雜錄個人消息
Cha̍p-lio̍k Kò-jîn siau-sit
文獻資訊
| 項目 | 資料 |
|---|---|
| 作者 | 王oá Ông oá |
| 卷期 | 台灣教會公報 |
| 卷期 | 第849號 |
| 日期 | 1959/9 |
| 頁數 | 26 |
白話字（原文數位化）
Kò-jîn Siau-sit
Chi̍t chhuì kā tn̄g 4 tiâu tîn ê Hô-bí Kò͘ N̂g Hok Tiúⁿ-ló ê Sió-toān
Ông oá
1959年9月849期 p.26
Chhit goe̍h 13 hō, sio̍k Hô-bí kàu-hoē Tiúⁿ-ló N̂g Hok 79 hoè kè-sin. I 21 hoè sìn tō-lí, i só͘ toà sī Soàⁿ-sai hiong ùn-á, tng-sî Hô-bí iáu-bē sit kàu-hoē tio̍h ài kàu Chiong-hoà lé-pài; tuì ùn-á kàu Chiong-hoà ài kiâⁿ-lō͘ 2 tiám cheng kú, sui-jiân lō͘ hn̄g nā sī moé lé-pài sī pí chāi Chiong-hoà ê lâng tāi-seng kàu. 25 hoè tī Chiong-hoà tuì Lîm Ha̍k-kiong Bo̍k-su niá sé-lé; 30 hoè tng chip-sū, 15 nî kú, 45 hoè tng tiúⁿ-ló, 10 nî kú, 55 hoè lâi Chiong-hoà i-koán chò kang ke̍k kut-la̍t jīn-chin, tuì hoān-chiá ke̍k chhin-chhiat, 61 hoè ji̍p chò Chiong-hoà kheh-ūn soàⁿ-lō͘-hu, pêng-siông 60 hoè chiū thè-ia̍h, i 61 siū chhái-iōng, thang chai i sin-thé ê kiān-khong kap chò kang ê chīn-tiong, 66 hoè hō͘ i ê kiáⁿ-sun ko͘-chiâⁿ i thè-hiu, tuì 66 hoè khí toà ka-têng chiū-sī moé chá-khí kàu pài-tn̂g sàu-tè, chèng-hoe ak-chuí, só͘-í 13 nî kú moé-ji̍t sī án-ni; pài-tn̂g só͘ ū ê hoe, chhiū lóng sī tuì i ê chhiú chiàu-kò͘ lâi toā-châng, put-tàn ak-chuí, ku̍t-sang, èng-puî, lia̍h-thâng. Moé-pái chò hong-thai toā-chuí i tek-khak seng kàu pài-tn̂g lâi sûn-sī, chi̍t pái chhiū-oe phah-tn̄g chin chē, i ka-kī chéng-lí kui-ji̍t, i teh sàu lé-pài-tn̂g ê sàu-chiú bô ēng kàu-hoē kong ê, iā bô ēng ke-lāi suî-piān ê, sī lēng-goā i bé ê, chí-ū chò sàu pài-tn̂g ê lō͘-ēng gia̍h khǹg i ê khùn-pâng tiàu koân, tuì chit ki sàu-chiú thang chai i ê khoàⁿ-tāng Sèng-tn̂g.
I hán-tit phoà-pēⁿ, kin-nî 2 goe̍h chiah kám-kak uī bô tú-hó, kuí-ji̍t-á bô ài chia̍h, ti̍t-ti̍t siau-sán, i iā m̄-ài hō͘ i-seng khoàⁿ, kàu 5 goe̍h chhe siū chāi-tē i-seng bián-lē, chiah lâi ji̍p-īⁿ, chai i sī toā-tn̂g gâm, i-seng beh kā chhiù-su̍t, i m̄, kóng, 80 hoè lah. Siōng-tè beh tiàu goá tò-khì chhù-nih. Lâng thè i kî-tó, i kóng m̄-thang kiû Siōng-tè kā i i-hó, tio̍h kiû Siōng-tè siúⁿ-sù i ū khuì-la̍t lâi thun-lún iâⁿ-koè chit ê pēⁿ-thiàⁿ; i ê sim-pū teh kò͘ i, khoàⁿ i teh kan-khó͘, bīn iu-būn, i kóng lín ê bīn m̄-thang iu-iu, tio̍h chhiò-chhiò. Sī-toā-lâng teh kan-khó͘ sī-sè teh chhiò sī put-kai, che thang chai i tuì si chin bêng-pe̍k, chhin-chhiūⁿ toā chiong-kun tek-sèng beh khái-soân ê hoaⁿ-hí; beh sí ê chìn-chêng ka-kī liām kóng i m̄-thang tī lâng siu tang bô êng ê sî kā lâng tàu bô êng, kó-jiân siu-tang liáu chiah sí. Chit hō gâm iā m̄-sī hiah khoài koè-sin, nā-sī Hok-hiaⁿ chí-ū kan-khó͘ 5 jit kú nā-tiāⁿ, chiū an-jiân khì-khùn, Siōng-tè thè-thiap i ê lô͘-po̍k.
Lūn Hok Tiúⁿ-ló ê sìn-gióng iáu ū thang hō͘ lâng o̍h ê só͘-chāi. In tâng khí-gī lâi sín Chú ū 8 ê lâng, ū ê poē-kàu, ū ê léng-sim hiah ê lóng lông-poē, in 2 lâng chhim-sìn siú tō-lí ê, Siōng-tè chiok-hok hō͘ i 2 ê hāu-siⁿ 2 ê cha-bó͘-kiáⁿ, lāi-goā sun 14 ê, Ha̍k-īⁿ pit-gia̍p ê 2, Su-hoān pit-gia̍p 2, Ko-tiong, Chho͘-tiong chāi-ha̍k tiong chin-chē, tī kàu-hoē, tī siā-hoē sī toā lō͘-ēng ê jîn-bu̍t.
Gō͘-cha̍p-saⁿ nî chêng Chiong-hoà teh khí pài-tn̂g ê sî, bo̍k-liāu sī hok-sam, sī Lîm Ha̍k-kiong, Ong Poê-eng nn̄g uī Bo̍k-su khì Hok-chiu bé--ê, pàng hái-chhuí ēng phâng-chûn toà ji̍p Thô͘-kat-khut. Hok Tiúⁿ-ló in chio ùn-á 5 hiaⁿ-tī 4 ê tuì Thô͘-kat-khut ūn-kàu Chhì-tông-kha kau 5, 6 ki ká-chò chi̍t-pâi, hiám-á tōng-tio̍h lâng chài-hoè ê pâi, nā kā lâng tōng-péng ài poê-lâng, Hok Tiúⁿ-ló tī guî-hiám tiong koáⁿ-kín ēng chhuì kā-tn̄g ká-sam ê 4 kó͘ tîn hō͘ sam-pâi soàⁿ-khì tōng-tio̍h chài-hoè ê pâi chiah bô péng, āu-lâi tâng-phoāⁿ kā Hok Tiúⁿ-ló kóng tîn chi̍t tiâu lí kā ê tn̄g bē? Sian kā mā bē tn̄g, àn-choáⁿ 4 kó͘ chi̍t ē kā-tn̄g lī-lī, che iā sī chi̍t hāng ê kî-biāu.
I teh siú lé-pài bô hō͘ hong hō͘ chó͘-tòng, iā bô hō͘ hn̄g á kīn lâi pîn-toāⁿ, óng-ho̍k tio̍h kiâⁿ 4 tiám cheng ê lō͘, pí kīn ê tāi-seng kàu, āu-lâi i toà tī pài-tn̂g piⁿ, iā bô pîn-toāⁿ thèng-hāu lâng teh gîm-si chiah khì.
Sàng-chòng i iā hiòng-chêng, i m̄-sī kan-ta chò chi̍t ê hoē-chiòng-chiá, chiū-sī khui-khut-á kap kng koaⁿ-chhâ, bô chhin-chhiūⁿ bó͘ kàu-hoē tû tiûⁿ-ló, chip-sū, pó-chèng, lí-tiúⁿ, sin-sū, soà bô lâng thang kng koaⁿ-chhâ.
漢羅（Ùi原文改寫）
個人消息
一喙咬斷4條藤的和美故黃福長老的小傳
王oá
1959年9月849期 p.26
七月13號，屬和美教會長老黃福79歲過身。伊21歲信道理，伊所蹛是線西鄉ùn-á，當時和美猶未設教會著愛教會彰化禮拜；對ùn-á到彰化愛行路2點鐘欠，雖然路遠若是每禮拜是比在彰化的人代先到。25歲佇彰化對林學恭牧師領洗禮；30歲當執事，15年久，45歲當長老，10年久，55歲來彰化醫館做工極搰力認真，對患者極親切，61歲入做彰化客運線路夫，平常60歲就退役，伊61受採用，通知伊身體的健康佮做工的盡忠，66歲予伊的囝孫ko͘-chiâⁿ伊退休，對66歲起蹛家庭就是每早起到拜堂掃地，種花沃水，所以13年久每日是按呢拜堂所有的花，就攏是對伊的手照顧來大欉，不但沃水，掘鬆，èng肥，掠蟲。每擺做風thai大水伊的確先到拜堂來巡視，一擺樹oe扑斷真濟，伊家己整理規日，伊teh掃禮拜堂的掃帚無用教會公的，也無用家內隨便的，是另外伊買的，只有做掃拜堂的路用舉囥伊的睏房吊懸，對這支掃帚通知伊的看重聖堂。
伊罕得破病，今年2月才感覺胃無拄好，幾日仔無愛食，直直消sán，伊也毋愛予醫生看，到5月初受在地醫生勉勵，才來入院，知伊是大腸癌，醫生欲共手術，伊毋，講，80歲lah。上帝欲召我倒去厝裡。人替伊祈禱，伊講毋通求上帝共伊醫好，著求上帝賞賜伊有氣力來吞忍贏過這个病疼；伊的新婦teh顧伊，看伊teh艱苦，面憂悶，伊講恁的面毋通憂憂，著笑笑。Sī大人teh艱苦sī細teh笑是不該，這通知伊對死真明白，親像大將軍得勝欲凱旋的歡喜；欲死的進前家己唸講伊毋通佇人收冬無閒的時共人鬥無閒，果然收冬了才死。這號癌也毋是遐快過身，若是福兄只有艱苦5日久nā-tiāⁿ，就安然去睏，上帝體貼伊的奴僕。
論福長老的信仰猶有通予人學的所在。In同起義來信主有8个人，有的背教，有的冷心遐的攏狼狽，in 2人深信守道理的，上帝祝福予伊2个後生2个查某囝，內外孫14个，學院畢業的2，師範畢業2，高中，初中在學中真濟，佇教會，佇社會是大路用的人物。
五十三年前彰化teh起拜堂的時，木料是福杉，是林學恭、翁Poê-eng兩位牧師去福州買的，放海水用帆船帶入Thô͘-kat-khut。福長老in招ùn-á 5兄弟4个對Thô͘-kat-khut運到刺桐kha交5、6支絞做1排，險仔撞著人載貨的排，若共人撞反愛賠人，福長老佇危險中趕緊用喙咬斷絞杉的4股藤予杉排散去撞著載貨的排才會反，後來同伴共福長老講藤一條你咬會斷袂？Sian咬嘛袂斷，按怎4股一下咬斷離離，這也是一項的奇妙。
伊teh守禮拜無予風雨阻擋，也無予遠á近來貧惰，往覆著行4點鐘的路，比近的代先到，後來伊蹛佇拜堂邊，也無貧惰聽候人teh吟詩才去。
送葬伊也向前，伊毋是kan-ta做一个會眾者，就是開窟仔佮扛棺材，無親像某教會除長老、執事、保正、里長、紳士，紲無人通扛棺材。