對教會佮T.K.C.的呼聲
Tuì kàu-hoē kap T.K.C. ê ho͘-siaⁿ
文獻資訊
| 項目 | 資料 |
|---|---|
| 作者 | Ông Eng-sè Ông Eng-sè |
| 卷期 | 台灣教會公報 |
| 卷期 | 第845號 |
| 日期 | 1959/5 |
| 頁數 | 17 |
白話字（原文數位化）
Tuì kàu-hoē kap T.K.C. ê ho͘-siaⁿ(呼聲)
(Chhiⁿ Tiong Chheng-liân-pō͘: Ông Eng-sè siá)
1959年5月845期 p.17
Lia̍t-uī chhin-ài tâng sio̍k Chú ê hiaⁿ-ché, lí m̄-chai bat kā siūⁿ hiān-sî èng-tiàu tī kun-tiong teh ho̍k-bū á-sī hùn-liān ê kàu-hoē chheng-liân ū joā choē á-bô?
Hiān-sî pêⁿ-tē kap san-tē kàu-hoē lóng-chóng ū 707 keng. Siat-sú chi̍t keng kàu-hoē nā pêng-kin ū nn̄g ê chiū 1414 ê, nā ū 5 ê chiū 3535 ê lah. án-ni kiám m̄-sī chin thang kiaⁿ-hiâⁿ ê sò͘-jī. Chiah ê chheng-liân tī lé-pài-ji̍t á-sī hioh-khùn ê sî m̄-chai khì tó-uī? Ū chin-choē khó-chhú ê chheng-liân siông-siông khì choè lé-pài, chhut-ji̍p tī kàu-hoē. Chóng-sī iā ū chin-chē in-uī tē-thâu chheⁿ-so͘ bô sio-bat, iū koh sî-kan siuⁿ chē, só͘-í uī-tio̍h beh siau-mô͘ chiah ê sî-kan hō͘ bô liâu ê sim tit-tio̍h chi̍t-sî-tek ê boán-chiok, in chiū kiâⁿ tiān-iáⁿ-koán, lòng-kiû-keng, á-sī tê-tiàm téng-téng só͘-chāi. Lia̍t-uī che kiám m̄-sī tuì lán kàu-hoē chin toā ê ui-hia̍p(威脅). Chhit-chheⁿ Tiong-hoē Chheng-liân-pō͘ in-uī khoàⁿ koè-khì kàu-hoē bô sím-mi̍h koan-sim tī chit khoán ê kang-chok, só͘-í ài hoàn-khí kok kàu-hoē chù-ì chit ê būn-tê. Tī Tâi-pak Hok-im Liân-gî-hoē ū uī-tio̍h Bí-kok peng siat chiau-thāi-só͘, lāi-bīn ū tiān-chhiùⁿ-ki, tô͘-su, phin-phóng toh, kî-thaⁿ chióng-chióng ê thit-thô mi̍h ê siat-pī. Khiok lán boē thang choè kàu án-ni, chóng-sī chì-chió lán oē thang thê-kióng(sic.) tiûⁿ-só͘, ki-hoē hō͘ chiah ê lâng. Ū sî iú-chì chiau-thāi in tī ka-têng hō͘ in ū thang chiap-chhiok tio̍h ka-têng ê sio-lō. iā kàu-hoē tio̍h chek-ke̍k-tek chio-ho͘ in hō͘ in tī tī in ê sî-kan oē thang iông-ún ê hoān-uî lāi chham-ka kàu-hoē ê chū-hoē. Te̍k-pia̍t T.K.C. tio̍h choè tiong-sim lâi chiau-thāi in kap in choè pêng-iú. Goá siong-sìn tī in pún kàu-kàu-hoē(sic.) bô sím-mi̍h jia̍t-sim ê chheng-liân iā beh tuì án-ni koh-khah jīm-sek(sic.) tī Chú lāi-bīn ê thiàⁿ, m̄-nā án-ni, thiàⁿ Chú ê sim beh ná ke-thiⁿ.
Chú Iâ-so͘ kiò lán “Tio̍h thiàⁿ chhù-piⁿ chhin-chhiūⁿ ka-kī,”iū koh kóng, “Lín kì-liân kiâⁿ i tī goá ê hiaⁿ-tī chì bî-soè ê ê chi̍t ê, chiū-sī kiâⁿ i tī goá”(Má-thài 25:40).
Lia̍t-uī chhin-ài ê hiaⁿ-ché kap T.K.C. ê hoē-oân, lí kiám bô ài saⁿ-kap ū hūn lâi choè chit ê iàu-kín ê kang lâi pó-chhî tī kun-tiong kàu-hoē chheng-liân ê sûn-kiat lâi lī-ek Siōng-tè ê kok:
5 KAK GÛN HIÀN-KIM SIU-CHI PÒ-KÒ-SU
3 ge̍h-hūn só͘ hiàn ê.
T.K.C. Kim-gia̍h T.K.C. Kim-gia̍h
Chhiⁿ Tiong
Ji-kiat 22.00 Tang-soaⁿ 26.00
Siang-liân 150.00
Pak Tiong
Báng-kah 848.00 Saⁿ-têng-po͘ 57.00
Pang-kiô 129.00 Kiàn-sêng 50.00
Tek Tiong
Tiong-hoē 50.00
Tang Tiong
Sìn-gī 100.00 Gio̍k-lí 30.00
Koan-san 20.00 Tâi-tang 90.00
Tāi-lí 30.00
Tiong Tiong
Liú-goân 20.70 Lo̍k-káng 20.00
Gû-bîn 16.00
Ka Tiong
Phò-chú 150.00
Lâm Tiong
Chó-tìn 24.00 Gio̍k-chíⁿ 21.00
Sai-mn̂g 60.00
Ko Tiong
Kū-siâⁿ 12.00 iâm-tiâⁿ 120.00
Jîn-bú 37.50
Ha̍p-ke 2083,20
3 ge̍h lán só͘ pang-chān ê.
Tiong-hoē Kàu-hoē Kim-gia̍h
Chhit-chhiⁿ Chhit-tó͘ 200.00
Sin-tek Tâng-lô 200.00
Hù-kong 100.00
Tang-pō͘ Ti-pún 200.00
Tâi-tiong Chi̍p-chi̍p 200.00
Lō͘-siōng 100.00
Ka-gī Koè-lō͘ 100.00
Tâi-lâm Thô͘-siâⁿ 100.00
Ko-hiông Ka-tang 150.00
Eńg-an 100.00
Ha̍p-kè 1,450,00
郵局劃撥第5699號
帳戶名稱:台灣總會T.K.C.
(Tiuⁿ Hông-chhiong)
漢羅（Ùi原文改寫）
對教會佮T.K.C.ê呼聲
(星中青年部：王英世寫)
1959年5月845期p.17
列位親愛同屬主ê兄姊，你毋知捌共想現時應召佇軍中teh服務á是訓練ê教會青年有偌濟á無？
現時平地佮山地教會攏總有707間。設使一間教會若平均有兩个就1414个，若有5个就3535个lah。按呢kiám毋是真通驚惶ê數字。遮个青年佇禮拜日á是歇睏ê時毋知去tó位？有真濟可取ê青年常常去做禮拜，出入佇教會。總是也有真濟因為地頭生疏無相捌，又閣時間傷濟，所以為著欲消磨遮个時間予無聊ê心得著一時得ê滿足，in就行電影館，lòng球間，á是茶店等等所在。列位這kiám毋是對咱教會真大ê威脅。七星中會青年部因為看過去教會無甚物關心佇這款ê工作，所以愛喚起各教會注意這个問題。佇台北福音職誼會有為著美國兵設招待所，內面有電唱機，圖書，乒乓桌，其他種種ê thit-thô物ê設備。卻咱袂通做到按呢，總是至少咱會通提供場所，機會予遮个人。有時有志招待in佇家庭予in有通接觸著家庭ê燒lō。也教會著積極的招呼in予in佇in ê時間會通容允ê範圍內參加教會ê聚會。特別T.K.C.著做中心來招待in佮in做朋友。我相信佇in本教會無甚物熱心ê青年也欲對按呢閣較認識佇主內面ê疼，毋若按呢，疼主ê心欲ná加添。
主耶穌叫咱「著疼厝邊親像家己，」又閣講，「恁既然行i佇我ê兄弟至微細ê ê一个，就是行佇我」（馬太25:40）。
列位親愛ê兄姊佮T.K.C. ê會員，你kiám無愛saⁿ-kap有份來做這个要緊ê工來保持佇軍中教會青年ê純潔來利益上帝ê國：
5角銀獻金收支報告書
3月份所獻ê
T.K.C. 金額 T.K.C. 金額
星中
二結 22.00 冬山 26.00
雙連 150.00
北中
艋舺 848.00 三重埔 57.00
枋橋 129.00 建成 50.00
竹中
中會 50.00
東中
信義 100.00 玉里 30.00
關山 20.00 台東 90.00
大里 30.00
中中
柳原 20.70 鹿港 20.00
牛眠 16.00
嘉中
朴子 150.00
南中
左鎮 24.00 玉井 21.00
西門 60.00
高中
舊城 12.00 鹽埕 120.00
仁武 37.50
合加 2083,20
3月咱所幫贊ê.
中會 教會 金額
七星 七堵 200.00
新竹 銅鑼 200.00
Hù-kong 100.00
東部 知本 200.00
台中 集集 200.00
Lō͘-siōng 100.00
嘉義 Koè-lō͘ 100.00
台南 土城 100.00
高雄 茄苳 150.00
永安 100.00
合計 1,450,00
郵局劃撥第5699號
帳戶名稱:台灣總會T.K.C.
(Tiuⁿ Hông-chhiong)