玉山聖經書院概況
Gio̍k-san Sèng-keng Su-īⁿ khài-hóng
文獻資訊
| 項目 | 資料 |
|---|---|
| 作者 | 張雲錦 Tiuⁿ Hûn-gím |
| 卷期 | 台灣教會公報 |
| 卷期 | 第835號 |
| 日期 | 1958/7 |
| 頁數 | 16 |
白話字（原文數位化）
Gio̍k-san Sèng-keng Su-īⁿ khài-hóng
Tiuⁿ Hûn-gím
1958年7月835期 16-17
Tâi-oân kong-ho̍k liáu-āu, san-tē ê lâng siū kái-hòng sìn-gióng chū-iû, koh Sun Ngá-kok Bo̍k-su tuì Bí-kok koh-chài lâi hē la̍t san-tē ê thoân-tō, chiū tit-tio̍h kiaⁿ lâng ê sêng-kó. Sun Bo̍k-su pìn-chhéng Ka-ná-tāi Bú-hoē pang-chān keng-êng Sèng-keng su-īⁿ, tit-tio̍h ún-chún liáu-āu, chiū phèng-chhiáⁿ Un En̂g-chhun Bo̍k-su choè chhoo-tāi ê ĪN-tiúⁿ. (Hit tiong-kan ê chêng-hêng chêng goe̍h hō Lîm Bo̍k-su ū pò siông-sè, pún-phiⁿ beh séng-lio̍k.) Un En̂g-chhun Bo̍k-su ū kám-kak sù-bēng beh bo̍k-hoē, chiū sî ha̍k-hāu ê kang-chok, San-tē Soan-tō-chhù chiū bu̍t-sek N̂g Ka-sēng Bo̍k-su choè chhoo-tāi ê ĪN-tiúⁿ.(Hit tiong-kan ê chêng-hêng chêng goe̍h hō Lîm Bo̍k-su ū pò siông-sè, pún-phiⁿ beh séng-lio̍k). Un En̂g-chhun Bo̍k-su ū kám-kak sù-bēng beh bo̍k-hoē, chiū sî ha̍k-hāu ê kang-chok, San-tē Soan-tō-chhù chiū bu̍t-sek N̂g Ka-sēng Bo̍k-su choè tē-jī jīm ê hāu-tiúⁿ.
N̂g Bo̍k-su uī-tio̍h ha̍k-hāu ê chiong-lâi ū sin-khó͘, só͘ poê-iúⁿ ê ha̍k-seng chi̍t-nî chit-nî ke-thiⁿ, soà chiâⁿ-choè San-tē Soan-tō-chhù koè-kè siōng ê tāng-tàⁿ, kiám-chhái choē-choē pit-gia̍p seng ê tiong-kan ū chió-sò͘ phāu i-nāi ê sèng-chit, iau-kiû sin-hōng ê tiau-chéng, iā sî-siông thò͘-lō͘ put-pêng ê oē, koh hit-sî goā kàu-phài lio̍h-sio̍k lâi Tâi-oân, boē-bián ū choē-choē iú-he̍k. Soan-tō-chhù chìn-thè lióng-lân,tī iú-hān ê keng-chè ê tiong-kan,tio̍h chhái-chhú khoàⁿ sī beh ka-kiông thoân-tō-chiá ê tīn-iông, tiau-chéng sin-hōng khah iàu-kín? á-sī ka-kiông ha̍k-hāu lâi thêng-chí hoat sin-hōng hō͘ chiah-ê í-keng tī kàu-hoē choè kang ê kang-lâng? Chiàu hit-sî ê si̍t-chè su-iàu, tāi-khài chhái-chhú koan-bōng ê thài-tō͘, î-chhî í-keng ióng-sêng chhut ê thoân-tō-chiá, lâi chiām-thêng khai-pān ha̍k-hāu. Tī chit ê sî-tāi, ha̍k-hāu ê miâ-chheng siū tong-kio̍k chí-sī kái-chheng choè Gio̍k-san Sèng-keng Su-īⁿ.
N̂g Bo̍k-su hū-chek-jîn, chhin-chhiūⁿ ióng-sêng ê ha̍k-seng, koh í-ki̍p sin chio ê chāi-hāu-seng chāi-lāi, m̄-kam chiū án-ni pàng-hē. Ha̍k-hāu ê kiàn-tio̍k-bu̍t só͘ sio̍k Kang-khòng Kong-si, chó͘-kim tui-thó hū-chè luī--luī, kâm ba̍k-sái chiong chhù-the̍h hêng hō͘ só͘ sio̍k ki-koan, tī ū lō͘ bô chhù ê tiong-kan, N̂g Ka-sēng Bo̍k-su siū phèng choè Tâi-oân Sîn-ha̍k-īⁿ ê kàu-siū, chhun Phîⁿ Bûn-hiān Kàu-bū Chú-jīm kap nn̄g uī ê chit-oân. Ha̍k-seng hit-sî sī 25 ê.
Chit ê sî-chūn Sun Ngá-kok Bo̍k-su-niû choè toā sū-gia̍p piàn-moá choân-séng, chiū-sī ko͘-jî-īⁿ, pó-bó ióng-sêng, hì-pīⁿ chín-só͘. Pún-hāu Táng-sū-tiúⁿ Ô͘ Bûn-tî Bo̍k-su , khoàⁿ-kìⁿ Sun Bo̍k-su-niû tī Tâi-tang koān Koan-san cho͘-iōng chi̍t keng chhù put-chí khoah, hit ê lāi-bīn ū khai-sí tī-liâu hoān-chiá, iā ū pīⁿ-sek, koh ū pó-bó ê hùn-liān-pan. Lāi-bīn iáu ū kuí-nā keng, thang lī-iōng, chiū kau-sia̍p khoàⁿ oē hō͘ ha̍k-hāu ēng á boē. Í-keng tit-tio̍h ún-chún, chiū suî-sî soá khì hia. Phîⁿ Bûn-hiān Sian-siⁿ choè tāi-lí hāu-tiúⁿ. Tī Koan-san iok-lio̍k 7 goe̍h ji̍t kú, sī 1957 nî ê sū.
Phîⁿ Bûn-hiān Sian-siⁿ uī-tio̍h to͘-ha̍p siōng sî khì tāi-lí hāu-tiúⁿ ê chit-bū, siū phèng choè Tek-pak Tiúⁿ-ló-hoē Sèng-keng Su-īⁿ ê sian-siⁿ. Soan-tō-chhù phèng Ko Chùn-bêng Bo̍k-su choè ĪN-tiúⁿ. Tuì 1957 nî 10 ge̍h khai-sí, Sun Ngá-kok Bo̍k-su-niû ū kóng, ū chi̍t pit ê chîⁿ hoaⁿ-hí pang-chān Sèng-keng Su-īⁿ ê ha̍k-seng choè hù-si̍t. Nā-sī keng-siông huì, muí ge̍h poah 3000 kho͘, sī tuì San-tē Soan-tō-chhù chi-chhut. Sun Bo̍k-su-niû tī Hoa-liân kīn-kau ū thoè Khèng-hong kàu-hoē siu-lí chi̍t keng sió-chhù, àn-sǹg beh chio-seng khioh pó-bó káng-si̍p-pan. Chi̍t hong-bīn tī Koan-san só͘ cho͘-iōng ê chhù í-keng kàu nî-hān, bô hêng boē ēng-tit. Ha̍k-hāu í-keng bô só͘-chāi thang khì, hit ê sî-chūn Sun Bo̍k-su-niû hoaⁿ-hí chiong Hoa-liân Khèng-hong kàu-hoē i ê sió-chhù hō͘ ha̍k-hāu. Kî-kan sī kàu 1958 nî 11 ge̍h. Sun Bo̍k-su-niû uī-tio̍h ha̍k-seng só͘ khai-chhut ê sò͘-jī boē chió. Tuì 1957 nî 10 ge̍h í-lâi, ēng choè ha̍k-seng ê hù-si̍t iok 45,000,00. Siu-lí chhù 23,000,00.
1957 nî 10 ge̍h , ū kè-sio̍k í-chêng ê pún-kho ha̍k-seng 25 miâ, í-goā ū khioh 4 ge̍h ji̍t té-kî hùn-liān-pan, thâu chi̍t kî 21 miâ, lóng-chóng sī Bunun cho̍k.(Kàu-hoē-pò 827 hō, 11 ge̍h hūn tē 25 bīn). Tē 2 kî 28 miâ, tuì choân-séng lâi, ū 4 ê cho̍k(Kàu-hoē-pò 832 hō, 4 ge̍h 21 bīn). Thâu chi̍t pan í-keng phài khì kok kàu-hoē choè kang. Tē 2 kî iā bô kú oē pit-gia̍p. In sī iu-siù ê chì-goān soan-tō-su, ū si̍t-chāi bo̍k-hoē keng-giām, bat tú-tio̍h khùn-lân. Lâi tha̍k iā chin jīn-chin. Chit khoán ê ha̍k-seng tio̍h kè-sio̍k khioh khí-lâi hùn-liān, oē thang lī-ek lán ê kàu-hoē chin choē. (Boē-oân).
漢羅（Ùi原文改寫）
玉山聖經書院概況
張雲錦
1958年7月835期 16-17
台灣光復了後，山地的人受解放信仰自由，閣孫雅各牧師對美國閣再來hē力山地的傳道，就得著驚人的成果。孫牧師稟請加拿大母會幫贊經營聖經書院，得著允准了後，就聘請溫榮春牧師做初代的院長。(彼中間的情形前月號林牧師有報詳細，本篇欲省略。) 溫榮春牧師有感覺使命欲牧會，就辭學校的工作，山地宣道處就物色黃嘉盛牧師做初代的院長。(彼中間的情形前月號林牧師有報詳細，本篇欲省略)。溫榮春牧師有感覺使命欲牧會，就時學校的工作，山地宣道處就物色黃嘉盛牧師做第二任的校長。
黃牧師為著學校的將來有辛苦，所培養的學生一年這年加添，紲成做山地宣道處會計上的重擔，kiám-chhái濟濟畢業生的中間有少數報依賴的性質，要求薪俸的調整，也時常透露不平的話，閣彼時外教派陸續來台灣，袂免有濟濟誘惑。宣道處進退兩難，佇有限的經濟的中間，著採取看是欲加強傳道者的陣容，t調整薪俸較要緊？抑是加強學校來停止發薪俸予遮个已經佇教會做工的工人？照彼時的實際需要，大概採取觀望的態度，維持已經養成出的傳道者，來暫停開辦學校。佇這个時代，學校的名稱受當局指示改稱做玉山聖經書院。
黃牧師負責人，親像養成的學生，閣以及新招的在校生在內，毋甘就按呢放下。學校的建築物所屬工礦公司，chó͘金追討負債累累，kâm目屎將厝宅還予所屬機關，佇有路無厝的中間，黃嘉盛牧師受聘做台灣神學院的教授，chhun 彭 文現教務主任佮兩位的職員。學生彼時是25 个。
這个時陣孫雅各牧師娘最大事業遍滿全省，就是孤兒院，褓姆養成，肺病診所。本校董事長胡文池牧師，看見孫牧師娘佇台東縣 關山租用一間厝不止闊，彼个內面有開始治療患者，也有病室內，閣有褓姆的訓練班。內面猶有幾若 間，通利用，就交涉看會予學校用抑袂。已經得著允准，就隨時徙去遐。彭文現先生做代理校長。佇關山約略7月日久，是1957年的事。
彭文現先生為著都合上辭去代理校長的職務，受聘做Tek-pak長老會聖經書院的先生。宣道處聘高俊明牧師做院長。對1957年10月開始，孫雅各牧師娘有講，有一筆的錢歡喜幫贊聖經書院的學生做hù-si̍t。若是經常費，每月poah 3000箍，是對山地宣道處支出。孫牧師娘佇花蓮近郊區有替慶豐教會修理一間小厝，按算欲招生khioh褓姆講習慣班。一方面佇關山所租用的厝已經到年限，無還袂用得。學校已經無所在通去，彼个時陣孫牧師娘歡喜將花蓮慶豐教會伊的小厝予學校。期間是到1958年11月。孫牧師娘為著學生所開出的數字袂少。對1957年10月以來，用做學生的 hù-si̍t約45,000.00。修理厝23,000.00。
1957年10月，有繼續以前的本科學生25名，以外有khioh 4月日短期訓練班，頭一期 21名，攏總是Bunun族。(教會報827號，11月份第 25面)。第 2 kî 28名，對全省來，有4个族(教會報832號，4月21面)。頭一班已經派去各教會做工。第 2 期也無久會畢業。In是優秀的志願宣道師，有實在牧會經驗，捌拄著困難。來讀也真認真。這款的學生著繼續khioh起來訓練，會通利益咱的教會真濟。(未完)。