工業社會佮教會的責任
Kang-gia̍p siā-hoē kap kàu-hoē ê chek-jīm
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第861號 |
| 日期 | 1960/9 |
| 頁數 | 3 |
白話字（原文數位化）
Kang-gia̍p siā-hoē kap kàu-hoē ê chek-jīm
1960年9月861期 3-4
Kim-ji̍t A-chiu ê kok-ka í-keng bêng-hián ê chìn-pō͘ kang-gia̍p-hoà kap to͘-chhī-hoà. Chit nn̄g chióng chhu-sè tông-sî chìn-ji̍p hiong-chhoan , in ê hêng-sek kap loē-iông sui-jiân bô sio-siāng , chóng-sī hō͘-siong ê koan-hē chin bi̍t-chhiat.
I. Jîn-kháu ê chhian-î.
-
Sit-khì kè-e̍k ê jîn-kháu chhian-î, hō͘ to͘-chhī jîn-kháu koè-thâu chē, khoân-kéng , oē-seng piàn pháiⁿ, sit-gia̍p-chiá cheng-ka.
-
uī khoân-kéng só͘ pek, toaⁿ-sin kàu to͘-chhī thàn-chia̍h, oē hō͘ siâⁿ-chhī tō-tek sit-khì tia̍t-sū; koh chi̍t bīn, in ê ka-têng iā siū hūn-soàⁿ.
II. Siā-hoē——keng-chè éng-hióng.
-
Chit khoán siā-hoē chù-tiōng hu̍t-chit, hut-lio̍k lêng-hûn kap cheng-sîn hong-bīn, kang-lâng chiâⁿ-choè chhin-chhiūⁿ ki-khì, kò-jîn jîn-keh chiū chiām sòng-sit.
-
Siā-hoē ê keng-chè boē an-tēng. Hó kéng-khì ê sî khoài thàn-chia̍h; pháiⁿ kéng-khì chiū pháiⁿ thàn-chia̍h. Só͘-í kang-lâng su-iàu chó͘-chit kang-hoē.
III. Sán-gia̍p kang-hoē ūn-tōng ê sán-seng.
Kang-hoē oē thang kò͘-siú chèng-gī, uī kang-lâng cheng-chhú èng tit ê lī-ek, iòng-hō͘ kang-lâng ê jîn-keh. Chit ê sī hó. Chóng-sī tī A-chiu kok-ka tio̍h koh siong-tong ló͘-le̍k, lâi kiàn-li̍p oân-siān ê sán-gia̍p kang-hoē——kò͘ pún-sin kap choân siā-hoē lī-ek ê kang-hoē.
IV. To͘-chhī——kang-gia̍p siā-hoē.
Tī to͘-chhī , ū sî lâng oē tú-tio̍h ū chó͘-chit ê pháiⁿ-tóng, á-sī siū hú-pāi ê éng-hióng. Só͘-í chèng-hú ki-koan eng-kai hū chek-jīm pó-chiòng siā-hoē ê an-choân, pān-lí kiān-khong pó-hiám thè-hiu-kim, siā-hoē kè-e̍k, téng.
V. Kang-gia̍p siā-hoē tuì lâng phín sèng ê put-liông éng-hióng.
-
Seng-oa̍h koè-thâu kín-tiuⁿ , lâng chin-chē, chóng-sī chin ko͘-toaⁿ. Che sī seng-oa̍h hun-kang ê kiat-kó.
-
Kò-jîn sit-khì te̍k-sek kap to̍k-chhòng-le̍k.
-
Bu̍t-chit kiám-chhái hù-jū , na-sī lêng-sèng kap bûn-hoà hong-bīn chiâⁿ-choè sòng-hiong.
VI. Kàu-hoē èng ū ê jīm-sek.
-
kàu-hoē eng-kai têng-sin phêng-kà keng-chè chè-tō͘ kái-piàn āu ê siā-hoē chōng-hóng.
-
Tio̍h choán-oāⁿ kàu-hoē kang-chok hong-àn, hù-ha̍p hiān siā-hoē ê si̍t-chè chêng-hêng.
VII. Kàu-hoē èng ū ê chek-jīm.
-
Kàu-hoē ài jīn-chheng Ki-tok hok-im ê tuì-siōng tio̍h pau-koat siā-hoē jîn-seng ê kok hong-bīn. Tī ta̍k sî-tāi chí-sī chèng-khak ê jîn-seng ê ì-gī, kéng-kò siā-hoē ê choē-ok, phoàⁿ-toàn siā-hoē-siōng kok chióng lūn-cheng, hû-chō͘ siā-hoē ê chèng-gī.
-
Kàu-hoē tio̍h hoàn-khí siā-hoē tiōng-sī jîn-keh. Chù-ì Y.M.C.A., Y.W.C.A., S.C.M. kap ia̍t-lám-sek téng ê si-siat hō͘ in chiâⁿ-choè oē thang pang-chān, hun-tô jîn-keh, koh chiâⁿ-choè kàu-hoē kap siā-hoē chiap-chhiok ê ki-koan.
-
Siā-hoē nā khiàm-khoeh chèng-khak ê léng-tō-chiá sî, kàu-hoē tio̍h chhut-lâi chhoā siā-hoē kàu tī kong-gī. Koh kàu-hoē iā eng-kai tī siā-hoē kho-ha̍k kap keng-chè khai-hoat hong-bīn choè siā-hoē ê chiân-hong. Koh pān lô-kang kàu-io̍k, chham-ka kang-hoē oa̍h-tāng , lâi léng-tō kang-hoē.
-
Tông-sî kàu-hoē tio̍h sek-tòng phoè-ha̍p to͘-chhī kap lông-chhoan ê kang-chok , uī siā-hoē choân-pō͘ lâi ho̍k-bū.
Tuì án-ni choè, kàu-hoē chiah oē thang chiong éng-oán ê bí-niû iúⁿ-chhī iau-gō ê peh-sìⁿ, pó-chhî kàu-hoē ê oa̍h-la̍t , lâi êng-iāu Chú ê sèng-miâ.
漢羅（Ùi原文改寫）
工業社會佮教會的責任
1960年9月861期 3-4
今日亞洲的國家已經明顯的進步工業化佮都市化。這兩種趨勢同時進入鄉村，in的形式佮內容雖然無相像，總是互相的關係真密切。
I. 人口的遷移。
-
失去計畫的人口遷移，予都市人口過頭濟，環境，衛生變歹，失業者增加。
-
為環境所逼，單身到都市趁食，會予城市的道德失去秩序；閣一面，in的家庭也受分散。
II. 社會-經濟影響。
-
這款社會注重物質，忽略靈魂佮精神方面，工人成做親像機器，個人人格就漸喪失。
-
社會的經濟袂安定。好景氣的時快趁食；歹景氣就歹趁食。所以工人需要組織工會。
III. 產業工會運動的產生。
工會會通固守正義，為工人爭取應得的利益，擁護工人的人格。這個是好。總是佇亞洲國家著閣相當努力，來建立完善的產業工會-顧本身佮全社會利益的工會。
IV. 都市-工業社會。
佇都市，有時人會拄著有組織的歹黨，抑是受腐敗的影響。所以政府機關應該負責任保障社會的安全，辨理健康保險退休金，社會計畫，等。
V. 工業社會對人品行的不良影響。
-
生活過頭緊張，人真濟，總是真孤單。這是生活分工的結果。
-
個人失去特色佮獨創力。
-
物質減彩富裕 ，若是靈性佮文化方面成做sòng-hiong。
VI. 教會應有的認識。
-
教會應該重新評價經濟制度改變後的社會狀況。
-
著轉換教會工作方案，符合現社會的實際情形。
VII. 教會應有的責任。
-
教會愛認清基督福音的對像著包決社會仁聲的各方面。佇逐時代指示正確的仁聲的意義，警告社會的罪惡，判斷社會上各種論爭，扶助社會的正義。
-
教會著喚起社會重視人格。注意Y.M.C.A.，Y.W.C.A.，S.C.M.佮閱覽室等的施設予in成做會通幫贊，薰陶人格，閣成做教會佮社會接觸的機關。
-
社會若欠缺正確的領導者時，教會著出來chhoā社會到佇公義。閣教會也應該佇社會科學佮經濟開決方面做社會的前鋒。閣辦勞工教育，參加工會活動，來領導工會。
-
同時教會著適當配合都市佮農村的工作，為社會全部來服務。
對按呢做，教會才會通將永遠的米糧養飼枵餓的百姓，保持教會的活力，來榮耀主的聖名。