學習怎樣來活
Ha̍k-si̍p cháiⁿ-iūⁿ lâi oa̍h
文獻資訊
| 項目 | 資料 |
|---|---|
| 作者 | 周天來 Chiu Thian-lâi |
| 卷期 | 台灣教會公報 |
| 卷期 | 第838號 |
| 日期 | 1958/10 |
| 頁數 | 14 |
白話字（原文數位化）
Ha̍k-si̍p cháiⁿ-iūⁿ lâi oa̍h
Bí-kok cha̍p-chì “Moody” 5 goe̍h-hō só͘ chài
Chiu Thian-lâi e̍k
1958年10月838期 14-15
△ Chi̍t ê Ki-tok-tô͘, siat-sú i nā-sī sio̍k Sîn ê lâng, kín-bān oē ha̍k-si̍p lâi khoàⁿ-chhut Siōng-tè ê chhiú kàu tī it-chhè ê sū-kiāⁿ; iā it-chhè ê sū-kiāⁿ tī Siōng-tè ê chhiú-tiong.
△I ha̍k-si̍p kóng tī thong-ji̍t ê tiong-kan , ti̍t-chiap tāi-seng kap Siōng-tè tè kau-poê, chit khoán kò-jîn ê kî-tó kap hōng-sū sī chin iàu-kín , bô lâng oē thang thoè i choè, iā boē thang hō͘ pa̍t-hāng lâi thoè-oāⁿ.
△ I ha̍k-si̍p kóng i boē thang choè ta̍k-hāng sū, chóng-sī i tio̍h hoat-tián i ka-kī sio̍k lêng ê un-sù, koh tio̍h jīn-bêng tī kàu-hoē lāi uī Ki-tok tio̍h choè sím-mi̍h kang.
△ I ha̍k-si̍p kóng i boē thang chai tio̍h cháiⁿ-iūⁿ lâi kái-tap lóng-chóng ê gî-būn chí-ū chai uī-tio̍h ta̍k khoán ê kéng-gū kap būn-toê tio̍h chhē-kiû tuì téng-bīn lâi ê tì-huī.
△ I ha̍k-si̍p kóng m̄-thang khoàⁿ-tāng ka-kī siuⁿ kè-thâu. I sī khoài chhò-gō͘, ū sî iā sī gû-gōng, chhin-chhiūⁿ chhia-lûn se̍h tò-tńg ê lâng, oē hiáu kóng “Goá hoân-ló, goá ū sit-chhò”ê lâng ū hok-khì.
△ I ha̍k-si̍p kóng lán ê lâng-khoán sī chiàu lâng tuì lán só͘ kóng ê phêng-kè joā tāng lâi koat-tēng; só͘-í lán ê kiàn-chèng ê hāu-kó sī kan-ta kap lán ê kiâⁿ-ta̍h ê hāu-kó pîⁿ-pîⁿ nā-tiāⁿ.
△ I ha̍k-si̍p kóng Sin-iok ê kàu-hoē m̄-sī khoàⁿ boē tio̍h , bong boē tio̍h ê chi̍t hāng mi̍h; sī tuì ū niá soé-lé ê sìn-tô͘, ū chó͘-chit, ū kio̍k-pō͘-tek ê chū-chi̍p teh kèng-pài Siōng-tè , êng-kng Siōng-tè; koh chiah ê lâng sī ū saⁿ koàn-kò͘ koh sī ū lêng-chiàn tek-sèng kui Ki-tok ê lâng.
△ I ha̍k-si̍p kóng Ki-tok-tô͘ iáu-bē kàu thian-kok, iáu sī ū put-hô, hun-cheng ê sū; hit ê sī chhin-chhiūⁿ chi̍t ê sûn-lé-chiá ū kak-gō͘ ji̍p koá thô-soa tī i ê phê-oê--nih.
△ I ha̍k-si̍p kóng sio̍k lêng ê sū bô pit-iàu chin tek-ì hián-chhut i ê khiân-sêng hō͘ lâng khoàⁿ. Kî-si̍t lêng-sèng jú tióng-toā, jú chió khoa-kháu hō͘ lâng khoàⁿ. Kèng-khiân ê goā-māu phó͘-thong sī chi̍t ê chhián-po̍h ê piáu-sī; phe-phêng khah siông sī sio̍k tī ké-hó ê.
△ I ha̍k-si̍p kóng lán tiong-kan bô lâng uī ka-kī lâi oa̍h, ko͘-li̍p ê thài-tō͘ sī phò-bia̍t. Ko͘-to̍k sī pun-lī. Hia̍p-tông sī cheng-ka, hoat-tián.
△ I ha̍k-si̍p chhú-lí i ê būn-toê sī tī chi̍t kha-pō͘,tī chi̍t ê sî, chi̍t ê khoàⁿ-hoat. Toā-soaⁿ khó-lêng phò-hoāi pìⁿ choè soaⁿ-lûn-á, chāi Siōng-tè sī bô būn-toê.
△I ha̍k-si̍p tio̍h tāi-seng kî-tó chhiⁿ-kông sī sit-pāi, in-uī Siōng-tè oē sêng-choân chi̍t hāng sū.
△I ha̍k-si̍p kóng Ki-tok sī choân só͘-iú, m̄-sī kan-ta chhiong-chiok nā-tiāⁿ, sī kàu-gia̍h ū chhun.
漢羅（Ùi原文改寫）
學習怎樣來活
美國雜誌「Moody」5月號所載
周天來 譯
1958年10月838期 14-15
△一个基督徒，設使伊若是屬神的人，緊慢會學習來看出上帝的手到佇一切的事件；也一切的事件佇上帝的手中。
△伊學習講佇通日的中間，直接代先佮上帝交陪，這款個人的祈禱佮奉事是真要緊，無人會通替伊做，也袂通予別項來替換。
△伊學習講伊袂通做逐項事，總是伊著發展伊家己屬靈的恩賜，閣著認明佇教會內為基督著做甚物工。
△伊學習講伊袂通知著怎樣來解答攏總的疑問，只有知為著逐款的境遇佮問題著chhē求對頂面來的智慧。
△伊學習講毋通看重家己傷過頭。伊是快錯誤，有時也是愚戇，親像車輪踅倒轉的人，會曉講「我煩惱，我有失錯」的人有福氣。
△伊學習講咱的人款是照人對咱所講的評價 joā重來決定；所以咱的見證的效果是kan-ta佮咱的行踏的效果平平nā-tiāⁿ。
△伊學習講新約的教會毋是看袂著，摸袂著的一項物；是對有領洗禮的信徒，有組織，有kio̍k-pō͘-tek 的聚集teh敬拜上帝，榮光上帝；閣遮个人是有相眷顧閣是有lêng-chiàn得勝規基督的人。
△伊學習講基督徒猶未到天國，猶是有不和，紛爭的事；彼个是親像一个殉禮者有覺悟入寡 thô沙佇伊的皮鞋裡。
△伊學習講屬靈的事無必要真得意顯出伊的虔誠予人看。其實靈性愈長大，愈少誇口予人看。敬虔的外貌普通是一个淺薄的表示；批評較常是屬佇假好的。
△伊學習講咱中間無人為家己來活，孤立的態度是破滅。孤獨是分離。協同是增加，發展。
△伊學習處理伊的問題是佇一跤步，佇一个時，一个看法。大山可能破壞變做山崙仔，在上帝是無問題。
△伊學習著代先祈禱青狂是失敗，因為上帝會成全一項事。
△伊學習講基督是全所有，毋是kan-ta充足nā-tiāⁿ，是夠額有chhun。