危機佮信賴
Guî-ki kap sìn-nāi
文獻資訊
| 項目 | 資料 |
|---|---|
| 作者 | 胡茂生 Ô͘ Bō͘-seng |
| 卷期 | 台灣教會公報 |
| 卷期 | 第860號 |
| 日期 | 1960/8 |
| 頁數 | 11 |
白話字（原文數位化）
Guî-ki kap sìn-nāi
Sèng-keng: Má-thài 10: 24-33.
Ô͘ Bō͘-seng siá
1960年8月860期 11-13
Chá sî sian-ti Iâ-lī-bí siū Siōng-tè ê ho͘-tiàu ê sî, Siōng-tè mn̄g kóng, lí ū khoàⁿ-kìⁿ sím-mi̍h? Iâ-lī-bí kóng, “Goá ū khoàⁿ-kìⁿ chi̍t ê tiáⁿ teh kún”. Lán chai, tiáⁿ nā teh kún ê sî, bô ū chi̍t-sut á an-chēng ê só͘-chāi, kui tiáⁿ phi̍h-phi̍h pho̍k-pho̍k, lóng tín-tāng Hiān-chāi ê sè-kài kok-chè-kan ê būn-tê, chū-kí kok-ka ê būn-tê, siā-hoē, bîn-cho̍k kap bîn-cho̍k, lâng kap lâng, keng-chè, kho-ha̍k, si̍t-chāi lóng chhin-chhiūⁿ tiáⁿ teh kún, bô an-chēng pêng-an ê só͘-chāi. Khak-si̍t hiān-chāi ê sè-kài sī tī nn̄g ê sî-tāi ê tiong-kan, chi̍t ê í-keng kè liáu, koh chi̍t ê sî-tāi hō͘ àm-bū tà ba̍t, bô chi̍t lâng káⁿ kóng á-sī ū-giân ián-piàn tiong ê sè-kài beh piàn choè cháiⁿ-iūⁿ?
Tē 2 chhù tāi-chiàn tuì ài-in-su-tàn só͘ hoat-bêng ê goân-chú-lêng só͘ chō chhut ê goân-chú-tân lâi kiat-sok , chi̍t-sî-tek chhin-chhiūⁿ hō͘ sè-kài tit-tio̍h hô-pêng ê kng ê khoán-sit. Chóng sī chia̍h ê hô-pêng sī chí ū chhin-chhiūⁿ chi̍t ê hiu chí hû(休止符), tī té-té ê sî-kan chiū kè liáu, suî-sî chìn ji̍p hiān-chāi chit ê àm-tām iu-būn, khó͘-thàng, guî-ki ê sî-tāi. Hiān-chāi choân jîn-luī 20 goā ek ê lâng , chhin-chhiūⁿ sī lóng chē tī hō͘ àm-bū tà ba̍t guî-ki ê toā hong-lōng ê lāi-bīn teh oa̍h ê.
- Kok-chè-kan ê guî-ki.
Hō͘ àm-bū tà ba̍t ê put-hēng ê sè-kài hun choè nn̄g pêng, chiū-sī Hoa-sēng-tùn kap Bo̍k-su-kho, chū-iû kap ke̍k-koân ê tuì-li̍p. Tāi-ke boē thang hô-kái, saⁿ giâu-gî, saⁿ kong-kek, saⁿ chhim-hoān, lióng-hong ê àm-bū ná o͘-àm, ná tà ba̍t. Lán khoàⁿ bô kú í-chêng tī Pa-lê só͘ khui ê ko-chân hoē-gī liû-sán, hit ê phò-lia̍t ê loē-iông kiám m̄-sī chin hó-chhiò ê sū. So͘-liân Hek-ló͘-soat-hu tuì Bí-kok Ngāi-sim-hô kóng, lí pàng U 2 hō ê cheng-thàm hui-ki lâi goán chia, tio̍h tāi-seng kā goá chhē m̄-tio̍h, nā bô m̄ kap lí hô-tâm. Ngāi-sim-hô kóng, pàng hui-ki sī lióng-hong lóng ū, goán ê hui-ki hō͘ lín phah lo̍h-lâi, lâng sí, koh kā lín chhē m̄-tio̍h, beh thài ū chit ê lí. Taⁿ goán iā í-keng tiong-chí, hō͘ lín phah lo̍h-lâi , koh kā lín chhē m̄-tio̍h boē ēng-tit. Chhin-chhiūⁿ án-ni , So͘-liân kiò Bí-kok kóng, nā bô chhē m̄-tio̍h, it-tēng m̄ kap lí tâm. Chhin-chhiūⁿ gín-á teh oan-ke sio-mā chi̍t-poaⁿ-iūⁿ. Choân sè-kài ê hô-pêng, 20 goā ek ê hoan-êng kap jîn-hêng, ká ná teh hō͘ in lāng sńg-chhiò. Sui-bóng sī chhin-chhiūⁿ gín-á ê sio-mā, iáu-kú tī chi̍t ê poè-āu ū koân-bô͘ su̍t-chhek(權謀術策) ê chhiú-toāⁿ.
Chá-chêng Hi-lia̍p ê A-lí-su-to-tek só͘ kóng ê chèng-gī kek-bēng hiah ê chheng-liân uī chū-iû só͘ lâu ê huih , iā lóng sit liáu hāu-le̍k. Koh-chài tī àm-bū tiong lâi sán-seng chiah ê Tang Lâm A sin-heng kok-ka lóng phian-cháu tī ke̍k-toan ê to̍k-li̍p chú-gī, in ê chèng-tī to̍k-li̍p, keng-chè to̍k-li̍p, sī chhin-chhiūⁿ gín-á chhēng toā-lâng ê se-chong ê khoán-sit. Lán khoàⁿ Hui-li̍p-pin ê Hui-hoà-àn, ìn-nî tuì Hoa-kiâu ê pek-hāi , put kong-pêng put-chèng, bô lí ê sū-chêng bâi-ho̍k tī lán ê ba̍k-chêng, chiah ê chō-sêng guî-ki tī lán ê tiong-kan.
II. Kho-ha̍k, bûn-bêng ê guî-ki.
Hiān-chāi sī goân-chú kho-ha̍k, thài-khong bûn-bêng ê sî-tāi.Chóng-sī chiah ê ū hō͘ jîn-luī hēng-hok á-bô? Kî-si̍t sī chiâⁿ-choè hiong-béng sat-jîn ê bú-khì nā-tiāⁿ. Kó͘-chá ê chiàn-cheng sī chhin-chhiūⁿ Tāi-pi̍t kap Kho-lī-à chi̍t-ê tuì chi̍t-ê; Ná-pho-lûn cheng-ho̍k Au-chiu ê sî, hoat-bêng toā-phàu sī chi̍t lia̍p tuì 12 lâng. Tē 1 chhù tāi-chiàn sú-iōng chà-tân, chi̍t lia̍p pêng-kun phah Eng-kok só͘ sú-iōng ê V 1 hō, V 2 hō, sī chi̍t lia̍p kong-kek 168 lâng. Bí-kok tuì Ji̍t-pún só͘ sú-iōng ê goân-chú-tân, sī chi̍t lia̍p ē phah-sí 24 bān lâng. Taⁿ 15 nî āu só͘ hoat-ta̍t ê goân-chú-tân á-sī khin-khì-tân(氫彈), í-keng bô lâng oē hiáu kó͘-kè.
Hiān-chāi sī jîn-chō oē-chheⁿ ê kēng-sài ê sî, goân-chú bú-khì ê hoat-ta̍t, thài-khong ê chìn-tián sī hiòng jîn-luī ê ui-hia̍p; kàu 6 goe̍h chí, só͘ hoat-piáu tī Bí-kok, Eng-kok , Hoat kok, So͘-liân ê goân-chú-tân ê po̍k-chà, ū 210 hoê í-siōng, jîn-chō oē-chheⁿ ū hoat-siā 250 piàn í-siōng, hit ê koài-siaⁿ lán thiaⁿ bô tio̍h, m̄-kú ストロンチーム 90 ê to̍k-khì ná cheng-ka piàn-moá tī tāi-khì ê lāi-bīn. Lán khoàⁿ Bí-kok ēng hoé chìⁿ chài kâu ji̍p thài-khong, So͘-lâin chài káu ji̍p thài-khong; kâu kap káu boē thang hô-hó. Hiān-chāi ê kho-ha̍k , sī piàn choè kâu kap káu sio-kā, éng-oán boē chò-hoé ê mi̍h-kiāⁿ. le̍k-sú ka クインビー kóng, hiān-chāi sī tī bûn-bêng ê chhì-liān ê lāi-bīn.Khó͘ Hoâi-tiat Phok-sū tī i ê tù-chok “ Bûn-bêng ê bu̍t-lo̍k kap chài-kiàn” sī biô-siá kūn-tāi ê bûn-bêng hō͘ sè-kài-koan piàn choè àm-tām kap pi-ke̍k ê. Taⁿ chiah ê bûn-bêng tuì jîn-luī ê kòng-hiàn, sī chí-ū hō͘ lán iû-goân chhin-chhiūⁿ chi̍t ê tiáⁿ teh kún, sī tī bô an-chēng ê guî-ki ê.
III. Kò-jîn-kan ê guî-ki.
Kò-jîn ê guî-ki lán muí-ji̍t ū tú-tio̍h ti̍t-chiap ê thé-giām, só͘-í khah oē bêng-pe̍k. Seng, ló, pīⁿ, sí; it-seng ê tiong-kan ū sū-gia̍p ê sit-pāi put-an, hoân-ló, khó͘-thàng , uī kiáⁿ-jî ê seng-ha̍k, kò͘-jîn ê khoà-lū iû-goân chhin-chhiūⁿ tiáⁿ teh kún. Lán muí chi̍t lâng ū kok lâng bô tâng ê sū-chêng tī lán sim-lāi teh kún.
Lán oē kì-tit pài Siōng-tè ê lâng iû-goân tī chit ê kún ê jîn-seng kap sè-kài ê lāi-bīn. Lán tī chi̍t tiong-kan teh oa̍h, kiám ū lâng káⁿ kóng goá ê khó͘-thàng, put-an, hoân-ló, goá oē thang ka-kī hū-chek, á-sī ū lâng thang kā goá hū-chek? Si̍t-chāi bô. Tī chia chhì mn̄g lán tāi-ke, Lí ê thâu-mn̂g kuí ki? Lán lóng m̄-chai, bô lūn sī tiōng-hu, hū-jîn-lâng á-sī pē-bú lóng boē thang chai.
Che sī chèng-bêng lâng pún-sin boē thang thiat-té lâi ka-kī hū-chek ê.
IV. Khak-si̍t ún-tàng ū lâng kā lán hū-chek.
Tī chia ū hō͘ lán oē tio̍h-kiaⁿ ê hok-im chiū-sī kóng, “Chiū lín ê thâu-mn̂g iā lóng kè sǹg”. Ka-kī bô , koh pa̍t-lâng iā bô hoat-tō͘ thang chò ê, nā-sī lán ê Thiⁿ-pē khoàⁿ-kò͘ lán kàu thâu-mn̂g kā lán kè sǹg, kā lán chiàu-kò͘. Tī toā guî-ki ê poè-āu ū choân-lêng Siōng-tè hû-chhî khoàⁿ-kò͘ lán kàu chiah siông-sè ê chiàu-kò͘—— “ Chiū lín ê thâu-mn̂g iā lóng kè sǹg.” Tī 10:29 iā biô-siá chhek-chiáu-á Siōng-tè iā chiàu-kò͘ kàu chin hó-sè, hō͘ i chia̍h; hô-hòng lâng sī bān bu̍t ê lêng-tióng, pí chhek-chiáu kuì pah poē ê kè-ta̍t, sui-bóng tī toā guî-ki ê lāi-bīn iáu-kú lán oá-khò Siōng-tè beh chiàu-kò͘ ê ē-bīn tit chin ê pêng-an. Sui-bóng choân sè-kài chhin-chhiūⁿ tiáⁿ teh kún tī put-an guî-ki ê lāi-bīn. Lán thiaⁿ Chú ê chi̍t kù oē “Tī sè-kan lín ū khó-lān, to̍k-to̍k lín tio̍h pàng-sim , goá í-keng khah iâⁿ sè-kan.” Sîn-ha̍k-chiá Ho̍k-sài-su kóng, “ Tī ú-tiū ê tiong-kan ū si̍p-jī-kè khiā thâu.” Ki-tok-tô͘ sī í-keng kā lán hē tī sèng-lī ê chiàn-cheng ê só͘-chāi.
Tī bô ǹg-bāng ê tiong-kan , Chú si̍p-jī-kè ê sèng-lī ê kì-hō hō͘ lán. Sui-bóng tio̍h chiàn-tò͘, m̄-kú lán í-keng sī sèng-lī tiong ê chiàn-tò͘. Si̍p-jī-kè ê ka-têng put lūn ū sím-mi̍h kiaⁿ-hiâⁿ guî-ki, tuì lán ê sìn-sim oá khò Chú, Chú ê pêng-an, Chú ê sèng-lī beh am-khàm chiah ê guî-ki. Lán ê sìn-sim nā khí-chō tī chin oa̍h Siōng-tè ê Kiáⁿ ê téng-bīn ê sī, lán ū sím-mi̍h thang kiaⁿ. Goān Siōng-tè siúⁿ-sù lán muí chi̍t lâng ū sìn-nāi I ê sim, thang iâⁿ-kè it-chhè ê guî-ki, hō͘ lán tiàm tī Chú ū pêng-an.
漢羅（Ùi原文改寫）
危機佮信賴
聖經：馬太10：24-33
胡茂生 寫
1960年8月860期
早時先知耶利米受上帝的呼召的時，上帝問講，你有看見甚物？耶利米講，「我有看見一个鼎teh滾」。咱知，鼎若teh滾的時，無有一屑仔安靜的所在，規鼎phi̍h-phi̍h pho̍k-pho̍k，攏振動現在的世界國際間的問題，自己國家的問題，社會，民族佮民族，人佮人，經濟，科學，實在攏親像鼎teh滾，無安靜平安的所在。確實現在的世界是佇兩个時代的中間，一个已經過了，閣一个時代予暗霧罩密，無一人敢講抑是預言演變中的世界欲變做怎樣？
第2次大戰對愛因斯坦所發明的原子能所造出的原子彈來結束，一時tek親像予世界得著和平的光的款式。總是遮的和平是指有親像一个休止符，佇短短的時間就過了，隨時進入現在這个暗淡憂悶，苦痛，危機的時代。現在全人類20外億的人，親像是攏坐佇予暗霧罩密危機的大風浪的內面teh活的。
- 國際間的危機。
予暗霧罩密的不幸的世界分做兩爿，就是華盛頓佮莫斯科，自由佮極權的對立。大家袂通和解，相僥疑，相攻擊，相侵犯，兩方的暗霧那烏暗，那罩密。咱看無久以前佇巴黎所開的高層會議流產，彼个破裂的內容敢毋是真好笑的事。蘇聯赫魯雪夫對美國艾森豪講，你放Ú號的偵探飛機來阮遮，著代先共我chhē毋著，若無毋佮你和談。艾森豪講，放飛機是兩方攏有，阮的飛機予恁拍落來，人死，閣共恁chhē毋著，欲thài有這個理。Taⁿ阮也已經終止，予恁拍落來，閣共恁chhē毋著袂用得。親像按呢，蘇聯叫美國講，若無chhē毋著，一定毋佮你談。親像囡仔teh冤家相罵一般樣。全世界的和平，20外億的hoan-êng佮人民，假若teh予in弄耍笑。雖罔是親像囡仔的相罵，iáu-kú佇一个背後有權謀術策的手段。
早前希臘的亞里斯多德所講的正義革命遐的青年為自由所流的血，也攏失了效力。閣再佇暗霧中來產生遮的東南亞新興國家攏偏走佇極端的獨立主義，in的政治獨立，經濟獨立，是親像囡仔穿大人的西裝的款式。咱看菲律賓的 Hui-hoà-àn，印尼對華僑的迫害，不公平不正，無理的事情埋伏佇咱的目前，遮的造成危機佇咱的中間。
II. 科學，文明的危機。
現在是原子科學，太空文明的時代。總是遮的有予人類幸福抑無？其實是成做兇猛殺人的武器若定。古早的戰爭是親像大衛佮Kho-lī-à一个對一个；拿破崙征服歐洲的時，發明大砲是一粒對12人。第1次大戰使用炸彈，一粒平均拍英國所使用的 V 1號，V 2號，是一粒攻擊168人。美國對日本所使用的原子彈，是一粒會拍死24萬人。Taⁿ 15年後所發達的原子彈抑是氫氣彈(氫彈)，已經無人會曉估計。
現在是人造衛星的競賽的時，原子武器的發達，太空的進展是向人類的威脅；到6月止，所發表佇美國，英國，法國，蘇聯的原子彈的爆炸，有210回以上，人造衛星有發射250遍以上，彼个怪聲咱聽無著，毋過ストロンチーム90个毒氣那增加遍滿佇大氣的內面。咱看美國用火箭載猴入太空，蘇聯載狗入太空；猴佮狗袂通和好。現在的科學，是變做猴佮狗相咬，永遠未做伙的物件。歷史家クインビー講，現在是佇文明的試煉的內面。許Hoâi-tiat博士佇伊的著作 「文明的沒落佮再建」是描寫近代的文明予世界觀變做暗淡佮悲極的。Taⁿ遮的文明對人類的貢獻，是指有予咱猶原親像一个鼎teh滾，是佇無安靜的危機的。
III. 個人間的危機。
個人的危機咱每日有拄著直接的體驗，所以較會明白。生，老，病，死；一生的中間有事業的失敗不安，煩惱，苦痛，為囝兒的升學，故人的掛慮猶原親像鼎teh滾。咱每一人有各人無同的事情佇咱心內teh滾。
咱會記得拜上帝的人猶原佇這个滾的人生佮世界的內面。咱佇一中間teh活，敢有人敢講我的苦痛，不安，煩惱，我會通家己負責，抑是有人通共我負責？實在無。佇遮試問咱大家，你的頭毛幾隻？咱攏毋知，無論是丈夫，婦人人抑是父母攏袂通知。
這是證明人本身袂通徹底來家己負責的。
IV. 確實穩當有人共咱負責。
佇遮有予咱會著驚的福音就是講，「就恁的頭毛也攏計算」。家己無，閣別人也無法度通做的，若是咱的天父看顧咱到頭毛共咱計算，共咱照顧。佇大危機的 背後有全能上帝扶持看顧咱到才詳細的照顧——「就恁的頭毛也攏計算。」佇10：29也描寫雀鳥仔上帝也照顧到真好勢，予伊食；何況人是萬物的靈長，比雀鳥貴百倍的價值，雖罔佇大危機的內面猶過咱倚靠上帝欲照顧的下面得真的平安。雖罔全世界親像鼎teh滾佇不安危機的內面。咱聽主的一句話「佇世間恁有苦難，獨獨恁著放心，我已經較贏世間。」神學者Ho̍k-sài-su講，「佇宇宙的中間有十字架徛頭。」基督徒是已經共咱下佇勝利的戰爭的所在。
佇無向望的中間，主十字架的勝利的記號予咱。雖罔著戰鬥，毋過咱已經是勝利中的戰鬥。十字架的家庭不論有甚物驚惶危機，對咱的信心倚靠主，主的平安，主的勝利欲掩蓋遮的危機。咱的信心若起造佇真活上帝的囝的頂面的是，咱有甚物通驚。願上帝賞賜咱每一人有信賴伊的心，通贏過一切的危機，予咱踮佇主有平安。