介紹七十古來稀
Kài-siāu Chhit-si̍p kó͘-lâi hì
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第830號 |
| 日期 | 1958/2 |
| 頁數 | 8 |
白話字（原文數位化）
Chhit-si̍p kó͘-lâi hi
七十古來稀
(TIÓNG-ÊNG LÚ TIONG Ê PÒ-KÒ)
Muî Ka-liân pò
Pún-pò kì-chiá e̍k.
1958年2月830期 p.8-10
(Pún phiⁿ sī Muî Ko͘-niû hiòng Eng-kok Bó-hoē só͘ siá ê nî-tō͘ pò-kò, èng kì-chiá ê chhéng-kiû, hō͘ goá hoan-e̍k tī chia, ǹg-bāng tha̍k ê lâng beh ke-thiⁿ tuì Lú-o̍h ê liáu-kái kap koan-sim chiū-sī).
Tiong-kok ū chi̍t kù oē kóng, “Jîn-seng chhit-si̍p kó͘-lâi hi”(人生七十古來稀),ì-sù sī kóng, chò lâng chū chá kàu taⁿ chia̍h 70 hoè ê chin hi-hán. M̄-kú kin-nî lán ê Tâi-lâm Tióng-êng Lú-o̍h ū pêng-an ta̍t-tò tē 70 nî, iā chit tia̍p chiàⁿ-chiàⁿ ū iōng hoaⁿ-hí kap kám-siā teh kî-thāi kin-nî 3 goe̍h beh kú-hêng ê kì-liām tián-lé. Pún-hāu sī chi̍t ê sian-hong ki-koan, sī siat-li̍p tī pún Tó choè chá ê chi̍t keng lú-chú ê ha̍k-hāu. Khí-seng khai-sí ê sî sī kuí-ê á lú chú ê sió thoân-thé , jiân-āu nî kú goe̍h chhim, hoat-tián kàu kin-á-ji̍t chhiau-koè 600 ê ha̍k-seng, chē-chē sī í-chêng ê ha̍k-seng ê cha-bó͘-kiáⁿ, cha-bó͘-sun tī chia teh tha̍k. Taⁿ 1956 nî kàu 1957 nî ê ha̍k-hāu chêng-hêng sī siáⁿ khoán?
It-poaⁿ ê chêng-hêng
Ha̍k-seng ê sò͘-bo̍k kin-nî iû-goân bô piàn-oāⁿ, chóng-kiōng ū 640 goā ê; chho͘-tiong 6 pan, ko-tiong 6 pan. Kî-tiong 88 miâ sī toà tī ha̍k-liâu. Chiàu lē-nî ê khoán chin-chē gín-ná lāi tâu-khó beh ji̍p-ha̍k, tì-kàu khí-seng chha-put-to bô siu-iông chho͘ tiong it-liân 3 pan bē soah--tit ê khoán, jiân-āu keng-koè kú-kú sīn-tiōng ê khó-lū chham-siông, chiah koat-tēng bô án-ni chìn-hêng, in uī ha̍k-hāu í-keng chhiâu moá-oân, kàu-sek ê uī iā moá-moá, lé-tn̂g iā bô hoat-tō͘ thang siu-iông lóng-chóng ê ha̍k-seng hō͘ in thang muí chá-khí chū-chi̍p chò lé-pài. M̄-nā án-ni , chiàu goán ê keng-giām í-keng chai-iáⁿ put-sî teh cheng-ka ê ha̍k-seng-sò͘ kiat-kó sī kiám-chió kàu-ha̍k ê hāu-kó, jî-chhiáⁿ uī-tio̍h hok-im ê kan-chèng ê khah bô la̍t. Goán chin kám-siā ū khah chē ê Ki-tok-tô͘ kàu-oân lâi chiū-jīm, tuì in ê kang-chok thang kiông-hoà ha̍k-hāu ê chong-kàu seng-oa̍h.
Tô͘-su-koán.
Bí Ko͘-niû kì-liām Tô͘-su-koán í-keng tī kū-nî 5 goe̍h chùn-kang. Kong-sek ê lo̍k-sêng tián-lé sui-jiân iáu-boē kú-hêng , chóng-sī ha̍k-seng í-keng ū teh lī-iōng. Tô͘-su-koán ê siat-kè chin suí koh khoan-khoah, ha̍k-seng siông-siông tī lī-iōng ê tiong-kan piáu-sī in ê hoaⁿ-hí. Hiān-sî khiok iáu ū khiàm í-á kap toh-á, chóng-sī keng-huì nā tio̍k-lo̍k, chiah ê chiū ē thang siat-hoat. Tī iat-tho̍k-sek piah-nih ū beh chong-siat chi̍t tè chio̍h-pi lâi kì-liām Bí Ko͘-niû ê uî-gia̍p ; chio̍h-pi ū teh khek jī, jī-kù sī Hui-li̍p-pí 1:20 só͘ kì, “ In-uī lūn kàu goá oa̍h chiū-sī Ki-tok, sí chiū-sī lī-ek.”
Hāu-iú-hoē.
Hāu-iú-hoē kū-nî 3 goe̍h ū khui Chóng-hoē, hit sî ū koat-tēng kuí-hāng beh kì-liām bó-hāu 70 chiu-nî hāu-khèng ê kè-e̍k. Tiong-kan chú-iàu ê chi̍t hāng chiū-sī beh chiau-chhéng chêng ê Hāu-tiúⁿ Gô͘ Le̍k-chì Ko͘-niû lâi chham-ka chit ê hāu-khèng. Hāu-iú-hoē ū boán-tiûⁿ it-tì beh hū-tam Gô͘ Ko͘-niû ê lú-huì , lâi piáu-sī in ê thiàⁿ-sim, soà piáu-sī hāu-iú ài poaⁿ-chhiáⁿ i lâi ê jia̍t-sêng.
Chheng-liân thoân-khè.
Ha̍k-hāu lāi ê chheng-liân thoân-khè sui-jiân uī-tio̍h khó-chhì á-sī chèng-hú hong-biān só͘ iàu-kiû ê hāu-goā oa̍h-tāng siông-siông tú-tio̍h chó͘-tòng, iā ū kè-sio̍k chhui-hêng choân-pō͘ ê oa̍h-tāng kè-e̍k. Kū-nî T.K.C. ê sèng-koa-tuī ū hóng-būn Tâi-lâm Tiong-hoē lāi hiuⁿ-ē ê kàu-hoē. Chi̍t goe̍h-ji̍t chi̍t piàn thoân-khè-oân ū khì Ai-hō͘-liâu kà hia ê gín-ná, soà pang-chān hia ê lāu-lâng. Koh lé-pài-ji̍t ē-po͘ ū siat iá-goā Chú-ji̍t-o̍h tī ha̍k-hāu piⁿ-á ê chng-kha, ta̍k pái sī 4 tiám poàⁿ kú-hêng , iok ū 50 ê gín-ná lâi chhut-se̍k. Ū pún-tē gín-ná kap goā-séng gín-ná lâi chham-ka, só͘-í ū hun-siat Tâi-gú kap Kok-gú nn̄g khoán ê pan-kip. Chiah ê gín-ná goân-lâi m̄-bat kap kàu-hoē ū hoat-seng sím-mi̍h koan-hē, iáu-kú hoaⁿ-hí jia̍t-sim lâi hù chit khoán Chú-ji̍t-o̍h thang thiaⁿ Sèng-keng ê kò͘-sū, o̍h gîm Sèng-si kap Sèng-tān ê koa. Choè-kīn iā ū in ê sī-toā-lâng lâi chhut-se̍k, chhin-chhiūⁿ án-ni tī chit khoán iáu m̄-bat thiaⁿ-tio̍h hok-im ê só͘-chāi , chiām-chiām ū ki-hoē thang thiaⁿ-siū hok-im.
Ha̍k-seng keng-siông iā ū chē-chē tī chhī-lāi ê kok kàu-hoē teh pang-chān in ê Sèng-koa-tuī kap Chú-ji̍t-o̍h. Koh hiān-sî Tiong-o̍h kap Lú-o̍h ê liân-ha̍p Sèng-koa-tuī iā teh kè-sio̍k. Kin-nî Tiong-hoē ián-káng pí-sài, pún-hāu thoân-khè ê tāi-piáu ū koh tit-tio̍h koàn-kun , án-ni sī liân-sio̍k 4 chhù lah. Chi̍t nî kú ê tiong-kan Kám-siā cheh, Sèng-tān cheh, Koh-oa̍h cheh, Hū-lú cheh, Chheng-liân ji̍t, tī ha̍k-hāu lāi ê lé-pài lóng sī ha̍k-seng ka-kī chú-chhî, koh ta̍k pái lóng ū bō͘ hiàn-kim, só͘ tit-tio̍h ê beh kàu 2000 kho͘, kòng-hiàn chò kàu-hoē ê hū-lú kang-chok, chheng-liân kang-chok, kuí-keng jio̍k-siáu ê kàu-hoē, í-kip te̍k-pia̍t khùn-khó͘ ê ke-têng ê lō͘-ēng. Koh chheng-liân-thoân-khè-oân iā ū chham-ka 5 kak-gîn ūn-tōng, teh hû-chō͘ sin siat ê kàu-hoē. Muí chhù choân séng ê Chhun-lēng-hoē kap Hā-lēng-hoē iā ū phài tāi-piáu khì chham-ka.
Thé-io̍k.
Kū-nî tī thé-io̍k hong-biān iû-goân ū koh tit-tio̍h chhin-chhiūⁿ ē-bīn ê sèng-lī.
Choân-séng ūn-tōng tāi-hoē:
Tiân-sài chham-ka 51 keng lú-chú tiong-ha̍k tiong-kan, tit-tio̍h tē 4 uī.
Kēng-sì chham-ka 52 keng lú-chú tiong-ha̍k tiong-kan, tit-tio̍h tē 8 uī.
Tâi-lâm chhī ūn-tōng tāi-hoē:
Luí-kiû koàn-kun, chò tāi-piáu-tuī siū phài khì chham-ka Séng-ūn.
Koh tiân-sài chho͘-tiong-cho͘ tē 1 uī.Kēng-sài chho͘-tiong-cho͘ tē 2 uī.
In-uī chho͘-tiong-cho͘ 80 kong-chhioh te-lân pau-pān 1,2,3 miâ; tìm iân-kiû chiàm 1,2 miâ. Kî-û chiàm 2 téng 5 hāng, chiàm 3 téng 2 hāng.
Ko-tiong iā ū 2 téng ê 3 hāng, 3 téng chi̍t hāng.
Pit-gia̍p-seng.
Kin-nî ū 6 ê pit-gia̍p-seng khó-ji̍p Tong-hái, Sêng-kong, Hō͘-lí Choan-kho, Lông-ha̍k-īⁿ, Teng-gô͘(sic.) téng ê Tāi-choan. Lēng-goā ū 5 ê ji̍p Sîn-ha̍k-īⁿ pó-bó-kho, nn̄g ê khì Chiong-hoà I-koán. Koh chi̍t uī bo̍k-su-kiáⁿ, koh bat tng thoân-khè thoân-tiúⁿ, pit-gia̍p 1 miâ ê, siū pó-sàng kap chióng-ha̍k-kim khì Tong-hái Tāi-ha̍k.I í-keng tī Tāi-ha̍k Ki-tok-tô͘ seng-oa̍h teh kòng-hiàn, koh siū soán chò im-ga̍k-cho͘ ê cho͘-tiúⁿ. Le̍k-nî ê pit-gia̍p-seng ê tiong-kan, siông-siông ū phoe hō͘ goán, pò-kò in tī kàu-hoē kap siā-hoē kang-chok kap hōng-sū. Choè-kīn tī Tâi-lâm Tang-mn̂g kàu-hoē(ha̍k-seng pêng-siông chhut-se̍k teh lé-pài ê) soán-kí tiúⁿ-ló lóng sī pún-hāu ê hāu-iú, koh tiong-kan nn̄g ê sī pún-hāu ê sià-kam, koh chi̍t ê sī tī Kong-pò-siā teh ha̍k-bū ê. Koh só͘ soán 8 ê lú chip-sū tiong-kan, 3 ê sī chia ê hāu-iú.
Taⁿ goán chin kî-thāi pún-hāu ê 70 chiu-nî kì-liām ji̍t, koh chin hoan-gêng Gô͘ Ko͘-niû lâi chham-ka. Goán siong-sìn chin chē hāu-iú beh tńg-lâi, beh kap goán koh saⁿ-kìⁿ, saⁿ-kap hoaⁿ-hí.
Taⁿ ū chi̍t hāng, goán chai tī koè-khì ê ji̍t-chí 70 nî kú, Siōng-tè ū ín-chhoā pó hō͘ lán ê ha̍k-hāu, chiū goán iā chhim-sìn tī chiong-lâi I ún-tàng iā beh án-ni ín-chhoā pó-hō͘ goán.
漢羅（Ùi原文改寫）
七十古來稀
(長榮女中的報告)
梅 Ka-liân pò
本報記者譯。
1958年2月830期 p.8-10
(本篇是梅姑娘向英國母會所寫的年度報告，應記者的請求，予我翻譯佇遮，向望讀的人欲加添對女學的了解佮關心就是)。
中國有一句話講，「人生七十古來稀」，意思是講，做人自早到今食70歲的真稀罕。毋過今年咱的台南長榮女學有平安達到第70年，也這霎正正有用歡喜佮感謝teh期待今年3月欲舉行的記念典禮。本校是一个先鋒機關，是設立佇本島最早的一間女子的學校。起先開始的時是幾个仔女子的小團體，然後年久月深，發展到今仔日超過 600个學生，濟濟是以前的學生的查某囝，查某孫佇遮teh讀。今1956年到1957年的學校情形是啥款？
一般的情形
學生的數目今年猶原無變換，總共有640外个；初中6 班，高中6班。其中88名是蹛佇學寮。照例年的款真濟囡仔內投考欲入學，致到起先差不多無收容初中一年3班袂煞--得的款，然後經過久久慎重的考慮參詳，才決定無按呢進行，因為學校已經ch遐û滿員，教室的位也滿滿，禮堂也無法度通收容攏總的學生予 in通每早起聚集做禮拜。毋若按呢，照阮的經驗已經知影不時teh增加的學生數結果是減少教學的效果，而且為著福音的干證的較無力。阮真感謝有較濟的基督徒教員來就任，對in的工作通強化學校的宗教生活。
圖書館。
Bí姑娘記念圖書館已經佇舊年5月竣工。工式的落成典禮雖然猶未舉行，總是學生已經有teh利用。圖書館的設計真媠閣寬闊，學生常常佇利用的中間表示in的歡喜。現時卻猶有欠椅仔佮桌仔，總是經費若著落，遮的就會通設法。佇 閱讀室壁裡有欲 裝設一塊石碑來記念Bí姑娘的遺業；石碑有teh刻字，字句是腓立比1：20所記，「因為論到我活就是基督，死就是利益。」
校友會。
校友會舊年3月有開總會，彼時有決定幾項欲記念母校70週年校慶的計畫。中間主要的一項就是欲招請前的校長吳瓅志姑娘來參加這个校慶。校友會有滿場一致欲負擔吳姑娘的旅費，來表示in的疼心，紲表示校友愛搬請伊來的熱誠。
青年團契。
學校內的青年團契雖然為著考試á是政府方面所要求的校外活動常常拄著阻擋，也有繼續推行全部的活動計畫。舊年T.K.C.的聖歌隊有訪問台南中會內鄉下的教會。一月日一遍團契員有去Ai-hō͘-liâu教遐的囡仔，紲幫贊遐的老人。閣禮拜日下晡有設野外主日學佇學校邊仔的庄腳，逐擺是4點半舉行，約有50个囡仔來出席。有本地囡仔佮外省囡仔來參加，所以有分設台語佮國語兩款的班級。遮的囡仔原來毋捌佮教會有發生甚麼關係，猶過歡喜熱心來赴這款主日學通聽聖經的故事，學吟聖詩佮聖誕的歌。最近也有in的序大人來出席，親像按呢佇這款猶毋捌聽著福音的所在，漸漸有機會通聽受福音。
學生經常也有濟濟佇市內的各教會teh幫贊in的聖歌隊佮主日學。閣現時中學佮女學的聯合聖歌隊也teh繼續。今年中會演講比賽，本校團契的代表有閣得著 冠軍，按呢是連紲4厝lah。一年久的中間感謝節，聖誕節，閣活節，婦女節，青年日，佇學校內的禮拜攏是學生家己主持，閣逐擺攏有慕獻金，所得著的欲到2000 箍，貢獻做教會的婦女工作，青年工作，幾間弱小的教會，以及特別困苦的家庭的路用。閣青年團契員也有參加5角銀運動，teh扶助新設的教會。每次全省的春令會佮夏令會也有派代表去參加。
體育。
舊年佇體育方面猶原有閣得著親像下面的勝利。
全省運動大會：
田賽參加51間女子中學中間，得著第4位。
競賽參加52 間女子中學中間，得著第8位。
台南市運動大會：
壘球冠軍，做代表隊受派去參加省運。
閣田賽初中組第1 位。競賽初中組第2 位。
因為初中組80公尺低欄包辦1，2，3名；tìm鉛球佔 1，2名。其餘佔 2等5項，佔 3等2項。
高中也有2等的3項，3等一項。
畢業生。
今年有6个畢業生考入東海，成功，護理專科，農學院，東吳等的大專。另外有5个入神學院保姆科，兩个去彰化醫館。閣一位牧師囝，閣捌當團契團長，畢業1名的，受保送佮獎學金去東海大學。伊已經佇大學基督徒生活teh貢獻，閣受選做音樂組的組長。歷年的畢業生的中間，常常有批予阮，報告in佇教會佮社會工作佮奉仕。最近佇台南東門教會(學生平常出席teh禮拜的)選舉長老攏是本校的校友，閣中間兩个是本校的舍監，閣一个是佇公報社teh學務的。閣所選8个女執事中間，三个是遮的校友。
今阮真期待本校的70週年記念日，閣真歡迎吳姑娘來參加。阮相信真濟校友欲轉來，欲佮阮閣相見，相佮歡喜。
今有一項，阮栽佇過去的日子70年久，上帝有引chhoā保護咱的學校，就阮也深信佇將來伊穩當也欲按呢引chhoā保護阮。