台灣頭一个神學博士
Tâi-oân thâu chi̍t ê Sîn-ha̍k phok-sū
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第864號 |
| 日期 | 1960/12 |
| 頁數 | 16 |
白話字（原文數位化）
Tâi-oân thâu chi̍t ê Sîn-ha̍k phok-sū
1960年12月864期 16
Káu-cha̍p-gō͘ nî chêng má I-seng lâi Tâi-oân hêng-i thoân-kàu í-lâi, Siōng-tè kéng-soán chē-chē i ê khì-kū. Chiū tiong chi̍t uī put-chí hō͘ lán thang khoa-kháu ê chiū-sī Tâi-lâm Sîn-ha̍k-īⁿ īⁿ-tiúⁿ N̂g Chiong-hui Bo̍k-su. I si̍t-chāi sī Ki-tok-kàu kài sè-kài-tek ê chhut-miâ lâng. Chū-nî tī Ji̍t-pún khui ê Ki-tok-kàu kàu-io̍k Sè-kài Tāi-hoē, i iā sī káng-su ê chi̍t ê. I ū siū kéng-soán beh chò Bí-kok Liân-ha̍p Tiúⁿ-ló Kàu-hoē hái-goā Soan-tō-hoē Chu-sûn Uí-oân-hoē chú-se̍k . I ū siūⁿ kàu Tâi-oân iáu ū chē-chē ti̍t-chiap ê kang, chiū bô èng-phèng . Chit ê ki-kò͘ chiū chiām-sî bô beh phèng choan-jīm ê, iā phèng-chhiáⁿ i iû-goân chò chú-se̍k lâi kè-e̍k léng-tō. iā ū koat-tēng 2 nî beh khui-hoē 3 pái, thang kiàn-gī chéng-kò soan-tō-hoē ê hong-chiam.
Kū-nî 9 goe̍h chhut-hoat, ū kàu 20 goā ê kok-ka , ū hù kuí-nā hāng iàu-kín ê hoē, iā ū kap chin chē iàu-kín ê lâng kìⁿ-bīn tâm-oē. Tuì chiah ê kau-poê tiong, i ū toà chin chē chin pó-poè ê lé-mi̍h tò-lâi. Chiah ê siông-sè, lán āu-lâi ū ki-hoē thang tit-tio̍h chai.
N̂g bo̍k-su 11 goe̍h 7 hō tò-lâi kàu tâi-lâm . Thâu chi̍t kù oē chiū-sī kóng, “lán siat-kàu 100 chiu-nî ê sēng-tián lâng-lâng teh kā lán chù-ba̍k, lán kó-jiân ē thang kiat sím-mi̍h koé-chí beh hiàn hō͘ Chú? M̄-sī keng-chè ê būn-tê, sī beh á m̄, sī sim ê būn-tê.iáu 5 nî ,ū sím-mi̍h kè-e̍k, beh chhui-chìn kàu sím-mi̍h thêng-tō͘. 100 chiu-nî ǹg 1000 keng kàu-hoē ê bo̍k-phiau , m̄-sī kan-ta liōng, sī tī chit (質) ê hong-bīn koh khah sī iàu-kín. Só͘-uī tē saⁿ tāi ū guî-hiám (lán chē-chē léng-tō-chiá sī tē saⁿ tāi ê), nā bô hoat-chhut chhòng-chō tek, chiū chin-chiàⁿ sī guî-hiám. Chóng-sī chit ê sî-tāi iā sī guî-hiám, iā sī ki-hoē. Lán khak-sìn Chú beh ēng lán. Tio̍h ū thoân-kiat , thê-hê.”
I ū tit-tio̍h Ka-ná-tāi Knox College, Toronto kap Bí-kok Liân-ha̍p Tiúⁿ-ló Kàu-hoē Monmo͘th College sàng i Sîn-ha̍k phok-sū ê ha̍k-uī , iā sī i ê kong-êng, koh khah sī lán Tâi-oân kàu-hoē ê kong-êng.
Goān Chú si un tī i ê sin-chiūⁿ , thàu-koè i ke-thiⁿ koh ke-thiⁿ chē-chē un-sù tuì Siōng-tè, tuì lâng, kàu tī lán Tâi-oân ê kàu-hoē.
漢羅（Ùi原文改寫）
台灣頭一个神學博士
1960年12月864期 16
九十外年前馬醫生來台灣行醫傳教以來，上帝揀選濟濟伊的器具。就中一位不止予咱通誇口的就是台南神學院院長黃彰輝牧師。伊實在是基督教界世界tek的出名人。自年佇日本開的基督教教育世界大會，伊也是講師的一个。伊有受揀選欲做美國聯合長老教會海外宣道會諮詢委員會主席。伊有想到台灣猶有濟濟直接的工，就無應聘。這个機會就暫時無欲聘專任的，也聘請伊猶原做主席來計畫領導。也有決定2年欲開會3擺，通建議整個宣道會的方針。
舊年9月出發，有到20外个國家，有赴幾若項要緊的會，也有佮真濟要緊的人見面談會。對遮的交陪中，伊有帶真濟真寶貝的禮物倒來。遮的詳細，咱後來有機會通得著知。
黃牧師11月7號倒來到台南。頭一句話就是講，「咱設教100週年的盛典人人teh共咱注目，咱果然會通結甚物果子欲獻予主？毋是經濟的問題，是欲抑毋，是心的問題。猶5年，有甚物計畫，欲催進到甚物程度。100週年向1000間教會的目標，毋是kan-ta量，是佇質的方面閣較是要緊。所謂第三代有危險(咱濟濟領導者是第三代的)，若無發出創造tek，就真正是危險。總是這个時代也是危險，也是機會。咱確信主欲用咱。著有團結，提攜。」
伊有得著加拿大Knox College，Toronto佮美國聯合長老教會Monmo͘th College送伊神學博士的學位，也是伊的光榮，閣較是咱台灣教會的光榮。
願主施恩佇伊的身上，透過伊加添閣加添濟濟恩賜對上帝，對人，到佇咱台灣的教會。