祈禱
Kî-tó
文獻資訊
| 項目 | 資料 |
|---|---|
| 作者 | 高瑞士 Ko Suī-sū |
| 卷期 | 台灣教會公報 |
| 卷期 | 第848號 |
| 日期 | 1959/8 |
| 頁數 | 11 |
白話字（原文數位化）
Kî-tó
Ko Suī-sū
(Chiap chêng goe̍h hō 11 bīn)
1959年8月848期 p.11-12
Chóng siā-bûn——Thanksgiving General Thanksgiving——
Bû-só͘ put-lêng ê Chú, siúⁿ-sù bān-hāng un-tián ê Thiⁿ-pē, goán sī sió-khoá bô lō͘-ēng ê lō͘-po̍k, lóng ēng khiam-pi sêng sim kám-siā Chú, in-uī Chú ū siúⁿ-sù un-huī jîn-chû hō͘ goán, iā ū siúⁿ-sù hō͘ bān lâng.
Koh kám-siā Chú, in-uī Chú ū chhòng-chō goán, pó-hō͘ goán, koh chiong kim-sè ta̍k-iūⁿ ê hok-khì siúⁿ-sù goán. Koh khah kám-siā Chú, in-uī Chú chiong tē-it toā ê jîn-ài, tuì goán ê Chú Iâ-so͘ Ki-tok, lâi kiù-sio̍k sè-kan lâng, koh ēng tit-tio̍h un-tián ê hoat-tō͘ siúⁿ-sù goán, iā hō͘ goán ū ǹg-bāng āu-lâi ê êng-kng. Khún-kiû Chú, hō͘ goán kì-liām Chú it-chhè ê jîn-chû, ēng chīn-sim kám-siā Chú, chàn-bí Chú, koh hō͘ goán hián-bêng Chú ê sèng-tek, m̄-nā ēng chhuì kóng, iā tio̍h ēng só͘ choè ê sū, chiū-sī chi̍t-sim ho̍k-sāi Chú it-seng choè chheng-khì, siān-liông ê tāi-chì, che lóng sī oá-khò goán ê Chú Iâ-so͘ Ki-tok. A-men.
uī-tio̍h oân-choân ê un-tián kám-siā——Thanksgiving Almighty and Most Merciful Father, from whom cometh every good and perfect gift——
Choè toā choân-lêng chû-pi ê Pē, ta̍k khoán ê hó-sū kap oân-choân ê un-tián, lóng sī tuì Lí lâi-ê, goán tuì tī Lí lóng-chóng ê un-huī kiong-kèng ài chàn-bí Lí, sêng-sim kám-siā Lí, in-uī Lí chhòng-chō goán hó ê ì-sù, koh ēng chin hong-hù kióng-kip goán.
Koh tuì Lí chû-ài ê Pē ê kà-sī kap chek-pī, lâi hō͘ goán sì-chiàⁿ, ēng thun-lún ê sim khoán-thāi goán, ēng thiàⁿ-sim kiù-sio̍k goán, só͘-í goán ài ēng khiân-sêng o-ló Lí, ēng sêng-sim kám-siā Lí.
Khún-kiû Lí, chiong ta̍k-khoán ê un-sù kap thiàⁿ Lí ê sim, pîⁿ-pîⁿ siúⁿ-sù goán, hō͘ goán oē hiàn-sin ho̍k-bū, bān hāng sū hoaⁿ-hí chun-thàn Lí ê sèng chí-ì, án-ni kám-siā Lí ê toā un-tián, sī oá-khò goán ê Chú Iâ-so͘ Ki-tok. A-men.
uī-tio̍h thiⁿ-ē ê lâng kî-tó——Intercession For all Sorts and Condition of Men——
Thiⁿ-pē, sī chhòng-chō sè-kan lâng pó-hō͘ sè-kan lâng ê, hiān-chāi goán uī ta̍k iūⁿ ta̍k khoán ê lâng kiong-kèng kî-tó, khún-kiû Chú, hō͘ in lóng bêng-pe̍k Chú ê tō-lí, hō͘ bān-kok iā lóng kám-siā Chú kiù-sè ê un-tián.
Koh te̍k-pia̍t uī-tio̍h thiⁿ-ē sèng ê kàu-hoē kî-tó, kiû Chú hō͘ kàu-hoē tit-tio̍h Sèng Sîn ê ín-chhoā koán-lí, hō͘ hoān-nā ka-kī kóng sī Ki-tok-tô͘ ê lóng tit-tio̍h chí-sī lâi kàu chin-lí ê lō͘-chiūⁿ, tâng sim kian siú sèng-kàu, tāi-ke hô-hó, choè sū ha̍p-lí.
Koh thoè sìn-sim kap sū-gia̍p tú-tio̍h kan-khó͘ ê lâng kî-tó, an-uì in, chín-kiù in, hō͘ in tī siū-khó͘ ê sî ū thun-lún ê sim, iā kiû in thoat-lī it-chhè ê khùn-khó͘, che lóng sī oá-khò goán ê Chú Iâ-so͘ Ki-tok. A-men.
Kiû Chú-bîn ha̍p-it ê kî-tó——Intercession——O God. Who hast made of one blood all the Nations of Mankind——
Siōng-tè ah! Lí bat hō͘ choân jîn-luī bān peh-sìⁿ, chiâⁿ-choè chi̍t ê hiat-thóng tuì án-ni tāi-ke lóng sī chi̍t-ke lâng. Goán chin gōng, ngī-sim, boē oē jīn-bat goán ū kong-kiōng ê thiàⁿ-chêng.
Siōng-tè ah! goán khian-sêng(sic.) kî-tó, khún-kiû Lí hō͘ bān-bîn chiâⁿ-choè chit5 thé. Ki-tok ê kàu-hoē án-ni ê phò-hoāi, hun-li̍h, sì-soàⁿ, tì-kàu lâng khoàⁿ boē chhut goán sī kun-tè chi̍t ê Kiù-chú, chun-siú kong-kiōng ê sìn-gióng.
Chú ah! Khún-chhiat kiû Lí, soé-chheng it-chhè, hoān-nā oē hō͘ goán hun-khui ê hu-êng, chip-bê kap m̄-khéng sià-bián lâng ê cheng-sîn, bián-tit tì-kàu Chú bô thīⁿ ê sèng-saⁿ tú-tio̍h phoàⁿ-li̍h, koh hō͘ Chú ê sèng-thé oē têng-sin ha̍p-it.
In-uī choân jîn-luī ê su-iàu sī siâng chi̍t khoán ê, goán chhiat-chhiat kiû Lí hō͘ goán chhē-tio̍h to̍k-it ê lō͘, saⁿ-kap lâi chhin-kūn Lí to̍k-it ê Sîn. Kiû Lí kìm-chí goán bô hō͘ goán tī ko siōng ê sū-chêng, lâi phò͘-hoāi thoân-kiat. Goān Ki-tok ê lêng lâi phah-phoàⁿ it-chhè ê chó͘-gāi, hō͘ bān-kok ê ǹg-bāng tit-tio̍h boán-chiok.
Khún-kiû Lí, hō͘ goán oē liân-ha̍p, goān chit ê liân-ha̍p sī thiat-té ê, phó͘-piàn ê, ài chip-siú kàu chi̍t ê thêng-tō͘, oē hō͘ choân jîn-luī lóng chi̍p-ha̍p lâi tâng kui Chú chi̍t ê iûⁿ-tiâu, hō͘ kî-tó ê kap boē kî-tó ê, sìn-gióng kian-tēng ê kap giâu-gî sim boē khoài siau-bô ê lâng lóng oē saⁿ-kap tiàm. Chóng-sī goán bô ēng che choè boán-chiok, hoān-nā oē hō͘ pa̍t-lâng boē hióng-siū tio̍h Lí hong-hù ê un-tián, koh oē kū-choa̍t chi̍t ê lêng-hûn boē hō͘ in chiap-siū tio̍h Lí ê hoan-gêng, bô-lūn sī chè-tō͘, chó͘-chit, á-sī sìn-tiâu, si̍p-koàn, gî-sek, lí-sióng, khùn-kiû Lí bô hō͘ goán lia̍h-choè boán-chiok; oá-khò Iâ-so͘ Ki-tok ê kong-lô. A-men.
漢羅（Ùi原文改寫）
祈禱
高 Suī-sū
(接前月號11面)
1959年8月848期 p.11-12
總謝文—-Thanksgiving General Thanksgiving
無所不能的主，賞賜萬項恩典的天父，阮是小可無路用的奴僕，攏用謙卑誠心感謝主，因為主有賞賜恩惠仁慈予阮，也有賞賜予萬人。
閣感謝主，因為主有創造阮，保護阮，閣將今世逐樣的福氣賞賜阮。閣較感謝主，因為主將第一大的仁愛，對阮的主耶穌基督，來救贖世間人，閣用得著恩典的法度賞賜阮，也予阮有向望後來的榮光。懇求主，予阮紀念主一切的仁慈，用盡心感謝主，讚美主，閣予阮顯明主的聖德，毋若用喙講，也著用所做的事，就是一心服侍主一生做清氣，善良的代誌，這攏是倚靠阮的主耶穌基督。A-men。
為著完全的恩典感謝—--Thanksgiving Almighty and Most Merciful Father, from whom cometh every good and perfect gift—-
最大全能慈悲的父，逐款的好事佮完全的恩典，攏是對你來的，阮對佇你攏總的恩惠恭敬愛讚美你，誠心感謝你，因為你創造阮好的意思，閣用真豐富供給阮。
閣對你慈愛的父的教示佮責備，來予阮四正，用吞忍的心款待阮，用疼心救贖阮，所以阮愛用虔誠呵咾你，用誠心感謝你。
懇求你，將逐款的恩錫佮疼你的心，平平賞賜阮，予阮會獻身服務，萬項事歡喜遵趁你的聖旨意，按呢感謝你的大恩典，是倚靠阮的主耶穌基督。A-men。
為著天下的人祈禱—-Intercession For all Sorts and Condition of Men—-
天父，是創造世間人保護世間人的，現在阮為逐樣逐款的人恭敬祈禱，懇求主，予in攏明白主的道理，予萬國也攏感謝主救世的恩典。
閣特別為著天下聖的教會祈禱，求主予教會得著聖神的引chhoā管理，予凡若家己講是基督徒的攏得著指示來到真理的路上，同心聖守聖教，大家和好，做事合理。
閣替信心佮事業拄著艱苦的人祈禱，安慰in，拯救in，予in佇受苦的時有吞忍的心，也求in脫離一切的困苦，這攏是倚靠阮的主耶穌基督。A-men。
求子民合一的祈禱—-Intercession—--O God. Who hast made of one blood all the Nations of Mankind—--
上帝矣！你捌予全人類萬百姓，成做一个血統對按呢大家攏是一家人。阮真戇，硬心，袂會認捌阮有公共的疼情。
上帝矣！阮虔誠祈禱，懇求你予萬民成做一體。基督的教會按呢的破壞、分裂、四散，致到人看袂出阮是跟綴一个救主，遵守公共的信仰。
主矣！懇切求你，洗清一切，凡若會予阮分開的虛榮，執迷佮毋肯赦免人的精神，免得致到主無thīⁿ的聖衫拄著破裂，閣予主的聖體會重新合一。
因為全人類的需要是siâng一款的，阮切切求你予阮揣著獨一的路，saⁿ-kap來親近你獨一的神。求你禁止阮無予阮佇高尚的事情，來破壞團結。願基督的靈來扑破一切的誤解，予萬國的向望得著滿足。
懇求你，予阮會聯合，願這个聯合是徹底的，普遍的，愛執守到一仲程度，會予全人類攏集合來同歸主一个羊椆，予祈禱的佮袂祈禱的，信仰堅定的佮僥疑心袂快消無的人攏會saⁿ-kap踮。總是阮無用這做滿足，凡若會予別人袂享受著你豐富的恩典，閣會拒絕一个靈魂袂予in接受著你的歡迎，無論是制度，組織，á是信條，習慣，儀式，理想，懇求你無予阮掠做滿足；倚靠耶穌基督的功勞。 A-men。