明有德牧師的通信

Bêng Iú-tek Bo̍k-su ê thong-sìn

文獻資訊

項目	資料
作者	無lo̍h名
卷期	台灣教會公報
卷期	第861號
日期	1960/9
頁數	22

白話字（原文數位化）

Bêng Iú-tek Bo̍k-su ê thong-sìn

1960年9月861期        22

Kui kok té-kî hioh-khùn tiong ê Bêng Iú-tek Bo̍k-su, tī 8 goe̍h tiong tuì Ka-ná-tāi kap So͘-kek-lân, kok kià chi̍t pái phoe lâi pún-siā. Tuì Ka-ná-tāi lâi ê phoe ū pò-kò kóng, i ū khì hóng-būn koè-khì 6,7 nî kú teh pang-chān lán ê Kong-pò ê Ka-ná-tāi Lú Soan ê Eng Lú-sū (Mrs. Cherry), chai-iáⁿ lú-sū ū beh kè-sio̍k pó͘-chō͘ chi̍t nî, Bêng Bo̍k-su iā ū kóng kū-nî Kong-pò-siā siù chi̍t ki kím-kî khì sàng i, i chin moá-ì ta̍k pái beh pò-kò pún Pò ê sî, lóng ū toà chit ki kím-kî khì hō͘ lâng khoàⁿ.

Bêng Bo̍k-su tī 8 goe̍h tiong-sûn kàu So͘-kek-lân, tú-hó tī 14 hō, ài-teng-pó chhī-lāi Sèng-gâi-ní (St. Giles) kàu-hoē teh kú-pān lé-pài , Bêng Bo̍k-su ū chiong hit ê siau-sit pò lâi pún-siā. 1910 nî hoē-gī ū toā kó͘-bú Sè-kài kok kàu-phài kok kàu-hoē ê it-tì, só͘-í thang kóng chiū-sī sán-seng hiān-sî Phó͘-sè kàu Liân ê hoē-gī. Hit ji̍t ê lé-pài ū Eng-kok Lú-ông gū-kà chhin-lîm lâi chhut-se̍k, kok Eng-kok kàu-hoē ê léng-siù, Sè-kài Soan-kàu hoē-gī kap Phó͘-sè kàu Liân ê tāi-piáu í-kip tong-sî ū hù tio̍h 1910 nî hoē-gī ê lâng lâi chhut-se̍k. Koh chi̍t pái kó͘-lē tāi-ke ke-thiⁿ Sè-kài kàu-hoē it-tì hia̍p-le̍k ê cheng-sîn.

漢羅（Ùi原文改寫）

明有德牧師的通信

1960年9月861期  22

歸國短期歇睏中的明有德牧師，佇8月中對加拿大佮蘇格蘭，各寄一擺批來本社。對加拿大來的批有報告講，伊有去訪問過去6，7年久teh幫贊咱的公報的加拿大女宣的英女士(Mrs. Cherry)，知影女士有欲繼續補助一年，明牧師也有講舊年公報社繡一支錦旗去送伊，伊真滿意逐擺欲報告本報的時，攏有帶這支錦旗去予人看。

明牧師佇8月中旬到蘇格蘭，拄好佇14號，愛丁堡市內聖gâi-ní (St. Giles)教會teh舉辦禮拜，明牧師有將彼個消息報來本社。1910年會議有大鼓舞世界各教派各教會的一致，所以通講就是產生現時普世教聯的會議。彼日的禮拜有英國女王御駕親臨來出席，各英國教會的領袖，世界宣教會議佮普世教聯的代表以及當時有赴著1910年會議的人來出席。閣一擺鼓勵大家加添世界教會一致協力的精神。