雷 Khek-su先生
Luî Khek-su Sian-siⁿ
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第814卷 |
| 日期 | 1956/10 |
| 頁數 | 4 |
白話字（原文數位化）
1956 nî 10 goe̍h p.4
Luî Khek-su Sian-siⁿ
Tī 1780 nî, Eng-kok chi̍t ê siâⁿ ê siâⁿ-chhī Gloster(Kek-lô-su-tek), ū chi̍t uī sian-siⁿ khui chi̍t ê o̍h-á, chū-chi̍p chhù-piⁿ keh-piah tī chè-chō chiam ê kang-tiûⁿ teh chò kang thàn chîⁿ lóng bô ki-hoē thang tha̍k-chheh ê gín-á 90 ê tī hiu-gia̍p ê lé-pài-ji̍t lâi tha̍k-chheh. Hit sî I khiok ū siu ha̍k-huì, chi̍t lé-pài 1 Shilling, pang-chān I ê ū chi̍t ê lâm ê pêng-iú kap 4 ê sian-siⁿ. Ha̍k-si̍p ê khò-thêng sī tha̍k-chheh, liām Chin-tō būn-tap, o̍h gîm-si téng. Pān-lí chit keng o̍h-á ê lâng kiò(R. Raikes) Luî Khek-su Sian-siⁿ; I ê lāu-pē ū teh pān chi̍t ê sin-bûn-pò, I iā soà-chiap lāu-pē ê gia̍p, āu-lâi chiong I só͘ pān chit ê lé-pài-ji̍t ê o̍h-á ê sū hoat-piáu tī I ê sin-bûn-pò͘, bô phah-sǹg put-chí ín-khí tho̍k-chiá ê chù-ì. 5 nî āu chiū tī Lûn-tun ê tho̍k-chiá cho͘-chit chi̍t ê “Chú-ji̍t-o̍h ê chín-heng-hoē,” chiām-chiām tit-tio̍h lâng chàn-sêng, chiū m̄-nā choân Eng-kok, kàu tī kok-goā iā chē-chē lâng chàn-sêng, tī-kàu kin-á-ji̍t iā hoat-tián kàu sè-kài kok-kok.
Taⁿ lūn Chú-ji̍t-o̍h khiok m̄-sī Luî Khek-su Sian-siⁿ í-chêng bô lâng pān, iā I tong-chho͘ siat chit ê o̍h-á iā m̄-sī choân-bûn beh kàu-io̍k kàu-hoē ê chú-tē, in-uī I sī thé-thiap Gloster chhī chia̍h thâu-lō͘ chò kang ê gín-á bô ki-hoē thang siū kàu-io̍k, chiah kéng hiu-gia̍p-ji̍t lâi kàu-io̍k in, put-kò I ū te̍k-pia̍t chù-tiōng chong-kàu ê kàu-io̍k, chit hāng hong-chiam āu-lâi toā phó͘-phiàn, kàu āu-lâi sui-jiân sè-kài kok-kok siàu-liân lâm-lú bô thang siū kàu-io̍k ê ki-hoē ê í-keng chin chió, iáu-kú lī-iōng lé-pài-ji̍t lâi si-hêng chong-kàu kàu-io̍k ti̍t-ti̍t phó͘-piàn, hit ê khí-goân thang kóng lóng sī Luî Sian-siⁿ ê kong-chek. Só͘-í lâng lóng chheng-ho͘ I chò “Chú-ji̍t-o̍h ê lāu-pē.”
Taⁿ lán ê Kàu-hoē-pò kui-tēng 10 goe̍h lâi siàu-liām Chú-ji̍t-o̍h ê sū-gia̍p, ū só͘-chāi ēng hiàn-kim, ū só͘-chāi te̍k-pia̍t lé-pài lâi kó͘-bú, pún pò iā tī chia kài-siāu “Chú-ji̍t-o̍h ê lāu-pē” ê sió-toān, ǹg-bāng tho̍k-chiá tuì Chú-ji̍t-o̍h ka-chhim jīm-sek kap koan-sim, thang hō͘ lán ê Chú-ji̍t-o̍h koh-khah ū toā ê chìn-tián, sī sim só͘ goān.
漢羅（Ùi原文改寫）
雷 Khek-su先生
Tī 1780年，英國一個城ê城市Gloster(Kek-lô-su-tek)，有一位先生開一個學仔，聚集厝邊隔壁tī製造chiam ê工場teh做工 趁錢攏無機會thang讀冊ê 囡仔 90個tī 休業ê禮拜日來讀冊。 Hit時伊卻有收學費，一禮拜一Shilling，幫贊伊ê有一個男ê朋友kap 四 ê先生。學習ê課程是讀冊，念真道問答，學吟詩等。辨理這間學仔ê人叫(R. Raikes)雷Khek-su先生；伊ê老父有teh辦一個新聞報，伊也續接老父ê業，後來將伊所辦這個禮拜日ê學仔 ê事發表tī伊ê新聞報，無拍算不止引起讀者ê注意。 五年後就tī倫敦 ê 讀者 組織一個”主日學ê振興會，”漸漸得tio̍h人贊成，就m̄-nā全英國，到tī 國外也濟濟人贊成， tī-到今仔日也發展到世界各國。
Taⁿ論主日學卻m̄是雷 Khek-su先生以前無人辦，也伊當初設這個學仔也m̄專門beh教育教會ê子弟，因為伊是體貼Gloster 飼食頭路做工ê 囡仔無機會thang受教育， chiah揀休業日來教育in，不過伊有特別注重宗教ê教育， 這項方針後來大普遍，到後來雖然世界各國少年男女無thang受教育ê機會ê已經真少， iáu-kú利用禮拜日來施行宗教教育直直普遍， hit個起源thang講攏是雷先生ê 功績。所以人攏稱呼伊做”主日學ê老父。”
Taⁿ咱ê教會報規定10月來數念主日學ê事業，有所在用獻金，有所在特別禮拜來鼓舞，本報也tī chia介紹”主日學ê老父” ê小傳， 向望讀者對主日學加深認識kap關心， thang hō͘咱ê主日學koh-khah有大ê進展，是心所願。