祈禱
Kî-tó(III)
文獻資訊
| 項目 | 資料 |
|---|---|
| 作者 | 高瑞士 Ko Suī-sū |
| 卷期 | 台灣教會公報 |
| 卷期 | 第849號 |
| 日期 | 1959/9 |
| 頁數 | 19 |
白話字（原文數位化）
Kî-tó(III)
Ko Suī-sū
(Chiap chêng-goe̍h hō 12 bīn)
1959年9月 849期 p.19-20
uī siā-hoē ho̍k-bū kî-tó——Intercession——For Society—--
Goán ê Thiⁿ-pē Siōng-tè tuì Lí kham-tit o-ló ê Sèng-kiáⁿ ū kà-sī goán chai, Lí sī thiàⁿ-thàng ê Chú. Goán khún-kiû Lí toā hoat chû-pi, lâi chiok-hok lóng-chóng kun-tè Chú, uī-tio̍h tông-pau hiàn-sin ho̍k-bū ê lâng, kiû Lí hō(sic.) in chheng-chhó chiong-lâi ê sū, iā hō͘ in khoàⁿ-chhut hiān-chāi ê siā-hoē chè-tō͘ tiong ê khoat-tiám , hō͘ in ū chin-si̍t ê phêng-phoàⁿ, ióng-kám kap kú-tn̂g ê sim, iā hō͘ in koé-chiàⁿ ba̍k-chêng ê chhò-gō͘. Koh siúⁿ-sù in bô piàn-oāⁿ ê thiàⁿ-sim, oē ho̍k-bū tī sòng-hiong ê, siū khó͘ ê, ko͘-toaⁿ bô î-oá(sic.) ê lâng. iā khún-kiû hō͘ goán oē kì-tit, goán lóng sī Lí ê kiáⁿ-jî , tī goán ê tiong-kan, tāi-ke tio̍h ū saⁿ-thiàⁿ ê cheng-sîn.
Goán tek-khak tio̍h chiàu Lí ê sèng chí-ì gâu pān-lí it-chhè ê sū. án-ni kiû sī oá-khò Lí ê Sèng kiáⁿ, thoè goán pàng-sak sìⁿ-miā ê Kiù-chú Iâ-so͘ Ki-tok ê kong-lô.
Kiû choè hó ê chhù-piⁿ——Intercession——O God, help us to be just and true in all relations with o͘r neighbo͘rs——
Toā chû-pi ê Chú, kiû Lí kà-sī goán, hō͘ goán tuì chhù-piⁿ it-chhè ê koan-hē tiong oē thé-thiap, kong-pêng, sêng-si̍t, hō͘ goán ê sim hoaⁿ-hí chun-siú Lí hó ê hoat-tō͘ kap ho̍k-bū. Pó-siú goán ê su-sióng kap kiâⁿ-choè, bián-tit goán tuì tī sòng-hiong lâng lâi chham-ka ap-pek, tuì tú-tio̍h tāi-chì bô chhin-chhiūⁿ goán ê lâng lâi boē kì-tit kong-tō. Koh oē ko-kú lâng ê sim, chiâⁿ-choè goán choè toā ê ǹg-bāng Kiû Lí hō͘ goán chiâⁿ-choè hó ê kang lâng, hó ê chhù-piⁿ, uī-tio̍h pa̍t lâng tô͘-bô lī-ek, chhin-chhiūⁿ goán ka-kī chi̍t-iūⁿ.
Tī siū tio̍h chhì-liān ê sî ū thun-lún ê sim, chhut la̍t tui-kiû tī thian-kok ê èng-ún tiong tit-tio̍h hí-lo̍k , hō͘ thian-kok chiâⁿ tī jîn-luī iú-ài tiong.
Koh kiû, hō͘ goán ê kok-ka thoat-lī oàn-tò͘, tham-sim kap oàn-hūn; pang-chān goán , oē lī-iōng Lí só͘ hō͘ goán ê it-chhè lâi tô͘-bô͘ tāi-ke ê hēng-hok. Hōng goán ê toā hiaⁿ Ki-tok ê miâ lâi kiû. A-men.
Soat-kàu í-āu ê kî-tó——Prayer after Sermon——
Choân-lêng ê Siōng-tè ah! Khún-kiû Lí si un, hō͘ goán kin-á-ji̍t só͘ thiaⁿ ê chin-lí, oē khek-tiâu tī goán ê sim-lāi, hō͘ goán thang kiat-chiâⁿ hó ê ké-chí, goān êng-kng kui tī Lí sèng-miâ. A-men.(Oân)
漢羅（Ùi原文改寫）
祈禱 (III)
Ko Suī-sū
(接前月號12面)
1959年9月 849期 p.19-20
為社會服務祈禱—--Intercession—--For Society——
阮的天父上帝對你堪得呵咾的聖囝有教示阮知，你是疼thàng的主。阮懇求你大發慈悲，來祝福攏總跟綴主，為著同胞獻身服務的人，求你予in清楚將來的事，也予in看出現在的社會制度中的缺點，予in有真實的評判，勇敢佮久長的心，也予in改正目前的錯誤。閣賞賜in無變換的疼心，會服務佇散鄉的，受苦的，孤單無依倚的人。也懇求予阮會記得，阮攏是你的囝兒，佇阮的中間，大家著有相疼的精神。
阮的確著照你的聖旨意gâu辦理一切的事。按呢求是倚靠你的聖囝，退阮放拺性命的救主耶穌基督的功勞。
求做好的厝邊—--Intercession—--O God, help us to be just and ture in all relations with o͘r neighbo͘rs——
大慈悲的主，求你教示阮，予阮對厝邊一切的關係中會體貼，公平，誠實，予阮的心歡喜遵守你好的法度佮服務。保守阮的思想佮行做，免得阮對佇散鄉人來參加壓逼，對拄著代誌無親像阮的人來袂記得公道。閣會高舉人的心，成做阮最大的向望 求你予阮成做好的工人，好的厝邊，為著別人圖謀利益，親像阮家己一樣。
佇受著試煉的時有吞忍的心，出力追求佇天國的應允中得著喜樂，予天國成佇人類友愛中。
閣求，予阮的國家脫離怨妒，貪心佮怨恨；幫贊阮，會利用你所予阮的一切來圖謀大家的幸福。奉阮的大兄基督的名來求。A-men。
說教以後的祈禱—Prayer after Sermon—--
全能的上帝矣！懇求你施恩，予阮今仔日所聽的真理，會刻牢佇阮的心內，予阮通結成好的果子，願榮光歸佇你聖名。A-men。（完）