增補聖詩 50首介紹II
Cheng-pó͘ Sèng-si 50 siú kài-siāu II
文獻資訊
| 項目 | 資料 |
|---|---|
| 作者 | 明有德 Bêng Iú-tek |
| 卷期 | 台灣教會公報 |
| 卷期 | 第839號 |
| 日期 | 1958/11 |
| 頁數 | 17 |
白話字（原文數位化）
Cheng-pó͘ Sèng-si 50 siú kài-siāu II
Bêng Iú-tek
1958年11月839期 17-18
Saⁿ-cha̍p-it bīn tē 1 siú, “Goá nā tham-loân sè-kan hok-khì.” Chit siú si sī aⁿ Steele(1716-1778) só͘ siá ê. I chhut-sì tī Eng-kok ê Hampshire, lāu-pē sī bē bo̍k-chhâi ê lâng, iā sī bô niá sin-suí ê Chìm-lé kàu-hoē ê bo̍k-hoē-chiá. aⁿ tī sè-hàn ê sî-chūn chiū chin ài chò si, chin ài chiong só͘ siá ê si liām hō͘ chhù-nih ê lâng thiaⁿ. Tī i 44 hoè ê sî , ū lâng chiong i ê chok-phín phian choè chi̍t pún Sèng-si ū 144 siú, 34 siú sī tuì “ Si-phian” hoan-e̍k chhut-lâi ê, 30 siú si ka-kī choè ê phó-thong si. Tī aⁿ ê seng-gâi-tiong ū 3,4 hāng tāi-chì hō i chin kan-khó͘. Tē-it, chiū-sī sin-thé bô kiān-khong. Lēng-goā ū chi̍t koè sī in-uī tēng-hun āu i ê bī-hun-hu put-hēng siū-siong koè-sin, hō i chin thòng-sim. Tī ka-têng seng-oa̍h i iā kè-thâu bô-êng. In-uī án-ni, hō͘ i oá-khò Chú, i ê sìn-gióng jú kian-kò͘, khoàⁿ i só͘ siá ê si chiū thang chai i ê cheng-sîn kap sìn-gióng.
Chit ê si-tiāu ê chok-chiá sī Naegeli(1773-1836). I sī Tek-kok chhut-miâ ê im-ga̍k su-che̍k ê chhut-pán-chiá. In-uī i kap Bah-hah(Bach), Poè-to-hun (Beethoven) kāng sî-tāi , só͘-í siông-siông kài-siāu in ê im-ga̍k.
(Boē-oân).
漢羅（Ùi原文改寫）
增補聖詩 50首介紹II
明有德
1958年11月839期 17-18
三十一面第 1首，「我若貪婪世間福氣。」這首詩是aⁿ Steele(1716-1778)所寫的。伊出世佇英國的 Hampshire，老爸是賣木材的人，也是無領薪水的浸禮教會的牧會者。aⁿ佇細漢的時陣就真愛做詩，真愛將所寫的詩念予厝裡的人聽。佇伊44 歲的時，有人將伊的作品編做一本聖詩有144首，34首是對「詩篇」翻譯出來的，30首詩家己做的普通詩。佇aⁿ 的生涯中有3、4項代誌予伊真艱苦。第一，就是身體無健康。另外有一過是因為訂婚後伊的未婚夫不幸受傷過身，予伊真痛心。佇家庭生活伊也過頭無閒。因為按呢，予伊倚靠主，伊的信仰愈堅固，看伊所寫的詩就通知伊的精神佮信仰。
這个詩調的作者是Naegeli(1773-1836)。伊是德國出名的音樂書籍的出版者。因為伊佮巴哈(Bach)，貝多芬 (Beethoven)仝時代，所以常常介紹in 的音樂。
(未完)。