管家是甚物？
Koán-ke sī sím-mi̍h?
文獻資訊
| 項目 | 資料 |
|---|---|
| 作者 | 江萬里 Kang Bān-lí |
| 卷期 | 台灣教會公報 |
| 卷期 | 第835號 |
| 日期 | 1958/7 |
| 頁數 | 11 |
白話字（原文數位化）
“Koán-ke” sī sím-mi̍h?
What is a steward?
Kang Bān-lí
1958年7月835期 11
Phian-chiá chù: Sìn-tô͘ ê pún-hūn sī tio̍h kî-tó, tha̍k Sèng-keng, thoân tō-lí, che lán lóng chai, iā thang kóng chē-chē lâng lóng ū teh chò. Chóng-sī iáu chit hāng: tio̍h hōng-hiàn, kiám-chhái chiū bô hiah-nih phó͘-piàn teh si-hêng. Kang Bān-lí Tiúⁿ-ló chiū-jīm Châi-bū kàn-sū liáu-āu, tuì kàu-hoē châi-chèng ū chē-chē khó͘-sīm, put-kò i iā ū chē-chē hó ì-kiàn. Taⁿ chhú-khì ū ài chiap-soà chiong i ê ì-kiàn kap kang-chok chêng-hêng pò tī chia. Chhiáⁿ tho̍k-chiá chù-ì tha̍k chiū-sī.
Chit jī Eng-bûn “Steward” tī Sèng-keng sī hoan-e̍k choè “Koán-ke,” nā sī chiàu jī lâi siá sī 家宰或管事. Chóng-sī iáu boē thang cha̍p-hun piáu-bêng hit ê steward ê ki-pún ì-gī. Eng-bûn ê jī-tián ê tēng-gī sī kóng, (a steward is a person entrusted with the management of astates or affairs not his own). Koán-ke sī chi̍t ê lâng siū thok lâi koán-lí pa̍t-lâng ê só͘-iú châi-sán he̍k-sī sū-gia̍p. Tuì chit kù ê tēng-gī lán thang kóng, “ Koán-ke “ put-kò sī chi̍t ê koán-lí ê lâng jî-í, só͘-í choè-chió tio̍h ū pau-hâm chit kuí hāng ê chek-jīm.
Tē 1 ê chek-jīm sī tio̍h chiàu-kò͘ kap koán-lí só͘ siū kau-thok ê, koh ia̍h tio̍h èng-iōng lâi hō͘ chú-lâng ū thang tit-tio̍h siu-ek sī èng-kai ê sū. Iâ-hô-hoa Siōng-tè , chiong hit ê lâng hē teh Ai-tiân hn̂g lāi, m̄-nā sī beh kò͘-siú, ia̍h sī beh chèng-choh thang tit-tio̍h siu-sêng (Chhòng-sè-kì 3:15).
Tē 2 ê chek-jīm, sī tio̍h èng-iōng choân-pō͘ só͘ siū kau-thok ê thang hō͘ chú-lâng thang tit-tio̍h choân-pō͘ ê lī-ek, sī chú-lâng èng-kai tit-tio̍h ê hūn-gia̍h, in-uī nā chi̍t pō͘-hūn bô èng-iōng chiū hit pō͘-hūn boē seⁿ lī, chú-lâng chiū kiám siu-ji̍p, chiū-sī koán-ke ê bô chīn-tiong.
Lán ê Chú Iâ-so͘ ia̍h sī án-ni kà-sī, tī Má-thài 25:24-30, “Niá chi̍t chheng ê ia̍h lâi……só͘-í goá kiaⁿ , chiū chiong lí chi̍t chheng gûn khì tâi tī toē-nih, taⁿ lí ê goân-mi̍h hêng lí……ia̍h hit ê bô lī-ek ê lô͘-po̍k koáⁿ i tī goā-bīn.” Tuì chit ê phì-jū, chit ê niá chi̍t chheng ê lô͘-po̍k sī ū pó-siú, chiàu-kò͘ só͘ kau-thok i ê, kiaⁿ-liáu phah bô-khì, só͘-í khì tâi tī toē-nih, ia̍h ū chiàu goân-mi̍h hêng i ê chú-lâng tit-tio̍h lī-ek, só͘-í sī chi̍t ê bô lī-ek ê koán-ke, nā bô chóng èng-iōng lóng-chóng siū kau-thok thang hō͘ chú-lâng tit-tio̍h lī-ek. Hiān-sî ū chi̍t kù ê oē chin liû-hêng, chiū-sī kóng ū chîⁿ ê chhut chîⁿ, ū la̍t ê chhut la̍t. Ì-sù chiū-sī ū chhut chîⁿ ê lâng chiū m̄-bián chhut la̍t. Chit ê sī m̄-tio̍h, tio̍h ài èng-iōng choân-pō͘ chiah sī chīn-tiong ê koán-ke.
(Bī-oân).
漢羅（Ùi原文改寫）
「管家」是甚物？
What is a steward？
江萬里
1958年7月835期 11
編者註：信徒的本份是著祈禱，讀聖經，傳道理，這咱攏知，也通講濟濟人攏有teh做。總是猶這項：著奉獻，kiám-chhái就無遐爾普遍 teh施行。江萬里長老就任財務幹事了後，對教會財政有濟濟苦心，不過伊也有濟濟好意見。今此去有愛接續將伊的意見佮工作情形報佇遮。請讀者注意讀就是。
這字英文「Steward」佇聖經是翻譯做「管家，」若是照字來寫是家宰或管事。總是猶袂通十分表明彼个steward 的基本意義。英文的字典的定義是講，(a steward is a person entrusted with the management of astates or affairs not his own)。管家是一个人受託來管理別人的所有財產或是事業。對這句的定義咱通講，「管家」不過是一个管理的人而已，所以最少著有包含這幾項的責任。
第 1个責任是著照顧佮管理所受交託的，閣亦著應用來予主人有通得著收益是應該的事。耶和華上帝，將彼个人hē teh伊甸園內，毋但是欲顧守，也是欲種作通得著收成(創世記3：15)。
第2个責任，是著應用全部所受交託的窗予主人通得著全部的利益，是主人應該得著的份額，因為若一部分無應用就彼部分袂生利，主人就減收入，就是管家的無盡忠。
咱的主耶穌也是按呢教示，佇馬太25：24-30，「領一千的也來……所以我驚，就將你一千銀去tâi佇地裡，今你的原物還你……iā彼个無利益的奴僕趕伊佇外面。」對這个譬喻，這个領一千的奴僕是有保守，照顧所交託伊的，驚了拍無去，所以去tâi佇地裡，也有照原物還伊的主人得著利益，所以是一个無利益的管家，若無總應用攏總受交託通予主人得著利益。現時有一句的話真流行，就是講有錢的出錢，有力的出力。意思就是有出錢的人就毋免出力。這个是毋著，著愛應用全部才是盡忠的管家。
(未完)。