海外通信英國ê印象
Hái-goā Thong-sìn Eng-kok ê ìn-siōng
文獻資訊
| 項目 | 資料 |
|---|---|
| 作者 | 黃西香 N̂g Se-hiong |
| 卷期 | 台灣教會公報 |
| 卷期 | 第822號 |
| 日期 | 1957/6 |
| 頁數 | 18 |
白話字（原文數位化）
HÁI-GOĀ THONG-SÌN
Eng-kok ê ìn-siōng
(1966 : 2. 15 tī Eng-kok N̂g Se-hiong kèng-siá)
(Chiap chêng-goe̍h hō tē 15 bīn)
1957.06 tē 822 hō p.18
Chiah ê siū soán chìn-ji̍p Bûn-tián ha̍k-hāu ê gín-ná chiū kè-sio̍k in ê ha̍k-gia̍p, te̍k-pia̍t chù-tiōng ha̍k-kiù hong-bīn (academic side). In muí ha̍k-kî ū giâm-tiōng ê khó-chhì, kàu 15 hoè ê sî, koh chham-ka kok-ka chhì-giām (Exams for the General Certificate of Education), 16 hoè ê sî, koh chi̍t hoê ko-kip (high level) ê chhì-giām. Chiah ê nā lóng thong-koè chiū tī 18 hoè ê sî, chiàu in ê sêng-chek kap chì-goān thang sin-chhéng seng-ji̍p tāi-ha̍k, á-sī phó͘-thong ê ha̍k-īⁿ. Hiān-chāi Eng-kok (England) lóng-chóng ū 10 keng ê tāi-ha̍k, thang kóng, tāi-ha̍k seng ê chóng-sò͘ chiàm choân-kok jîn-kháu ê sió pō͘-hūn nā-tiā, (bô chiūⁿ 10%). án-ni pí-kàu Bí-kok tāi-liōng seng-sán (Mass production) ê kâu-io̍k chè-tō͘, Eng-kok ê te̍k-tiám chāi tī tiōng chit (quality); bô tiōng liōng (quantity). Tong-jiân che iā ū i ê khoat-tiám; chóng-sī kiat-lūn lâi kóng, Eng-kok ê kàu-io̍k chè-tō͘ chiū-sī tián-hêng-te̍k (典型的), Eng-kok bîn-cho̍k-sèng ê sêng-kó (成果). Kàu-io̍k ê sêng-kong chāi-tī hó ê koat-chhek (Well organized scheme), ióng-sêng sûn-liông ê kok-bîn, kap pó-chhî siā-hoē ê chuí-chún.
3) Siā-hoē hong-bīn.
Tuì siā-hoē hong-bīn, goá chí-ū ài kán-tan thê-chhut kuí-tiám chò goá tuì Eng-kok ê ìn-siōng ê kiat-lūn.
Chiàu lán só͘ chai, Eng-kok ê kok-ka tī chèng-tī, chong-kàu, á-sī kàu-io̍k muí hong-bīn ê tē-ki lóng pí-kàu-te̍k kian-kò͘, chū-jiân tī siā-hoē hong-bīn, it-poaⁿ peh-sìⁿ ê seng-oa̍h, bô lūn cheng-sîn-siōng, á-sī bu̍t-chit-siōng, lóng ū siong-tong ê pá-ak kap an-tēng. Che tong-jiân m̄-sī 一朝一夕 só͘ ta̍t-chiâⁿ, chiū-sī in tuì kiàn-kok í-lâi, hùn-tò͘ cheng-chhú ê kiat-chiⁿ. Lâi kàu Eng-kok chhin-sin chhin-ba̍k chiap-chhiok tio̍h Eng-kok ê bûn-hoà, in-uī tuì koh-iūⁿ ê kak-tō͘ lâi khoàⁿ, boē bián-tit keng-giām chē-chē sin ê kiàn-kái kap kám-sióng. Chóng-sī chit tiong-kan ū chi̍t hāng te̍k-pia̍t thang chù-ì ê, chiū-sī kàu-hoē kap siā-hoē bi̍t-chhiat ê koan-hē. Sui-jiân téng-bīn só͘ kóng jia̍t-sim ê sìn-tô͘, chí-ū chiàm jîn-kháu ê sió-sò͘, iáu-kú tī chit ê Ki-tok-kàu ê kok-ka lāi-bīn, kàu-hoē tuì siā-hoē ê éng-hióng chin-chiàⁿ toā. It-poaⁿ ê siā-hoē hong-chiam lóng ēng Sèng-keng ê kà-sī chò phiau-gú, chiū tī bô-hêng tiong, peh-sìⁿ ê hêng-tōng kú-chí iā siū éng-hióng. Bô-lūn tī sím-mi̍h thoân-thé seng-oa̍h, ha̍k-hāu á-sī siā-hoē, Ki-tok-kàu ê chûn-chāi sî-siông hián-hiān tī in tiong-kan teh kéng-kài chho-chhiòng chèng-kô ê kok-ka.
Choè-āu sūn-pit chhéng-án kok-uī tho̍k-chiá, ǹg-bāng tī bô kú ê chiong-lâi beh hoaⁿ-hí kap tāi-ke saⁿ-kìⁿ. Goān Chú sù-hok lán. (Oân)
漢羅（Ùi原文改寫）
海外通訊
英國的印象
(1966 : 2. 15佇英國黃西香敬寫)
(接前月號第15面)
1957.06 第822號 p.18
遮的受選進入文典學校的囡仔就繼續in的學業，特別注重學究方面(academic side)。In每學期有嚴重的考試，到15歲的時，閣參加國家試驗 (Exams for the General Certificate of Education)，16歲的時，閣一回高級(high level)的試驗。遮的若攏通過就佇18歲的時，照in的成績佮志願通申請升入大學，抑是普通的學院。現在英國(England)攏總有10間的大學，通講大學生的總數佔全國人口的小部份nā-tiā，(無上10%)。按呢比較美國大量生產 (Mass production)的教育制度，英國的特點在佇重質(quality)；無重量 (quantity)。當然這也有伊的缺點；總是結論來講，英國的教育制度就是典型的，英國民族性的成果。教育的成功在佇好的決策(Well organized scheme)，養成純良的國民，佮保持社會的水準。
3) 社會方面。
對社會方面，我只有愛簡單提出幾點做我對英國的印象的結論。
照咱所知，英國的國家佇政治，宗教，抑是教育每方面的地基攏比較的堅固。自然佇社會方面，一般百姓的生活，無論精神上，抑是物質上，攏有相當的把握佮安定。這當然毋是一朝一夕所達成，就是in對建國以來，奮鬥爭取的結晶。來到英國親身親目接觸著英國的文化，因為對各樣的角度來看，未免得經驗濟濟新的見解佮感想。總--是這中間有一項特別通注意的，就是教會佮社會密切的關係。雖然頂面所講熱心的信徒，只有佔人口的小數，猶過佇這个基督教的國家內面，教會對 社會的影響真正大。一般的社會方針攏用聖經的教示做標語，就佇無形中，百姓的行動舉止也影響。無論佇甚物團体生活，學校抑是社會，基督教的存在時常顯現佇in中間teh警戒操縱整個的國家。
最後順筆請安各位讀者，向望佇無久的將來欲歡喜佮逐家相見。願主賜福咱。(完)