耶魯神學院ê回顧
Iâ-ló͘ Sîn-ha̍k-īⁿ ê hoê-kò͘
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第830卷 |
| 日期 | 1958/2 |
| 頁數 | 10 |
白話字（原文數位化）
Iâ-ló͘ Sîn-ha̍k-īⁿ ê hoê-kò͘
(Gô͘ Chín-khun siá)
(Chiap chêng-hō tē 24 bīn)
1958年2月n0.830 pp.10-11
R.L.Culho͘n Khah-ní-hông Kàu-siū. I sī Chó͘-chit sîn-ha̍k kap Kàu-lí-sú ê kàu-siū, sī hui-siông phok-ha̍k koh hó kì-sèⁿ ê lâng, chóng-sī iā sī chi̍t uī hui-siông khiam-pi ê ha̍k-chiá, goá m̄-bat khoàⁿ-kìⁿ hiah-ni̍h ū khiam-pi koh ū liông-sim ê ha̍k-chiá. Thiaⁿ-kìⁿ kóng, tng i iáu siàu-liân ê sî, Iâ-ló͘ Sîn-ha̍k-īⁿ chai i sī chiân-tô͘ iú-uî ê ha̍k-chiá, ài phèng i lâi chò Sîn-ha̍k-īⁿ kàu-siū. Chóng-sī i ū the-sî, in-uī i só͘ thiàⁿ chit ê hiaⁿ-tī, só͘-í tuì Siōng-tè ê thiàⁿ kap chûn-chāi hoat-seng hoâi-gî.Nā-sī tong-sî ê īⁿ-tiúⁿ uī-tio̍h ài khak-pó chit ê chiân-tô͘ iú-uî ê chheng-liân, só͘-í phèng-chhiáⁿ i chiām-sî tam-jīm Se-iûⁿ Tiat-ha̍k-sú ê káng-chō. Sui-jiân i tuì i pún-sin ê choan-kong hong-bīn iáu-boē ū ha̍k-su̍t-siōng ê tù-chok, lâng iáu m̄-bat thiaⁿ-kìⁿ i ê káng-gī, iáu-kú thiaⁿ-tio̍h i ê káng-gī lâng chiū lóng chai i ê ha̍k-būn sī joā-ni̍h chhim-oán. I ū chi̍t pún uī-tio̍h chheng-liân lâng só͘ siá ê jîn-koan(人觀). Chit pún ū Tiong-bûn ê hoan-e̍k-pún , sī chêng Siōng-hái Chheng-liân hia̍p-hoē chhut-pán ê Hái-sīn chhông-su(海慎叢書) ê chi̍t pún, Tiong-bûn tê-ba̍k kiò chò 人是什麼?
I m̄-nā sī kok-chè kan ê toā ha̍k-chiá, ka-kī iā sī chi̍t uī ài-ho͘N3 im-ga̍k, ài-ho͘N3 chū-jiân , ài-ho͘N3 lô-tōng ê lâng, I ka-kī chèng chhài, ka-kī chèng hoe, chhī ke. Khiā-ke sī tī chháu-tē chi̍t ê lóng-tiûⁿ(sic.) kap chhiū-nā(sic.) ê tiong-kan. Koh pún-sin só͘ chhī ê ke só͘ seⁿ ê nn̄g ka-kī chia̍h bē liáu , siông-siông ka-kī the̍h chhut-khì bē, ū sî muí-ji̍t the̍h ke-nn̄g chhut-khì phoè-ta̍t. Só͘-í bé nn̄g ê lâng m̄-chai i sī kok-chè kan ê toā ha̍k-chiá , siūⁿ i sī chi̍t ê lông-hu, chiū kiò i chò láu-pán(Bob), liân gín-ná iā kiò i “Bob” . I ê hu-jîn sī chi̍t uī cheng-sîn-kho ê bêng-i, tam-jīm Bí-kok Coⁿecticut chiu (tang-pêng hái-hoāⁿ ê chi̍t chiu) ê Cheng-sîn i-ha̍k-hoē ê hoē tiúⁿ. Koh i ū chit uī cha-bó͘-kiáⁿ hiān-sî lâi tī Tâi-oân ; in-uī i ê tiong-hu(sic.) sī Tiong-kok ha̍k ê ha̍k-chiá, hiān-chāi lâi tī Tâi-oân Tāi-ha̍k teh liû-ha̍k.
Helmut Richard Niebuhr Nî-pek Kàu-siū. I sī Ki-tok-kàu Lûn-lí-ha̍k ê kàu-siū, sī Iâ-ló͘ Sîn-ha̍k-īⁿ só͘ khoa-kháu ê chi̍t ê toā ha̍k-chiá. I só͘ tù ê “Ki-tok kap bûn-hoà,” “Khé-sī ê ì-gī” kap “Kàu-phài ê siā-hoē kap ian-goân,” tī Eng-gú kok-bîn kan í-keng choè sîn-ha̍k-seng tek-khak tio̍h tha̍k ê chhut-miâ ê chheh. I ê hiaⁿ-ko sī chhut-miâ ê Reinhold Neibuhr, sī Liú-iok Hia̍p-hô Sîn-ha̍k-īⁿ(Union Seminary) ê Ki-tok-kàu Lûn-lí-ha̍k ê kàu-siū. Koh ū chi̍t ê chí-moē tī Chi-ka-ko(Chicago) Tāi-ha̍k chò chong-kàu kàu-io̍k ê kàu-siū. I pún-sin ê toā kiáⁿ sī Hap-hut(Harvard) Tāi-ha̍k Sîn-ha̍k-īⁿ Ki-tok-kàu Lûn-lí-ha̍k ê kàu-siū. Só͘-í chi̍t cho̍k lóng sī ha̍k-chiá, I pún-sin iā sī Iâ-ló͘ Sîn-ha̍k-īⁿ lāi gián-kiù-īⁿ ê chí-tō kàu-siū, thang chai i ê ha̍k-sek sī joā ko-oán. I tī 1955 nî kàu 1956 nî chi̍t nî ê tiong-kan siū Rockfeller (Bí-kok chio̍h-iû ông) châi-thoân ê uí-thok choan-bûn gián-kiù Bí-kok ê sîn-ha̍k kàu-io̍k. Hit ê sêng-kó hoat-piáu tī “Kàu-hoē kap i ê bo̍k-ióng ê bo̍k-tek” kap “Sîn-ha̍k kàu-io̍k ê chìn-pō͘,” nn̄g pún chheh ê lāi-bīn.
Taⁿ Ni-pek Kàu-siū ê lâng khoán sī bô koân bô kē ê lâng, bīn sī jiâu phè-phè, choan-choan hûn. Lâng nā khoàⁿ-tio̍h chiū chai i sī chi̍t ê keng-koè su-sióng-chiūⁿ kan-khó͘ hùn-tò͘ ê chiàn-sū. I ê káng-gī kap soat-kàu lóng chin chhim lân kái. Chit ê sî in-uī i keng-koè hok-cha̍p ê su-siúⁿ í-keng ta̍t kàu to̍k-li̍p ê kéng-tē. I ê káng-gī khah m̄-sī ēng hun-sek ê hoat-tō͘ lâi soat-bêng, sī ēng thó-lūn ê hoat-tō͘ lâi ta̍t-tò kàu koân ê só͘-chāi , só͘-í ha̍k-seng siông-siông toè bē tio̍h.
I ê Ki-tok-kàu Lûn-lí-ha̍k ê te̍k-sek chiū-sī kiông-tiāu lâng sī Siōng-tè só͘ chhòng-chō ê, lâng sui-jiân tuī-lo̍h iáu sī hó lâng; sè-kài iā sī chhut tī Siōng-tè ê chí-ì. Siōng-tè iā sī lâng ê sè-kài ê Chú, in ê Ông. Só͘-í pí-kàu i ê toā hiaⁿ Reinhold Niebuhr ê su-siúⁿ sī ke chin lo̍k-koan-tek. I bô khoàⁿ lâng ê sèng-chêng, lêng-le̍k kap sū-gia̍p lóng sī oân-choân pháiⁿ, chīn-liōng lī-iōng tiat-ha̍k, sim-lí-ha̍k, lûn-lí-ha̍k, siā-hoē-ha̍k, chèng-tī kho-ha̍k kap kî-thaⁿ ha̍k-būn ê hoat-piáu lâi thó-lūn kap kiàn-li̍p i ê Sîn-ha̍k.(Thāi-sio̍k) .
漢羅（Ùi原文改寫）
耶魯神學院的回顧
(吳振坤寫)
(接前號第24面)
1958年2月第830卷 pp.10-11
R. L. Culho͘n Khah-ní-hông教授。伊是組織神學佮教理史的教授，是非常博學閣好記性的人，總是也是一位非常謙卑的學者，我毋捌看見遐爾有謙卑閣有良心的學者。聽見講，當伊猶少年的時，耶魯神學院知伊是前途有為的學者，愛 聘伊來做神學院教授。總是伊有推辭，因為伊所疼這个兄弟，所以對上帝的疼佮存在發生懷疑。若是當時的院長為著愛確保這个前途有為的青年，所以聘請伊暫時擔任西洋哲學史的講座。雖然伊對伊本身的專攻方面猶未有學術上的著作，人猶 毋捌聽見伊的講義，猶過聽著伊的講義人就攏知伊的學問是偌爾深遠。伊有一本為著青年人所寫的人觀。這本有中文的翻譯本，是前上海青年協會出版的海慎叢書的一本，中文題目叫做人是什麼？
伊毋若是國際間的大學者，家己也是一位愛好音樂，愛好自然，愛好勞動的人，伊家己種菜，家己種花，飼雞。徛家是佇草地一個農場佮樹林的中間。閣本身所飼的雞所生的卵家己食袂了，常常家己提出去賣，有時每日提雞蛋出去配達。所以買蛋的人毋知伊是國際間的大學者，想伊是一個農夫，就叫伊做老闆(Bob)，連囡仔也叫伊「Bob」。伊的夫人是一位精神科的名醫，擔任美國Coⁿecticut州 (東爿海岸的一州)的精神醫學會的會長。閣伊有這位查某囝現時來佇台灣；因為伊的丈夫是中國學的學者，現在來佇台灣大學teh留學。
Helmut Richard Niebuhr Nî-pek教授。伊是基督教倫理學的教授，是耶魯神學院所誇口的一個大學者。伊所著的「基督佮文化，」「啟示的意義」佮「教派的社會佮淵源，」佇英語國民間已經做神學生的確著讀的出名的冊。伊的兄哥是出名的Reinhold Neibuhr，是紐約協和神學院(Union Seminary)的基督教倫理學的教授。閣有一個姊妹佇Chi-ka-ko(Chicago)大學做宗教教育的教授。伊本身的大囝是Hap-hut(Harvard)大學神學院基督教倫理學的教授。所以一族攏是學者，伊本身也是耶魯神學院內研究院的指導教授，通知伊的學識是偌高遠。伊佇1955年到1956年一年的中間受Rockfeller (美國石油王) 財團的委託專門研究美國的神學教育。彼个成果發表佇「教會佮伊的牧養的目的」佮「神學教育的進步，」兩本冊的內面。
今Ni-pek教授的人款是無懸無低的人，面是jiâu phè-phè，專專紋。人若看著就知伊是一個經過思想上艱苦奮鬥的戰士。伊的講義佮說教攏真深難解。這个時因為伊經過複雜的思想已經達到獨立的境地。伊的講義較毋是用分析的法度來說明，是用討論的法度來達到到懸的所在，所以學生常常綴袂著。
伊的基督教倫理學的特色就是強調人是上帝所創造的，人雖然墮落猶是好人；世界也是出佇上帝的旨意。上帝也是人的世界的主，in的王。所以比較伊的大兄Reinhold Niebuhr的思想是加真樂觀的。伊無看人的性情，能力佮事業攏是完全歹，盡量利用哲學，心理學，倫理學，社會學，政治科學佮其他學問的發表來討論佮建立伊的神學。(待續) 。