台灣聖神

Tâi-oân Sèng Sîn

文獻資訊

項目	資料
作者	廖得 Liāu Tit
卷期	台灣教會報
卷期	第815卷
日期	1956/11
頁數	24

白話字（原文數位化）

1956 nî 11 goe̍h p.24-25

Tâi-oân Sèng Sîn

(Liāu Tit)

Gín-ná kiù toā-lâng

Chá tī pè tē-hng ū chi̍t ê sèⁿ Cheng ê iú-le̍k-chiá, só͘ khiā sī hiā-chhù-kó͘, thâu-chêng hî-tî, āu-piah koé-chí, hó hn̂g kui-cha̍p; kui-chng ê lâng khah chē thâu tì i ê thiⁿ, kha ta̍h i ê tē; i ê a-phiàn-thô͘ kûn kui-tiáⁿ, ta̍k mê chē-chē iú--ê lâi i hia kiat-tóng chia̍h a-phiàn.

Au-lâi i thiaⁿ-tio̍h tō-lí, khì Ka-tang-á lé-pài, chiū khì-siâ kui-chèng, ji̍t-mê chia̍h chin toā ê a-phiàn iā ké khí--lâi!

Tī pè-tē, Cheng, Liāu, Lí saⁿ sèⁿ ū châi-sè-le̍k ê lâng khah chē bô kiáⁿ kap chió kiáⁿ. Taⁿ chit ê sèⁿ Cheng ê châi-sè-le̍k-chiá iā sī bô kiáⁿ; só͘-í i ū iúⁿ nn̄g ê bêng-lêng-chú, toā--ê khì hû, sè--ê koai-khá. Ang-bó͘ thiàⁿ chit ê sè ê iúⁿ-kiáⁿ chhin-chhiūⁿ chhin-seⁿ--ê. Jīn-chin kā i kàu-io̍k, hō͘ i tha̍k kàu-hoē ê sió-o̍h, tiong-o̍h, kap chèng-hú ê kong-o̍h. āu-lâi iā jhì “Sió thian-tông” chhú chi̍t ê kín toā-hàn, gâu seⁿ-thoàⁿ, tn̂g hoè-siū hit khoán iu-liông-chéng ê cha-bó͘ gín-ná lâi chò sim-pū. Chhoā lâi liáu, sun-á ti̍t-ti̍t chhut-thâu; taⁿ Cheng-ka iú-èng-kong ê hāu-pó͘-chiá khì-koân niū pa̍t-lâng.

Koh tī chng-tiong tng pó-chèng: kàu koaⁿ-thiaⁿ ū sè.Tī kàu-hoē ê hōng-hiàn, bô-lūn pài-tn̂g khí kap siu-lí, á-sī thoân-tō sin-suí, lóng hū-tam saⁿ-hūn-chi̍t á-sī chi̍t-poàⁿ, kî-û ta̍k khoán iā chhut toā-thâu; tī kàu-hoē iā ū miâ.Lâng-kheh kàu uī, khóng-khài chhin-chhiat! Thâi-ke thâi-ah, pha-hî bé-bah; ta̍k pái toh pâi moá-moá! Chin-chiàⁿ chîⁿ ū, m̄-kiaⁿ sè-sū! “Ū chîⁿ, sái kuí ē e-bō.” Lâng kàu hia, kám-kek chhin-chhiūⁿ kàu Toā thian-tông: “Thian-tông moá-moá jîn-ài!”

Taⁿ chit ê tit-tio̍h sè-kan “Ngó͘-hok lîm-bûn” ê Cheng--ka, koh tit-tio̍h thian-kok ê “Pak-hok” ; kiōng tit-tio̍h ‘Cha̍p-saⁿ hok lîm-bûn!’ Chit khoán ê hēng-hok m̄-chai beh hoaⁿ-hí kàu-án-choáⁿ?

Bô phah-sǹg ta-ke-koaⁿ sī Kheh-lâng, sim-pū sī Choân--ê ; lé-kàu put-tông, ì-chì put-thong! Tuì án-ni kám-chêng ê li̍h-hûn chiām-chiām khok-tiong! Hó-hó ê “Toā oa̍h thian-tông” soà pìⁿ chò “Sió oa̍h tē-ge̍k” !

Ta-ke sī tâu-thiⁿ kò-tē, oàn-sin chheh-miā! Thái ê chhoā tio̍h chit khoán ji̍p-kàu sim-pū lâi kap lâng bô pêⁿ chē khiā! Sim-pū lí-ke io-kiáⁿ, ba̍k-sái lâu-ji̍p, gêng-sim-oân ta̍k ji̍t ná kek ná toā oân. Ta-koaⁿ tâng ta-ke, hāu-seⁿ oá sim-pū, sun-á tiong-li̍p: chi̍t ke hun chò “Sam-kok!” Sio̍k-gú kóng, “Ka hô bān-sū sêng, ke chhá bān-sì kêng!” Kok kóng, “Ke-lāi siāng-iūⁿ sim, o͘-thô͘ piⁿ n̂g-kim; chi̍t lâng chi̍t iūⁿ sim, bô chîⁿ thang bé teng-sim!”

Taⁿ chit ê hó-hó ê Cheng--ka soà pìⁿ chò “o͘-thiⁿ àm-tē.”Ta-ke “Sat-khì thêng-thêng.” Ta-koaⁿ gêng-sim! Sim-pū ‘ngó͘-hêng chīn thoat!’ Hāu-seⁿ ‘loé-chì!’ Sun-á ná chhin-chhiūⁿ hî-á khì chia̍h-tio̍h lô͘-tîn-chuí, hoán-khut péng-tō͘! Chhù-the̍h bô chéng-tùn; thiaⁿ-thâu ū Chap-tiâu-kài koà kàu bô cha̍p-tiâu-kài; ka-têng lak-cheh, chhin-chhiuⁿ song-tiong!

Chit khoán ê ka-têng, lhoàⁿ-tio̍h ê lâng hàiⁿ-thâu thó͘-khuì bô pān-hoat! In ka-tī ia sī choa̍t-bāng, chí-ū thèng-hāu sí nā-tiāⁿ!

Hó kai-chài! Ke-lāi hiah ê sè-hàn gín-ná chhin-chhiūⁿ sió thiⁿ-sài! Ta̍k àm ē hiáu kiò ‘Kiù-lâng’ chhá lé-pài! Bô lé-pài m̄ khùn!

Tuì án-ni chi̍t ke ê sìn-gióng tit-tio̍h iân-tiông! Sèⁿ-miā tit-tio̍h pó-choân! Goân-khì tit-tio̍h khoe-ho̍k!

Kàu taⁿ 50 nî kú, in chi̍t ke chi̍t nî chha-put-to ke chi̍t lâng. Ū-ê chò tiúⁿ-ló, chip-sū, bo̍k-su, hù hiong-tiúⁿ. Kî-tiong tē-it kám-kek--ê chiū-sī chit tuì chêng teh chè-chō gêng-sim-oân ê 70 hoè chó-iū tióng-chiá ta̍k lé-pài tī kàu-hoē teh tok-tuī!

[āu-tê: Tâi-oân chí-moē seⁿ Ji̍t-pún bo̍k-su]

漢羅（Ùi原文改寫）

台灣聖神

(廖得)

囡仔救大人

早tī pè地方有一個姓 Cheng ê 有力者，所khiā是瓦厝古，頭前魚池，後壁果子，好園幾十甲；歸庄 ê人khah濟頭tì伊ê天， 腳踏伊ê地；伊ê 阿片塗kûn 歸鼎， 逐暝濟濟友--ê來伊hia結黨食阿片。

後來伊聽tio̍h道理，去茄苳仔禮拜，就去邪歸正，日暝食真大ê 阿片也改起來！

Tī pè-鎮， Cheng， Liāu，李 三姓有財勢力ê人khah濟無囝 kap少囝。 Taⁿ 這個 姓 Cheng ê 財勢力者也是無囝；所以伊有養兩個螟蛉子，大--ê氣浮， 細--ê 乖巧。 翁某疼這個 細 ê 養囝親像親生--ê。認真kā伊教育， hō͘伊讀教會ê小學，中學， kap政府ê 公學。後來也去 “小天堂”取一個kín大漢， gâu 生湠，長歲壽hit款優良種 ê查某囡仔來做新婦。 Chhoā來了，孫仔直直出頭； taⁿ Cheng家 有應公 ê 後補者棄權 讓別人。

Koh tī 庄中當保證:到官廳有細。Tī教會ê奉獻，無論拜堂起 kap修理， á是傳道薪水，攏負擔三份一á是一半，其餘逐款也出大頭； tī教會也有名。人客到位，慷慨親切！ Thâi雞 thâi鴨， 拋魚買肉； 逐擺 toh 排滿滿！真正錢有， m̄驚世事！ “有錢， 駛鬼 ē 挨磨。”人到hia，感激親像到大天堂: “天堂滿滿仁愛！”

Taⁿ 這個得tio̍h世間”五福臨門” ê Cheng家， koh得tio̍h天國ê “八福” ；共得tio̍h ‘十三福臨門！’ 這款ê幸福m̄知beh歡喜到按怎？

無拍算ta-ke-koaⁿ是客人，新婦是泉--ê ； 禮教不同，意志不同！ Tuì án-ni感情ê裂痕漸漸擴中！好好ê “大活天堂”soà變做”小活地獄” ！

Ta-ke是投天告地，怨身chhè命！ Thái ê chhoā tio̍h 這款入教新婦來kap人無平坐khiā！新婦理家 io-囝，目屎流入， gêng-心丸 逐日ná激ná大丸。 Ta-官同ta-家， 後生 倚新婦，孫仔中立:一家分做”三國！”俗語講：”家和萬事興， 家吵 萬世窮！” Kok講：”家內siāng樣心， 烏塗變黃金；一人一樣心，無錢thang 買 燈心！”

Taⁿ 這個好好ê Cheng家soà變做”烏天暗地。”Ta-家 “殺氣騰騰。” Ta-官 gêng-心！新婦‘五形盡脫！’ 後生 ‘餒志！’孫仔 ná親像魚仔去食-tio̍h 蘆藤水， 反掘 péng-肚！厝宅無整頓；聽-頭有十條誡 割到無十條誡；家庭落節， 親像喪中！

這款ê家庭， 看-tio̍h ê人hàiⁿ-頭吐氣無辦法！ In 家治 也是絕望，只有聽候死nā-tiāⁿ！

好佳哉！家內hiah-ê細漢囡仔親像小天使！ 逐暗會曉叫‘救人’ 吵禮拜！無禮拜m̄睏！

Tuì án-ni一家ê信仰得tio̍h延長！性命得tio̍h保全！元氣得tio̍h恢復！

到taⁿ 50年久， in一家一年差不多加一人。有ê做長老，執事，牧師， 副鄉長。其中第一感激--ê就是這對前teh製造gêng-心丸 ê 70 歲左右長者逐禮拜tī教會teh 督隊！

[後題:台灣姐妹生日本牧師]