S.C.M的批
S.C.M. ê phoe
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第837號 |
| 日期 | 1958/9 |
| 頁數 | 14 |
白話字（原文數位化）
S.C.M. ê phoe
1958年9月837期 14-15
Chú-lāi só͘ kèng-thiàⁿ ê bo̍k-su tióng-chip pêng-an!
Goán ēng chin sêng ê sim tāi-piáu Sèng-keng tāi-ha̍k ê S.C.M. choân-thé hoē-oân tuì lín piáu-sī kèng-ì, goān Chú chiok-hok lín tāi-ke.
Chú Iâ-so͘ tuì lán kóng, “ Khì phó͘ thiⁿ-ē thoân hok-im,” in-uī chiâⁿ chheng chiâⁿ bān ê lâng khat-bōng (ǹg-bāng) hok-im ê lūn-tek. Chit ê su-iàu tī kim-ji̍t ê tāi-choan ha̍k-hāu koh-khah pek-chhiat. uī-tio̍h hō͘ Ki-tok-tô͘ ha̍k-seng tī kiû ha̍k tiong iā siông-siông ū chū-chi̍p ê ki-hoē, oē tit hō͘-siōng kó͘-lē, kian-kò͘ sìn-gióng , koh chìn chi̍t pō͘ thoân hok-im tī tông-ha̍k ê tiong-kan, só͘-í sè-kài kok toē chiah ū S.C.M.(Student Christian Movement), chiū-sī ha̍k-seng Ki-tok-kàu ê chó͘-chit. Goán Sêng-Tāi S.C.M. tī Tâi-lâm Sîn-ha̍k-īⁿ īⁿ-tiúⁿ léng-tō ê ē-bīn, í-keng siong-tong chhiong-si̍t, kian-kiông. Tān-sī goán koh-khah su-iàu lín siông-siông kā goán chí-tō, thè goán kî-tó.
Sêng Tāi S.C.M. ê ki-pún hoē-oân sī kok toē kàu-hoē tī Sêng-Tāi chiū-sī kok toē kàu-hoē tī Sêng-Tāi chiū-ha̍k ê hiaⁿ-tī chí-moē. Kin-nî ê Tāi-choan liân-ha̍p khó-chhì bô kú oē hoat-pńg, kuì kàu-hoē ê chin choē hiaⁿ-tī chí-moē teh-beh lâi kàu pún-hāu , goán lóng chin hoaⁿ-hí teh thèng-hāu kap hoan-gêng. Káu ge̍h chhe teh-beh hoat-pńg, hit sî ǹg-bāng lín thoè goán tiâu-cha. (1) Kuì kàu-hoē chheng-liân khó ji̍p pún-hāu ê miâ-toaⁿ. (2) Miâ-toaⁿ lāi chhiáⁿ chù-bêng ta̍k-lâng ê īⁿ-hek koh chhiáⁿ chiong chiah-ê miâ-toaⁿ kià kàu 宜蘭縣蘇澳鎮港路92號 林豐仁, hō͘ goá thang chéng-lí kap liân-lo̍k. Goān chit hāng kong-chok tit-tio̍h Chú ê hoaⁿ-hí.
Choè āu ǹg chu-uī kám-siā bô soah.
Í-má-loē-lī.
Sêng-kong Tāi-ha̍k S.C.M. Uí-oân-hoē kèng-siōng.
漢羅（Ùi原文改寫）
S.C.M. 的批
1958年9月837期 14-15
主內所敬疼的牧師長執平安！
阮用真誠的心代表聖經大學的 S.C.M.全體會員對恁表示敬意，願主祝福恁大家。
主耶穌對咱講，「去普天下傳福音，」因為成千成萬的人渴望(向望)福音的論的。這个需要佇今日的 大專學校閣較迫切。為著予基督徒學生佇求學中也常常有聚集的機會，會得互相鼓勵，堅固信仰，閣進一步傳福音佇同學的中間，所以世界各地才有S.C.M.(Student Christian Movement)，就是學生基督教的組織。阮成大 S.C.M.佇台南神學院院長領導的下面，已經相當充實，堅強。但是阮閣較需要恁常常共阮指導，替阮祈禱。
成大 S.C.M.的基本會員是kok地教會佇成大就是各地教會佇成大就學 的兄弟姊妹的。今年的 大專聯合考試無久會發榜，貴教會的真濟兄弟姊妹 teh欲來到本校 ，阮攏真歡喜teh聽候佮歡迎。九月初 teh欲發榜，彼時向望恁替阮調查。(1) 貴教會青年考入本校的名單。(2)名單內請註明逐人的院hek，閣請將遮个名單寄到宜蘭縣蘇澳鎮港路92號 林豐仁，予我通整理佮連絡。願這項工作得著主的歡喜。
做後向位感謝無煞。
以馬內利。
成功大學S.C.M.委員會敬上。