小題目，小故事

Sió tê-ba̍k, sió kò͘-sū

文獻資訊

項目	資料
作者	Tiong-ga̍k seng Tiong-ga̍k seng
卷期	台灣教會公報
卷期	第843號
日期	1959/3
頁數	25

白話字（原文數位化）

Sió tê-ba̍k, sió kò͘-sū

1959.03  tē 843 hō  p.25

(Tiong-ga̍k seng)

Sûn-kàu-chiá ê thài-thài.

1956 nî ê 2 goe̍h 20 ji̍t hoat-hêng ê Bí-kok toā cha̍p-chì  “Seng-oa̍h oē-pò”ū chhut kuí tiuⁿ siōng, teh soeh-bêng 5 ê soan-kàu-su khì Lâm Bí-chiu Ò-ka cho̍k (Augas) Ek-koa-tô kok thoân tō-lí.  Ò-ka cho̍k san-tē ê só͘-chāi iáu sī bô chhēng saⁿ, bô chhēng khò͘ ê iá-bân cho̍k, siông-siông ū thâi-lâng chò chè-sū ê cho̍k.

Gō͘ ê soan-kàu-su kàu chit ê só͘-chāi soà hō͘ hiah ê chheⁿ-hoan thâi-sí, hip tī siōng-nih ê chēng-hêng, sī hui-ki ê thàm-hiám-tuī só͘ hip ê, iā ū sin-si phû tī khe-nih, hō͘ lâng hoat-kiàn--tio̍h ê.

Kàu 1957 nî 8 goe̍h, bô phah-sǹg chiah ê soan-kàu-su ê chi̍t ê thài-thài kap eⁿ-á tú chhut-sì chi̍t nî goā ê, saⁿ-chhoā khì hiah ê chheⁿ-hoan ê só͘-chāi beh khì thoân-kàu.  Hiah ê siau-sit kap siōng koh chhut tī Sēng-oa̍h oē-pò-nih, lēng-goā iā ū siū thâi-sí ê chi̍t ê soan-kàu-su ê sió-moē iā koh khì hia thoân tō-lí, hit ê siōng kap siau-sit iā ū chhut tī Seng-oa̍h cha̍p-chì--ni̍h.

Kàu 1958 nî ê 12 goe̍h hō ū koh chhut in ê siōng tī Seng-oa̍h cha̍p-chì--nih.  Taⁿ hiah ê siōng ū chhut 3 tiuⁿ tī pún Pò, chhiáⁿ tho̍k-chiá iā khoàⁿ, iā siūⁿ, tuì hia lâi siū kà-sī kap kek-lē.

漢羅（Ùi原文改寫）

小題目，小故事

1959.03  第843號  p.25

(Tiong-ga̍k seng)

殉教者的太太

1956年的2月20日發行的美國大雜誌「生活畫報」。有出幾張像，teh說明5个宣教師去南美洲奧加族( Augas )厄瓜多國傳道理。奧加族山地的所在猶是無穿衫，無穿褲的野蠻族，常常有刣人做祭祀的族。

五个宣教師到這所在煞予遐的生番刣死，翕佇像--裡的情形，是飛機的探險隊所翕--的，也有身屍浮佇溪--裡，予人發見--著的。

到1957年8月，無拍算遮的宣教師的一个太太佮嬰仔拄出世一年外--的，相chhoā去遐的生番的所在欲去傳教。遐的消息佮像閣出佇生活畫報--裡，另外也有受刣死的一个宣教師的小妹也閣去遐傳道理，彼的像佮消息也有出佇生活畫報雜誌--裡。

到1958年的12月號有閣出in的像佇生活雜誌--裡。今遐的像有出3張佇本報，請讀者也看，也想，對遐來受教示佮激勵。