日本教會考察觀感
Ji̍t-pún Kàu-hoē Khó-chhat Koan-kám
文獻資訊
| 項目 | 資料 |
|---|---|
| 作者 | 陳 Kam-kó Tân Kam-kó |
| 卷期 | 台灣教會公報 |
| 卷期 | 第866期 |
| 日期 | 1961/2 |
| 頁數 | 29 |
白話字（原文數位化）
Ji̍t-pún kàu-hoē khó-chhat koan-kám
Tân Kam-kó
1961年2月866期 29
Goá phāu chin toā ê kî-thāi kap “ Iú só͘ tit “ê sim-chêng, 9 goe̍h 18 ji̍t chē Northewst Line ê phùn-siā-ki khì Ji̍t-pún. Khah bān kuí-nā ji̍t, Chiong Chú-sî Bo̍k-su, iûⁿ Se̍k-lîm Sian-siⁿ Phêⁿ Chheng-iok Tiúⁿ-ló, Tân Huī-lâm Bo̍k-si ia̍h lâi. Kok lâng ū kok lâng ê li̍p-tiûⁿ kap sù-bēng khì khó-chhat.
Keng-koè 80 ji̍t, lú-hêng Koan-sai, Kīn-ki, Koan-tong, Tang-pak, Pak-hái tō. Hóng-bún(sic) chē-chē kàu-hoē kap bo̍k-su í-ki̍p chheng-liân chí-tō chiá, chham-koan 12 ê lêng-siu tō-tiûⁿ á-sī camp, center ê siat-pī. Taⁿ chongha̍p pún-jîn ê kám-sióng;
1) Chiàu kap Ji̍t-pún bo̍k-su tâm-lūn só͘ chai, Ji̍t-pún kàu-hoē ê pêng-kin hoē-iú chi̍t keng sī 30 miâ.
2) Kàu-hoē chi̍p-tiong tī to͘-chhī, hiong-chhoan chin chió.
3) Bo̍k-su ê káng-tō chù-tiōng sîn-ha̍k chhim-tîm, put-kò nā bô ko tiong ê kàu-io̍k í-siōng ê ha̍k-le̍k oh lí-kái.
4) Kàu-hoē hoē-iú chió, hiàn-kim chió, bo̍k-su ê siā-lé bô choè-chió hān-tō͘ ê pó-chiong (kàu-hoē á-sī Tiong-hoē), só͘-í tio̍h khui iù-tī-hn̂g, siá goân-kó tâu tī sìn-gióng cha̍p-chì, á-sī tù-chok lâi pó͘-thiam bô kàu (m̄-sī lóng-chóng, chóng-sī chin chē).
5) Tióng-chip á-sī sìn-tô͘ ê kò-jîn ha̍k-le̍k, sìn-gióng it-poaⁿ-tek chuí-chún koân, chóng-sī kàu-hoē kám-kak bô oa̍h-khì.
6) Ji̍t-pún ê siā-hoē ài khin-sang iû-lo̍k, hióng-lo̍k, pháiⁿ hong-sio̍k (tuì sek-chêng), kàu-hoē m̄-káⁿ thiau-chiàn, sit-lo̍h tuì goā pò͘-tō ê ióng-khi. Siuⁿ koè sîn(sic)-sū -tek.
7) Pêng sìn-tô͘ ê iú-le̍k-chiá khah ài tī Y.M.C.A, Hu-lūn-siā oa̍h-tāng, tī kàu-hoē sī chí-ū choè chi̍t ê hó ê sìn-tô͘ nā-tiāⁿ. Che sī bo̍k-su ê chek-jīm á-sī pêng sìn-tô͘ ê chek-jīm goá m̄ káⁿ phoàⁿ-toàn.
8) Bí-kok chhe-hoē (kok-Kàu-phài) kià chin chē chiⁿ lâi khí lêng-siu tō-tiûⁿ, camp, center ê siat-pī. Kàu-hoē chin hok-khì thang hióng-siū chiah ê siat-pī.
Chóng kóng, Ji̍t-pún tuì chiàn-pāi liáu-āu, kàu-hoē ê ho̍k-heng jiok bē tio̍h siā-hoē ê ho̍k-heng. Bo̍k-su á-sī sìn-tô͘ kò-jîn sī chin bián-kióng, chin chhin-chhiat, bô thang hiâm ê khah chē, khó-sioh kàu-hoē bô oa̍h-khì, chió lâng. Goá tī 12 goe̍h 8 ji̍t tò-lâi, ū sî chēng-chēng siūⁿ-tio̍h Ji̍t-pún ê kàu-hoē ê sî, “Lán tio̍h o̍h in kò-jîn-tek ê chìn-tián.” Kàu-hoē nā beh phài lâng khì Ji̍t-pún khó-chhat ê sî, tio̍h bêng-pe̍k lán chia si̍t-chè oa̍h-tāng, khì hia thang tī chō-tâm ê sî kó͘-lē in. In hia ê bo̍k-su siông-siông ài goá kóng lán oa̍h-tāng ê sū, si̍t-chai goá ia̍h chhiong-hun hō͘ in ê bo̍k-su lī-iōng lah.
Pit-chiá:
I-su. Tâi-tiong Lí-goân kàu-hoē tiúⁿ-ló.
Chheng-liân-chhù-tiúⁿ.
漢羅（Ùi原文改寫）
日本教會考察觀感
陳Kam-kó
1961年2月866期 29
我抱真大的期待佮「有所得」的心情，9月18日坐Northewst Line的噴射機去日本。較慢幾nā日，將鍾Chú-sî牧師，游Se̍k-lîm先生、彭清約長老，陳Huī-lâm牧師亦來。各人有各人的立場佮使命去考察。
經過80日，旅行關西、近畿、關東、東北，北海道，訪問（按：原誤寫作「Hóng-bún」）濟濟教會佮牧師以及青年指導者，參觀12个靈修道場á是camp， center 的設備。今綜合本人的感想：
1)照佮日本牧師談論所知，日本教會的平均會友一間是30名。
2)教會集中佇都市，鄉村真少。
3)牧師的講道注重神學深沉，不過若無高中的教育以上的學歷oh理解。
4)教會會友少，獻金少，牧師的謝禮無最少限度的保障（教會á是中會），所以著開幼稚園，寫原稿投佇信仰雜誌，á是著作來補添無夠（毋是攏總，總是真濟）。
5)長執á是信徒的個人學歷，信仰一般tek水準懸，總是教會感覺無活氣。
6)日本的社會愛輕鬆，遊樂、享樂、歹風俗（對色情），教會毋敢挑戰，失落對外佈道的勇氣。傷過紳士（按：原誤寫作「sîn-sū」）tek。
7) 平信徒的有力者較愛佇Y.M.C.A、扶論社活動，佇教會是只有做一个好的信徒nā-tiāⁿ。這是牧師的責任á是平信徒的責任我毋敢判斷。
8)美國差會（各教派）寄真濟錢來起靈修道場，camp， center 的設備。教會真福氣通享受遮的設備。
總講：日本對戰敗了後，教會的復興逐袂著社會的復興。牧師á是信徒個人是真勉強：真親切，無通嫌的較濟，可惜教會無活氣，少人。我佇12月8日倒來，有時靜靜想著日本的教會的時，「咱著學in個人tek的進展。」教會若欲派人去日本考察的時，著明白咱遮實際活動，去遐通佇座談的時鼓勵in。In遐的牧師常常愛我講咱活動的事，實在我亦充分予in的牧師利用lah。
筆者：
醫師 台中Lí-goân教會長老。
青年處長。