花博士佇安定
Hoa Phok-sū tī An-tēng
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第860號 |
| 日期 | 1960/8 |
| 頁數 | 15 |
白話字（原文數位化）
Hoa Phok-sū tī An-tēng
1960年8月860期 15-17
Hoa Phok-sū ê thian-bō͘ pò͘-tō tī Tâi-oân í-keng sī chi̍t hāng chhut-miâ ê chûn-chāi. I m̄-nā tī kok só͘-chāi khui pò͘-tō hoē hia̍p-chō͘ í-keng ū ê kàu-hoē. Chiū-sī tī Ka-gī Tiong-hoē ū hia̍p-chō͘ koè-lō͘ kàu-hoē ê kiàn-siat, tī Tang-pō͘ Tiong-hoē hia̍p-chō͘ Sin-siâⁿ kàu-hoē ê kiàn-siat. Koh tuì 4 goe̍h khí, lâi Lâm Tiong pang chān An-tēng kàu-hoē ê kiàn-siat. Tāi-seng khui thian-bō͘ pò͘-tō-hoē , āu-lâi khui bō͘-tō-iú ê chō-chiū-hoē, āu-lâi chiū si-hêng sé-lé chiap-chiū sèng-chhan, ta̍k pái lóng ū chin toā ê siu-sêng. Kàu kiat-kio̍k, koh tuì thian-bō͘ pò͘-tō-tuī ū-soàn poah káng bān kho͘ lâi hia̍p-chō͘ hoē-tn̂g sin kiàn ê kang-chok. I pún-sin hiān-sî 70 goā hoè, chiàu i kóng 50 goā nî lâi m̄-bat phoàⁿ-pīⁿ, tì-kàu tó chhn̂g, m̄-bat chia̍h io̍h. I ê Tiong-kok oē chin liû-lī, pò-tō ū lêng-le̍k. Pún-sin tam-tng tuì gín-á pò͘-tō ; kìⁿ-tio̍h lâng chhiò ha̍h-ha̍h, chi̍t só͘-chāi koè chi̍t só͘-chāi án-ni thoân hok-im, án-ni tàu kiàn-siat kàu-hoē.
Taⁿ An-tēng ê kiàn-tn̂g í-keng oân-sêng, sūn-soà tī keh piah chng-kha khí chi̍t keng tek-thiāu kha chhù beh chò pò͘-tō, pêng-sî chū-hoē kap Chú-ji̍t-o̍h ê lō͘-ēng, kàu Chú-ji̍t thang chhoā hiah ê kiû-tō ê lâng koè-khì An-tēng chham-ka lé-pài. Chi̍t chhù kiàn-tn̂g, An-tēng pún-sin ū Au-iông Toàn Chip-sū hiàn thó͘-tē, ū in pún-hoē, bó-hoē Siān-hoà, Tâi-lâm Tiong-hoē kap P.K.U. ê pó͘-chō͘; chóng-sī kan-ta Hoa Phok-sū ê pò͘-tō-thoân chiū koan-chō͘ 4 bān gîn. Kàu 7 goe̍h 11 ji̍t lo̍k-sêng ê sî, khoàⁿ-kìⁿ pài-tn̂g chin tông-hông koh bí-lē, káng-tâi, í-toh, hoē-chiòng í-liâu lóng chê-pī. Si̍t-chāi kám-siā Chú.
Hoa Phok-sū tī 5 goe̍h kàu hiàn-tn̂g hit tiong-kan , kiōng nn̄g goe̍h goā-ji̍t tī An-tēng chò kang. Kàu beh lo̍k-sêng ê chêng 18 ji̍t kan, tī sin khí hó ê pài-tn̂g ū koh chi̍p-tiong pò͘-tō;18 ji̍t kú chóng kiōng ū 9000 ê thiaⁿ-chiòng, ū 128 lâng lâi chhiam-miâ kiû-tō. Tī chia ū koh kú-pān tēng-kî ê chi̍p-hoē, chiū-sī Chú-ji̍t-o̍h, Chú-ji̍t téng ē-pō͘ lé-pài , hū-jîn-hoē, chheng-liân ê Chú-ji̍t chū-hoē; tī chiu-kan iā ū tī lé-pài-tn̂g kap sió-chhù khui kî-tó-hoē, kiû-tō chiá ê chō-chiū-hoē kap sèng-koa tuī ê liān-si̍p.
Tī keh-piah chng-kha So͘-chhù ê chū-hoē-só͘ iā ū khui pò͘-tō-hoē 4 ji̍t, thiaⁿ-chiòng kiōng ū 3000 lâi chhiam-miâ kiû-tō ê ū 36 lâng. Tī chia muí Chú-ji̍t ū 360 ê gín-á lâi hù Chú-ji̍t-o̍h; muí pài-jī àm uī-tio̍h kiû-tō-chiá kap in ê pêng-iú ū khui chō-chiū-hoē, lī-iōng chit ê hoē thang chiong tiōng-iàu ê tō-lí lâi kà in, chhut-se̍k-chiá chiàu pò-kò lóng chin ióng-io̍k.
Chhit goe̍h 10 hō ê Chú-ji̍t , ū 38 ê siū chiap-la̍p chìn-kàu. Kū ê chiàⁿ hoē-oân ū 9 miâ, chit pang tit-tio̍h chiah ê sin--ê ha̍p chò-hoé, taⁿ ū 47 ê chiàⁿ hoē-oân lah. Hit ji̍t ū siat-li̍p chi̍t ê tiúⁿ-ló kap chi̍t ê chip-sū, koh ū kā 6 ê siáu-jî kiâⁿ sé-lé. Siāng ji̍t tāi-ke iā ū kiōng-siú Sèng-chhan.
Chhit goe̍h 11 ji̍t hiàn-tn̂g tián-lé. Tiong-hoē gī-tiúⁿ , su-kì kap chu iàu-oân ū lâi chú-chhî chham-ka sēng-hoē; lâi hù-hoē ê lâi-pin chha-put-to sī tuì hū-kīn 20 uī kàu-hoē lâi ê Bó-hoē Siān-hoà hō͘ tāi-ke chheng-chàn siàu-liām in uī-tio̍h chit keng kàu-hoē siat-li̍p só͘ hián-chhut ê tio̍h-boâ. Iû-kî-sī Hoa Phok-sū tī tián-lé tiong te̍k-pia̍t ín Hui-li̍p-pí 3:13 , kóng khí “oán-tāi ê gán-kong,” ín Hi-pek-lâi 11:1 , kóng-khí “Kian-tēng ê sìn-sim.”ín Nî-hi-bí, kóng-khí “Ha̍p-chok,” kóng chiah ê chiū-sī kiàn-siat An-tēng kàu-hoē ê cheng-sîn, tuì chit ê ē thang ji̍t-ji̍t khoàⁿ-kìⁿ chìn-pō͘ ê hiān-siōng, tuì án-ni koh-khah hō͘ tāi-ke tī hoaⁿ-hí khèng-chiok ê chêng-sū tiong tit-tio̍h bián-lē.
Taⁿ Hoa Phok-sū tī tián-lé liáu liâm-piⁿ siu-si̍p i ê thian-bō͘, chiām-sî tńg-khì Tām-suí hioh khùn, jiân-āu kàu Tâi-pak koān Tiong-hô hiong khui pò͘-tō hoē, liáu āu chiū beh koh lâi Lâm Tiong Siān-hoà kàu-hoē só͘ teh khai-thok ê Toā-lāi pò͘-tō-só͘, tī hia chhin-chhiūⁿ tī An-tēng chi̍t-iūⁿ lâi tián-khai i ê thoân tō-lí, siat kàu-hoē ê sū-kong. Toā-lāi hiān-sî í-keng chhit ba̍k-chiu teh tán-hāu, Siān-hoà iā teh tán-hāu, Lâm Tiong iā lóng teh tán-hāu kî-thāi.
Kiû Chú si-in chiok-hok A-bēn.
漢羅（Ùi原文改寫）
花博士佇安定
1960年8月860期15-17
花博士的天幕佈道佇台灣已經是一項出名的存在。伊毋若佇各所在開佈道會協助已經有的教會。就是佇嘉義中會有協助過路教會的建設，佇東部中會協助新城教會的建設。閣對4月起，來南中幫贊安定教會的建設。代先開天幕佈道會，後來開慕道友的造就會，後來就施行洗禮接就聖餐，逐擺攏有真大的收成。到結局，閣對天幕佈道隊預算撥káng萬箍來協助會堂新建的工作。伊本身現時70外歲，照伊講50外年來毋捌破病，致到倒床，毋捌食藥。伊的中國話真流利，報道有能力。本身擔當對囡仔佈道；見著人笑ha̍h-ha̍h，一所在過一所在按呢傳福音，按呢鬥建設教會。
Taⁿ安定的建堂已經完成，順續佇隔壁庄腳起一間竹thiāu跤厝欲做佈道，平時聚會佮主日學的路用，到主日通chhoā遐的求道的人過去安定參加禮拜。這次建堂，安定本身有Au-iông Toàn執事獻土地，有in本會，母會善化，台南中會佮P.K.U.的補助；總是kan-ta花博士的佈道團就捐助4萬銀。到7月11日落成的時，看見拜堂真堂皇閣美麗，講台，椅桌，會眾椅liâu攏齊備。實在感謝主。
花博士佇5月到獻堂彼中間，共兩月外日佇安定做工。到欲落成的前18日間，佇新起好的拜堂有閣集中佈道；18日久總共有9000个聽眾，有128人來簽名求道。佇遮有閣舉辦定期的集會，就是主日學，主日頂下晡禮拜，婦人會，青年的主日聚會；佇週間也有佇禮拜堂佮小厝開祈禱會，求道者的造就會佮聖歌隊的練習。
佇隔壁庄腳蘇厝的聚會所也有開佈道會4日，聽眾共有3000，來簽名求道的有36人。佇遮每主日有360个囡仔來赴主日學；每拜二暗為著求道者佮in的朋友有開造就會，利用這个會通將重要的道理來教in，出席者照報告攏真踴躍。
七月10號的主日，有38个受接納進教。舊的正會員有9名，這pang得著遮的新--ê合做伙，taⁿ有47个正會員lah。彼日有設立一个長老佮一个執事，閣有加6个小兒行洗禮。Siāng日大家也有共守聖餐。
七月11日獻堂典禮。中會議長 ，書記佮諸要員有來主持參加盛會；來赴會的來賓差不多是對附近20位教會來的母會善化予大家稱讚數念in為著這間教會設立所顯出的著磨。尤其是花博士佇典禮中特別引腓立比3：13，講起「遠大的眼光，」引希伯來11：1，講起「堅定的信心。」引尼希米，講起「合作，」講chiah的就是建設安定教會的精神，對這个會通日日看見進步的現象，對按呢閣較予大家佇歡喜慶祝的情事中得著勉勵。
Taⁿ花博士佇典禮了連鞭收拾伊的天幕，暫時轉去淡水歇睏，然後到台北縣中和鄉開佈道會，了後就欲閣來南中善化教會所teh開拓的大內佈道所，佇遐親像佇安定一樣來展開伊的傳道理，設教會的事工。大內現時已經擦目睭teh等候，善化也teh等候，南中也攏teh等候期待。
求主施恩祝福A-bēn。