六月第3禮拜
La̍k goe̍h tē 3 lé-pài
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第834號 |
| 日期 | 1958/6 |
| 頁數 | 3 |
白話字（原文數位化）
La̍k goe̍h tē 3 lé-pài
1958年6月834期 3
1865 nî ê 6 goe̍h 16 ji̍t sī Tâi-oân Tiúⁿ-ló Kàu-hoē chhut-sì ê ji̍t, kàu taⁿ í-keng 93 nî lah.
Goân Lâm-pō͘ Tāi-hoē siat-tēng 6 goe̍h 16 ji̍t chêng-āu ê Chú-ji̍t chò siat kàu kì-liām ê lé-pài-ji̍t, kàu kong-ho̍k āu san-tē thoân-tō ê mn̂g-hō͘ khai-hòng liáu-āu, Tāi-hoē koh chiong siat kàu kì-liām-ji̍t ê lé-pài hiàn-kim thê-kióng chò san-tê soan-tō ê lō͘-ēng. Taⁿ Lâm-pō͘ Tāi-hoē ha̍p-pēng tī Chóng-hoē, koh Chóng-hoē kè-sêng Lâm Tāi só͘ chè-tēng ê siat kàu kì-liām-ji̍t, kap uī san-tē soan-tō hōng-hiàn ê hong-sek, ēng pún goe̍h tē 3 Chú-ji̍t lâi chò san-tē soan-tō kì-liām Chú-ji̍t, thang uī-tio̍h san-tē kang-chok kî-tó kap hōng-hiàn.
Chóng-sī uī san-tē kang-chok lâi kî-tó kap hōng-hiàn, iáu-kú san-tē soan-tō ê hiān-chōng sī siáⁿ khoán? ún-tàng chē-chē lâng ài chai.
San-tē Soan-tō chhù kap pún Pò, uī-tio̍h ài hō͘ choân kàu-hoē bêng-liâu san-tē kang-chok ê hiān-chōng, ū chiong pún-hō chò san-tē soan-tō ê te̍k-chhip, bo̍k-tek sī ài chèng tho̍k-chiá ke-thiⁿ jīn(jīm)-sek kap koan-sim. Taⁿ san-tē kàu-hoē í-keng ū 335 keng, í-keng chhiau-kè pîⁿ-tē kàu-hoē sò͘-bo̍k(320). Lán pêⁿ-tē kàu-hoē tuì in bat chīn to-siáu ê le̍k-liōng. Chóng-sī nā khoàⁿ in ê seng-oa̍h ê chōng-hóng, in ê kàu-hoē ê khoeh-khiàm, thoân-kàu siōng ê chióng-chióng ê chó͘-gāi, í-ki̍p in ê chū-kiông to̍k-li̍p ê hùn-tò͘; koh khoàⁿ goā-kok tuì in ê koan-sim kap hia̍p-chō͘, lán iáu-kú ē kám-kak ū chin chē bô chīn pún-hūn ê só͘-chāi.
Taⁿ san-tē kàu-hoē ê hiān-chōng chiū-sī án-ni, “Chhiáⁿ koè-lâi pang-chān goán” iáu-sī in só͘ teh hoat-chhut ê siaⁿ. Nā-sī lán uī-tio̍h in iáu ū chò bô kàu ê kang, chhiáⁿ lán tio̍h koh chò; koh uī-tio̍h in nā iáu ū boē chīn ê hōng-hiàn, chhiáⁿ lán koh hùn-hoat khoàⁿ-bāi.
ǹg-bāng án-ni thang uī-tio̍h Ki-tok ê seng-khu, chiū-sī kàu-hoē……lâi pó͘-moá I só͘ boē ū chīn ê hoān-lān, sī só͘ chhiat-bōng ê só͘-chāi.
漢羅（Ùi原文改寫）
六月第 3禮拜
1958年6月834期 3
1865年的 6月16日是台灣長老教會出世的日，到今已經93年lah。
原南部大會設定 6月16日前後的主日做設教記念的禮拜日，到光復後山地傳道的門戶開放了後，大會閣將設教紀念日的禮拜獻金提供做山地的 宣道的路用。今南部大會合併佇總會，閣總會繼承南大所制定的設教紀念日，佮為山地 宣道奉獻的方式，用本月第 3主日來做山地宣道記念主日，通為著山地工作祈禱佮奉獻。
總是為山地工作來祈禱佮奉獻，iáu-kú 山地宣道的 現狀是啥款？穩當濟濟人愛知。
山地宣道處佮本報，為著愛予全教會明瞭山地工作的現狀，有將本號做山地 宣道的 te̍k-chhip，目的是愛眾讀者加添認識佮關心。今山地教會已經有335 間，已經超過平地教會數目(320)。咱平地教會對in捌盡多少的力量。總是若看in 的生活的狀況，in 的教會的缺欠，傳上的種種的阻礙，以及in 的自強獨立的奮鬥；閣看外國對in 的關心佮協助，咱iáu-kú會感覺有真濟無盡本份的所在。
今山地教會的現狀就是按呢，「請過來幫贊阮」猶是in所teh發出的聲。若是咱為著in猶有做無夠的工，請咱著閣做；閣為著in若猶有未盡的奉獻，請咱閣奮發看覓。
向望按呢通為著基督的身軀，就是教會……來補滿伊所未有盡的患難，是所切望的所在。