基督教病院的意義
Ki-tok-kàu pīⁿ-īⁿ ê ì-gī
文獻資訊
| 項目 | 資料 |
|---|---|
| 作者 | 蘭大弼 Lân Tâi-pi̍t |
| 卷期 | 台灣教會公報 |
| 卷期 | 第863號 |
| 日期 | 1960/11 |
| 頁數 | 7 |
白話字（原文數位化）
Ki-tok-kàu pīⁿ-īⁿ ê ì-gī
Chiong-hoà: Lân Tâi-pi̍t
1960年11月863期 7
Tī pún 11 goe̍h tē it chú-ji̍t Tâi-oân-choân-tó ê Tiúⁿ-ló Kàu-hoē ū beh kì-liām Ki-tok-kàu i-liâu kang-chok. Che sī lán kàu-hoē choân-tó thâu chi̍t-pái ê kì-liām-ji̍t.
I-liâu kap thoân-tō kàu-hoē le̍k-sú-siōng ū saⁿ lâin-hê. Lán ê Chú Iâ-so͘ tuì I ê ha̍k-seng hoan-hù kóng, “Thoân Siōng-tè ê kok, i-hó phoà-pīⁿ lâng.” iā sī phoè-ha̍p “Sìn kap kiâ”.
Le̍k-sú-siōng tī sè-kài chē-chē kok-ka ê pīⁿ-īⁿ, liâu-ióng-īⁿ, ióng-ló-īⁿ, lóng sī Ki-tok-kàu (sin-kàu á-sī kū-kàu) thê-chhiòng kiàn-siat ê, kàu-hoē tāi-seng khui lō͘, āu-lâi chèng-hú chiū tè bô͘-iūⁿ lâi siat. Tī hui-chiu , ìn-tō͘, īⁿ sī kàu-hoē siat ê, chèng-hú chū-jiân sī khah āu-lâi siat ê , thang kóng se-i ê i-ha̍k sī Ki-tok-kàu-kok toà lâi lī-e̍k chiah ê kok-ka ê peh-sìⁿ.
Tī lán Tâi-oân iā sī án-ni, se-i, kho-ha̍k-tek ê i-ha̍k khai-sí tī Ko-hiông kap Tâi-lâm kàu-hoē ê i-koán, tī pak-pō͘ sī Tām-chuí kap Tâi-pak, Tiong-po͘ 7 chiū sī tī Toā-siâⁿ kap Chiong-hoà. chit ê ūn-tōng chiū-sī chi̍t hong-bīn tī Chú ê miâ choè chû-siān ê sī, lâi piáu-hiān Siōng-tè ê thiàⁿ, tû-khì peh-sìⁿ ê bê-sìn, sêng-kiàn kap tuì Ki-tok-kàu ê hoán-kám á-sī gō͘-kái; koh chi̍t bīn thoân hok-im hō͘ lâi pīⁿ-īⁿ kiû i ê hoān-chiá.
Taⁿ tī chí 90 goā nî Tâi-oân siat-kàu kàu hiān-chāi, Ki-tok-kàu i-liâu kang-chok ū piàn chin choē, te̍k-pia̍t tī ē-bīn só͘ kì ê tiám.
-
Khah chá chiah ê kang-chok lóng sī goā-kok Kàu-sū-hoē ti̍t-chiap pān-lí, chit chūn sī lán Tâi-oân kàu-hoē ka-kī teh keng-êng.
-
Chá-chêng chiah ê kang-chok tan-uī , sī kan-ta chi̍t keng ê se-i nā-tiāⁿ,bô pa̍t ê se-i ki-koan á-sī tan-uī, chóng-sī hiān-chāi choân-tó ta̍k kak-lo̍h lóng ū.
-
Chá-sî chiah ê kàu-hoē pīⁿ-īⁿ ū kiam hùn-liān ha̍k-seng choè i-seng , ū kuí-nā ê chhut-miâ i-seng chhut-lâi, chit chūn chiah ê pīⁿ-īⁿ sī siat hō͘-sū ha̍k-hāu lâi hùn-liān hō͘-sū nā-tiāⁿ.
-
Chá-sî i-io̍h sī khah kán-tan bô ko-kuì-io̍h, koh tuì goā-kok ū pang-chān, só͘-í lóng sī bián-huì si-liâu khah choē, nā-sī hiān-sî i-io̍h sī chin kuì, ko-kuì-io̍h chin choē, chín-toàn iā sī chin hok-cha̍p, (tiān-kong-soàⁿ, kiám-giām hok-téng), koh tuì goā-kok lâi ê chîⁿ chin chió, só͘-í chiū-i ê lâng khah choē lóng tio̍h la̍p chin choē io̍h-huì.
Sui-jiân chit chūn kap khai-siat ê chêng-hêng lóng bô saⁿ-tâng, chóng-sī kàu-hoē pīⁿ-īⁿ ê pún-chit kap bo̍k-tek lóng bô piàn-oāⁿ, thoân-kàu ê le̍k-liōng iáu sī chin toā, chin ǹg-bāng lán kàu-hoē it-poaⁿ hoē-iú oē thiàⁿ lán ê Ki-tok-kàu pīⁿ-īⁿ sī sio̍k in ê, sī kàu-hoē iàu-kín ê ki-koan.
Pún chiong-hoà Ki-tok-kàu Pīⁿ-īⁿ chhòng-siat sī tī Chú-āu 1896 nî (Bîn-kok chêng 15 nî) kàu hiān chāi sī 64 nî kú, hiān-sî ū khiàm 3 hāng sū ài chhiáⁿ lán saⁿ-kap kî-tó kap pang-bâng ê.
1) Khiàm sio̍k tī kàu-hoē sìn-tô͘ ê siàu-liân i-seng , lia̍h chit keng ê pīⁿ-īⁿ kap chit ê kang-chok sī thang choè in hōng-hiàn hō͘ Siōng-tè ê ki-hoē, lâi hōng-sū tī chia ê kang.
2) In-uī sòng-hiong hoān-chiá chin chē, koh io̍h-á iā chin kuì, chóng-sī “Si-liâu kiù-chè-khoáⁿ” sī chin chió, só͘-í ài chhiáⁿ tī kàu-hoē lāi thiàⁿ Chú ê hiaⁿ-ché, hōng-hiàn lín ê chîⁿ lâi pang-chān goán ê si-liâu, kiù-chè sòng-hiong lâng.
3) Pún-īⁿ pīⁿ-sek chin kū koh bô kàu-gia̍h , só͘-í goán iā ū kè-e̍k beh khí sin ê pīⁿ-sek, tio̍h ài ēng chin chē ê chîⁿ chiah oē oân-sêng , iā ài chhiáⁿ lán tàu chhut-la̍t lâi pang-chān goán.
Goān Chú kap lín tī-teh.
漢羅（Ùi原文改寫）
基督教病院的意義
彰化：蘭大弼
1960年11月863期 7
佇本11月第一主日台灣全島的長老教會有欲紀念基督教醫療工作。這是咱教會全島頭一擺的紀念日。
醫療佮傳道教會歷史上有相連繫。咱的主耶穌對伊的學生吩咐講，「傳上帝的國，醫好破病人。」也是配合「信佮行」。
歷史上佇世界濟濟國家的病院，療養院，養老院，攏是基督教(新教抑是舊教)提倡建設的，教會代先開路，後來政府就綴模樣來設。佇非洲，印度，院是教會設的，政府自然是較後來設的 ，通講西醫的醫學是基督教國帶來利益遮的國家的百姓。
佇咱台灣也是按呢，西醫，科學的的醫學開始佇高雄佮台南教會的醫館，佇北部是淡水佮台北，中部就是佇大城佮彰化。這個運動就是一方面佇主的名做慈善的事，來表現上帝的疼，除去百姓的迷信，成見佮對基督教的反感抑是誤解；閣一面傳福音予來病院求伊的患者。
今佇chí 90外年台灣設教到現在，基督教醫療工作有變真濟，特別佇下面所記的點。
-
較早chiah的工作攏是外國教事會直接辨理，這陣是咱台灣教會家己teh經營。
-
早前chiah的工作單位，是kan-ta一間的西醫nā-tiāⁿ，無別的西醫機關抑是單位，總是現在全島逐角落攏有。
-
早時chiah的教會病院有兼訓練學生做醫生，有幾若个出名醫生出來，這陣遮的病院是設護士學校來訓練護士nā-tiāⁿ。
-
早時醫藥是較簡單無高貴藥，閣對外國有幫贊，所以攏是免費施療較濟，若是現時醫藥是真貴，高貴藥真濟，診斷也是真複雜，(電光線，檢驗各等)，閣對外國來的錢真少，所以就伊的人較濟攏著納真濟藥費。
雖然這陣佮開設的情形攏無相同，總是教會病院的本質佮目的攏無變換，傳道的力量猶是真大，真向望咱教會一般會友會疼咱的基督教病院是屬in的，是教會要緊的機關。
本彰化基督教病院創設是佇主後1896年(民國前15年)到現在是64年久，現時有欠3項事愛請咱相佮祈禱佮幫忙的。
1)欠屬佇教會信徒的少年醫生，掠這間的病院佮這個工作是通做in奉獻予上帝的機會，來奉侍佇遮的工。
2)因為sòng-hiong患者真濟，閣藥仔也真貴，總是「施療救濟款」是真少，所以愛請佇教會內疼主的兄姊，奉獻恁的錢來幫贊阮的施療，救濟sòng-hiong人。
3)本院病室真舊閣無夠額，所以阮也有計畫欲起新的病室，著愛用真濟的錢才會完成，也愛請咱鬥出力來幫贊阮。
願主佮恁佇teh。