東海大學的現在
Tong-hái Toā-o̍h ê hiān-chāi
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第839號 |
| 日期 | 1958/11 |
| 頁數 | 15 |
白話字（原文數位化）
Tong-hái Toā-o̍h ê hiān-chāi
Pún-pò kì-chiá
1958年11月839期 15-16
Tong-hái Tāi-ha̍k sī hiān-sî lán chū-iû Tiong-kok só͘ ū ê chi̍t keng kàu-hoē toā-o̍h, che sī lán só͘ chai. Taⁿ put-kò Tong-gô͘ Tāi-ha̍k, Tām-kang Eng-choan í-ki̍p Tiong-le̍k ê Tiong-goân Lí Kang ha̍k-īⁿ khiok iā ū Ki-tok-kàu ê poē-kéng tī-teh. Ū ê Tāi-ha̍k khiok Ki-tok-kàu ê sek-chhái kap oa̍h-tāng bô joā sēng, chóng-sī ū ê khiok iā chám-jiân oa̍h-tāng. Put-kò chit goe̍h ji̍t lán só͘ ài koan-sim ê chiū-sī Tong-hái Tāi-ha̍k.
Chiàu chhin-chhiūⁿ lán Chóng-hoē gī-tiúⁿ ê kong-kò só͘ kóng (1) Sī lán chhut-thâu sin-chhéng lâi siat. (2) Sī lán ê Chóng-hoē soán-phài ê Táng-sū ū chham-ka.(3) Ū lán Chóng-hoē koat-gī beh ēng 11 goe̍h thâu chi̍t lé-pài chò Tong-hái Toā-o̍h ji̍t, thang uī in kî-tó kap hōng-hiàn.
Taⁿ Tong-hái Tāi-ha̍k hiān-sî chōng-hóng sī siáⁿ khoán?
Hāu-tiúⁿ sī Gô͘ Tek-iāu Phok-sū. I ē-hiáu kóng Bân-lâm oē hō͘ lán kám-kak ke chin hó chhin-kīn, lâng phok-ha̍k koh kèng-khiân, chiap-soà tē-it jīm Chan Iok-lông hāu-tiúⁿ pān-lí ha̍k-seng iā ū cheng-ka, thang hō͘ lâng hoaⁿ-hí kî-thāi in ê chiân-tô͘ ū bû-hān ê chìn-tián. Kin-nî sī khai-hāu tē 4 nî. Ha̍k-hāu ū 3 ê ha̍k-īⁿ, 140 goā ê kàu-chit-oân kap 800 goā ê ha̍k-seng. Ha̍k-seng thang kóng sī choân kok chiàm tī choè iu-siù ê pō͘-hūn, só͘-í beh chai-poê hō͘ in chìn-pō͘, in ê lêng-le̍k chu-chit sī bián án-choáⁿ khoà-lū.
Koh châi-chèng ê poē-kéng chin hong-hù, sī chiong í-chêng tī Tāi-lio̍k só͘ ū 13 keng Ki-tok-kàu tāi-ha̍k ê liân-ha̍p táng-sū-hoē ê ki-kim the̍h lâi chia teh ēng, só͘-í beh án-choáⁿ kiàn-siat, beh án-choáⁿ siat-pī si̍t-chāi sī bián án-choáⁿ khoà-lū. Hóng-kiam ha̍k-hāu-tē khoah (300 goā 畝), tē-tiám hó, hong-kéng suí, iā sī oh-tit tit-tio̍h ê hó khoân-kéng, thang thè lán ê kok-ka, siā-hoē chō-chiū hó jîn-châi.
Taⁿ chiah-ê í-goā , lán só͘ ài koan-sim ê ún-tàng sī in ê chong-kàu oa̍h-tāng, chit goe̍h-ji̍t tī Hù-khan “Eng-kong” nih ū chiong in ha̍k-hāu tong-kio̍k só͘ siá ê “Ki-tok-kàu oa̍h-tāng khài-hóng” chi̍t phiⁿ, í-ki̍p Ki-tok-tô͘ ha̍k-seng Thoân-khè ê tāi-piáu só͘ siá ê siau-sit khan-chài. Tī chia pit-chiá chiong hiah ê iàu-tiám tiah-lio̍k lâi kài-siāu, ǹg-bāng chèng tho̍k-chiá ke-thiⁿ liáu-kái kap koan-sim chiū-sī.
Tong-hái Toā-o̍h sui-jiân sī Ki-tok-kàu ê toā-o̍h, chóng-sī sian-siⁿ, ha̍k-seng pèng m̄-sī lóng-chóng Ki-tok-tô͘. Kàu-chit-oân tiong sī Ki-tok-tô͘ ê ū oá 7 siâⁿ, ha̍k-seng tiong Ki-tok-tô͘ chiū koh-khah chió, chiah ū 172 ê. Kî-ū iā ū Hu̍t-kàu-tô͘, iā ū Thian-chú-kàu tô͘, koh ū chin toā to-sò͘ ê bô chong-kàu sìn-gióng ê. Chóng-sī tāi-ke, thang kóng chin hô-gia̍p, cháiⁿ-iūⁿ ē án-ni, thang kóng sī Ki-tok-kàu hô-hia̍p khoan-iông kap jîn-ài ê cheng-sîn ê piáu-hiān.
Ha̍k-hāu ê chong-kàu chí-tō-chiá khui-o̍h ê tong-chho͘ sī Bo̍k Ì-jîn Bo̍k-su(Bí chek) lâi kiam. 1955 nî 10 goe̍h chhe khai hāu, 11 goe̍h tiong chiū khai-sí Tong Tāi thâu chi̍t chhù ê Chú-ji̍t lé-pài. Siāng-sî chiū ū kàu-chit-oân só͘ chó͘-chit ê Sèng-koa-tuī, chit ê Sèng-koa-tuī chū án-ni kè-sio̍k kàu kin-á-ji̍t, jî-chhiáⁿ lâng-sò͘ ke chin-chē, koh bat kàu goā-kháu khì ián-chhiùⁿ.
Bo̍k Ì-jîn Bo̍k-su iû-goân khoàⁿ ha̍k-seng ū iau-kiû, kā in pang-bâng chó͘-chit Ki-tok-tô͘ ha̍k-seng thoân-khè. āu lâi Chan Hāu-tiúⁿ tàu kó͘-bú chó͘-chit chong-kàu oa̍h-tāng uí-oân-hoē, thang chí-tō Ha̍k-seng thoân-khè, í-ki̍p Chú-ji̍t lé-pài. Kang-iú thoân-khè, Sèng-koa-tuī, Eng-gú cha-keng-pan; lēng-goā iā khai-sí lûn-liû tī kàu-chit-oân ka-têng khui ke-têng lé-pài, chhiáⁿ lāi-goā bêng-sū lâi chèng-tō, án-ni lâi chham-ka oa̍h-tāng ê ha̍k-seng siông-siông 1-20 ê.
Kàu tē jī nî, Ha̍k-seng thoân-khè ū koh ke-thiⁿ lâng-gia̍h kap kang-chok, só͘-í hun kàu 12 sió-cho͘, í-goā ū koh cheng-ka chi̍t ê Hū-lú kî-tó-hoē kap Hū-lú Eng-bûn cha-keng-pan, Tâi-gú pò͘-tō-hoē, Lú kang-iú thoân-khè, í-ki̍p Eng-gú lé-pài.
Tē 3 nî chhun-thiⁿ, Thoân-khè ū hoat-khan “Phû-tô-hn̂g,” chò in ê pò siau-sit , thoân sìn-sek ê lō͘-ēng, kè-sio̍k kàu hiān-chāi.
Lēng-goā ū koh ke-thiⁿ chin chē oa̍h-tāng, jî-chhiáⁿ í-keng ū choan-jīm ê ha̍k-hāu bo̍k-su Hân An-tek Bo̍k-su lâi thè tē jī jīm ê Jīm Sù-suī Bo̍k-su (lóng sī Bí che̍k). I sī tī Tiong-kok chhut-sì seng-tióng ê, Tiong-kok oē chin gâu kóng. Koh Tâi-oân ê sū-chêng chin se̍k, hiān-sî ha̍k-hāu ê lé-pài-tn̂g tit-tio̍h Bí-kok Seng-oa̍h cha̍p-chì-siā chú-chhî jîn kià-hù chîⁿ teh-beh kiàn-tio̍k lah. Só͘-í Tong-hái kàu-hoē í-keng sêng-li̍p, ū 140 goā ê hoē-oân, hiah kú chia̍p-la̍p 16 ê lâng kā in kiâⁿ sé-lé chìn-kàu.
Chiah-ê chêng-hêng í-goā thang chù-ba̍k ê, chiū-sī saⁿ nî lâi Tâi-lâm Sîn-ha̍k-īⁿ ha̍k-seng siông-siông ū it, jī-cha̍p ê (hiān-sî 12 ê) tī hia kià tha̍k. Chit hāng hō͘ lán ê Sîn-ha̍k-seng tī hia tit-tio̍h chin-chē hó ê kiàn-sek kap keng-giām, iā sū-si̍t-chiūⁿ tī ha̍k-seng saⁿ-kap kiû ha̍k ê tiong-kan , siông-siông chiâⁿ-chò chong-kàu oa̍h-tāng ê tiong-sim le̍k-liōng, koh ē thang tit-tio̍h Tong Tāi ha̍k-seng ê chhin-ài hap chù-tiōng.
Taⁿ kán-tan ê chêng-hêng sī án-ni, goān tho̍k-chiá ke-thiⁿ jīm-sek kap koan-sim chiū-sī.
漢羅（Ùi原文改寫）
東海大學的現在
本報記者
1958年11月839期 15-16
東海大學是現時咱自由中國所有的一間教會大學，這是咱所知。今不過東吳大學，淡水英專以及中壢的中原理工學院卻也有基督教的背景佇teh。有的大學卻基督教的色彩佮活動無joā盛，總是有的卻也嶄然活動。不過這月日咱所愛關心的就是東海大學。
照親像咱總會議長的公告所講(1)是咱出頭申請來設。(2)是咱的總會選派的董事有參加。(3)有咱總會決議欲用11月頭一禮拜做東海大學日，通為in祈禱佮奉獻。
今東海大學現時狀況是啥款？
校長是吳德耀博士。伊會曉講閩南話予咱感覺加真好親近，人博學閣敬虔，接續第一任曾約農校長辨理學生也有增加，通予人歡喜期待in 的前途有無限的進展。今年是開校第 4年。學校有3个學院，140外个教職員佮800外个學生。學生通講是全國佔佇最優秀的部分，所以欲栽培予in進步，in 的能力資質是免按怎掛慮。
閣財政的背景真豐富，是將以前佇大陸所有13 間基督教大學的聯合董事會的基金提來遮teh用，所以欲按怎建設，欲按怎設備實在是免按怎掛慮。Hóng- kiam學校地闊(300外畝)，地點好，風景媠，也是oh得得著的好環境，通替咱的國家，社會造就好人才。
今遮的以外，咱所愛關心的穩當是in 的宗教活動，這月日佇副刊「榮光」裡有將in學校當局所寫的 「基督教活動概況」一篇，以及基督徒學生團契的代表所寫的消息刊載。佇遮筆者將遐的要點摘錄來介紹，向望眾讀者加添了解佮關心就是。
東海大學雖然是基督教的大學，總是先生、學生並毋是攏總基督徒。教職員中是基督徒的有倚 7成，學生中基督徒就閣較少，才有172 个。其餘也有佛教徒，也有天主教徒，閣有真大多數的無宗教信仰的。總是大家，通講真和協，怎樣會按呢，通講是基督教和協寬容佮仁愛的精神的表現。
學校的宗教指導者開學的當初是牧意人牧師(美籍)來兼。1955年10月初開校，11月中就開始東大頭一次的主日禮拜。Siāng時就有教職員所組織的聖歌隊，這个聖歌隊自按呢繼續到今仔日，而且人數加真濟，閣捌到外口去演唱。
牧意人牧師猶原看學生有要求，共 in幫忙組織基督徒學生團契。後來曾校長鬥鼓舞組織宗教活動委員會，通指導學生團契，以及主日禮拜。工友團契、聖歌隊、英語查經班；另外也開始輪流佇教職員家庭開家庭禮拜，請內外名士來正道，按呢來參加活動的學生常常1-20 个。
到第二年，學生團契有閣加添人額佮工作，所以分到12小組，以外有閣增加一个婦女祈禱會佮婦女英文查經班、台語佈道會、女工友團契，以及英語禮拜。
第 3年春天，團契有發刊「葡萄園，」做in 的報消息，傳信式的路用，繼續到現在。
另外有閣加添真濟活動，而且已經有專任的學校牧師韓安德牧師來替第二任的任士瑞牧師(攏是美籍)。伊是佇中國出世生長的，中國話真gâu講。閣台灣的事情真熟，現時學校的禮拜堂得著美國生活雜誌社主持人寄付錢teh欲建築 lah。所以東海教會已經成立，有140外个會員，hiah久接納 16 个人共 in行洗禮進教。
遮个情形以外通注目的，就是三年來台南神學院學生常常有一、二十个 (現時12 个)佇遐寄讀。這項予咱的神-學生佇遐得著真濟好的見識佮經驗，也事實上佇學生saⁿ-kap求學的中間，常常成做宗教活動的中心力量，閣會通得著東大學生的親愛hap注重。
今簡單的情形是按呢，願讀者加添認識佮關心就是。