現今的大問題
Hiān-kim ê toā būn-toê
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第865期 |
| 日期 | 1961/1 |
| 頁數 | 16 |
白話字（原文數位化）
家庭講座(1) Hiān-kim ê toā būn-toê
1961年1月 865期 16-18
▲ Tit tio̍h chú-pi̍t Tân Bo̍k-su ê gâu kè-e̍k, tuì kin-nî khí ē ke-thiⁿ chi̍t phiⁿ “Ka-têng káng-chō” hō͘ lán thang saⁿ-kap siūⁿ ka-têng ê chu būn-toê, si̍t-chāi kàu-gia̍h hoaⁿ-hí ê sū.
▲ Chóng-sī lóng bô phah-sǹg, soà siū-bēng ài hū-tam thâu chi̍t pái ê kang; in-uī m̄-sī chit hong-bīn ê choan-ka, goá kám-kak put-phoè bô lêng.
▲ ǹg-bāng tuì āu ge̍h hō, oē tit-tio̍h choan-ka ê bûn-chiuⁿ, thang hoàn-khí lán tuì ka-têng būn-toê ê koan-sim, saⁿ-kap chīn Ki-tok-tô͘ ê pún-hūn.
Ka-têng sī lán lâng thâu chi̍t ê chhut-hoat-tiám, in-uī lóng tī chit tuì pē-bú ê ē-bīn chhut-sì, tī chia thâu-pái kìⁿ-tio̍h sè-kan.
Ka-têng sī chi̍t ê sió siā-hoē, sī tē-it iàu-kín ê thoân-ché; in-uī tī chia ū hoat-seng koan-hē, ū “lí” kap “goá” ē kau-poê.
Ka-têng sī seng-oa̍h ê tiong-sim, sī lán ê kī-chhó͘; in-uī lâng tī chia seng-tióng toā-hàn, tuì chia teh chhut-ji̍p.
Taⁿ sui-jiân sī án-ni, choè kūn siông-siông thiaⁿ-kìⁿ chi̍t kù oē, kong,”bó͘-bó͘ lâng ê ke, sit-chāi m̄-chiâⁿ ka-têng” Che sī sím-mi̍h ì-sù? Cháiⁿ-iūⁿ oē pìⁿ-choè án-ni? Nā-sī ū iáⁿ ū chin choē m̄-chiâⁿ ka-têng ê ke, che kiám m̄-sī chiàⁿ-chiàⁿ chiū-sī hiān-kim ê toā būn-toê? In-uī lán ê seng-oa̍h ê ki-chhó͘ í-keng siū iô-tāng lah.
Chit tia̍p saⁿ-kap lâi siūⁿ kui-hāng sū:
1.Kip-piàn ê siā-hoē
Lán phah-sǹg tio̍h ài bêng-pe̍k hiān-kim ê sî-tāi, in-uī chit ê piàn-chhian ê siā-hoē, sū-si̍t ū tuì goā-bīn toā éng-hióng lán ê ka-têng.
Chiàu lán só͘-chāi, hiān-kim chiū-sī bī-chêng-iú ê kín-tiuⁿ ê sî-tāi(1) Ū joa-nih choē chá-sî ê sit-bîn kok-ka teh ūn-tōng bîn-cho̍k ê to̍k-ji̍p(sic.). (2) Tī ta̍k só͘-chāi ū chin ōng-sêng ê kek-bēng hong-khì. (3) Ū chin ho̍k-cha̍p ê tang-sai kok-ka ê léng-chiàn(4) Ū chin choē kū ê chong-kàu koh-chài teh ho̍k-heng.
Chóng-sī chit sî goá ài te̍k-pia̍t thê-khí, kuí-hāng tī Tâi-oân só͘ ū ê tiong-iàu(sic.) sū-sit.
1) Jî-kháu(sic.) koè-to.
Chit chūn ê jîn-kháu, í-keng beh oá kong-ho̍k hit sî ê nn̄g-poē. Thó͘-toē lóng bô khah ke, nā-sī lâng ti̍t-ti̍t ke-thiⁿ, che oē suî-sî ti̍t-chiap éng-hióng lán ê chia̍h kap toà ê būn-toê. Che kiám kap ka-têng bô koan-hē?
2) Keng-chè khùn-lân
Oh chhē thâu-lō͘, ia̍h siu-ji̍p chió, nā-sī seng-oa̍h huì-iōng koân, keng-chè kun-pún boē an-tēng. uī-tio̍h án-ni, liân hū-jîn-lâng ia̍h tio̍h chhut-khì goā bīn chhē kang-chok á-sī tī chhù-lāi choè hù-gia̍p. Che kiám boē éng-hióng ka-têng?
3) Kūn-tāi kang-gia̍p.
Í-chêng sī lông-gia̍p kok-ka, nā-sī bô kang-gia̍p hoà toè boē tio̍h. Chit ê kang-gia̍p hoà kap it-chhè to͘-chhī chi̍p-tiong, si̍t-chāi ū ti̍t-chia̍p éng-hióng keng-chè, siā-hoē, í-ki̍p bûn-hoà ê put-an. Ka-cho̍k siū sì-soàⁿ, lâng ia̍h ná ke-khì hoà. Si̍t-chāi beh cháiⁿ-iūⁿ thang chun-tiōng kò-jîn ê jîn-keh?
4) Bîn-chú chú-gī.
Chiàn-cheng āu só͘ liû-hêng ê bîn-chú chú-gī, ū joā-choē lâng si̍t-chāi lí-kái hit ê cheng-sîn? Bîn-chú ê cheng-sîn sī oē iok-sok ka-kī, chóng-sī lâng lóng gō͘-hoē teh loān-iōng “chū-iû” Chit ê chhò-gō͘; ū éng-hióng tī sin sî-tāi kap kū sî-tāi kan ê put-hô.
5) Se-iûⁿ bûn-hoà
Ū joā-nih choē ê put-liông bûn-hoà, iû-goân ū chìn-kháu chiâⁿ-choè toā éng-hiông. In-uī án-ni, hō͘ lán ê Tang-iûⁿ ki-pún to-tek(sic.) soà hūn-loān, tì-kàu éng-hióng kàu tī ka-têng ê hong-khì.
- Ka-têng guî-ki.
Taⁿ lán lâi khoàⁿ ka-têng ê sî, beh hoat-kiàn tio̍h chin choē khùn-lân tiám. Goân-lâi eng-kai sī hô-khì ai-ai ê ka-têng, kin-á-ji̍t choē-choē pìⁿ-choè oàn-tò͘, saⁿ-chiⁿ, bô lí-kái, bô hia̍p-le̍k, chi̍t lâng chi̍t lō͘ ê thoân-thé . Ū choē-choē ka-têng, in ê chhù put-kò sī kan-ta pìⁿ-choè si̍t-tn̂g beh chia̍h-pn̄g, choè lú-khoán beh hioh-khùn ê só͘-chāi nā-tiāⁿ. Si̍t-chāi sī khó-lîn kàu-ke̍k! Che kiám m̄-sī guî-ki?
1) Chè-tō͘ piàn-oāⁿ.
Í-chêng lán ê thoân-thóng chiū-sī toā ka-cho̍k chè-tō͘, nā-sī í-keng chiām-chiām oāⁿ choè sió ka-têng chú-gī. Chóng-sī kàu sím-mi̍h thêng-tō͘ thang án-ni piàn-oāⁿ? Ū-sî uī-tio̍h m̄-chiâⁿ lióng-pêng, hoán-tńg hoat-seng mâu-hoân.
2) Khiàm-kheh thoân-kiat
Hu-hū, pē-kiáⁿ, hiaⁿ-tī, ta-ke sim-pū, í-kip chhin-lâng ê tiong-kan, ū khiàm-kheh saⁿ-thiàⁿ, saⁿ thé-thiap ê sim. Sió siā-hoē ê ka-têng boē thang chiâⁿ-choè chi̍t-sim, boē bián-tit tī muí-ji̍t ê sin-bûn só͘ khoàⁿ ê lī-hun, thâi-lâng, chū-sat, sio-kò téng; lóng sī tuì chia khí-in.
3)Tō-tek hù-pāi(sic.).
Choē-choē put-liông ê gû-lo̍k, tiān-iáⁿ, á-sī siáu-soat ū éng-hióng chit ê siā-hoē, tì-kàu lâm-lú kan ê koan-hē soà oai-chhoah. Hiah-nih choē ê kong-kiōng tê-sek á-sī kun-tiong lo̍k-hn̂g, kiám ū iáⁿ boē éng-hióng lán ê ka-têng?
4) Sit-lo̍h kàu-io̍k.
Pē-bó ê put-hô, á-sī bô koan-sim gín-ná, ū-sī tuì gín-ná ê kàu-io̍k oân-choân ēng lī-kí tek, bô chun-tiōng gín-ná ê jîn-keh. Chiah ê lóng ū chiâⁿ-choè kín-á-ji̍t ê siàu-liân hoān-choē ê toā goân-in. Chhut thài-pó thài-moē ê ka-têng lāi, kun-pún ū sit-lo̍h si̍t-chāi ê kàu-io̍k.
5) Hun-in būn-toê.
Beh chiâⁿ chi̍t ê ka-têng sī tuì kiat-hun lâi khai-sí, án-ni nā oē sū-sian hó-hó chí-tō hun-in, ún-tàng thang kî-thāi chiong-lâi ū suí ê ka-têng. Tī koè-khì, si̍t-chāi ū loā-choē lâng koan-sim tī chit tiám? Chin khó-sioh, lán nā kóng hun-in chí-tō, chí-ū teh siūⁿ” choè moê-lâng tàu kài-siāu” nā-tiāⁿ.
- Kàu-hoē ê khò-toê
Kì-jiân ka-têng sī hiān-kim ê toā būn-toê, tàu-tí sí sím-mi̍h lâng tio̍h hū chit ê chí-tō ê chek-jīm? Kiám thang kan-ta kî-thāi siā-hoē ê hong-siaⁿ á-sī thoân-thóng?
Kàu-hoē sū-si̍t sī ài khiā tī siā-hoē ê bīn-chêng lâi kiâⁿ, sui-jiân sī chió-chió ê sò͘ gia̍h, lán eng-kai ài ū chhòng-chō tek ê khuì-la̍t.
uī-tio̍h án-ni, tī chit tia̍p kàu-hoē ê tiōng-iàu hong-chiam ū nn̄g hāng:
1) Ka-têng ê kàu-hoē.
Muí chi̍t ê Ki-tok-tô͘ ka-têng chiū-sī kàu-hoē ê ki, tio̍h ài chiâⁿ-choè chit ê sió kàu-hoē tī só͘ khiā-khí ê só͘-chāi kan-chèng Iâ-so͘ Ki-tok. uī-tio̍h chit ê hong-chiam, lán ài tì-ì ka-têng ê kàu-io̍k, ia̍h tī bo̍k-hoē siōng muí ka-têng kap kàu-hoē ài bi̍t-chhiat ê liân-lo̍k.
2) Sìn-gióng ê seng-oa̍h hoà.
Lán nā khoàⁿ kàu-hoē ê le̍k-sú, oa̍h-oa̍h ê sìn-gióng lóng ū thong-koè i ê seng-oa̍h piáu-hiān chhut-lâi. Kì-jiân lán beh chiâⁿ-choè Ki-tok hoà ka-têng, lán nā oē ēng Ki-tok ê sìn-gióng piáu-hiān tī ji̍t-siông ê seng-oa̍h, che chiah oē lī-ek lán ê ka-têng í-ki̍p chèng-kô(sic.) ê siā-hoē.
Taⁿ koan-hē ka-têng būn-toê ê gián-kiù, saⁿ-kap kán-tan lâi siūⁿ lán Tâi-oân kàu-hoē tī koè-khì só͘ choè--ê, í-ki̍p kî-thāi chiong lâi eng-kai tio̍h choè--ê.
1)Hoê-sióng koè-khì.
Í-chêng ū kuí-uī bo̍k-su, put-chí tì -ì tī ka-têng seng-oa̍h būn-toê ê gián-kiù, put-kò che chí-ū sī tī in ê bo̍k-hoē siōng tām-po̍h teh thê-khí jî-í.
Kàu-tī 1954 nî 11ge̍h 2-16 ji̍t, ū 10 miâ(pau-hâm goā kàu-phài), tāi-piáu khì chham-ka, “Tang A Ki-tok-kàu ka-têng gián-kiù tāi-hoē” tò-tǹg-lâi. Tuì chit-sî khí, tāi-ke ê ba̍k-chiu ū ke khah khoah, ia̍h jīm-bat chit ê tiōng-iàu sèng.
āu-lâi ia̍h bat sêng-li̍p “Ki-tok-hoà ka-têng seng-oa̍h gián-kiù-hoē,” á-sī ū tāi-piáu chhut-kok chham-ka 1958 nî 2 ge̍h 1-4 ge̍h 25 ji̍t tī Thài-kok ê “Tang Lâm A kiat-hun, ka-têng būn-toê gián-kiù-hoē.”
Sū-si̍t í-keng ū kuí-uī chin koan-sim ê lâng tī hia, tī chia teh hoàn-khí ka-têng seng-oa̍h būn-toê, sī thang hoaⁿ-hí ê sū.
Chóng-sī chin khó-sioh, kàu taⁿ iáu boē thang ū sím-mi̍h kè-sio̍k sèng ū la̍t ê chó͘-chit, á-sī gián-kiù tiong-sim thang chhui-hêng kap kióng-èng choē-choē ê su-iàu.
2) Kî-thāi chiong-lâi.
- Siat-li̍p gián-kiù-hoē.
ēng iú-sim ê lâng kap kuí-uī choân-ka(sic.), thang siat-li̍p chi̍t ê tông-chì ê gián-kiù-hoē; thong-koè chit ê hoē hoat-toê, thó-lūn thang thê-chhut chí-tiám hō͘ kàu-hoē.
Só͘ tio̍h thó-lūn ê būn-toê, chiàu ē-bīn:
Ka-têng chè-tō͘ ê būn-toê.
Sèng, ài-chêng, kiat-hun koan.
Hun-in ê chún-pī.
Hun-in ê chiap-tâm.
Pē-bú ê kàu-io̍k.
Sán-jî ê būn-toê.
Ka-têng kàu-io̍k.
Ji̍t-siông seng-oa̍h.
Ka-têng kap kàu-hoē.
Ka-têng kap siā-hoē.
Ka-têng chí-tō.
Chheng-liân chí-tō.
Hùn-liān chí-tō-chiá.
Hoat-khan ka-têng cha̍p-chì.
2.Kiông-hoà Ka-têng-pō͘ hū-lú-hoē.
Tiong-hoē Ka-têng-pō͘ beh gián-kiù ê hoān-uî tio̍h ài khah khoah, thang chí-sī kok kàu-hoē beh choè ê hong-chiam. Hū-lú-hoē sī khiā tī tē-it-soàⁿ teh kang-chok, ǹg-bāng oē gián-kiù choân-poaⁿ tek “Ka-têng seng-oa̍h būn-toê.”
- Hùn-liān chí-tō-chiá.
Chhiat-chhiat su-iàu ū choân-bûn ê jîn-châi, thang hū-khí chit ê tiōng-iàu ê kang. ǹg-bāng oē tuì Sîn-ha̍k-tek, i-ha̍k-te̍k, sim-lí-tek, cheng sîn-tek téng, ê kok hong-bīn chuut léng-to ê âng(sic.).
Kî-thāi tuì kin-nî khí, oē koh khah choē lâng uī-tio̍h “Ki-tok sī ngó͘ ka chi Chú”(基督是我家之主) lâi ló͘-le̍k.
Pit-chiá:
Goân-che̍k: Tâi-tiong koān,34 hoè.
Ha̍k-gia̍p: Tâi-oân Sîn-ha̍k-īⁿ.
Bí-kok Bangor Sîn-ha̍k-īⁿ.
Hiān-jīm: Sin-tiàm kàu-hoē bo̍k-su,
Kiam Tâi-oân Sîn-ha̍k-īⁿ káng-su.
漢羅（Ùi原文改寫）
家庭講座(1)現今的大問題
1961年1月 865期 16-18
▲得著主筆陳牧師的gâu計劃，對今年起會加添一篇「家庭講座」予咱通相與想家庭的註問題，實在夠額歡喜的事。
▲總是攏無拍算，續受命愛負擔頭一擺的工；因為毋是這方面的專家，我感覺不配無能。
▲向望對後月號，會得著專家的文章，通喚起咱對家庭問題的關心，相與盡基督徒的本份。
家庭是咱人頭一個出發點，因為攏佇這對父母的下面出世，佇遮頭擺見著世間。
家庭是一个小社會，是第一要緊的團結（原文誤做thoân-ché）；因為佇遮有發生關係，有「你」佮「我」會交陪。
家庭是生活的中心，是咱的基礎；因為人佇遮生長大漢，對敢teh出入。
今雖然是按呢，最近常常聽見一句話，講，「某某人的家，實在毋成家庭」這是啥物意思？怎樣會變做按呢？若是有影有真濟毋成家庭的家，這敢毋是正正就是現今的大問題？因為咱的生活的基礎已經受搖動lah。
這霎相與來想幾項事：
1。急變的社會
咱拍算著愛明白現今的時代，因為這个變遷的社會，事實有對外面大影響咱的家庭。
照咱所在，現今就是未曾有的緊張的時代(1)有偌爾濟早時的失眠國家teh運動民族的獨立（按：原誤寫作「to̍k-ji̍p」）。(2)佇逐所在有真旺成的革命風氣。(3)有真複雜的東西國家的冷戰 (4)有真濟舊的宗教koh再teh復興。
總是這時我愛特別提起，幾項佇台灣所有的重要（按：原誤寫作「tiong-iàu」）事實。
1) 人口（按：原誤寫作「Jî-kháu」）過多。
這陣的人口，已經欲倚光復彼時的兩倍。土地攏無較加，若是人直直加添，這會隨時直接影響咱的食佮住的問題。這敢佮家庭無關係？
2)經濟困難。
Oh找頭路，亦收入少，若是生活費用懸，經濟根本袂安定。為著按呢，連婦人人亦著出去外面找工作á是佇厝內做副業。這敢袂影響家庭？
3)近代工業。
以前是農業國家，若是無工業化綴袂著。這个工業化佮一切都市集中，實在有直接影響經濟，社會，以及文化的不安。家族受四散，人亦ná機器化實在欲怎樣通尊重個人的人格？
4)民主主義。
戰爭後所流行的民主主義，有偌濟人實在理解彼个精神？民主的精神是會約束家己，總是人攏誤會teh亂用「自由」這个錯誤；有影響佇新時代佮舊時代間的不和。
5)西洋文化有偌呢濟的不良文化，猶原有進口成做大影響。因為按呢，予咱的東洋基本道德（按：原誤寫作「to-tek」）續混亂，致到影響到佇家庭的風氣。
2。家庭危機。
今咱來看家庭的時，欲發見著真濟困難點。原來應該是和氣ai-ai的家庭，今仔日濟濟變做怨妒，相爭，無理解，無協力，一人一路的團體。有濟濟家庭，in的厝不過是kan-ta變做食堂欲食飯，做旅館（按：原誤寫作「lú-khoán」）欲歇睏的所在nā-tiāⁿ。實在是可憐到極！這敢毋是危機？
1)制度變換。
以前咱的傳統就是大家族制度，若是已經漸漸換做小家庭主義。總是到啥物程度通 按呢變換？有時為著毋成兩爿，反轉發生麻煩。
2)欠缺團結。
夫婦，父囝，兄弟，ta-ke新婦，以及親人的中間，有欠缺相疼，相體貼的心。小社會的家庭袂-通成做一心，袂免得佇每日的新聞所看的離婚，刣人，自殺，相告等；攏是對遮起因。
3)道德腐敗（按：原誤寫作「hù-pāi」）
濟濟不良的娛樂，電影，á是小說有影響這个社會，致到男女間的關係續歪chhoah。Hiah呢濟的公共茶室á是軍中樂園，敢有影袂影響咱的家庭？
4)失落教育。
父母的不和，á是無關心囡仔，有是對囡仔的教育完全用利己tek，無尊重囡仔的人格。遮的攏有成做今仔日的少年犯罪的大原因。出太保太妹的家庭內，根本有失落實在的教育。
5)婚姻問題。
欲成一个家庭是對結婚來開始，按呢若會事先好好指導婚姻，穩當通期待將來有媠的家庭。佇過去，實在有偌濟人關心佇這點？真可惜，咱若講婚姻指導，只有teh想「做媒人鬥介紹」nā-tiāⁿ。
3。教會的課題
既然家庭是現今的大問題，到底死啥物人著這个指導的責任？敢通kan-ta期待社會的風聲á是傳統？
教會事實是愛徛佇社會的面前來行，雖然是少少的數額，咱應該愛有創造tek的氣力。
為著按呢，佇這霎教會的重要方針有兩項：
1)家庭的教會。
每一的基督徒家庭就是教會的基，著愛成做這个小教會佇所徛起的所在干證耶穌基督。為著這个方針，咱愛致意家庭的教育，亦佇牧會上每家庭佮教會愛密切的連絡。
2)信仰的生活化。
咱若看教會的歷史，活活的信仰攏有通過伊的生活表現出來。既然咱欲成做基督化家庭，咱若會用基督的信仰表現佇日常的生活，這才會利益咱的家庭以及整個（按：原誤寫作「chèng-kô」）的社會。
今關係家庭問題的研究，相與簡單來想咱台灣教會佇過去所做--的，以及期待將來應該著做--的。
1)回想過去。
以前有幾位牧師，不止致意佇家庭生活問題的研究，不過這只有是佇in的牧會上淡薄teh提起而已。
到佇1954年11月2-16日，有10名（包含外教派），代表去參加，「東亞基督教家庭研究大會」」倒轉來。對這時起，大家的目睭有加較闊，亦認識這个重要性。
後來亦捌成立「基督化家庭生活研究會」，á是有代表出國參加1958年2月1-4月25 日佇泰國的「東南亞結婚、家庭問題研究會。」
事實已經有幾位真關心的人佇遐，佇敢teh喚起家庭生活問題，是通歡喜的事。
總是真可惜，到今猶袂通有啥物繼續性有力的組織，á是研究中心通推行佮供應濟濟的需要。
2)期待將來。
1。設立研究會。
用有心的人佮幾位專家，通設立一个同志的研究會；通過這个會發題，討論通提出指點予教會。
所著討論的問題，照下面：
家庭制度的問題。
性，愛情，結婚觀
婚姻的準備。
婚姻的協談。
父母的教育。
產兒的問題。
家庭教育。
日常生活。
家庭佮教會。
家庭佮社會。
家庭指導。
青年指導。
訓練指導者。
發刊家庭雜誌。
2。強化家庭部婦女會。
中會家庭部欲研究的範圍tio̍h 愛 較闊，通指示各教會欲做的方針。婦女會是徛佇第一線teh工作，向望會研究全般tek「家庭生活問題」。
3。訓練指導者。
切切需要有專門的人才，通負起這个重要的工。向望會對神學tek，醫學tek，心理tek，精神tek等，的各方面出領導的人（按：原誤寫作「âng」）。
期待對今年起，會閣較濟人為著「基督是我家之主」（基督是我家之主）來努力。
筆者：
原籍：台中縣，34歲。
學業：台灣神學院。
美國Bangor神學院。
現任新店教會牧師，
兼台灣神學院講師。