魏士德博士的做人佮神學
Guī Sū-tek Phok-sū ê chò lâng kap sîn-ha̍k
文獻資訊
| 項目 | 資料 |
|---|---|
| 作者 | 鄭兒玉 Tēⁿ Jî-gio̍k |
| 卷期 | 台灣教會公報 |
| 卷期 | 第864號 |
| 日期 | 1960/12 |
| 頁數 | 17 |
白話字（原文數位化）
Guī Sū-tek Phok-sū ê chò lâng kap sîn-ha̍k
Tâi-lâm Sîn-ha̍k-īⁿ Hù kàu-siū︰Tēⁿ Jî-gio̍k
1960年12月864期 17-18
1958 nî ê chhiu-thiⁿ, goá khì Ji̍t-loē-oá kau-goā ê Bo͘h8-seí (Bossey) chham-ka tē 7 kài ê Ji̍t-loē-oá Tāi-ha̍k Phó͘-sè kàu-hoē Gián-kiù-īⁿ ê sî, ū kap chi̍t uī tuì Bí-kok Liân-ha̍p Tiúⁿ-ló Kàu-hoē lâi ê Sîn-ha̍k-ka Guī Sū-tek Phok-su(魏士德,Charles C.West) siong-hoē. Goá iáu tī Bí-kok ê sî to͘ í-keng ū thiaⁿ-kìⁿ i ê ko-miâ, nā-sī chiap-tio̍h i pún-lâng ê sî, chiah chai i sī chin khiam-pi koh hó kau-poê ê lâng. I ê siok-sià tú-tú khiā tī goán ê keh-piah. Tī Bo͘h8-seí ê poàⁿ nî kú, goá siū i ê kà-sī í-ki̍p in choân-ke ê chiàu-kò͘ put-chí toā, hō͘ goá chin kám-kek, kàu taⁿ iáu-kú teh siàu-liām. Ū chi̍t pái i só͘ chú-chhî ê Tiúⁿ-ló chè-tō͘ ê Sèng-chhan-sek ê sî, m̄-chai cháiⁿ-iūⁿ kiò goá tam-tng chō͘-lí Sèng-chhan ê chit, hō͘ goá hui-siông gông-ngia̍h, koh kám-kak chin bē kham-tit.
Taⁿ Guī Kàu-siū í-keng tī 11 ge̍h tiong-sûn chiū lâi Hiong-káng hù Ki-tok-kàu kap Tiong-kok Chong-kàu ê gián-kiù-hoē. Jiân-āu tī 11 ge̍h 28 ji̍t kàu 12 ge̍h 4 ji̍t ê chi̍t lé-pài kú, beh lâi hóng-būn lán ê Tâi-oân kàu-hoē. Hiān-chāi Tâi-lâm Sîn-ha̍k-īⁿ ū teh kè-e̍k beh chhiáⁿ i káng-ián “Hiān-tāi Ki-tok-kàu su-sióng ê choè kín-iàu ê būn-tê,” iā soà beh chhiáⁿ i tiàm kàu-sek kap ha̍k-seng thó-lūn “Kàu-hoē kap kip-piàn ê siā-hoē ê koan-hē”. Tī beh ngiâ-chih chit ê uí-tāi ê Phó͘-sè kàu Liân ê sîn-ha̍k-ka lâi Tâi-oân ê sî, goá siūⁿ ū pit-iàu kài-siāu i ê chò lâng kap sîn-ha̍k hō͘ lán Tâi-oân kàu-hoē ê chu-uī kàu-chit kap hiaⁿ-ché chai, só͘-í chiah gia̍h-pit.
Guī Bo̍k-su chhut-sì tī Bí-kok. Tī Niú-io̍k ê hia̍p-hô Sîn-ha̍k-īⁿ pit-gia̍p liáu-āu khì Iè-luh(Yale) Tāi-ha̍k tit-tio̍h tia̍t-ha̍k phok-sū(Ph.D.). I bat lâi Tiong-kok chò soan-kàu-su, tī hit sî iā bat tī Kim-lêng Tāi-ha̍k chò kàu-siū, só͘-í i iā ē hiáu-tit kóng Tiong-kok oē.āu-lâi khì Tek-kok chò kàu-hoē hō͘-chō͘ ê sū-gia̍p. Hiān-chāi sī Phó͘-sè Kàu Liân Gián-kiù-īⁿ ê hù īⁿ-tiúⁿ.
Guī Sian-sin tû-khí chhut chin-chē ê kó tī chióng-chióng ê sîn-ha̍k phêng-lūn-chì í-goā, hiān-chāi tī goá ê chhiú-tiong ū 3 pún i ê chheh. “Kiōng-sán Chú-gī kap Sîn-ha̍k-ka”(Communism and the Thologians, 1958, S.C.M. London). Chit pún goá beh lī-khui Bo͘h8-seí ê sî, i ū ēng Hàn-jī chhiam i ê miâ kap goá ê miâ sàng goá ê. Tē 2 pún sī Tio̍h chhut iâⁿ-goā(o͘t-side the camp, 1959, Do͘bleday, New York). Chit pún ìn hó ê sî, i iā ū chhiam-miâ suî-sî kià lâi sàng goá. Tē 3 pún sī Tī Tang Sai ê Soan-kàu ê Kàu-hoē (The Missionary Church in East and West , edited with David paton, 1959, S.C.M, London).
Guī Lāu-su ê sîn-ha̍k su-sióng sī chiàu i ê keng-le̍k án-ni, tong-jiân sī choan-bûn tī soan-kàu-ha̍k nih. I ê Tio̍h Chhut iâⁿ-goā ê chheh, ē tit thang siāng-sî kóng sī i ê sîn-ha̍k ê phiau-tê. I tī Kiōng-sán Chú-gī kap sîn-ha̍k-ka ê tiong-kan ū thê-chhut kuí-nā ê būn-tê. Má-khek-su Chú-gī tuì Ki-tok-kàu ê thiau-chiàn sī í-keng bē tit thang bû-sī ê sū-si̍t. Bô lūn lí-lūn-siōng kap si̍t-chè-siōng beh jû-hô lâi èng hù in ê thiau-chiàn? uī-tio̍h chit ê chit-būn, i ū soán kuí-nā ê hiān-tāi ê tāi-piáu-tek ê sîn-ha̍k-ka lâi gián-kiù, khoàⁿ in cháiⁿ-iūⁿ teh ìn-tap chiah ê thiau-chiàn. Chiū-sī E. Bú-lún-nà(Brunner), J. Lô͘-má-ló͘-khah(Hromadka), P.Thí-lih-hih(Tillich), R.Nì-bà(Niebuhr), kap k.Bá-lú-to͘h(Barth) téng ê lâng. Í-goā iā ū kóng-khí saⁿ ê. Chiah ê lâng sui-bóng in ê ha̍k-būn-tek ê li̍p-tiûⁿ bô tú-tú lóng sio-siāng, iáu-kú in ē tit thang kóng sī sio̍k tī Guî-ki Sîn-ha̍k, á-sī Sin chèng-thóng Sîn-ha̍k ê tē-it liû ê lâng.
Nā-sī Guī Kàu-siū pún-lâng tuì chit ê thiau-chiàn ê ìn-tap bô suî-sî chhut tī kiat-lūn nih. Lēng-khó͘ tī kè tńg nî (1959) só͘ chhut-pán ê Tio̍h chhut iâⁿ-goā nih lâi ìn-tap che. Tī chit pún chheh ê khí-thâu to͘ í-keng teh ìn-tap kàu-hoē tī nn̄g ê sè-kài ê tiong-kan beh cháiⁿ-iūⁿ chò? Tù-chiá ín-iōng Hi-pek-lâi 13:13 kóng, lán tio̍h ài chhut Siōng-tè ê iâⁿ-goā, tī lāi(kàu-hoē) goā (sè-kài) ê lióng chiàn-tiûⁿ tàu-cheng. Kàu-hoē tuì lāi ê tàu-cheng sī chhiau-kè kàu-phài, thoân-thóng, bîn-cho̍k kap kok-ka, sè-kài ê kàu-hoē tio̍h ài tī Chú ê miâ lâi ha̍p-it ê si̍t-hiān. Kàu-hoē tuì goā tàu-cheng ê tuì-siōng sī chó͘-chit (chè-tō͘), chèng-tī, chú-gī kap bûn-hoà téng tī hit tiong-kan lâi khak-li̍p Ki-tok ê Ông-koân.
漢羅（Ùi原文改寫）
魏士德博士的做人佮神學
台南神學院副教授：鄭兒玉
1960年12月864期 17-18
1958年的秋天，我去日內瓦郊外的Bo͘h8-seí (Bossey)參加第7屆的日內瓦大學普世教會研究院的時，有佮一位對美國聯合長老教會來的神學家魏士德博士(魏士德，Charles C. West)相會。我猶佇美國的時都已經有聽見伊的高名，若是接著伊本人的時，才知伊是真謙卑閣好交陪的人。伊的宿舍拄拄徛佇阮的隔壁。佇Bo͘h8-seí的半年久，我受伊的教示以及in全家的照顧不止大，予我真感激，到今猶過teh數念。有一擺伊所主持的長老制度的聖餐式的時，毋知怎樣叫我擔當助理聖餐的職，予我非常gông-ngia̍h，閣感覺真袂堪得。
今魏教授已經佇11月中旬就來香港赴基督教佮中國宗教的研究會。然後佇11月28日到12月4日的一禮拜久，欲來訪問咱的台灣教會。現在台南神學院有teh計畫欲請伊講演「現代基督教思想的最緊要的問題，」也紲欲請伊踮教室佮學生討論「教會佮急變的社會的關係」。佇欲迎接這个偉大的普世教聯的神學家來台灣的時，我想有必要介紹伊的做人佮神學予咱台灣教會的諸位教職佮兄姊知，所以才攑筆。
魏牧師出世佇美國。佇紐約的協和神學院畢業了後去Iè-luh(Yale)大學得著哲學博士(Ph. D.)。伊捌來中國做宣教師，佇彼時也捌佇金陵大學做教授，所以伊也會曉得講中國話。後來去德國做教會互助的事業。現在是普世教聯研究院的副院長。
魏先生除去出真濟的稿佇種種的神學評論誌以外，現在佇我的手中有3本伊的冊。「共產主義佮神學家」(Communism and the Thologians，1958，S. C. M. London)。這本我欲離開Bo͘h8-seí的時，伊有用漢字簽伊的名佮我的名送我的。第2本是著出營外(o͘t-side the camp，1959，Do͘bleday，New York)。這本印好的時，伊也有簽名隨時寄來送我。第3本是佇東西的宣教的教會(The Missionary Church in East and West，edited with David paton，1959，S. C. M.，London)。
魏老師的神學思想是照伊的經歷按呢，當然是專門佇宣教學裡。伊的著出營外的冊，會得通siāng時講是伊的神學的標題。伊佇共產主義佮神學家的中間有提出幾若個問題。馬克斯主義對基督教的挑戰是已經袂得通無視的事實。無論理論上佮實際上欲如何來應付in的挑戰？為著這个質問，伊有選幾若個現代的代表tek的神學家來研究，看in怎樣teh應答遮的挑戰。就是E. Bú-lún-nà(Brunner)，J. Lô͘-má-ló͘-khah(Hromadka)，P. Thí-lih-hih(Tillich)，R. Nì-bà(Niebuhr)，佮K. Bá-lú-都h(Barth)等的人。以外也有講起三个。遮的人雖罔in的學問tek的立場無拄拄攏相像，猶過in會得通講是屬佇危機神學，抑是新正統神學的第一流的人。
若是魏教授本人對這个挑戰的應答無隨時出佇結論裡。寧可佇隔轉年(1959)所出版的著出營外裡來應答這。佇這本冊的起頭都已經teh應答教會佇兩个世界的中間欲怎樣做？著者引用希伯來13：13講，咱著愛出上帝的營外，佇內(教會)外(世界)的兩戰場鬥爭。教會對內的鬥爭是超過教派，傳統，民族佮國家，世界的教會著愛佇主的名來合一的實現。教會對外鬥爭的對象是組織(制度)，政治，主義佮文化等佇彼中間來確立基督的王權。