故鄭陳招女士歷傳
Kò͘ Tīⁿ Tân Chio lú-sū lio̍k-toān
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第854號 |
| 日期 | 1960/2 |
| 頁數 | 20 |
白話字（原文數位化）
Kò͘ Tīⁿ Tân Chio lú-sū le̍k-toān
1960年2月854期 20
Tīⁿ Chìn-teng Tiúⁿ-ló-niû Tân Chio lú-sū sèng-chêng hiân-huī, chò lâng sêng-sit, sī Tāi-kah sè-ka-té Tân Kî-siông Tiúⁿ-ló ê chhian-kim, iā-sī Tân Khêng-iâu Bo̍k-su, kò͘ Tân Khēng-ku Sian-siⁿ, Tân Khêng-kiú Thoân-tō-su ê 2 lēng-moē. I chhut-sì tī 1898 nî 1 goe̍h 26 ji̍t, keng-koè Tām-chuí Lú-o̍h pit-gia̍p liáu, toè lāu-pē kap hiaⁿ tò-chhù khì thoân-kàu, jia̍t-sim hōng-sū kàu-hoē ê toâⁿ khîm, pò͘-tō, kà Chú-ji̍t-o̍h ê kang. 1920 nî 3 goe̍h 29 ji̍t kap Tīⁿ Chìn-teng Tiúⁿ-ló kiat-hun ji̍p ka-têng chò chú-hū, tuì sī-toā lâng iú-hàu, tuì chhù-piⁿ saⁿ hô-hó, gâu khîn gâu khiām pang-chān tiōng-hu, kà-sī kiáⁿ-jî. Kiat-hun bô loā-kú bat èng hāu-iú-hoē ê chhéng-kiû ēng “Lí-sióng ke-têng ê kiàn-siat” chò tê-ba̍k, tâu kó khan-teng tī bó-hāu ê cha̍p-chì, koh tī siā-hoē chú-chhui Hū-lú káng-ián-hoē, thang thê-ko lú koân. Le̍k-jīm tìn-nih ê Hū-lú hoē-tiúⁿ, koh uī Chú siū khó͘ tio̍h-boâ. I ū siⁿ 5 lâm 1 lú: Tióng-lâm Liân-khun sī Sin-tek kàu-hoē ê bo̍k-su. Chhù-lâm Liân-tō sī bō͘-ek-hâng ê keng-lí, tng Siang-liân kàu-hoē ê chip-sū, Chú-ji̍t-o̍h ê hāu-tiúⁿ. Sam-lâm Liân-tek sī Sin-tiàm kàu-hoē ê bo̍k-su, hiān-chāi liû Bí tiong, Sí-lâm Liân-tì, gîn-hâng-oân, iā tng Chè-lâm-ke kàu-hoē chip-sū. Gō-lâm Liân-bêng sī chêng Se̍k-chí kàu-hoē ê bo̍k-su, hiān-chāi iā-sī Bí-kok liû ha̍k tiong. Soah-boé lú-chú Chhan huī hiān-chāi Tām-kang Lú Tiong ko 2, tng T.K.C. ê hoē-tiúⁿ. Sun-á lâm ê 15 ê lú ê 3 ê, chiū tiong 3 ê tī Tiong-ha̍k, 8 ê tī sió-ha̍k, kiáⁿ-sun uî-luî tī heng chêng, thang kóng sī chin hó miā.
I tī 1953 nî siū Tâi-oân séng Chú-se̍k piáu-chiong chò tē 1 kài bô͘-hoān bú-chhin, kàu 1959 nî 4 goe̍h 1 ji̍t hut-jiân hoat-seng kiap-sim-chèng, sui-sî ji̍p Tāi-ha̍k pīⁿ-īⁿ tī-liâu, chóng-sī siāng nî 10 goe̍h 28 ji̍t soà-chiap hoat-seng náu-ek-hiat, tó-chhng kàu taⁿ, sui-jiân kiáⁿ-jî sim-pū lûn-liû khàn-hō͘, gâu chīn hàu-tō, put-hēng tī kū-nî 12 goe̍h 2 ji̍t siōng-ngó͘ 10 tiám pêng-an koè-sì. 12 goe̍h 3 ji̍t hā-ngó͘ 2 tiám tī Chè-lâm-ke kàu-hoē kú-hêng kò-pia̍t-sek. Kò-pia̍t-sek tong ji̍t ū 7 uī bo̍k-su chhēng chiàⁿ chong tī tâi-téng, chham-chòng ê lâng ū 400 goā lâng, chiū tiong bo̍k-su ū 38 lâng, thang kóng sī pi-ai tiong-kan ê toā kong-êng.
漢羅（Ùi原文改寫）
故鄭陳招女士歷傳
1960年2月854期 20
鄭進丁長老娘陳招女士性情賢慧，做人誠實，是大甲世家底陳其祥長老的千金，也是陳瓊瑤牧師，故陳瓊琚先生，陳瓊kiú傳道師的2令妹。伊出世佇1898年1月26日，經過淡水女學畢業了，綴老父佮兄到處去傳道，熱心奉事教會的彈琴，佈道，教主日學的工。1920年3月29日佮鄭進丁長老結婚入家庭做主婦，對序大人有孝，對厝邊相和好，gâu勤gâu儉幫贊丈夫，教示囝兒。結婚無偌久捌應校友會的請求用「理想家庭的建設」做題目，投稿刊登佇母校的雜誌，閣佇社會主催婦女講演會，通提高女權。歷任鎮裡婦女會長，閣為主受苦著磨。伊有生5男1女：長男Liân-khun是新竹教會的牧師。次男Liân-tō是貿易行的經理，當雙連教會的執事，主日學的校長。三男Lâin-tek是新店教會的牧師，現在留美中，四男Liân-tì，銀行員，也當濟南街教會執事。五男Liân-bêng是前汐止教會的牧師，現在也是美國留學中。Soah尾女子Chhan-huī現在淡江女中高二，當T.K.C的會長。孫仔男的15个女的三个，就中三个佇中學，8个佇小學，囝孫圍纍佇胸前，通講是真好命。
伊佇1953年受台灣省主席表彰做第1屆模範母親，到1959年4月1日忽然發生狹心症，隨時入大學病院治療，總是像年10月28日紲接發生腦溢血， 倒轉到taⁿ，雖然囝兒新婦輪流看護，gâu盡孝道，不幸佇舊年12月2日上午10點平安過世。12月3日下午2點佇濟南街教會舉行告別式。告別式當日有7位牧師穿正裝佇台頂，參葬的人有400外人，就中牧師有38人，通講是悲哀中間的大光榮。