⁿ leh, nā-sī kheh-koán ê lâng kóng chiah ê peh-sèⁿ chá khùn, chá khí-lâi, só͘-í í-keng siuⁿ àm, lóng koaiⁿ tiàm lah. Goán chiū chhut-khì lú-koán ê kīn-hū kiâⁿ-kiâⁿ leh. Kó-jiân ke-lō͘ chin chió lâng, toā pō͘-hūn ê chhù iā í-keng siau-teng. Tò-tńg lâi lú-koán khoán hêng-lí hó-sè, chiū lo̍h bîn-chhn̂g. Nā-sī sim-chêng, tú-tú chhin-chhiūⁿ gín-á sî-tāi beh khì lú-hêng ê chìn-chêng àm ê heng-hùn. Hoaⁿ-hí kî-thāi, ho͘N3-kî…hok-cha̍p ê sim-chêng, tì-kàu oh-tit lo̍h bîn. Sim-lāi uī-tio̍h bîn-á-ji̍t beh chiūⁿ sèng-siâⁿ, pek-chhiat khún-kiû Siōng-chú tài-niá kap chiok-hok. (Thāi-sio̍k).
漢羅（Ùi原文改寫）
聖地訪問記(1)
1961.04 868號p.16
劉華義
得著主筆的好意，愛我將聖地的旅行記落佇公報來分大家。這算是我的光榮。無惜攑筆的頇顢，干焦將所看，所聽，所感，分做幾若擺做大家的參考。
結束2年久佇英美的學生生活，欲轉來台灣的路中，有機會通訪問聖地，是我一生最大的快樂。對佇囡仔時代就咧眠夢，設使若會通親身來踏著主所踏過的地，毋知偌爾好咧！聖地是有大的吸引力佇每一个基督徒的心。Taⁿ這pang順路會通達成這个久久的期望。
1)訪問聖地的進前日。
九月28日(1960)是我佮黃彰輝牧師約束欲相遇佇Lī-pa-loán國的Beirut然後欲相佮去聖地的日。黃牧師對非洲彼下晝已經到Beirut。我對德國彼下晡4點外到位。伊佇飛機場接我。阮就相佮蹛佇飛機公司所招待的旅館，叫做「Lord’s Hotel」(主的客館)。這个名予阮有親密的感激，因為欲訪問聖地的進前暝會通蹛佇「主的客館。」Beirut是Lī-pa-loán的首都也是重要的港口。人口35萬。主要的產物是棉，絹，衣類佮貴金屬類的裝飾品。有一間設備完全，出名的美國的教會大學佇遮。這个都市對古早就有名聲；現時市勢日日咧發展。最新式的建築物堂皇閣美麗，公路大條閣寬闊，實在有新興的氣象。(像是Beirut市街)。
Lī-pa-loán佇咱的聖經是叫腓尼基，對古早就為著出產柏香柴來出名。佇舊約聖經所羅門王的時代。Lī-pa-loán國王有供給柏香柴予所羅門起聖殿佮王宮。現時柏香柴猶是做in國家的國徵。無論佇郵票上抑是佇稅關的關防等攏會通看著柏香樹的記號。百姓真親切，官吏對外國旅客也真客氣，所以予阮有留好的印象。
十月應該是涼冷的秋天，若是Beirut猶過真熱，親像咱的6月天。阮佇遮來褪起寒衫，換薄的熱衫。室內若毋是有冷氣的設備，實在無法度通踮。食暗飽，有幾若位教會的領袖來訪問，到in轉去咧想欲出去鬧熱地區來看看咧，若是客館的人講遮的百姓早睏，早起來，所以已經傷暗，攏關店啦。阮就出去旅館的近附行行咧。果然街路真少人，大部分的厝也已經消燈。倒轉來旅館款行李好勢，就落眠床。若是心情，拄拄親像囡仔時代欲去旅行的進前暗的興奮。歡喜期待，好奇….複雜的心情，致到僫得落眠。心內為著明仔日欲上聖城，迫切懇求上主帶領佮祝福。(待續)。