Tâi-oân Sèng SînPermalink

文獻資訊Permalink

白話字（原文數位化）Permalink

1956 nî 10 goe̍h p.17

Tâi-oân Sèng Sîn

(Liāu Tit)

Thun-lún kàu boē tit-tio̍h kiù

Chheng-tiâu boé ê sî, tī Tâi-lâm hú-siâⁿ ū chi̍t ê sèⁿ Koeh ê toā chhì-á thâu, hêng-hêng sù-chì, liân pan-thâu gê-ia̍h iā hō͘ I lêng-tī. Si̍t-chāi sī chhin-chhiūⁿ hó͘-lông to̍k-choâ ê kiông-ok!

āu-lâi tit-tio̍h Chú kiù, chiū piàn chò “Sûn-liông chhin-chhiuⁿ chíⁿ-á,” kap chhin-chhiūⁿ chi̍t chiah koai-koai ê mî-iûⁿ-á-kiáⁿ, ji̍t-mê jia̍t-sim ài chio hòng-tōng ê soàⁿ-iûⁿ tńg-lâi iûⁿ-tiâu-lāi!

I iā chiong tha̍k Lú-o̍h ê cha-bó͘-kiáⁿ kè-lo̍h chng-kha, hō͘ choh-sit hoē-iú chò sim-pū, beh poê-iúⁿ in ê tō-lí kap sìn-sim!

I ê chhian-kim iā iú-hàu sūn-thàn lāu-pē chú-ì; sui-jiân kè-tio̍h bô ha̍k-būn ê tiōng-hu, iā sī mê-ji̍t sûn-sûn siān-iú, chhoē ki-hoē lâi kà hu-kun tha̍k-chheh.

Bô phah-sǹg tiōng-hu bat tām-po̍h jī, soà khì kap lâng o̍h chò ku-lí-thâu; tuì án-ni tuī-lo̍h, só͘ ū kuí kah ê hn̂g soà hòng-tōng liáu-liáu!

Kàu-boa̍t kàu hia bo̍k-hoē ê sî, khoàⁿ-tio̍h in ê sit-tiûⁿ hong-hoè! chhù-the̍h phoà-sàm!bó͘-kiáⁿ bô chhin-chhiūⁿ lâng! Pún-sin liu-liu khì; ū sî-chūn lí-hiaⁿ goá-tī chhoā tio̍h kui-tīn-á tńg-lâi, iā beh lim, iā beh chia̍h, bô mi̍h-phoè ê sî, ke-bó ke-á thâi kàu beh bô chéng khì. Só͘ chèng ê bái kam-chià boē kheh, chiū tuì hoē-siā seng chioh chîⁿ khì ēng. Bó͘-kiáⁿ ū boâ bô chia̍h, phoà-pēⁿ bô io̍h, tin-tāng tio̍h beh phoà beh ji̍h!

Ū chi̍t ji̍t, chit ê sèⁿ koeh ê chí-moē lâi chhoē goá, kóng, “Bo̍k-su ah! goá ê kan-khó͘ tòng bē tiâu! goá siūⁿ beh cháu lâi-khì kā lâng chú-chia̍h tō͘-oah!”

Goá kā i kóng, “Tio̍h! chí-moē goá chin tông-chêng--lí! lí sī hú-siâⁿ lâng, kam-goān lâi kè chháu-tē-hiaⁿ, lí sī Lú-o̍h ha̍k-seng, hoaⁿ-hí lâi phoè chheⁿ-mê gû! lí ê hi-seng si̍t-chāi chin-chē!”

Tān--sī lâng teh chhiàⁿ chú-chia̍h--ê sī ài chhiàⁿ ióng-kiāⁿ--ê, iā lí sī n̂g-sng lám-sin-miā, thái ū lâng beh chhiàⁿ--lí? Koh lí nā pēⁿ siong-tiōng ê sî, lâng lāi-bīn mā m̄-káⁿ hō͘ lí toà! kiat-kio̍k nā sí soà tio̍h chò lō͘-pông-si! Koh lí 3 ê kiáⁿ ū lí ji̍t-mê teh chiàu-kò͘ to m̄ chiâⁿ gín-ná, n̂g-sng toā-tó͘-tháng, pái-kha! Lí nā cháu-khì, chiū chhin-chhiūⁿ bô ke-bó ê ke-á! in kiám ē oa̍h?

Taⁿ lí ê kan-khó͘ í-keng ke̍k-thâu, chha-put-to lún kàu “99 lún” lah! koh lún chi̍t lún chiū tit-tio̍h chi̍t ê “kim-tún!” Siat-sú lí nā ē hō͘ lí ê tiong-hu phah-sí! tio̍h hō͘ i phah--sí! Nā ē iau-koâⁿ pēⁿ--sí! tio̍h kap lí 3 ê kiáⁿ, saⁿ-kap iau-koâⁿ pēⁿ--sí! Lí nā cháu! óng-huì lí í-chêng ê hi-seng! Lâng beh kóng lí sī pháiⁿ cha-bó͘, m̄-ti̍h ang, iā m̄-ti̍h kiáⁿ!

Koeh chí-moē ìn kóng, Bo̍k-su! hó! goá beh tńg-khì! Ē sí, beh sí toà lāi-bīn!

Koè bô loā kú, hit ê hòng-tōng ê hiaⁿ-tī hoán-hoé! ang-bó͘ thoân-oân! ka-têng hoat-ta̍t!

[āu-tê: “Gín-á kiù toā-lâng.”]

漢羅（Ùi原文改寫）Permalink

台灣聖神

(廖得)

吞忍到boē得tio̍h救

清朝尾 ê時， tī台南府城有一個姓 郭 ê大刺仔頭， hêng-hêng sù-chì，連班頭衙役也hō͘伊凌遲。實在是親像虎狼毒蛇ê強惡！

後來得tio̍h主救，就變做”純良親像鴿仔，” kap親像一隻乖乖ê綿羊子囝，日暝熱心愛 chio放蕩ê散羊 轉來羊寮內！

伊也將讀女學ê 查某囝 嫁落庄腳， hō͘作穡會友做新婦， beh培養in ê道理kap信心！

伊ê 千金也有孝順趁老父主意；雖然嫁-tio̍h無學問ê丈夫，也是暝日循循善誘，揣機會來教夫君讀冊。

無拍算丈夫bat淡薄字，soà去kap人學做苦力頭； tuì án-ni墮落，所有幾甲 ê園soà放蕩了了！

到末到hia 牧會 ê時，看tio̍h in ê 穡場荒廢！厝宅破散！某囝無親像人！本身溜溜去；有時陣你兄我弟 chhoā tio̍h 歸陣仔 轉來，也beh lim，也beh食，無物配 ê時， 雞母雞仔 thâi到beh無種去。所種ê bái 甘蔗 未 kheh，就tuì 會社先借錢去用。 某囝有磨無食，破病無藥， tin-tāng tio̍h beh破beh ji̍h！

有一日， 這個 姓郭 ê 姐妹來揣我，講：”牧師ah！我ê艱苦tòng bē tiâu！我想beh走來去kā人煮食討活！”

我kā伊講， “Tio̍h！ 姐妹我真同情--你！你是府城人，甘願來嫁草地兄，你是女學學生，歡喜來配 青盲牛！你ê犧牲實在真濟！”

但--是人teh 請 煮食--ê是ài 請勇健-ê，也你是黃酸 lám-身命， thái有人beh 請--你？ Koh你若病傷重ê時，人內面mā m̄敢hō͘你toà！結局若死soà tio̍h做路旁屍！ Koh你三個囝有你日暝 teh照顧to m̄成囡仔，黃酸大肚桶，跛腳！你若走去，就親像無雞母 ê雞仔！ in 敢 ē活？

Taⁿ你ê艱苦已經極頭，差不多忍到”99忍” lah！ koh忍一忍就得tio̍h一個”kim-tún！”設使你若ē hō͘你ê丈夫 拍死！ tio̍h hō͘伊拍--死！若ē iau-koâⁿ 病--死！ tio̍h kap你三個囝，相kap iau-koâⁿ 病--死！你若走！ 枉費你以前ê犧牲！人beh講你是歹查某， m̄-ti̍h 翁，也m̄-ti̍h 囝！

郭姐妹應講，牧師！好！我beh 轉去！ Ē死， beh死toà內面！

過無偌久， hit-ê放蕩ê兄弟反悔！ 翁某團圓！家庭發達！

[後題: “囡仔救大人。”]